Panangiparang iti Apocalipsis a Libro
1 Gapu ti kapeggad iti tiempotayo, adu a tattao ti agmalanga ken agtarigagay iti makapnek a sungbat maipapan ti masanguanan. Anian a kinamaitutopna daytoy, ngarud, a paregtaen ida a basaen iti libro nga Apocalipsis! Daytoy a publikasion ti mangitukon iti nadiosan a giya babaen ti panangilawlawag kadagiti pasamak kadagitoy aldawtayo babaen iti lawag dagiti padto ti Apocalipsis. Dagitoy sumaruno ti sumagmamano a singasing a mabalin a suroten no itukontayo daytoy kadagiti tattao iti daytoy a bulan.
2 Kadagidiay Relihioso a Tattao: Umad-adu dagiti tattao ti mangad-adalen iti Biblia kadagitoy nga aldaw. No masabettayo dagiti kakastoy a tattao, ti diretso nga idudupag isut’ epektibo.
Mabalinyo a kunaen:
◼ “Maisaludsodmi daytoy kadagiti kaarruba: Pagarupenyo kadi a ti libro nga Apocalipsis ket maawatan iti kababagasna, wenno agnanayon aya daytoy a misterio? [Palubosan nga agkomento.] Adu ti agkuna met a kasta. Siputanyo no ania iti makuna ti Biblia a mismo ditoy Apocalipsis 1:3.” Kalpasanna mabalinyo nga iturong iti pangirugi a komentona idiay panid 9 ti libro iti “Pannakaipatarus dagiti Kasuratan.”
3 Kadagidiay Maseknan iti Kasasaad ti Lubong: Nasayaat no gundawayan nga usaren dagiti nalatak nga ilustrasion iti Apocalipsis a libro no itukonyo daytoy kadagiti maseknan maipapan ti problema daytoy lubong.
Kas ehemplo, mabalinyo a kunaen:
◼ “Simmarungkarkami a mangilawlawag iti kaipapanan dagiti pasamak ita iti aglawlaw daytoy lubong. Marikna dagiti dadduma a pangulo daytoy lubong a dandani kanon iti maysa a baro panawen ti talna. Mariknayo kadi a pudno dayta? [Palubosan nga agkomento.] Iti sidong ti pannakapaay dagiti natauan a gobierno, nupay kasta, iti 2 Pedro 3:13 ipasiguro ti Biblia kadatayo a maysa a baro a naindagaan a sosiedad ti agandar iti sidong ti nailangitan a gobierno. [Basaen ti kasuratan ken luktan iti Apocalipsis a libro idiay panid 302.] Ania ti makaallukoy kadakayo ditoy ladawan? [Palubosan a sumungbat.] Maipapan ti kasasaad nga agrangpaya ditoy daga, kunaen met ti Biblia iti Apocalipsis 21:4 [basaen ti kasuratan manipud panid 303, parapo 6]. Uray pay ni patay saannanton a singaen iti talna nga ipasdek ti Dios.”
4 Kadagidiay Maseknan iti Polusion ken ti Aglawlaw: Ti ilustrasion iti panid 174 ti libro isut’ mabalin a mausar agraman iti Apocalipsis 11:18.
Kas ehemplo, kalpasan ti introduksion mabalinyo a kunaen:
◼ “Iti pannakisaomi kadagiti kaarrubatayo, adu ti maseknan maipapan no kasano a ti angin, danum, ken taraontayo ket narugitan. [Ipakita ti ilustrasion iti panid 174.] Ti pagarupyo kabaelan ngata dagiti gobierno a pasardengen daytoy? [Palubosan nga agkomento.] Makaparegta a makita no ania iti kunaen ti Biblia a mapasamak kadagidiay a mangdaddadael ti daga.” Basaen ti Apocalipsis 11:18 manipud iti libro idiay panid 173, kalpasanna ipakita ti panggep iti Dios a maipaay ti daga idiay panid 302.
5 Dagiti padto ti Apocalipsis ket taudan iti dakkel a rag-o. Sireregta koma nga itukon daytoy Apocalipsis a libro iti daytoy a bulan tapno amin ket maigiya babaen ti nainsiriban a panangiturong ni Jehova.