Ania ti Ibagayo iti Maysa a Judio?
1 Idi umuna a siglo, adu “kadagiti annak ti Israel” ti nangipangag a buyogen ti panangapresiar iti panangasaba ni Jesus ken dagiti apostolna. (Ara. 10:36) Kas met iti daydi a tiempo, adu a napasnek a Judio itatta ti naimpusuan a mangab-abrasa iti kinapudno—saan laeng nga idiay Israel no di pay ket idiay Russia, Estados Unidos, ken dadduma pay a pagilian. Kayatyo kadi a nabalballigi ti panangasabayo kadagiti Judio? Dagiti sumaganad a singasing tulongandakayo a mangasaba a nataktika agpadpada kadagiti relihioso ken di relihioso a Judio.
2 Panangasaba Kadagiti Relihioso a Judio: Sipapanunottayo koma a masansan nga ad-adda a maseknan dagiti relihioso a Judio iti panangannurot kadagiti tradision dagiti rabbi ngem iti panangammo kadagiti espesipiko a doktrina. Kinapudnona, kadawyan a matmatmatanda nga agpada ti autoridad ti tradision ken ti Kasuratan. Gapuna, saan a kanayon nga interesadoda a mangusig kadagiti nauuneg a tema ti Biblia. Adda met pagannayasanda a mangipapan a ti Biblia ket libro dagiti Kristiano. Gapu iti dayta, gagangay a nasaysayaat a dakamaten ti Biblia babaen kadagiti sasao a “ti Hebreo a Kasuratan,” “ti Torah,” wenno “ti Kasuratan.” Ti broshur a Will There Ever Be a World Without War? ket nakasaysayaat a publikasion a nangnangruna a nairanta para kadagiti Judio. Magun-odan laeng dayta iti Ingles.
3 Aniada a topiko ti paginteresan dagiti relihioso a Judio? Bueno, mamatida nga adda maymaysa a Dios, nga interesado unay iti tao. Mamatida met a makibibiang ti Dios kadagiti gannuat ti tao. Mabalinyo nga usaren dagitoy a punto a pangipasdek iti pareho a paginteresan. Kasta met, pagaammo unay ti kaaduan a Judio ti panagsagaba dagiti kailianda idi Gubat Sangalubongan II. Pampanunotenda no apay a pinalubosan ti Dios ti kasta a kinaawan hustisia ken no kaanonto nga agpatingga ti kinadakes. Kabaelantayo unay a sungbatan dagita a saludsod, kas pagarigan, no dakamatentayo ti sinagaba dagiti kakabsattayo kabayatan ti Holocaust.
4 Siempre, tapno saan a masair ti bumalay, nasayaat no saanyo a dagdagusen a pagsaritaan ti maipapan iti kinasiasino ti Mesias. Imbes ketdi, mabalinyo a pagsaritaan ti akem ni Moises iti pakasaritaan ti Israel ket saludsodenyo iti bumalay no patienna nga adda pategna itatta dagiti pannursuro ni Moises. Inton makitayo a maitutop a pagsaritaan ti kinasiasino ti Mesias, mabalin a basaenyo nga umuna ti Deuteronomio 18:15, a kunana: “Ni Jehova a Diosmo mamangonto kenka iti maysa a mammadto nga aggapu iti nagtengngaam, kadagiti kakabsatmo, kas kaniak; isu ti ipangagyonto.” Saludsodenyo iti bumalay no siasino ti pampanunoten ni Moises idi dinakamatna ti maipapan iti propeta a kas kenkuana. Kalpasanna saklawenyo ti sumagmamano a punto iti broshur a World Without War, panid 14, parapo 17 ken 18.
5 Sabali ti Panangmatmat Dagiti Di Relihioso a Judio: Saan a tunggal maysa nga agkuna a Judioda ket umanamong kadagiti pannursuro ti Judaismo. Adu dagiti Judio a nailubongan ti panangmatmatda. Ad-adda nga interesadoda a mangitandudo iti naiduma a pakabigbigan dagiti Judio, agraman ti kultura, tradision, ken edukasionna imbes nga alagadenda ti relihion dagiti Judio. Agnostiko dagiti dadduma a di relihioso a Judio—nga adda pay ketdi sumagmamano nga ateista. Iti damo, bassit laeng ti maitulongna ti panagadaw iti adu a Hebreo a Kasuratan. Nasaysayaat no makisaritakayo kenkuana a kas iti pannakisaritayo iti tao a saan a relihioso. Kas pagarigan, mabalin nga ilawlawagyo no kasano a praktikal ti Biblia iti kaaldawantayo. No di mamati ti bumalay a naipaltiing ti Biblia, adda sumagmamano a punto iti broshur a World Without War a mabalin a makatulong, nangnangruna dagidiay masarakan iti seksion ti panid 3 a napauluan “The Bible—Inspired by God?”
6 No kasabaanyo ti maysa a Judio, mabalinyo nga ibaga:
◼ “Kaaduan kadatayo napasarantayon ti saem ti matayan iti maysa nga ipatpateg. Panagkunayo, aniat’ mapasamak kadatayo no mataytayo?” Palubosanyo a sumungbat. Kalpasanna iturongyo ti bumalay iti kahon a napauluan iti “Death and the Soul—What Are They?” iti panid 22 ti broshur a World Without War. Iti kahon, pagdiligenna ti kunaen ti Kasuratan ken ti isursuro dagiti rabbi maipapan iti biag kalpasan ti ipapatay. Kalpasanna iturongyo iti parapo 17 iti panid 23, sa ipakitayo a sigun iti Kasuratan, mapagungarto dagiti natay ken agbiagdanto iti paraiso a daga. Itukonyo ti broshur. Kas panangisagana iti isasarungkar, mabalinyo a dakamaten a namati ni patriarka a Job iti namnama a panagungar. Dakamaten dagiti kasuratan a naisitar iti ngudo ti parapo 17, sa ibagayo nga agsublikayto ket pagsaritaanyonto dagita.
7 Dagiti libro ti Mateo, Marcos, Lucas, Juan, ken Aramid inrekordda ti kapkapadasan dagiti Judio a dimngeg ken nagtignay a maitunos iti kinapudno. Saan pay a rinikepan ni Jehova ti dalan nga agturong iti biag nga agnanayon. Adu ti napasnek a Judio a mabalin pay a mangammo ken Jehova, ti pudno a Dios, tapno agbiagdanto met nga agnanayon iti baro a lubong ti Dios.—Mik. 4:1-4.