Naimpusuankayo Koma iti Tay-ak ti Ministerio
Paset 1: Ti Balor iti Panangipateg ken Jehova
1 Ti kinaimpusuan iti ministerio isut’ agrusing manipud iti napasnek a panangipateg ken Jehova ken iti amin nga inaramidna nga agpaay kadatayo. (2 Sam. 22:2, 3) Ti pannakaseknan kadagiti tattao isu pay koma ti mangtignay kadatayo nga agregget iti serbisio. (Mat. 9:36; 2 Cor. 5:14, 15) No kasano ti kadebotadotayo ken Jehova ken pannakaseknan kadagiti tattao, lalo met a matignaytayo a makiraman a sirarayray iti tay-ak ti serbisio. (Mat. 22:37-39) Ngarud ti ministeriotayo isut’ agbalin a gameng a kupikopantayo. (2 Cor. 4:7) Ngem kasano a makultibar dayta a panangipateg?
TULBEK TI PANANGPARANG-AY ITI PANANGIPATEG
2 Ti personal ken kongregasional a panagadal ti Biblia a mainaig iti panagmennamenna isudat’ tumulong kadatayo a mangpatanor iti personal a relasion ken Jehova. Sursurotenyo kadi daydiay iskediol ti linawas a panagbasa iti Biblia? Regularkayo aya a mangadal kadagiti publikasion ti Sosiedad? Agsaganakayo kadi a maipaay iti gimong, tumabuno, ken makipasetkayo iti amin a taripnong ti kongregasion? (Heb. 10:24, 25) Ti panagmennamenna isu met ti mamabileg iti pusotayo a mangipateg ken Jehova ken iti panagdayaw kenkuana.—Sal. 27:4.
3 Maysa pay a wagas a pangpairut iti panangipateg isu ti panangusig iti ehemplo dagiti sabsabali a naimpusuan a ministro. Umap-apoy iti regta ni Jeremias a maipaay iti trabaho a naitalek kenkuana. (Jer. 20:9) Impakita ni Jesus iti nagpaiduma a padron ti kinaregta. (Juan 4:34) Impamatmat ni Pablo ti panagyamanna iti nadiosan nga asi a naipakita kenkuana. (1 Tim. 1:12, 13, 17) Bayat nga isarmingtayo dagitoy a pagulidanan, maparang-aytayo ti panangipateg iti ministerio.
4 No maadaltayo iti nangayed a dignidad ni Jehova ken maseknantayo a mismo kadagiti nakaskasdaaw a gapuananna, mapagunaytayo a mangidayaw kenkuana a sirarag-o. (Sal. 145:5-7) Maipakita nga italtalimengtayo iti gundaway a mangsaksi iti nadiosan a naganna babaen ti panangipamuspusan a mairakurak iti damag ti Pagarianna.—Luc. 6:45.
5 Ngem adda kadi sabsabali pay a bambanag a mangtignay kadatayo iti nakararuaan a pannakipaset iti ministerio? No kasta, aniada? Kasano a dagiti panglakayen, ministerial nga adipen, payunir ken dadduma a nasanayen nga agibumbunannag ket makatulongda? Ania a paset a dagiti kalat ket alaenda ti papel a mangkultibar iti kinarayray? Dagitoy a saludsod ken dadduma pay isudat’ masungbatan iti daytoy lima a paset a serye, nga isut’ maitultuloy kadagiti sumaruno a ruar iti Ti Ministeriotayo iti Pagarian.