Dagiti Kararag iti Biblia Maikarida nga Usigen a Naimbag

MAYSA a madandanagan a babai, maysa nga ari, ken ti mismo nga Anak ti Dios ti nangyebkas kadagiti kararag nga usigentayo ita. Tunggal kararag ket tinignay ti nagduduma a kita ti kasasaad. Kaskasdi, mabalin nga apektarannatay dagiti kasta a kasasaad itatta. Aniat’ maadaltayo kadagitoy a pagarigan?

“Kitaem Koma ti Kinaay-ay-ay ti Adipenmo a Babai”

Makidangdangadangkay kadi iti di agsarday a parikut? Wenno maringringgorankay kadi? No kasta, mayasping ti kasasaadyo ken ni Anna sakbay nga impasngayna ti immuna nga anakna, ni Samuel. Isut’ maysa idi a lupes ken linalais ti sabali a babai. Kinaagpaysuanna, ti kasasaad ni Anna ket pudno a makapasuron ken makapaladingit unay kenkuana ta saanen a makapangan. (1 Samuel 1:2-8, 15, 16) Nagpakpakaasi ken Jehova ket inyararawna:

“O Jehova dagiti buybuyot, no kitaem koma ti kinaay-ay-ay ti adipenmo a babai, ket lagipennak koma ken dika malipatan ti adipenmo a babai, no di ket mangtedka koma iti adipenmo a babai ti anak a lalaki, siak idatonkonto ken Jehova kadagiti amin nga al-aldaw ti panagbiagna, ket dinto umuli ti pangiskis iti rabaw ti ulona.”​—1 Samuel 1:11.

Paliiwenyo ta saan a nagsao ni Anna a di masinunuo. Espesipiko ti kiddawna (maysa nga anak a lalaki) ken Jehova sana pinakuyogan daytoy iti nabatad a pangngeddeng (nga ipaayna) nga agserbi iti Dios. Aniat’ masursurotayo iti daytoy?

No adda pakarigatan, agbalinkay nga espesipiko iti kararagyo. Aniaman ti parikutyo​—ti man kasasaadyo iti pagtaengan, kinaliday, wenno parikut iti salun-at​—ikararagyo dayta ken Jehova. Dakamatenyo kenkuana ti pudpudno a kasasaad ti pakarikutanyo ken no kasanot’ panagriknayo. “Rinabii nga italekko amin a pakarikutak ken ni Jehova,” kuna ti balo nga agnagan Louise. “Naruayda no dadduma, ngem sibabatad a dakamatek a sinaggaysa.”

Mangyeg iti gunggona ti pannakisao ken Jehova a buyogen kadagiti espesipiko a sasao. Ti panangaramid iti kasta tulongannatayo a mangtarus iti parikuttayo, a mabalin nga iti dayta a kanito ket saan met gayam a narikut unay. Ti espesipiko a panagkararag bang-arannatayo. Uray pay idi sakbay a nasungbatan ti kararagna, timmalged ti rikna ni Anna, ket “ti rupana saan idin a silaladingit.” (1 Samuel 1:18) Kasta met, ti panagbalin nga eksakto pagalertuennatayo a mangilasin iti sungbat ti kararagtayo. “No yebkasko dagiti kararagko kadagiti apag-isu a sasao,” kuna ni Bernhard, maysa a Kristiano idiay Alemania, “nabatbatad dagiti sungbat.”

“Maysaak nga Ubing Laeng”

Nupay kasta, mabalin a maringgoran ti maysa a tao no makaawat iti annongen a mariknana a dina pakaikarian. Marimbawankayo kadi no dadduma gapu iti responsabilidad nga intalek kadakayo ni Jehova? Wenno matmatmatan kadi dagiti dadduma a tattao a saankay a maikari iti nakaitudinganyo? Kastat’ kasasaad ni ubing a Solomon idi napulotan kas ari ti Israel. Tarigagayan dagiti prominente a lallaki a sabali koma ti agtugaw iti trono. (1 Ar-ari 1:5-7, 41-46; 2:13-22) Idi rugrugi ti panagturayna, kiniddaw ni Solomon iti kararagna:

“Jehova a Diosko, sika inaramidmo ti adipenmo nga ari . . . Maysaak nga ubing laeng. Diak ammo no kasano ti iruruar wenno iseserrek. . . . Ikkam ngarud ti adipenmo iti maysa a mannakaawat a puso nga agukom iti ilim, tapno mabalinko nga ilasin ti naimbag ken ti dakes.”​—1 Ar-ari 3:7-9.

