Magurgura nga Awan Gapgapuna

“Ginuradak nga awan gapgapuna.”​—JUAN 15:25.

1, 2. (a) Apay a masdaaw ti dadduma no adda agsao maibusor kadagiti Kristiano, ngem apay a saantay a pakasdaawan ti kasta a sasao? (b) Ania nga anag ti sao a “gura” ti usigentayo iti daytoy nga artikulo? (Kitaenyo ti footnote.)

IKAGKAGUMAAN dagiti Saksi ni Jehova ti agbiag maitunos kadagiti prinsipio a masarakan iti Sao ti Dios. Kas resultana, nasayaat ti reputasionda iti adu a pagilian. Ngem no dadduma, mapadpadakesda. Kas pagarigan, malagip ti maysa nga opisial ti gobierno idiay siudad ti St. Petersburg, Russia: “Napagparang a dagiti Saksi ni Jehova ket maysa a nalimed a sekta a mangpappapatay kadagiti ubbing ken iti mismo a bagida.” Ngem kalpasan a nakipagtrabaho kadagiti Saksi ni Jehova mainaig iti maysa nga internasional a kombension, napaliiw ti isu met laeng nga opisial: “Ti nakitak ket normal, naisem a tattao . . . Naurnos ken natalnada, ken nasged ti ayatda iti maysa ken maysa.” Innayonna: “Diak maawatan no apay a padpadaksen ida dagiti tattao.”​—1 Pedro 3:16.

² Saan a pagragsakan dagiti adipen ti Dios ti mapagparang a managdakdakes, ngem kaskasdi a dida pakasdaawan no agsao dagiti tattao iti maibusor kadakuada. Pinakdaaran ni Jesus dagiti pasurotna: “No guraennakayo ti lubong, ammoyo a ginuranak dayta sakbay a ginuranakayo. . . . Dayta ket tapno matungpal koma ti sao a naisurat iti Lintegda, ‘Ginuradak nga awan gapgapuna.’”a (Juan 15:18-20, 25; Salmo 35:19; 69:4) Sakbayna, kinunana idi kadagiti adalanna: “No dagiti tattao inawaganda ti bumalay iti Beelzebub, anian nga ad-adda pay nga awagandanto iti kasta dagiti kameng ti sangakabbalayanna?” (Mateo 10:25) Ammo dagiti Kristiano a ti panangibtur iti kasta a panangumsi ket paset ti ‘kayo a pagtutuokan’ nga inawatda idi nagbalinda a pasurot ni Kristo.​—Mateo 16:24.

3. Kasano kasaknap ti pannakaidadanes dagiti pudno nga agdaydayaw?

³ Nabayagen a maidaddadanes dagiti pudno nga agdaydayaw, sipud idi panawen ni “nalinteg nga Abel.” (Mateo 23:34, 35) Saan laeng a manmano ti nakapasar iti dayta. Kinuna ni Jesus a dagiti pasurotna ket agbalin a ‘puntiria ti pananggura dagiti amin a tattao’ maigapu iti naganna. (Mateo 10:22) Maysa pay, insurat ni apostol Pablo a saantayo koma a pakasdaawan no sumangbay ti pannakaidadanes kadagiti amin nga adipen ti Dios​—agraman iti tunggal maysa kadatayo. (2 Timoteo 3:12) Maigapu iti ania?

Ti Mangisungsungsong iti Awan Gapgapuna a Pananggura

4. Kasano nga impalgak ti Biblia no siasino ti mangisungsungsong iti amin nga awan gapgapuna a panangbusor?

⁴ Ipalgak ti Sao ti Dios a sipud idi punganay, adda maysa a di makita a sungsong. Panunotenyo ti brutal a pannakapapatay ti umuna a manamati, ni Abel. Kuna ti Biblia a ti mammapatay a kabsatna a ni Cain ket “nagtaud iti daydiay nadangkes,” ni Satanas a Diablo. (1 Juan 3:12) Sinurot ni Cain ti pagayatan ni Satanas, gapuna isu ket inusar ti Diablo a nangibanag kadagiti dakes a panggepna. Imbatad met ti Biblia no ania ti paset ni Satanas iti naulpit a panangdangran kada Job ken Jesu-Kristo. (Job 1:12; 2:6, 7; Juan 8:37, 44; 13:27) Nalawag a tinukoy ti libro nga Apocalipsis no siasino ti mangisungsungsong iti pannakaidadanes dagiti pasurot ni Jesus, a kunkunana: “Ti Diablo agtultuloyto a mangipisok iti sumagmamano kadakayo iti pagbaludan tapno naan-anay a masubokkayo.” (Apocalipsis 2:10) Wen, ni Satanas ti mangisungsungsong iti amin nga awan gapgapuna a pananggura kadagiti adipen ti Dios.

