Tulongan Ida a Mangawat
1 Adu ti mangipagarup a “narigat a maawatan” ti libro [ti Biblia] nga Apocalipsis. (2 Ped. 3:16) Nupay kasta, nalawlawaganen ti kaipapananna iti libro nga Apocalipsis. Kasano a matulongantayo dagiti interesado a tattao a magunggonaan iti dayta?
2 No napagsaritaanyo ti Apocalipsis 1:3 iti umuna nga ibibisitayo, nalabit pabaruen daytoy a kapanunotan ti interes:
◼ “Idi napalabas, nagsaritaantayo no kasano a mangyeg iti ragsak ti pannakaawat iti libro nga Apocalipsis. Nupay kasta, tapno magun-odan dayta a kinaragsak kasapulan nga adalentay ti Biblia, ken alagaden ti naadaltayo.” Basaen ken komentuan ti Santiago 1:25. Luktan ti parapo 9 iti panid 8, sa ipakita no kasano a tumulong kadatayo a gumun-od iti ragsak ti pannakaawat iti libro nga Apocalipsis.
3 No nagsaritaanyo ti Juan 17:3 idi umuna nga isasarungkaryo, igunamgunamyo ti panagkasapulan a gumun-od ti ad-adu pay a pannakaammo iti Biblia babaen ti panangikuna:
◼ “Iti daydi naudi a kaaddak ditoy, binasatayo ti Juan 17:3 a ti pananggun-od ti pannakaammo maipapan ti Dios ti mangiturong iti biag nga agnanayon. Ngem kayatyo kadi ti agbiag nga agnanayon iti lubong a pagbibiagantayo ita? [Palubosan a sumungbat.] Madi ti kaaduan. Gapu iti daytoy, agrag-otayo no mangngegtayo dagiti inkari ti Dios.” Iturong iti parapo 6 idiay panid 303, basaen ken komentuan ti Apocalipsis 21:4, sa itukon ti panagsubli manen maipaay iti kanayonan a panagsarita.
4 No inusaryo ti ladawan idiay panid 302 iti umuna nga isasarungkar, mabalinyo manen a luktan ti libro iti dayta a panid ket kunaenyo:
◼ “Napagsaritaantayo idin dagiti bendision a nailadawan ditoy a sagrapento dagiti tao iti sidong ti turay iti Pagarian ti Dios. Ania ti pagarupyo a masapul nga aramiden no kayattayo ti agbiag iti sidong dayta a Pagarian? [Palubosan a sumungbat.] Nangituyang ti sumagmamano a tattao idi tiempo ti Biblia iti naimbag nga ehemplo a tuladentayo.” Basaen ti Aramid 17:11, a maigunamgunam a kasapulan ti ‘panagsukimat kadagiti Kasuratan iti inaldaw.’ Itukon ti panagadal ti Biblia iti pagtaengan.
5 No nakaibatikayo ti tract a “Daytoy Kadi a Lubong Makalasatto?” iti bumalay nga okupado, mabalinyo a kunaen:
◼ “Iti nabiit pay nga isasarungkarko, medio okupadokayo, ngem nangibatiak ti tract kadakayo ken binasatayo ti Apocalipsis 21:4, isu a naadaw iti daytoy a libro, Apocalipsis—Ti Grande a Tampokna Asidegen! [Basaen dayta manipud parapo 6 iti panid 303.] Daytoy a ladawan [iti panid 302] ipakitana no anianto ti langana inton ‘punasen ti Dios ti amin a lulua manipud matatayo.’” Itukon ti libro.
6 No makasarakkayo ti interes, inton agangay kayatyo nga iturong ti atensionna iti libro a Pannakaammo a Mangiturong iti Biag nga Agnanayon ken usarenyo dayta a pangirugi ti panagadal. Sigurado a makasarakkayo ti nawadwad a rag-o iti panangtulong “kadagiti awanan kapadasan a makaawat.”—Sal. 119:130.