KINATULENG

Sangkabassit wenno naan-anay a pannakapukaw ti pannakabael a makangngeg, masansan a gapu iti sakit, aksidente, wenno napigsa nga aweng, mabalin a nakaro, ken kellaat wenno napaut. Adda met dagiti tattao a nayanak a tuleng. Ti sabali pay a makagapu iti kinatuleng a nadakamat iti Biblia ket panagbalin a nagunggan ti sairo. (Mr 9:25-29) Ti ramut a sao ti Hebreo a termino a che·reshʹ (‘daydiay tuleng’; Isa 35:5) tumukoy iti di pannakangngeg wenno uray iti di pannakapagsao. Nadumaduma ti pannakaipatarusna kas “agtuleng” ken “agtalinaed a siuulimek.”​—Sal 28:1; 35:22, Rbi8 ftn; Sal 50:3, Rbi8 ftn; Mik 7:16.

Ni Jehova, ti Namarsua iti lapayag (Pr 20:12), kinalikagumanna a ti ilina mangipakita iti konsiderasion iti tuleng. Dagiti Israelita saanda nga uyawen dagiti tuleng a tattao wenno idawdawat ti pakadaksanda, ta dagiti tuleng saanda a maikanawa ti bagbagida maibusor iti sasao a saanda a mangngeg.​—Le 19:14; idiligyo ti Sal 38:13, 14.

Ti sasao iti Exodo 4:11, a sadiay tukoyen ni Jehova ti bagina kas ‘mangituding iti tuleng,’ saanna a kayat a sawen nga isu ti makinggapuanan kadagiti amin a kaso ti kinatuleng. Nupay kasta, kabaelan ni Jehova a pagbalinen a literal a tuleng, di makapagsao, wenno bulsek ti maysa a tao maipaay iti maysa a rason wenno panggep. Ti ama ni Juan a Manangbautisar temporario a napagbalin nga umel gapu iti saanna a panamati. (Lu 1:18-22, 62-64) Ti Dios kabaelanna met ti “mangituding” iti tattao kas tuleng iti naespirituan babaen ti panangipalubosna nga agtalinaedda iti dayta a kasasaad no pilienda ti kasta.​—Idiligyo ti Isa 6:9, 10.

Bayat ti ministerio ni Jesu-Kristo, adda sumagmamano a gundaway nga imparangarangna ti namilagruan a pannakabalin a mangagas babaen ti panangisublina iti panagdengngeg dagiti tattao a tuleng iti pisikal. (Mt 11:5; Mr 7:32-37; Lu 7:22) Ipasigurado daytoy nga iti sidong ti panangiturayna iti daga, mapukawton ti amin a pakarigatan, agraman ti kinatuleng.

Dagiti nadangkes nga agkitakit nga umimdeng iti panangiwanwan, impadis ti salmista iti maysa a kobra a mamagbalin iti bagina a tuleng iti timek dagiti manangkayaw. (Sal 58:3-5) Umasping iti dayta, dagiti Israelita idi kaaldawan ni Isaias, nupay addaanda kadagiti lapayag, kaslada tuleng gapu iti kinabannayatda nga umimdeng ken agtignay iti sao ni Jehova. (Isa 42:18-20; 43:8) Nupay kasta, kalpasan ti naipadto a pannakaisubli manipud pannakaidestiero, agpatingga ti naespirituan a kinatuleng ti ili ti Dios. Mangngegda ti sao ni Jehova, kayatna a sawen, ipangagda dayta. (Isa 29:18; 35:5) Idi adda ni Jesu-Kristo ditoy daga, linuktanna ti adu a lapayag ti pannakaawat, ket gapu iti dayta, dagidiay naagasan makapagtignayda maitunos iti nangngeganda.​—Mt 13:16, 23.