5. Apay a kagura ni Satanas dagiti pudno nga agdaydayaw?

⁵ Apay a kagura ni Satanas dagiti pudno nga agdaydayaw? Iti maysa a pasamak a mangipakita iti nakaro a kinapalangguad, kinarit ni Satanas ‘ti Ari ti kinaagnanayon,’ ni Jehova a Dios. (1 Timoteo 1:17; 3:6) Pinagparangna a di nainkalintegan ti kinaestrikto ti Dios kadagiti parsuana ken awan ti agserserbi ken ni Jehova nga addaan iti umiso a motibo, nga agserserbi laeng dagiti tattao gapu iti managimbubukodan nga interes. Kuna ni Satanas a no mapalubosan la koma a mangsubok kadagiti tattao, mapagtallikudna ti amin nga agserserbi iti Dios. (Genesis 3:1-6; Job 1:6-12; 2:1-7) Gapu iti panangpadakesna ken ni Jehova kas maysa a manangirurumen, managulbod, ken napaay a Dios, pagparparangen ni Satanas nga adda met kalinteganna a mangituray iti uniberso. No kasta, ti pungtotna kadagiti adipen ti Dios ket maigapu iti tarigagayna a maidaydayaw.​—Mateo 4:8, 9.

6. (a) Kasano a personal a nairamantayo iti isyu mainaig iti kinasoberano ni Jehova? (b) Kasano a ti pannakaawat iti dayta nga isyu tulongannatayo a mangtaginayon iti kinasungdotayo? (Kitaenyo ti kahon, panid 16.)

⁶ Makitam kadi no kasano a dayta nga isyu apektaranna ti biagmo? Kas adipen ni Jehova, mabalin a nabigbigmo a nupay kasapulan ti panagregget tapno maaramid ti pagayatan ti Dios, aglaplapusanan dagiti bendision nga iyegna. Ngem komusta ngay no ti kasasaadmo iti biag pagbalinenna a narigat, mamagsagaba pay ketdi, ti agtultuloy a panagtulnog kadagiti linteg ken pagalagadan ni Jehova? Ken kasanon no kasla awan magunggonam iti panangaramidmo iti dayta? Ipapanmo kadi a sayang laeng no agtultuloyka nga agserbi ken ni Jehova? Wenno ti panagayatmo ken ni Jehova ken ti dakkel a panangapresiarmo kadagiti agkakaimbag a galadna tignayennaka nga agtultuloy a magna iti amin a danana? (Deuteronomio 10:12, 13) Iti panangipalubosna ken ni Satanas a mangyeg iti sumagmamano a rigat, impaayannatayo ni Jehova iti gundaway a mangipakita no ania ti sungbattayo iti karit ni Satanas.​—Proverbio 27:11.

“Inton Umsiendakayo Dagiti Tattao”

7. Ania ti maysa a taktika ti Diablo a mangyadayo kadatayo ken ni Jehova?

⁷ Usigentayo ita a naimbag ti maysa kadagiti nasikap a gakat ni Satanas tapno paneknekanna ti karitna​—ti panangusarna iti kinaulbod. Ni Jesus inawaganna ni Satanas kas “ti ama ti kinaulbod.” (Juan 8:44) Ti nagan a Diablo, a kaipapananna “Mammardaya,” tuktukoyenna daydiay kangrunaan a mangparpardaya iti Dios, iti saona, ken iti nasantuan a naganna. Us-usaren ti Diablo dagiti paripirip, ulbod a pammabasol, ken naan-anay a kinaulbod iti panangkaritna iti kinasoberano ni Jehova, ket dagita met laeng a taktika ti us-usarenna a mangdangran kadagiti nasungdo nga adipen ti Dios. Babaen ti agsasaruno a panangibabainna kadagitoy a Saksi, mapagbalinna a narigrigat nga ibturan ti maysa a nakaro a suot.

