“Napuersa ken Makaguyugoy”

“MANGRUGI no bigat, usarek daytoy iti panangasaba, ta naglaon daytoy kadagiti argumento a talaga a napuersa ken makaguyugoy,” insurat ti maysa a Saksi ni Jehova a taga Francia. Insurat ti maysa a Saksi a taga Estados Unidos: “Binasak a dagus ket magagaranak a mangusar iti dayta iti tay-ak ti ministerio, ta nakaad-adu ti makasarsaritami a tattao a mangyaleng-aleng ken di agtalek iti Biblia.” Ania ti tuktukoyenda? Ti 32-pinanid a broshur a napauluan Libro Para iti Amin a Tao, nga inruar ti Watch Tower Society iti “Pammati iti Sao ti Dios” a Kombension Distrito a naangay iti 1997/98.

Naisagana daytoy a publikasion nga agpaay a nangnangruna kadagiti edukado ngem nalabit nagbassit ti ammoda iti Biblia. Adu kadagitoy nga indibidual ti addaan masnup a kapanunotan maipapan iti Biblia, nupay pulos a dida nabasa dayta. Panggep daytoy a broshur nga allukoyen dagiti agbasa a ti Biblia maikari nga usigen uray kaskasano. Daytoy a broshur dina piliten ti agbasa a mamati a ti Biblia ket impaltiing ti Dios. Imbes ketdi, bay-anna a dagiti kinapudno ti agsao a mismo. Dagiti sasao a naaramat ket saan a naranga no di ket nalawag ken direkta iti punto.

Kas ipakita ti komento a naadaw iti ngato, sigagagar dagiti timmabuno kadagiti kombension a mangusar iti daytoy a broshur iti tay-ak ti ministerioda. Kas pagarigan idiay Francia, nayurnos ti maysa a naisangsangayan a kampania a panangasaba iti Agosto 23 ken 24, idi nagtataripnong idiay Paris dagiti ginasut a ribu nga agtutubo a bisita a naggapu iti nagduduma a paset ti lubong para iti World Youth Day. Agarup 2,500 a Saksi (kaaduan ti agedad iti 16 agingga iti 30) ti nakaipaima iti 18,000 a kopia ti broshur iti Ingles, Pranses, Aleman, Italiano, Polaco, ken Español.

Iti amin a pamay-an, usarentayo daytoy broshur a Libro Para iti Amin a Tao iti ministeriotayo. Sapay koma ta makagunggona daytoy a pangguyugoy kadagiti nainkalintegan a tattao a rebbeng nga usigenda a mismo ti Biblia.