Malagipyo Pay Aya?
Nakitayo a dagiti nabiit pay a ruar Ti Pagwanawanan addaanda ti praktikal a pateg? Ngarud kitaenyo no malagipyo pay dagiti sumaganad:
◻ Apay a maikuna a ti Biblia ket maysa a libro nga agpaay iti sangatauan?
Manipud iti pangrugianna, iparparang ti Biblia ti sangalubongan a panangmatmat no maipapan iti masanguanan ti sangatauan. (Genesis 1:28) Lab-awan dayta amin dagiti panagil-ilem ti rasa, nasionalismo, ken dagiti dadduma pay a mamagsinasina a puersa a nangsaplit ti sangatauan. Daytat’ makisasao kadagiti tattao iti amin a nasnasion ket sawenna ti daga kas maysa a naindaklan a pagtaengan nga agpaay iti intero a natauan a rasa. (Aramid 17:26)—4/15, panid 5.
◻ Aniat’ kayat a sawen ni Jesus idi a kinunana: “No, ti matam ti napamaysa, amin a bagim nalawagto”? (Mateo 6:22)
Ti sao a “napamaysa” ti naggapu iti Griego a sao a nangnangruna a kaipapananna ti panagmaymaysa ti isip wenno debosion iti maysa a panggep. Babaen iti panamagbalin iti panagaramid iti pagayatan ti Dios kas kalattayo iti biag, sapulentayo ti panangisarming iti nadayag a naimbag a damag maipapan iti Pagarian iti isuamin a paset ti panagbiagtayo.—5/1, panid 12, 13.
◻ Aniat’ kaipapanan ti kina-omnipotente ken kina-omnisiente ni Jehova?
Ni Jehova kunana ken ni Abraham: “Siak ti Dios a mannakabalin-amin.” (Genesis 17:1) Kas mannakabalin-amin—omnipotente—mabalin nga usaren ni Jehova ti pannakabalinna a mangparmek ti aniaman a lapped iti kaitungpalan dagiti karkarina ken pangpanggepna. Ni Jehova met ti mannakaammo ti amin, nainsiriban iti amin—omnisiente. Gapuna mabalinna a makita nga antimano aniaman a kayatna wenno tarigagayanna. Dagitoy dua a kualidad ti mamagbalin nga imposible ti pannakapaay ni Jehova. (Isaias 14:24)—5/15, panid 4.
◻ Kasano ti panangipakitatay ti kinapakumbaba no agkarkararagtayo iti publiko a maipaay kadagiti dadduma?
Maipakitatay ti kinapakumbaba babaen ti tulong ti timektayo—a nikaanoman ditay agbalin a bombastiko wenno nakakatkatawa. Nikaanoman ditay koma ipilit a mangaramid ni Jehova kadagiti sumagmamano a bambanag. Imbes ketdi, umararawtayo ken ni Jehova a maitunos ti pagayatanna ken dagiti sasaotayo ti rebbeng a nadayaw ken natakneng a kanayon, a bigbigen ti kinabassittayo. (Mateo 6:5; Isaias 66:2)—5/15, panid 21, 22.
◻ Kasano a mataginayon ti maysa a Kristiano ti positibo a kababalin iti sidong ti pannakaidadanes?
Dina koma palubosan ti isipna nga agtaeng kadagiti negatibo a bambanag. Imbes ketdi, masapul ti panagmennamennana kadagiti inar-aramid dagiti dadduma a matalek nga ad-adipen ni Jehova kadagiti panawen ti pannakasuot. Addaanda ti naan-anay a pammati ken panagtalek ken ni Jehova, nga agtalekda iti abilidadna a mamagungar ken manggunggona kadakuada. (Apocalipsis 12:10) Umasping iti dayta, ti Kristiano a maidaddadanes itatta ti rebbeng a pagtalinaedenna a nalawag ti isipna ti namnamana iti nalinteg a baro a sistema ni Jehova. (Idiligyo iti Hebreo 12:2.)—6/1, panid 30.
◻ Ania a maysa nga importante a banag ti nagtutunosan da Hus, Wycliffe, ken ni Luther?
Nagaanamonganda amin a ti Sao ti Dios ti rebbeng nga umun-una, aniaman ti opinion dagiti tattao. Sinalimetmetan dagiti immuna a Kristiano daytoy nalawlawagan a pannakaawat agsipud ta nasursuruanda a mismo babaen ken Jesu-Kristo. (Aramid 5:29; Juan 17:17)—6/15, panid 31.
◻ Ti kadi nangisit a kudil ti bunga ti nadiosan a panangilunod ken ni Canaan ken ti kaputotanna?
Saan. Ti nangisit a rasa nagtaud saan a ken Canaan no di ket ken Cus ken mabalin pay a ken ni Put. Awan ti lunod a naipataw kadagitoy dua nga appoko ni Noe. (Genesis 9:24, 25; 10:1, 6)—7/1, panid 4.
◻ Aniat’ kayat a sawen ni Jesus idi nagsao maipapan iti pananggura ti maysa kadagiti kameng ti pamiliana ken uray pay ti bagina met laeng? (Lucas 14:26)
Kayat a sawen ni Jesus a no maidilig ti panagayat ti maysa iti Dios ken ti debosionna ken Kristo, ti pannakirelasion kadagiti kabagian ti maysa ti mabalin a kasla pananggura. (Idiligyo ti Mateo 12:46-50.)—7/1, panid 27.
◻ Kasano a ni Jesus ti “Apo ti panaginana,” kas naikuna iti Mateo 12:8?
Ti tuktukoyen ni Jesus isu ti natalna a panagturayna iti Pagarian iti sangaribo a tawen. Daytoy naindaklan a panagturay ni Kristo iti Panaginana ket panawento ti panaginana manipud amin a panagsagsagaba ken pannakairurumen.—7/15, panid 9.
◻ Apay a saan a nainsiriban para iti maysa nga ubing ti mangikeddeng iti kabukbukodanna a kalat iti biag?
Ti kapadasan dagiti ubbing ti limitado unay nga agpaay kadakuada a mangikeddeng iti kabukbukodanda a kalat iti biag. No saan a tumulong dagiti nagannak kadakuada a mangikeddeng kadagita a kalat, addanto sabali a mangaramid iti dayta—nalabit dagiti ubbing idiay eskuelaan wenno ti manangbalakad idiay eskuelaan. Makatulong dagiti Kristiano a nagannak kadagiti annakda a mangikeddeng iti kalat a maitunos iti panangipategda kadagiti naespirituan a bambanag.—8/1, panid 28.