8. Kasano a nangyeg ni Satanas iti panangumsi ken ni Job, ket ania ti epektona?

⁸ Usigenyo ti napasamak ken ni Job, a ti naganna kaipapananna “Puntiria ti Gura.” Malaksid iti panangpukawna iti kinabaknang, annak, ken salun-at ni Job, pinagparang ni Satanas a managbasol ni Job isu a dusdusaen ti Dios. Nupay dati a mararaem, nagbalin a maum-umsi ni Job, uray pay kadagiti kabagian ken nasinged a gagayyemna. (Job 19:13-19; 29:1, 2, 7-11) Maysa pay, babaen kadagiti sinsinan a manangliwliwa, inkagumaan ni Satanas nga ‘idagel ni Job babaen ti sasao.’ Umuna, imparipiripda nga adda nadagsen a basol ni Job sada direkta a kinondenar kas managbasol. (Job 4:6-9; 19:2; 22:5-10) Makaupay la ketdi dayta ken ni Job!

9. Kasano a napagparang a managbasol ni Jesus?

⁹ Kas kangrunaan a mangitantandudo iti kinasoberano ni Jehova, ti Anak ti Dios ti nagbalin a kangrunaan a puntiria ti gura ni Satanas. Idi immay ni Jesus ditoy daga, inkagumaan ni Satanas a dadaelen ti espiritualidadna, kas inaramidna idi ken ni Job a pinagparangna a managbasol ni Jesus. (Isaias 53:2-4; Juan 9:24) Dagiti tattao inawaganda ni Jesus a mammartek ken nabuklis ken ‘addaan iti sairo.’ (Mateo 11:18, 19; Juan 7:20; 8:48; 10:20) Siuulbod nga inakusarda iti panagtabbaaw. (Mateo 9:2, 3; 26:63-66; Juan 10:33-36) Naladingitan ni Jesus yantangay ammona a nangyeg dayta iti saan a maiparbeng a pannakaumsi iti Amana. (Lucas 22:41-44) Kamaudiananna, nailansa ni Jesus kas maysa a nailunod a kriminal. (Mateo 27:38-44) Gapu iti panangtaginayonna iti naan-anay a kinatarnawna, inibturan ni Jesus ti adu a ‘mangbusor a sasao dagiti managbasol.’​—Hebreo 12:2, 3.

10. Kasano a dagiti napulotan a natda nagbalinda a puntiria ni Satanas iti moderno a panawen?

¹⁰ Iti moderno a panawen, dagiti natda kadagiti napulotan a pasurot ni Kristo nagbalinda met a puntiria ti gura ti Diablo. Nailadawan ni Satanas kas “manangakusar kadagiti kakabsat [ni Kristo] . . . , daydiay mangak-akusar kadakuada iti aldaw ken rabii iti sanguanan ti Diostayo.” (Apocalipsis 12:9, 10) Sipud idi napaksiat idiay langit ken naitapuak iti aglikmut ti daga, ad-adda a nagporsegi ni Satanas a pagparangen a makarimon ken nailaksid a tattao dagiti kakabsat ni Kristo. (1 Corinto 4:13) Iti dadduma a pagilian, napardayada kas napeggad a sekta, no kasano a napabasol met iti kasta dagiti Kristiano idi umuna a siglo. (Aramid 24:5, 14; 28:22) Kas nadakamat iti rugrugi, napadakesda babaen ti ulbod a propaganda. Ngem iti laksid ‘ti dayag ken pannakaibabain, iti dakes a damag ken nasayaat a damag,’ dagiti napulotan a kakabsat ni Kristo, a supsuportaran ti kakaduada a “sabsabali a karnero,” sipapakumbaba nga ikagkagumaanda a ‘tungpalen dagiti bilin ti Dios ken aramiden ti trabaho a panangsaksi ken Jesus.’​—2 Corinto 6:8; Juan 10:16; Apocalipsis 12:17.

11, 12. (a) Ania ti mabalin a pakaigapuan ti pannakaumsi ti dadduma a Kristiano? (b) Kadagiti ania a pamay-an a mabalin a di nainkalintegan nga agsagaba ti maysa a Kristiano maigapu iti pammatina?

