Panangmatmat iti Lubong
Blood Test iti AIDS
Nabiit pay, patien dagiti managsirarak nga alaenna ti 3 agingga iti 12 a lawlawas tapno madlaw dagiti antibodies a tumaud ken agparang iti blood tests ti maysa a tao a naisarang iti makapapatay a virus iti AIDS. Ngem ti nabibiit pay a panagadal idiay Finland nga inaramid ti Institute of Biomedical Sciences iti Tampere, iti sidong ti panangaywan iti U.S. National Cancer Institute, ti nangpaatiddog iti dayta a napattapatta a tiempo. “Ti tiempo sakbay ti panagparang dagiti antibodies at-atiddog ngem ti naipagarupen agingga ita,” kuna ti maysa a managsirarak iti inaldaw a pagiwarnak a Pranses a Le Monde. “Posible pay laeng ti maaddaan kadagiti negatibo a resulta iti uneg ti 14 a bulbulan kalpasan ti pannakaakar iti virus ti AIDS,” kuna ti salaysay.
Nadiskubre a Siudad Idi Ugma
Ni Gene Savoy, maysa a managsirarak manipud Norte America, inyanunsiona idi napalabas nga Agosto ti nadiskubrena a siudad idi ugma idiay kabakiran iti Amazon iti Peru. Ti siudad addaan iti nasurok a 25,000 a patpatakder, kuna ti Folha de S.Paulo. No idilig, ti kalalatakan a Machu Picchu iti Peru, ti sarikedked a siudad dagiti Incas idi ugma, ti addaan laeng iti agarup sangagasut a patpatakder. Patien ni Savoy a ti nabiit pay a nasarakan a siudad ti imbangon ti sibilisasion ti Chachapoya, ti kadaanan nga umili iti makin-amianan a Peru.
Nauyong a Pannakariing
Maysa a 66-tawenna a lalaki nadiskubrena ti gapu iti panagsakit ti sakana—ti panagurok. Kas insalaysay ni Dr. Neil Shear iti Toronto iti New England Journal of Medicine, ti lalaki napan iti doktorna nga agrekreklamo iti sakit ti sakana. Nupay no naikkanen kadagiti pildoras, isut’ nariing dua a rabii kalpasanna babaen iti nakaro a sakit iti butoy ti kannawan a sakana—a pinataud ti kugtar ti asawana. “Dinak kugtaran dita. Dita ti ayan ti nasakit a sakak!” imbaga ti lalaki iti asawana. Ti sungbatna: “Agur-urokka manen, ket dita ti kanayon a pangkugtarak kenka tapno agsardengka.”
“Manangaywan iti Aquarium”
Bayat ti panagsarungkarna idi napalabas a Setiembre iti kabisera ti Australia, ti Canberra, ni Dr. Roy Pointer, ti direktor iti panagsanay iti iglesia iti British and Foreign Bible Society, intudona ti kangrunaan a pagkapuyan dagiti kangrunaan a relrelihion itatta. Immanamong iti nakakatkatawa a sao a “kaaduan kadagiti ministro idiay Inglatera ti nasanay a mangaywan iti aquarium imbes nga agbalin a mangngalap kadagiti tattao,” kuna ti The Canberra Times. Patienna a ti gagangay a ministro masapul nga “agpanunot iti termino ti misionero” ket ti “ipapan kadagiti ruruangan ti kaskasdi a kasayaatan pay laeng a pamay-an nga aramiden” tapno umadu dagiti miembro ti iglesia. Makapainteres, inusarna dagiti Saksi ni Jehova kas ulidan iti irarang-ay “gapu iti ipapan kadagiti balaybalay.”
Nakaam-amak a Pannakaikkat dagiti Bangkay
Daydayawen dagiti Hindus a kas ti nasantuan a karayan, ti Ganges ti pagdigdigosan dagiti minilion nga umili iti India iti tinawen. Nupay kasta, iti nabiit pay a tawtawen, dayta ket nagbalinen a pagibellengan kadagiti bangkay. Dagiti kakabagian a nakapangpanglaw a di makabayad iti bayad ti panangpuor iti bangkay us-usarenda ti Ganges kas pagibellengan iti ingungotenda a minatayda, isu a mangrugit kadagiti “nasantuan” a dandanum. Tapno mapasardeng ti iyaadu dagiti maruprupsa a bangkay a mangrugit iti karayan, sigun iti New Zealand Herald, plano ti gobierno iti India ti mangikabil kadagiti buaya iti Ganges kas maysa nga epektibo a pamay-an iti panangikkat kadagiti bangkay.
Panagbalbaliw ti Tanem
Dagiti agtutubo a Hapones gumatgatangdan iti bukodda a tanem ken lapida. Apay nga adda ti kasta a kasasaad iti maysa a daga a sadiay dagiti tattao ti tradisional a maitabon iti tanem ti pamilia? Ti kangrunaan a rason, sigun kadagiti gumatgatang a mismo, ket kalpasan ti ipapatay tarigagayanda ti mawayawayaan iti pamiliada, nangnangruna kadagiti inapoda a saanda pay a nakitkita. Daytoy a kabbaro a pagannayasan ti mangay-ayo kadagiti opisiales ti sementerio, a makasarak a mangilaklako iti ad-adu a pagitaneman. Dagiti managpataud kadagiti lapida makidangdanggayda met iti kasasaad ket addaanda kadagiti uso a lapida nga stainless steel, ceramics, wenno aniaman a material a nalaka a malako. Idiay Osaka ti gagangay a gatad iti tanem ken ti lapida ket 3.5 milion yen ($28,000, E.U.). Ti Buddhist Information Center idiay Tokyo, maysa a serbisio iti panangbalakad, agsennaay: “Kadagiti panagkonsulta, mariknami a naimbag ti panagkapuy ti singgalut ti pamilia, uray pay iti nagbaetan ti lalaki ken ti asawana, dagiti nagannak ken dagiti ubbing.”
