Tulong Manipud ‘iti Dios a Mangipapaay iti Panagibtur ken Liwliwa’

AGARUP 2,000 a tawen ti napalabasen, ni Pablo a mannurat iti Biblia inladawanna ni Jehova kas ‘ti Dios a mangipapaay iti panagibtur ken liwliwa.’ (Roma 15:5) Tangay patalgedan kadatayo ti Biblia a saan nga agbalbaliw ni Jehova bayat ti panaglabas ti tiempo, makapagtalektayo a ti Dios liwliwaenna dagidiay agserserbi kenkuana. (Santiago 1:17) Kinapudnona, saritaen ti Biblia a nadumaduma ti panangliwliwa ni Jehova kadagidiay agkasapulan. Ania ti dadduma kadagitoy? Pabilgen ti Dios dagidiay agkararag kenkuana maipaay iti tulong. Tignayenna met dagiti pudno a Kristiano a mangliwliwa kadagiti kapammatianda. Malaksid iti dayta, nangipaay ni Jehova kadagiti makaparegta a salaysay iti Saona, ti Biblia, a nangnangruna a makapabileg kadagiti agladladingit gapu iti ipapatay ti maysa nga anak. Saggaysaentayo nga usigen ti tallo kadagitoy a pamay-an ti panangliwliwa.

“Nangngeg ni Jehova a Mismo”

Nagsurat ni Ari David maipapan iti Namarsua kadatayo a ni Jehova: “Agtalekkayo kenkuana iti amin a tiempo, O tattao. Iti sanguananna iparukpokyo ti pusoyo. Ti Dios ket kamang maipaay kadatayo.” (Salmo 62:8) Apay nga addaan ni David iti kasta a panagtalek ken Jehova? Insurat ni David maipapan iti bagina: “Daytoy a naparigatan immawag, ket nangngeg ni Jehova a mismo. Ket kadagiti amin a rigatna isu insalakanna.” (Salmo 34:6) Kadagiti amin a rigat a napasaranna, kanayon a nagpatulong ni David iti Dios babaen ti kararag, ket naynay a tinulongan ni Jehova. Maibatay iti kapadasanna, ammo ni David a ti Dios ti mangsuportar ken mangtulong kenkuana nga agibtur.

Laglagipen koma dagiti agladladingit a nagannak a tulongan ida ni Jehova a mangsaranget iti nakaro a ladingit, kas iti inaramidna idi ken ni David. Mabalin nga umadanida iti naindaklan a “Managdengngeg iti kararag,” ken agtalekda a tulonganna ida. (Salmo 65:2) Kastoy ti kinuna ni William a nadakamat iti immuna nga artikulo: “Namin-adu a nariknak a saankon a maibturan ti agbiag nga awan ti anakko, ket kiniddawko ken Jehova a liwliwaennak. Kanayon a pinabileg ken pinaturednak nga agtultuloy nga agbiag.” No agkararagka met ken Jehova buyogen ti pammati, ti naindaklan a Dios iti langit tulongannaka a mangdaer iti ladingit. Inkari ngamin ni Jehova a Dios kadagiti mangikagkagumaan nga agserbi kenkuana: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”​—Isaias 41:13.

Panangsuportar Dagiti Pudno a Gagayyem

Dagidiay natayan iti anak masansan a kasapulanda ti tiempo nga agladingit a bukodda ket tingitingenda dagiti riknada. Nupay kasta, saan a nainsiriban no liklikanda ti makitimpuyog iti mabayag a panawen. Sigun iti Proverbio 18:1, “ti maysa a mangiputputong iti bagina” mabalin a madangran. Ngarud, rumbeng nga agannad dagidiay agladladingit a saanda nga iputputong ti bagbagida.

Dagiti managbuteng iti Dios a gagayyem dakkel ti maitulongda kadagiti malmaldaangan. Kastoy ti kuna ti Proverbio 17:17: “Ti pudno a kadua agayat iti isuamin a tiempo, ken ti kabsat a mayanak no adda rigat.” Ni Lucy, a nadakamat met iti immuna nga artikulo, liniwliwa dagiti pudno a kakaduana kalpasan ti ipapatay ti barona. Kinunana maipapan kadagiti gagayyemna iti kongregasion: “Adu ti naitulong ti panangbisitada, uray pay no bassit laeng ti maestoriada no dadduma. Maysa a gayyem ti bumisbisita kaniak tunggal agmaymaysaak. Ammona a mabalin nga agsangsangitak idiay balay, ket masansan a dumagas ket nakipagsangit kaniak. Inaldaw met a simmarungkar ti dadduma ket pinaregtadak. Dadduma pay ti nangawis kadakami iti balayda tapno makipangan, ket intultuloyda nga inaramid dayta.”

Nupay saan a kaskarina a malipatan dagiti nagannak ti ipapatay ti anakda, ti panagkararag iti Dios ken pannakikadua kadagiti pudno a gagayyem a Kristiano mangyeg iti pudpudno a liwliwa kadagiti agladladingit. Adu a Kristiano a nagannak a natayan iti anak nariknada nga inandingay ida ni Jehova. Wen, ni Jehova “paimbagenna dagidiay nasnaayan ti pusona, ket bedbedanna dagiti naut-ot a pasetda.”​—Salmo 147:3.