¹¹ Siempre, saan nga amin a pannakaumsi a mapasaran dagiti indibidual nga adipen ti Dios ket “maigapu iti kinalinteg.” (Mateo 5:10) Dadduma a parikut ket mabalin a resulta ti bukodtayo a kinaimperpekto. Saantayo a pakaidayawan no ‘ibturantayo ti pannakatungpa ket agbasbasoltayo.’ Ngem no ti maysa a Kristiano “gapu iti konsiensia maipuon iti Dios, agibtur iti sidong ti makapaladingit a bambanag ken di nainkalintegan nga agsagaba, makaay-ayo a banag daytoy” iti imatang ni Jehova. (1 Pedro 2:19, 20) Iti sidong dagiti ania a kasasaad a mabalin a mapasamak daytoy?

¹² Dadduma ti natrato a sigugubsang gapu iti panagkedkedda a makiraman kadagiti di nainkasuratan a kaugalian iti pumpon. (Deuteronomio 14:1) Dagiti Saksi nga agtutubo ti nagbalin a puntiria ti awan sardayna a berbal a panangabuso gapu iti panangsalimetmetda kadagiti moral a pagalagadan ni Jehova. (1 Pedro 4:4) Dadduma a Kristiano a nagannak ti siuulbod a naawagan kas “managbaybay-a” wenno “managabuso” gapu ta dida kayat nga adda dara a mausar iti pannakaopera dagiti annakda. (Aramid 15:29) Dagiti Kristiano ket kinagura dagiti kabagian ken kaarrubada gapu laeng iti panagserbida ken ni Jehova. (Mateo 10:34-37) Awan nakaidumaan ti napasaranda iti di nainkalintegan a panagsagaba dagiti propeta ken ni Jesus a mismo.​—Mateo 5:11, 12; Santiago 5:10; 1 Pedro 2:21.

Panagibtur iti Sidong ti Pannakaumsi

13. Ania ti makatulong kadatayo a mangtaginayon iti naespirituan a kinatimbeng no maipasangotayo iti nakaro a pannakaumsi?

¹³ No mapasarantayo ti nakaro a pannakaumsi gapu iti pammatitayo, mabalin a maupaytayo, kas iti napasamak ken ni propeta Jeremias, ket kasla ditay kabaelanen ti agtultuloy nga agserbi iti Dios. (Jeremias 20:7-9) Ania ti makatulong kadatayo a mangsalimetmet iti naespirituan a kinatimbeng? Ikagumaantayo a matmatan ti bambanag sigun iti panangmatmat ni Jehova. Matmatanna a nagballigi dagidiay makapagtalinaed a nasungdo iti sidong ti pannubok, saan ket a kas biktima. (Roma 8:37) Panunotenyo dagidiay nangitandudo iti kinasoberano ni Jehova iti laksid ti tunggal pananginsulto kadakuada ti Diablo​—kas kada Abel, Job, ni Maria nga ina ni Jesus, ken dadduma pay a matalek idi ugma, agraman dagiti padatayo nga adipen iti moderno a panawen. (Hebreo 11:35-37; 12:1) Mennamennaenyo ti kinasungdoda. Dayta a dakkel nga ulep dagiti nasungdo a tattao aw-awisendatayo a makipagballigi kadakuada iti panangparmek iti lubong babaen ti pammati.​—1 Juan 5:4.

14. Kasano a ti napasnek a kararag pabilgennatayo nga agtalinaed a matalek?

¹⁴ No ti ‘mangriribuk a pampanunottayo umaduda iti unegtayo,’ mabalintay ti sipapasnek nga agkararag ken ni Jehova, ket liwliwaen ken pabilgennatayo. (Salmo 50:15; 94:19) Itedna kadatayo ti sirib a kasapulantayo tapno madaeran ti suot ken agbalintayo a silalagip iti naindaklan nga isyu mainaig iti kinasoberanona a pakaigapuan ti di nainkalintegan a pananggura kadagiti adipenna. (Santiago 1:5) Maipaayna met kadatayo “ti talna ti Dios a mangringbaw iti isuamin a panunot.” (Filipos 4:6, 7) Daytoy nga inted-Dios a kinatalinaay tulongannatayo nga agtalinaed a kalmado ken determinado iti sidong ti nakaro a pakarigatan a di agpaabak iti panagduadua wenno buteng. Babaen ti espirituna, saranayennatayo ni Jehova iti aniaman a pasamak nga ipalubosna a sumangbay kadatayo.​—1 Corinto 10:13.

