Paregtaen Dagiti Dadduma a Bumasa iti Ti Pagwanawanan
1 Kabayatan ti Mayo, kayattayo a paregtaen dagiti managayat ti kinapudno a basaenda a kanayon iti Ti Pagwanawanan. Kadagiti amin a magasina a naipablaak kadagitoy nga aldaw, daytoy laeng iti mangiyabasto iti nasken a naespirituan a taraon a kasapulan dagidiay a masmasnaayan ken maladingitan kadagiti nakalkaldaang a sasaaden ditoy rabaw ti daga.—Ezek. 9:4.
2 Natulongannatayo Ti Pagwanawanan a nangawat iti padto ti Biblia a mangpaneknek nga agbibiagtayon iti tiempo ti panungpalan ket ti Pagarian iti Dios iyegnanton ti mabiit iti talna ditoy daga. Ti napudno a pannakaseknan iti bibiag dagiti sabsabali isut’ mangtignay kadatayo a mangiranud iti daytoy a nakaskasdaaw a namnama kadakuada. Ket maparegtatayo a makakita a nawadwad kadagiti nasingpet iti panagpuspusoda a tattao ti maurnong pay a maipaay iti pannakaisalakan.—Juan 10:16.
3 Ti Mayo 1 a Pagwanawanan isut’ naglaon iti suheto a “Panangsaranget iti Krimen iti Nagulo a Lubong.” Ti Mayo 15 a ruar isut’ nangsaklaw iti “Ipangpangruna ti Dios iti Biag ti Pamiliayo!” Dagitoy nga artikulo ti nalaka laeng nga isilpo iti agdinama a Topiko a Pagsasaritaan maipapan iti Pagarian ti Dios. Agsaganakayo a naimbag tapno maipakitayo dagitoy nga artikulo a tumulong kadagiti bumalay a mangpalawa ti pannakaawatda iti suheto a mapagsasaritaan.
4 Laglagipenyo a ti komisiontayo isut’ panangikasaba iti naimbag a damag ken panagaramid iti adalan. No agmadi ti maysa a tao nga agsuskribe ngem kayatna ti agbasa kadagiti artikulo iti sagpaminsan, nasayaat no maidulin ti naganna iti rota ti magasina tapno kanayon a sarungkaranyo a maiyegan kadagitoy. Daytoy ti tumulong kadakayo a mangkultibar iti interesna nga addaan ti kalat a mapasdekanto iti panagadal ti Biblia.
5 Itukon ti Mayo dagiti adu a gundaway a makisao maipapan iti Pagarian kadagiti balaybalay ken iti impormal. Agtalektayo a bendisionan ni Jehova iti reggettayo a mangipaay iti espiritual a pamedped kadagiti naemma idiay teritoriatayo.