Dagiti Makaliwliwa a Salaysay ti Biblia

Malaksid iti kararag ken kadagiti makapabileg a pannakikadua, ti naisurat a Sao ti Dios makaliwliwa met kadagidiay agladladingit. Ipakita dagiti salaysay iti Biblia a napalalo ti tarigagay ken talaga a kabaelan ni Jesus nga ikkaten ti ladingit dagiti natayan a nagannak babaen ti panangpagungarna kadagiti natay. Dagita a salaysay talaga a liwliwaenda dagidiay agladladingit. Amirisentayo ti dua kadagita a salaysay.

Iladawan ti Lucas kapitulo 7 ti napasamak idi nasabet ni Jesus ti maysa a pumpon iti siudad ti Nain. Dandanin ipumpon dagiti tattao ti bugbugtong nga anak a lalaki ti maysa a balo. Kastoy ti kuna ti bersikulo 13: “Idi nakita ti Apo, simnek ti asina kenkuana, ket kinunana kenkuana: ‘Sumardengka nga agsangsangit.’”

Manmano ti makaitured a mangibaga iti maysa nga ina nga isardengna ti agsangit nangruna no pumpon dayta ti anakna. Apay ngarud a naibaga dayta ni Jesus? Agsipud ta ammona a dandanin agpatingga ti panagladingit ti ina. Kastoy ti tuloy ti salaysay: “Immasideg [ni Jesus] ket sinagidna ti idda ti natay, ket nagintek dagiti agaw-awit, ket kinunana: ‘Baro, kunak kenka, Bumangonka!’ Ket bimmangon ti natay a tao ket nangrugi nga agsao, ket intedna ken inana.” (Lucas 7:14, 15) Mabalin a nagsangit manen ti ina iti dayta a kanito, ngem maigapu daytan iti rag-o.

Iti sabali a gundaway, immadani ken Jesus ti maysa a lalaki nga agnagan iti Jairo tapno agpatulong mainaig iti masaksakit nga anakna nga agtawen iti 12. Di nagbayag kalpasanna, naipadamag kenkuana a natayen ti anakna. Kasla nagtupak ti langit ken Jairo idi nadamagna dayta, ngem imbaga ni Jesus kenkuana: “Dika agbuteng, watwatem laeng ti pammati.” Iti pagtaengan ti pamilia, inasitgan ni Jesus ti bangkay ti balasang. Idi iniggamanna ti ima ti balasang, kinunana: “Balasang, kunak kenka, bumangonka!” Ania ti napasamak? “Dagus a timmakder ti balasang ket nangrugi a nagna.” Ania ti reaksion dagiti nagannak kenkuana? “Saanda a natngelan ti riknada buyogen ti dakkel a panagsiddaaw.” Kasta unay ti ragsak da Jairo ken ni baketna bayat nga ar-arakupenda ti balasangda. Kasla agar-arapaapda laeng.​—Marcos 5:22-24, 35-43.

Dagita a detalyado a salaysay ti Biblia maipapan iti panagungar dagiti annak ipakitana no ania ti manamnama dagiti agladladingit a nagannak. Kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuarda.” (Juan 5:28, 29) Panggep ni Jehova a ti Anakna pagungarenna dagiti natay. Nagadu a natay nga annak ti ‘makangngegto iti timekna’ inton ibagana kadakuada: ‘Kunak kadakayo, Bumangonkayo!’ Magna ken agsaonto manen dagidiay nga agtutubo. Ket kas kada Jairo ken ni baketna, dagiti nagannak ‘saandanto a matngelan ti riknada buyogen ti dakkel a panagsiddaaw.’

No natayanka iti anak, laglagipem koma a kabaelan ni Jehova a sukatan ti lidaymo iti rag-o babaen ti panagungar. Tapno maaddaanka iti kastoy a nadayag a namnama, tungpalem ti balakad ti salmista: “Birokenyo ni Jehova ken ti pigsana. Sapulenyo a patinayon ti rupana. Lagipenyo ti nakaskasdaaw nga ar-aramidna nga inaramidna, dagiti milagrona.” (Salmo 105:4, 5) Wen, agserbika iti pudno a Dios, ni Jehova, ken agdayawka iti pamay-an nga anamonganna.

Ania ti dagus nga epektona no ‘birokem ni Jehova’? Bumilegka no agkararagka iti Dios. Mariknam a maliwliwaka iti naayat a pannakaseknan dagiti kakadua a pudno a Kristiano ken no agadalka iti Sao ti Dios matulonganka nga agtultuloy nga agbiag. Maysa pay, iti asidegen a masanguanan, makitamto dagiti ‘nakaskasdaaw nga aramid ken dagiti milagro’ nga aramidento ni Jehova agpaay iti agnanayon a pagimbagam ken agpaay iti natay nga anakmo.

