Manipud Managbasatayo

Nasam-it a Mesquite

No saan a gapu iti “Ti Mesquite . . . ” (Hulio 22, 1988), sigurado a saanko a nadlaw dayta iti lokal a paglakuan ket pudno a napalabesko koma daytoy nagsayaatan a putahe. Umanamongak a ti diro ti mesquite ket nakalamlamuyot ngem nakaramraman. Anian ti panagyamanko iti Namarsuatayo maipaay itoy a nakaskasdaaw a mula ken kadagiti nagduduma a mulmula nga impaayna kadatayo! Agyamanak iti adu.

S. B., Pederal a Republika iti Alemania

AIDS

Kas maysa a mangngagas, pudno nga umanamongak kadagiti sasao iti magasinyo maipapan iti AIDS (Oktubre 8, 1988). Maysaak a nangibangon iti Blood-Free Surgical and Medical Center. Agsipud ta mangipapaaykami kadagiti serbisio a ngangngani awan ti risgona iti AIDS, dagitoy nga artikulo ket makatulongda unay kaniak, kadagiti kamkameng ti opisina, ken kadagiti pasiente. Pangngaasiyo ta mangipatulodkayo iti sangagasut a magasin, ta kayatko a dagiti amin a kakaduak ket umawatda iti kopia.

F. G., Medikal a Direktor iti O.R., Estados Unidos

Maysa laeng a kard iti panagyaman​—maipaay kadagiti sientipiko unay nga artikulo ti AIDS iti maysa nga Agriingkayo! a nasarakak iti kalsada, napitak ken narugit. Diak pay nakagun-od ti adu nga impormasion maipapan iti AIDS ken ti saklawenna manipud iti asinoman sakbay dayta. Nabiit pay a naaddaanak iti dua a panangiyalison iti dara ket inanamaek a diak nakagun-od iti AIDS a “matmaturog” kadagiti tisyu wenno selula ti bagik.

G. T., Estados Unidos

Ti artikulo ket makapainteres unay. (nupay nakangngegakon/nakabasan ti adu maipapan iti tema). Nupay kasta adtoy ti maysa a komento. Adda panangipapan a no awatentayo “ti pagalagadan ti Namarsua a maipaay iti natauan a kababalin,” masapul a ditay koma maakaran iti virus ti AIDS. Nupay kasta, iti maysa a programa ti damdamag, naibaga a kadagiti luglugar nga adu ti populasion ken adun ti bilang dagiti tattao nga agaw-awit ti virus ti AIDS, “mabalin” nga adda ti AIDS a maiyakar babaen kadagiti lamok. Gapuna, ti pananginanama dagiti sumagmamano nga indibidual a makapagtalinaed a saan nga agsakit iti sakit a nasaknapen iti kagimongan ti tao nga adda iti aglawlawda ket mabalin a SAAN a nainkalintegan. Kamaudiananna, ti laeng kakaisuna a pamay-an a naan-anay a natalged manipud iti AIDS isunto ti panangawat ken panagbiag ti TUNGGAL MAYSA “kadagiti pagalagadan ti Namarsua.”

D. B. S., Estados Unidos

Umanamongkami ken D.B.S. Dikam pinanggep nga impapan a dagiti pagalagadan ti Namarsua ket naan-anay nga ilisina ti maysa manipud iti AIDS itatta. Pudno a kunaenmi a ti kasta a kababalin isu ti kasayaatan a pamay-an iti panangliklik iti dayta.​—ED.

Tured a Mangsango kadagiti Lapped

Ni tatangko ket makidangdangadang iti Parkinson’s Disease iti 20 a tawtawen. “Ti Panangibtur iti Parkinson’s Disease” (Enero 8, 1988) mangipaay iti dakkel a pammaregta. Ngangnganin saan a makapagna. Maidugmem, nga umuna ti ulo, kadagiti sarming a tawtawa-diding. Sumagmamano a bulbulan a napalabasen, napataudna ti negatibo a kababalin nga agbiag, ngem ti report iti Agriingkayo! ti nangipaay kenkuana iti pammabileg.

T. N., Japan

Idi nabasak “Ti Bagi​—Nakaskasdaaw ti Pannakaaramidna . . . ” (Hunio 8, 1988), masapul nga agyamanak kadakayo. Addaanak ti lapped iti kanawan nga imak ken sakak gapu iti cerebral infantile paralysis, ket pinampanunotko daytoy ken nangigapuak iti panaglidayko. Siempre, pudno a marigatanak no dadduma, ngem manipud ita nga agtultuloyen, imbes a malidayak, kayatko a baliwan ti panagpampanunotko ket iyebkasko ti panagyaman iti Daydiay a nangaramid kaniak.

T. T., Japan