Aramatenyo a Naimbag Dagiti Publikasiontayo
1 Ti organisasion ni Jehova isut’ nangabasto kadatayo iti nagduduma a publikasion tapno mausartayo iti panangasaba ken panangisuro a trabaho. Ti panangipateg kadagitoy isu koma ti mangtignay kadatayo a mangusar a naimbag kadagitoy iti ministeriotayo.
2 No ilawlawag dagiti Kasuratan iti maysa a tao, mabalin a makasaraktayo iti maysa a masinnunuo a suheto a makaguyogoy kenkuana. No kabisadotayo dagiti linaon iti nagduduma a publikasion, kabaelantayo a maihusto iti panangiparangtayo ken itukon dayta a publikasion a naglaon kadagiti bambanag a paginteresan ti tao. Kasapulanna daytoy ti panagsarungkar a maitugot dayta a maitutop a publikasion.
ITUKON DAYDIAY KASAPULAN
3 No makisaotayo iti maysa a tao nga agkurang ti pammatina iti Biblia ken mamati a daytoy ket agkokontra ken saan a nasayantipikuan, mabalin a maitutop nga itukon iti libro a Ti Biblia—Saot’ Dios wenno iti Tao? Dayta a publikasion ti naan-anay a mangsumra iti kritisismo ti tao iti Biblia ken ipakitana a dayta ket pudno a Sao ti Dios. Wenno mabalinyo nga itukon iti libro a Ti Panangbiruk ti Sangatauan iti Dios, a mausar iti kapitulo 15 ken 16.
4 Adu dagiti tattao a napasanguan kadagiti problema ti biag iti pagtaenganda. Tapno matulongan ida a mangsaranget kadagita a problema iti biag ken masarakanda dagiti solusion ti Biblia, mabalintayo nga itukon iti libro a Biag iti Pamilia wenno iturongtayo ida iti kapitulo 5 aginggat’ 8 iti Happiness a libro. Ti panagbalbaliw iti kasasaad ket saan a kanayon a dumteng a madagdagus, ngem maipakitatayo a dagiti balakad ti Biblia ket pudno nga agkurrida.
5 No sarungkaran dagiti tattao nga addaan iti annak, mabalinyo nga itukon iti publikasion nga Iyimtuod iti Agtutubo. Adu nga agibumbunannag ti nakatulong kadagiti nagannak ken annak babaen ti panangidatagda iti Ti Librok Dagiti Estoria ti Biblia wenno Panagimdeng iti Naindaklan a Mannursuro.
6 Dagiti tract isuda ti nalaka nga awiten ken mausar a pangirubbuat ti saritaan kadagiti balaybalay wenno impormal. Makaliwliwa unay daytoy tract nga Aniat’ Namnama Kadagiti Ing-ingungoten a Natayen? Kanayon aya a mangitugotkayo iti nawadwad a nagduduma a tract? Adda kadin nakasagana a komentoyo a mangiparang kadakuada?
7 Bayat nga iranudtayo ti naimbag a damag iti dadduma, kayattayo nga usaren a naimbag dagiti nawadwad a kagawaan iti panagadal ti Biblia nga impaay “iti matalek ken naannad nga adipen.” (Mat. 24:45-47) Ti kasta a nabuslon a naespirituan a taraon isut’ mangiyanninag iti kinaparabor ni Jehova ken ti pannakaseknanna iti amin a sangatauan.