15. Ania ti makatulong kadatayo tapno saan nga agsakit ti nakemtayo no agsagabatayo?

¹⁵ Ania ti makatulong kadatayo tapno saan nga agsakit ti nakemtayo kadagidiay awan gapgapuna a manggura kadatayo? Laglagipentayo a ni Satanas ken dagiti demoniona ti kangrunaan a kabusortayo. (Efeso 6:12) Nupay sipapakinakem ken inggagara ti panangidadanes kadatayo dagiti dadduma, adu kadagidiay bumusbusor kadagiti adipen ti Dios ti mangar-aramid iti dayta gapu iti kinaignorante wenno panangisungsong dagiti dadduma. (Daniel 6:4-16; 1 Timoteo 1:12, 13) Tarigagayan ni Jehova nga “amin a kita ti tattao” maaddaanda iti gundaway a ‘dumteng iti umiso a pannakaammo iti kinapudno.’ (1 Timoteo 2:4) Kinapudnona, dadduma a dati a bumusbusor ti nagbalinen a kakabsattayo iti pammati gapu iti napaliiwda a nasayaat a konduktatayo. (1 Pedro 2:12) Kanayonanna, makasursurotayo iti ulidan ni Jose nga anak ni Jacob. Nupay nakaro ti sinagaba ni Jose gapu kadagiti kakabsatna iti ama, saan a nagsakit ti nakemna kadakuada. Apay? Gapu ta bigbigenna nga ammo ni Jehova ti mapaspasamak, nga imanmaniobra ti Dios dagiti bambanag tapno matungpal ti panggepna. (Genesis 45:4-8) Umasping iti dayta, mabalin nga aramiden ni Jehova a pakaidayawan ti naganna ti aniaman a di nainkalintegan a panagsagaba a mapasarantayo.​—1 Pedro 4:16.

16, 17. Apay a ditay koma madukotan kadagiti panagregget dagiti bumusbusor a manglapped iti trabaho a panangasaba?

¹⁶ Ditay koma madukotan unay no agparang a naballigi dagiti bumusbusor iti pananglappedda iti pannakaisaknap ti naimbag a damag. Yugyugayogen itan ni Jehova dagiti nasion babaen ti sangalubongan a panangasaba, ket sumsumrek dagiti matarigagayan a bambanag. (Haggeo 2:7) Kinuna ni Jesus, ti Nasayaat a Pastor: “Imdengan dagiti karnerok ti timekko, ket am-ammok ida, ket surotendak. Ket ipaayak ida iti agnanayon a biag, . . . ket awan makarabsut kadakuada manipud iti imak.” (Juan 10:27-29) Adda met paset dagiti nasantuan nga anghel iti naindaklan a naespirituan a panagani. (Mateo 13:39, 41; Apocalipsis 14:6, 7) No kasta, awan ti aniaman a sawen wenno aramiden dagiti kabusor a mabalin a mangkeltay iti panggep ti Dios.​—Isaias 54:17; Aramid 5:38, 39.

¹⁷ Masansan a ti ibubusorda ker agresulta iti kasungani ti kayatda a mapasamak. Iti maysa a komunidad idiay Africa, adu a nakaro a pammadakes ti naisaknap maipapan kadagiti Saksi ni Jehova, agraman ti akusasion nga agdaydayawda iti Diablo. Gapu iti dayta, kada umay agbisita dagiti Saksi, aglemmeng ni Grace iti likudan ti balayda agingga a makapanaw dagiti Saksi. Maysa nga aldaw, ti pastor ti simbaan da Grace impakitana ti maysa a publikasiontayo ket kinuna kadagiti amin nga agdengdengngeg a dida basbasaen dayta gapu ta dayta ti mangisungsong kadakuada a mangtallikud iti pammatida. Dayta ti nangriing iti interes ni Grace. Idi naminsan a bimmisita dagiti Saksi, imbes nga aglemmeng, nakisarita kadakuada ni Grace ken nangala iti maysa a publikasion. Narugian a mayadalan iti Biblia, ket nabautisaran idi 1996. Busbusbosen ita ni Grace ti panawenna a mangbirok kadagidiay di umiso ti pannakaammoda maipapan kadagiti Saksi ni Jehova.

Pabilgenyo ti Pammatiyo Ita

18. Apay a nasken a pabilgentayo ti pammatitayo sakbay a dumteng dagiti nakaro a pakasuotan, ken kasanotay a maaramidan dayta?