[Kahon iti panid 5]

“Iyegyo Ditoy ti Babai a Natayan iti Dua nga Anak”

Natay iti aksidente ti lugan ti dua nga anak da Kehinde ken Bintu, agassawa a Saksi ni Jehova a taga-Nigeria. Sipud idin, nagsagabada iti nakaro a ladingit gapu iti daytoy nga ipupusay dagiti annakda. Nupay kasta, mapabpabilegda gapu iti panagtalekda ken Jehova, ket itultuloyda nga iranranud ti mensahe ti Biblia a mangipaay iti namnama.

Napaliiw ti dadduma ti kinakalmado ken bileg nga impakita da Kehinde ken Bintu. Naminsan, maysa a babai nga agnagan iti Mrs. Ukoli ti nangikuna iti maysa kadagiti gagayyem ni Bintu: “Iyegyo ditoy ti babai a natayan iti dua nga anak ngem kaskasdi nga ikaskasabana latta ti mensahe ti Biblia. Kayatko a maammuan no ania ti mangpabpabileg kenkuana nga agibtur.” Idi dimteng ni Bintu iti balay ni Mrs. Ukoli, kinunana kenkuana: “Kayatko a maammuan no apay nga ikaskasabam pay laeng ti maipapan iti Dios a nangpapatay kadagiti annakmo. Innala ti Dios ti bugbugtong a balasangko. Sipud idin, awanen ti interesko iti Dios.” Inusar ni Bintu ti Biblia a mangilawlawag no apay a matay dagiti tattao ken no apay nga addaantayo iti sigurado a namnama a mapagungarto dagiti natay nga inay-ayattayo.​—Aramid 24:15; Roma 5:12.

Kalpasanna, kinuna ni Mrs. Ukoli: “Impagarupko idi a ti Dios ti pakaigapuan ti ipapatay dagiti tattao. Ita ammokon ti kinapudno.” Inkeddengna ti makipagadal iti Biblia kadagiti Saksi ni Jehova tapno ad-adu pay ti maammuanna maipapan kadagiti kari ti Dios.

[Kahon iti panid 6]

‘Kayatko ti Tumulong, Ngem Diak Ammo No Kasano’

Nupay nakaro ti ladingit dagiti nagannak ken kakabsat ti natay nga anak, maamak dagiti gagayyemda. Kayatda a liwliwaen ti pamilia ngem maamakda amangan no makaisawang wenno makaaramidda iti banag a mangpakaro iti panagladingitda. Adtoy ti sumagmamano a singasing kadagidiay mangpampanunot iti, ‘Kayatko ti tumulong, ngem diak ammo no kasano.’

❖ Dikay liklikan dagidiay nagminatay gapu laeng ta dikay ammo no ania ti ibaga wenno aramidenyo. Makapabileg ti panangkaduayo kadakuada. Diyo kadi ammo no ania ti ibagayo? Ti laeng panangarakup ken napasnek a panangibaga iti “Ladingitek” ipariknana kadakuada a maseknankayo. Madanaganka kadi amangan no ad-adda nga agladingitda no agsangitka? Kastoy ti kuna ti Biblia: “Makipagsangitkayo kadagiti tattao nga agsangit.” (Roma 12:15) Ipakita ti panagsangityo a makipagriknakayo iti panagladingitda, ket makaliwliwa dayta.

❖ Umunakayo nga agtignay. Mabalin kadi nga ilutuanyo ti pamilia? Wenno dakayon ti aginnaw kadagiti naurnong a nanganan? Kayatyo kadi nga aramiden ti pangibaonanda kadakayo? Dikay kunaen, “Ibagayo laeng no adda kasapulanyo nga aniaman.” Uray pay no nasayaat ti motiboyo a nangibaga iti dayta, mabalin nga ipariknana kadagiti adu a nagminatay a nagannak nga okupadokayo unay tapno matulonganyo ida. Imbes ketdi, damagenyo, “Ania ti maitulongko kadakayo ita?” sa kalpasanna aramidenyo ti kidkiddawenda. Ngem liklikanyo ti makibiang kadagiti pribado a bambanag iti pagtaenganda wenno iti biagda.

❖ Dikay ibagbaga, “Ammok ti marikriknam.” Agduduma ti reaksion ti tunggal tao a matayan. Uray pay no natayankan iti anak, dimo ammo no ania ti eksakto a marikriknada.

❖ Tiempo laeng ti makaibaga no kaano nga agsubli ti normal a kasasaad iti pagtaenganda. Gapuna, itultuloyyo ti tumulong agingga iti kabaelanyo. Iti damo, adu ti mangandingay iti nagminatay a pamilia, ngem saan laeng a sumagmamano nga aldaw ti kasapulanda. Masapul nga ammuentayo dagiti kasapulanda kadagiti masanguanan a lawlawas ken bulbulan.a

[Footnote]

[Dagiti Ladawan iti panid 7]

Ipakita dagiti salaysay ti Biblia a ni Jesus addaan iti pannakabalin ken tarigagay a mangpagungar kadagiti annak