Saan a Pudno ti Ebolusion
Ipakita ti panangbilang kadagiti butos nga adu nga Americano ti mamati a direkta a pinarsua ti Dios dagiti immuna a tattao ket saan a babaen iti proseso ti ebolusion manipud kadagiti inuugma a kita ti biag. Ngem apay nga adu a mannursuro iti siensia idiay America ti mangitantandudo a pudno ti minamaag, naiparna nga ebolusion? Ti maysa a rason ket “dagiti Darwinista a pundamentalista . . . konkontrolenda dagiti departamento ti siensia iti adu nga unibersidad,” kuna ni Phillip E. Johnson, propesor ti abogasia idiay University of California sadi Berkeley.
Kinuna ni Johnson: “Iti dadduma a kaso, maparitan dagiti propesor iti biolohia a mangibaga kadagiti estudiante nga adda nabileg a rason a pagduaduaan ti maibagbaga a kabaelan ken agpayso a pinarsua dagiti minamaag a material a proseso dagiti pagsidsiddaawan ti biolohia.”
Kuna ti sientipiko ken inheniero a ni Murphy O’Dean: “Imbes a mailaksid ti maysa a palso a teoria, ti pagannayasan ti ‘ebolusionario a siensia’ ket pagbalinenna a nakapapati ti sasao nga ‘agpayso la ketdi ti ebolusion.’” Saan a maikankano wenno mabaybay-an dagiti agsisimparat ken kurang nga ebidensia.
Apay? Kuna ni Michael Behe, maysa a molecular biologist, iti Darwin’s Black Box: “Saan ngamin a kayat a patien ti adu a tattao, agraman dagiti adu nga agkakangato ken mapagraraeman unay a sientipiko, nga adda natantan-ok ngem iti nakaparsuaan. Dida kayat nga adda nabilbileg a persona a mangapektar iti nakaparsuaan.” Ngem saan nga ilaksid ti pudno a siensia dagiti agsisimparat nga ebidensia tapno mayadelantar dagiti kaykayatna a kapanunotan. Ket saan a mamati ti amin a sientipiko iti ebolusion.
Inimtuod ti magasin idiay Brazil a Veja iti nangabak iti Premio Nobel para iti Physics a ni Carlo Rubbia, “Mamatika kadi iti Dios?” Nupay saanna a binigbig ti maysa a Dios a persona, inaminna: “No ad-adda a paliiwem ti nakaparsuaan, ad-adda a maamirismo nga adda nakaskasdaaw nga urnos dagiti amin a bambanag. Daytat’ kasta unay a kinasaririt ta uray la ti panangpaliiwko kadagiti natural a pasamak, makagtengak iti konklusion nga adda Namarsua.”
Ipalagip kadatayo dagiti kapaliiwanna ti kinuna ni apostol Pablo maipapan iti Dios: “Dagiti di makita a kualidadna ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen kadagiti bambanag a naaramid, uray ti agnanayon a pannakabalin ken kina-Diosna.”—Roma 1:20.