Microchips Maipaay kadagiti Paralisado a Saksaka ken Im-ima
Kadagiti sumaganad a dekada, dagiti managsirarak idiay Stanford University idiay California inanamaenda ti mangimula iti elektroniko a chips kadagiti nerbio iti paralisado a saksaka ken im-ima tapno isubli ti panagrikna ken komunikasion iti utek. Ti kapanunotan ket ti maysa a bassit nga elektroniko a chip ti agserbi a “kas maysa a switchboard ti telepono, a mangbalbaliw ti dalan ti senias iti utek a manglabas kadagiti nadadael a nerbio,” kuna ti magasin nga Equinox. Ti pannakabael a mangidemonstra a ti bassiusit a linabag ti nerbio (axons) “mabalinda ti agbalbaliw nga indibidual iti maysa a milimetro kuadrado a silicon chip” ti nangipaay kadagitoy a namnama.
Dagiti Komersial ken dagiti Ubbing
Dagiti ubbing saanda a naannad wenno awan ti panagduaduada kadagiti komersial iti telebision a kas kadagiti nataengan. Dagiti ubbing mabalin nga awatenda dagiti panangikalintegan ken panangay-ayo dagiti produkto kas pudno ken nakapapati. Gapu iti daytoy a rason, ni Dale L. Kunkel, maysa a managpalawag iti University of California, Santa Barbara, ti nangibaga iti komite iti kongreso iti di pay nabayag a ti U.S. Federal Communications Commission ti masapul a manglimitar iti bilang dagiti komersial a maiturong kadagiti ubbing. Kuna ni Kunkel a dagiti nasarakan kadagiti panagsirarak ket mangiparang iti nabileg a pammaneknek a dagiti ubbing a nababbaba ngem lima a tawen “agkurangda ti panangsirmata ken uray mangilasin iti programa manipud iti linaon iti pablaak.”
Salaknib Manipud iti Istrok
“Makagun-odkayo iti kasta unay a proteksion manipud iti istrok babaen iti pannangan iti ad-adu a prutas ken natnateng,” kuna ni Dr. Louis Tobian iti University of Minnesota. Ti rason a ta kaaduan a prutas ken natnateng ti nabaknang iti potassium, isu a, nupay no saanda a pababaen ti presion, lapdanda ti panangdadael ti presion kadagiti ur-urat. Iti panagsaritana idiay tinawen a miting ti American Heart Association maipapan iti nangato a presion, kinuna ni Tobian a ti panagadal kadagiti animal ipakitana a ti inaldaw a tulong manipud kadagiti prutas ken natnateng mabalin a pabassitenna ti peggad iti istrok agingga iti 40 porsiento bayat iti naikeddeng a tiempo. Mairaman kadagiti kasayaatan a gubuayan iti potassium isu dagiti saba, patatas, strawberris, ken grapefruit ken tubbog ti dalanghita.
Elektroniko a Panglapped ti Ungor
Kasano ti panangikkatyo iti nakaro nga ungor? Ti panangdoble ti sarming ti tawa, dagiti mufflers, ken dagiti material a maipaay iti insulasion ti gagangay a pamay-an. Ngem itan dimteng ti dua a Briton a sientista, dagiti managpalawag maipapan iti acoustics idiay Southampton University, iti naisangsangayan a pamay-an—ti panglapped iti ungor. Kasano ti panagandarna? Ti padron ti ungor a di matarigagayan ket nausig ket napataud ti maysa a ladawan iti sarming babaen iti elektroniko a pamay-an tapno no agsabet dagiti dua a timek, pukawenda ti maysa ken maysa. Ti panangiyaplikar iti daytoy kabbaro a teknolohia ket nairanta kadagiti makina ti eroplano, nangnangruna ti nabangag nga ungor ti panagrikos ti paligpalig, kuna ti The Sunday Times iti Londres. Ti pamay-an maus-usaren iti panangpabassit ti “banurbor,” wenno ungor, a mangngeg kadagiti kotse nga agtartaray a nakaparpartak.
Subway ti Cairo
Idi Setiembre 27, 1987, ti umuna a subway idiay Africa ti nainagurasionan idiay Cairo, Egipto. Ti makapaaburido a 4.5 kilometro kaatiddogna a linea iti uneg ti daga kasapulanna ti lima ket kagudua a tawen. Sigun iti inaldaw a pagiwarnak a Pranses a Le Monde, “dagiti kompania nga [agpatpatakder] masapul nga agtuloyda nga awan ti sursurotenda gapu iti kinakurang ti mapa iti uneg ti daga. Nasken ti panangarikapda iti aglawlaw ken panangiyalisda kadagiti adu a milias a tubtubo ken kable sakbay ti panangirugida iti panagkali.” No magtengna ti kaaduanna, ti subway ti Cairo makaibiahento ti nasurok a 50,000 a pasahero iti maysa nga oras. Dagiti umili iti Cairo inanamaenda a daytoy a “panagibangon a Pharaonic” pabassitenna ti kapuskol ti trapiko iti siudadda.