Impamaysa ni Solomon ti kararagna iti relasionna ken Jehova, iti pribilehio a naited kenkuana, ken iti abilidadna a mangibaklay iti nakaitudinganna. Iti umas-asping a pamay-an, no maipaayantayo iti rebbengen a mariknatayo a saantay a kabaelan, rumbeng nga agkiddawtay iti Dios tapno tulongannatayo a mangaramid iti trabaho. Usigenyo dagiti sumaganad a kapadasan:

“Idi nakiddaw a mangaywan iti dakdakkel a responsabilidad iti sanga nga opisina ti Watch Tower Society,” inlawlawag ni Eugene, “mariknak ti naan-anay a di pannakaikari. Addada sabsabali nga ad-adda a maikari ken addaan iti ad-adu a kapadasan. Saanak unay a nakaturog kadagiti simmaganad a dua a rabii, a binusbosko ti kaaduan a panawenko iti panagkararag, a nangipaay kaniak iti pigsa ken ti nasken a pammatalged.”

Nakiddaw ken ni Roy a mangipaay iti palawag para iti pumpon ti maysa a nalatak a barito a gayyem a di napakpakadaan ken nakas-ang ti ipapatayna. Sigurado a ginasut ti tumabuno. Aniat’ inaramid ni Roy? “Idi laeng a nagkararagak iti kasta unay maipaay iti bileg ken abilidad a mangsarak kadagiti maitutop a sasao, tapno makayebkasak kadagiti makapabileg a kapanunotan ken makaipaayak iti liwliwa.”

Bayat a ‘pappapartaken [ti Namarsua] dagiti bambanag’ ken bayat a dumakdakkel ti organisasionna, gagangay nga agbanag daytoy iti pannakaitalek ti responsabilidad iti ad-adu pay nga ad-adipenna. (Isaias 60:22) No makiddaw kadakayo a maaddaan iti kanayonan a paset, manginanamakayo a punnuan ni Jehova ti aniaman a kinakurang iti kapadasan, pannakasanay, wenno abilidadyo. Umadanikayo iti Dios kas iti inaramid ni Solomon, ket tulongannakayto a mangtaming iti annongen.

“Tapno Maymaysada Koma Amin”

Ti maikatlo a kasasaad a tumaud itatta ket no makalikaguman a mangibagi iti maysa a grupo iti kararag. No makiddaw nga agkararag a maipaay kadagiti sabsabali, aniat’ rumbeng nga ikararagtayo? Usigenyo ti kararag ni Jesus a nailanad iti Juan kapitulo 17. Inyebkasna daytoy a kararag idi kaduana dagiti adipenna iti naudi a rabiina kas maysa a tao. Ania dagiti kiniddawna iti nailangitan nga Amana?

Impaganetget ni Jesus ti maymaysa a kalat ken namnama dagidiay adda idi sadiay. Dinakamatna ti pannakaipadayag ti nagan ni Jehova a Dios ken ti pannakaiwaragawag ti Pagarian. Impaganetget ni Jesus ti kinapateg ti personal a pannakirelasion iti Ama ken iti Anak, a naibatay iti pannakaammo kadagiti Kasuratan. Dinakamatna ti pannakaisina iti lubong, a mangisagana kadagiti pasurotna maipaay iti pannakaidadanes. Kiniddaw met ni Kristo iti Amana a salaknibanna dagiti adalanna ken pagkaykaysaenna ida iti pudno a panagdayaw.

Wen, impaganetget ni Jesus ti panagkaykaysa. (Juan 17:20, 21) Iti nasapsapa a paset dayta a rabii, naaddaan dagiti adalan iti inuubingan a panagsusupiat. (Lucas 22:24-47) Nupay kasta, iti kararag, saan a nangbabalaw ni Jesus no di ket namagkaykaysa. Iti isu met laeng a pamay-an, dagiti kararag iti pamilia ken iti kongregasion rumbeng a mangitandudo iti ayat ken tumulong a mangparmek kadagiti di pagkikinnaawatan iti maysa ken maysa. Dagidiay maikarkararagan rumbeng a mapagkaykaysada.​—Salmo 133:1-3.

Maiparangarang daytoy a panagkaykaysa no kunaen dagidiay agdengdengngeg, “Amen,” wenno “Sapay koma,” iti pagnguduanna. Tapno posible daytoy, kasapulan a maawatan ken umanamongda iti amin a naikuna. Gapuna, saan a maikanatad a dakamaten iti kararag ti maysa a banag a saan nga ammo dagiti dadduma nga adda sadiay. Kas pagarigan, mabalin a kiddawen ti maysa a panglakayen a mangibagi iti kongregasion iti kararag ti pammendision ni Jehova iti maysa a naespirituan a kabsat a lalaki wenno babai a masaksakit unay. Ngem gagangay a nasaysayaat koma no aramidenna laeng dayta no ti kaaduan kadagiti ibagbagianna [iti kararag] ket am-ammoda ti tao ken naammuandan ti maipapan iti sakit.