¹⁸ Gapu ta mabalin a mangiwayat ni Satanas iti awan gapgapuna a pananggura iti aniaman a kanito, napateg a pabilgentayo ti pammatitayo ita. Kasanotay a maaramid dayta? Kuna ti report manipud iti maysa a pagilian a maidaddadanes dagiti adipen ni Jehova sadiay: “Daytoy ti nabatad: Dagidiay addaan kadagiti nasayaat a naespirituan nga ugali ken nauneg nga apresasion iti kinapudno iti Biblia dida marigatan a mangsalimetmet iti kinasungdoda no sumangbay dagiti pannubok. Ngem dagidiay managlangan kadagiti gimong uray kadagiti ‘nanam-ay a panawen,’ iregular iti panangasaba, ken mangikompromiso uray kadagiti babassit nga isyu masansan a sumukoda iti sidong ti ‘nakaro’ a pannubok.” (2 Timoteo 4:2) No makitayo nga adda dagiti rumbeng a balbaliwanyo, sigaganat a pagreggetanyo koma nga aramiden dayta.​—Salmo 119:60.

19. Ania ti resulta ti kinatarnaw dagiti adipen ti Dios iti laksid ti awan gapgapuna a pananggura?

¹⁹ Ti kinatarnaw dagiti pudno nga agdaydayaw iti laksid ti pammarigat ti sataniko a pananggura ket sibibiag a pammaneknek iti kinaumiso, kinanainkalintegan, ken kinalinteg ti kinasoberano ni Jehova. Maragsakan ni Jehova gapu iti kinamatalekda. Nupay adu a daras nga umsien ida dagiti tattao, daydiay a ti dignidadna ket nangatngato ngem iti daga ken langit ‘dina ibain ida, nga isu awaganda kas Diosda.’ Kinapudnona, no maipapan iti amin a nasungdo, mayanatup a maikuna kadakuada: ‘Ti lubong saan a maikari kadakuada.’​—Hebreo 11:16, 38.

[Footnote]

Mailawlawagyo Kadi?

• Ania ti pakaigapuan ti awan gapgapuna a pananggura kadagiti pudno nga agdaydayaw?

• Kasano nga inusar ni Satanas ti panangumsi kas paset ti panagreggetna a mangdadael iti kinatarnaw da Job ken Jesus?

• Kasanonatay a pabilgen ni Jehova tapno makapagtalinaedtayo a natibker iti laksid ti sataniko a pananggura?

[Kahon/Ladawan iti panid 16]

Ammoda ti Pudno nga Isyu

Kinuna ti maysa kadagiti Saksi ni Jehova idiay Ukraine, a sadiay nasurok a 50 a tawen a naiparit ti panangasaba iti Pagarian: “Saan koma a mamatmatan dagiti Saksi ni Jehova sigun iti panangtrato kadakuada dagiti sabsabali. . . . Ar-aramiden laeng ti kaaduan nga opisial ti rebbengenda. No agbaliw ti gobierno, agbaliw met ti pangisaadan dagiti opisial iti kinasungdoda. Ngem no kadatayo, ditay agbalbaliw. Ammotayo a naipalgak iti Biblia ti pudno a ramut dagiti parikuttayo.

“Saanmi a minatmatan dagiti bagimi a basta inosente a biktima dagiti manangirurumen a tattao. Nakatulong kadakami a makapagibtur ti nalawag a pannakaawat iti isyu a napataud idiay minuyongan ti Eden​—ti isyu maipapan iti kalintegan ti Dios nga agturay. . . . Natibker ti takdermi no iti isyu mainaig kadagiti personal nga interes ti tattao ken kadagiti interes ti Soberano iti uniberso. Naun-uneg ti pannakaawatmi kadagiti pudpudno nga isyu a nairaman. Dayta ti nangpapigsa kadakami ken timmulong tapno mataginayonmi ti kinatarnawmi uray iti sidong dagiti karirigatan a kasasaad.”

[Ladawan]

Ni Victor Popovych, a naaresto idi 1970

[Ladawan iti panid 13]

Siasino ti adda iti likudan ti pannakaumsi ni Jesus?

[Dagiti Ladawan iti panid 15]

Ni Job, Maria, ken dagiti adipen ti Dios iti moderno a panawen, kas ken Stanley Jones, intandudoda ti kinasoberano ni Jehova