Tulongan ti Sabsabali a “Mangtungpal Kadagiti Bambanag a Naisurat”
1 Saan nga umdas ti “dumngeg” iti sasao dagiti padto iti Apocalipsis. Tapno magunggonaan a naan-anay, masapul a ‘tungpalen’ ti maysa no ania iti naisurat. (Apoc. 1:3) Ti panangipaima ti literatura ket umuna laeng nga addang nga agturong iti panagaramid ti ad-adalan. Apaman a masarakantayo dagidiay situtulok a dumngeg, masapul nga agsublitayo a dagus a tumulong kadakuada a mangadal iti ad-adu pay. Ania ti sawen no agsarungkartayo?
2 No nagsaokayo maipapan iti simboliko nga uppat a kumakabalio iti umuna a bisita, mabalin a rugian ti saritaanyo iti kastoy:
◼ “Idi napalabas, nagsaritaantayo maipapan ti panagsakay dagiti simboliko nga uppat a kumakabalio a nagresulta iti nakaro a riribuk ken rigat ditoy daga. Nakitatayon a napasamak daytoy iti imatangtayo a mismo. Adu dagiti agimtuod no kaano nga agngudo dagitoy a rigat tapno masagrap ti biag iti natalna a lubong. Ania ti opinionyo? [Palubosan a sumungbat.] Interesado dagiti disipulo ni Jesus iti sungbat daytoy a saludsod.” Basaen ti Mateo 24:3, a sadiay napataud ti saludsod, sa iti bersikulo 34, inted ni Jesus iti sungbat.
3 No napagsaritaanyo ti maipapan iti Pagarian ti Dios iti umuna nga isasarungkar, mabalinyo nga itultuloy babaen ti panangisaludsod:
◼ “Iti opinionmo, ania a kita ti gobierno ti makapennek iti amin a kasapulan ti sangatauan? [Palubosan a sumungbat. Basaen ti Jeremias 10:23.] Kas makitayo, saan nga inranta ti Dios a ti tao isut’ mangiturong iti bukodna nga ar-aramid. Dagiti gandat a mangaramid iti dayta nga awan tulong ti Dios isudat’ pakaigapuan dagiti kaaduan a problematayo. Ti Pagarian ti Dios isut’ kakaisuna a gobierno a makaipaay iti kasapulantayo.” Iturong iti panid 271 iti Panakirinnason a libro, ken salaysayen dagiti kasuratan iti baba ti umuna a subtema. Yurnos a maituloy ti diskusion iti sumaruno a lawas.
4 Nalabit a kayatyo a padasen daytoy a pangyusuat ti Nainkasuratan a diskusion:
◼ Ipakita ti ilustrasion iti panid 302 ti Apocalipsis a libro, sa mailawlawag: “Sagrapento ti sangatauan dagitoy a kasasaad inton maaramid ti pagayatan ti Dios ditoy daga a kas sadi langit. Nupay kasta, agamak dagiti dadduma a dagiti dakes a kasasaad ket agsublinto manen. Imposible dayta agsipud ta amin dagiti nadangkes ket maawandanton.” Basaen ti Salmo 37:10, 11. Awisen ti bumalay a manggundaway iti programatayo a panagadal iti Biblia tapno ad-adu pay iti maadalna.
5 No nakaibatikayo iti tract a “Biag iti Maysa a Natalna a Baro a Lubong”:
◼ Mabalinyo nga itudo ti ilustrasion iti parupana sa basaenyo ti parapo 1 iti baba ti paulo a “Ti Biag Idiay Baro a Lubong ti Dios.” Sa kunaenyo: “No kayattayo ti agbiag iti kasta a lubong, adda banag a nasken nga aramidentayo.” Basaen ti maudi a parapo, sa itukon ti Apocalipsis a libro.
6 Gapu ta ti panggeptayo ket ipasdek iti panagadal ti Biblia, yiskediul ti tiempo nga agsarungkar, ken agsagana a naimbag. Iti kastoy a wagas, pudno a matulongantayo dagiti nasingpet ti panagpuspusoda.—Apoc. 22:6, 7.