Imutektekanyo met ta saan a sinaggaysa ni Jesus dagiti personal a kasapulan ti tunggal miembro iti grupo. Ti panangaramid iti dayta ramanenna ti panangdakamat kadagiti personal a bambanag a manmano laeng ti makaammo. Dagiti personal a pakaseknan ket mayanatup a dakamaten kadagiti pribado a kararag, a mabalin a maaramid kas iti kayatyo a kaatiddog ken kinasinged.

Kasanot’ rumbeng a panagsagana ti maysa no mangibagi iti kararag iti maysa a dakkel a taripnong dagiti managdaydayaw? Ilawlawag ti maysa nga aduan-kapadasan a Kristiano: “Usigek a nasaksakbay no aniada dagiti pagyamanan, no ania dagiti mabalin a kiddawen dagiti kakabsat, ken no ania dagiti personal a kiddaw a mabalinko a dakamaten. Panunotek ti umiso a panagsasaruno dagiti bambanag, a pakairamanan dagiti ebkas a pagdayaw. Sakbay ti panangyebkasko iti publiko a kararag, agkararagak a siuulimek, nga agkidkiddaw iti tulong tapno maibagik dagiti kakabsat iti nadayaw a pamay-an.”

Aniaman dagiti kasasaadyo, mabalin a makasarakkayo iti maysa a kararag iti Biblia a nayebkas iti kasasaad nga umasping iti kasasaadyo. Ti adu a kita dagiti kararag iti Kasuratan ket pammaneknek iti naayat a kinamanangaasi ti Dios. Ti panangbasa ken panangmennamenna kadagitoy a kararag tulongannakayo a mangpasayaat kadagiti kararagyo.

[Kahon iti panid 5]

DAGITI NALATAK A KARARAG ITI BIBLIA

Nagkararag dagiti adipen ni Jehova iti sidong ti nakaad-adu a kasasaad. Ap-apektarannakayo kadi ti maysa wenno sumagmamano kadagiti sumaganad a kasasaad?

Kasapulanyo kadi ti panangidalan ti Dios, kas ken Eliezer?​—Genesis 24:12-14.

Agpegpeggadkay kadi, kas ken Jacob?​—Genesis 32:9-12.

Kayatyo kadi a maam-ammo a nasaysayaat ti Dios, kas ken Moises?​—Exodo 33:12-17.

Naipasangokay kadi kadagiti kabusor, kas ken Elias?​—1 Ar-ari 18:36, 37.

Marigatankay kadi a mangasaba, kas ken Jeremias?​—Jeremias 20:7-12.

Kasapulanyo kadi ti agipudno kadagiti basol ken dumawat iti pammakawan, kas ken Daniel?​—Daniel 9:3-19.

Maidaddadaneskay kadi, kas kadagiti adalan ni Jesus?​—Aramid 4:24-31.

Kitaenyo met ti Mateo 6:9-13; Juan 17:1-26; Filipos 4:6, 7; Santiago 5:16.

[Kahon iti panid 6]

ANIAT’ IKARARAG NO MAKIDANGDANGADANG ITI NAIGAMER NGA UGALI

Makidangdangadangkayo kadi iti maulit-ulit a pagkapuyan? Kasano a makagunggona dagiti kararag a nailanad iti Biblia? Makasursurotay ken David, a nagkararag iti namin-adu maipapan kadagiti bukodna a pagkapuyan.

Inkanta ni David: “Usigennak, O Dios, ket ammuem toy pusok. Sukimatennak, ket ammuem dagiti makariribuk a pampanunotko.” (Salmo 139:23) Tinarigagayan ni David a sukimaten ni Jehova a Dios dagiti di umiso a tarigagay, rikrikna, wenno motibo. Iti sabali a pannao, kiniddaw ni David ti tulong ni Jehova iti panangliklik iti basol.

Ngem narimbawan ni David kadagiti pagkapuyanna, ket nagbasol iti nadagsen. Manen, nakatulong kenkuana ti kararag​—iti daytoy a gundaway tapno maisubli ti relasionna iti Dios. Sigun iti Salmo 51:2, inyararaw ni David: “Bugguannak iti amin a kinadakesko, ket ugasannak iti basolko.”

Sipapakumbaba a makapagkararagtay met maipaay iti tulong ni Jehova tapno matengngeltay dagiti di umiso a pagannayasan. Daytoy ti mangpapigsa kadatayo a makidangadang iti naigamer a pagkapuyan ken matulongannatay a mangliklik iti basol. No maulit ti basol, rumbeng nga umadanitay manen ken Jehova buyogen iti panagar-araraw a tulongannatayo nga agtultuloy a makidangadang.

[Dagiti Ladawan iti panid 7]

Dagiti kararag a maipaay iti maysa a grupo rumbeng nga ipaganetgetda dagiti Nainkasuratan a namnama ken naespirituan a kalat ti isuamin