Apocalipsis—Tulbek ti Pudno a Kinaragsak
1 Iti Apocalipsis 1:3, imbaga ni apostol Juan kadatayo no kasano a masarakan ti ragsak. Insuratna: “Naragsak daydiay mangbasa a sipipigsa ken dagidiay dumngeg kadagiti sasao daytoy a padto, ken dagidiay mangtungpal kadagiti bambanag a naisurat iti dayta.” Ti libro nga Apocalipsis—Ti Grande a Tampokna Asidegen! tinulonganna ti adu a nangsarak iti nawadwad a ragsak. Addaantayo ti naimbag a rason a mangitukon dayta iti sabsabali.
2 Mabalinyo a rugian ti saritaan babaen iti daytoy a saludsod:
◼ “Ti kunayo mabalin a tarusan ti libro ti Biblia nga Apocalipsis, wenno agnanayon a misterio? [Palubosan a sumungbat.] Adu ti umanamong iti panangmatmatyo. Siputanyo ti kuna ti Biblia iti Apocalipsis 1:3. [Basaenyo.] Isu a mabalin a tarusan ti Apocalipsis, ket ti pannakaammo iti dayta mangyeg ti ragsak. Kasano a posible daytoy?” Repasuen dagiti kapanunotan iti parapo 2 iti panid 6, sa kunaen: “Idatag daytoy a publikasion ti bersikulo-por-bersikulo a pannakasalaysay ti libro nga Apocalipsis. Ragsakek nga ibati daytoy a kopia kadakayo.”
3 Idinto ta adu ti maseknan iti pannakaipaay dagiti material a kasapulanda, mabalin a mamataud ti interes daytoy:
◼ “Ania ti pagarupyo a kangrunaan a kasapulantayo? [Palubosan a sumungbat.] Adu ti mangibaga nga ad-adu pay a material a banag ti kasapulantayo.” Luktanyo ti panid 73 sa repasuen dagiti punto iti kahon a napauluan ti “Materialismo Kontra Sirib.” Ituloyyo a kunaen: “Ipakita daytoy a nalabes ti pannakaipaganetget kadagiti material a bambanag; ad-adda koma a maseknantayo kadagiti naespirituan a kasapulantayo.” Basaen ti Juan 17:3, sa ilawlawag no kasano a ti pannakaammo maipapan ti Dios isut’ mangiturong iti biag nga agnanayon. Itukon ti libro ken iyurnos ti panagsarungkar.
4 Gapu ta maseknan dagiti adu maipapan iti riribuk ti lubong, mabalinyo nga ipadas daytoy:
◼ “Tunggal tao a kasaok maseknan maipapan iti masakbayan. Marikna ti dadduma a papangulo ti lubong a dandanitayon iti baro a panawen ti talna. Ania ti makunayo iti dayta? [Palubosan a sumungbat.] Nupay kasta unay ti panangipamuspusan ti tao, kumarkaro ti kinaranggas ken riribuk iti sangalubongan. Ipalgak ti Biblia ti kakaisuna a manayon a solusion dagitoy a problema. [Basaenyo ti 2 Pedro 3:13. Luktan iti ilustrasion idiay panid 302, sayo ilawlawag no kasano nga iyeg ti Pagarian ti Dios ti manayon a talna ken talged ditoy daga.] Tumulong daytoy a publikasion kadakayo a kumita no kasano a matagiragsakyo ti biag nga agnanayon iti sidong ti turay iti Pagarian ti Dios.”
5 No adda madanonyo nga okupado ket masapul nga apagbiitkayo, mabalinyo a kunaen daytoy:
◼ “Idinto ta bassit laeng ti tiempoyo, kayatko laengen nga ibati kadakayo daytoy tract a napauluan iti Daytoy Kadi a Lubong Makalasatto? [Ipakita ti panid 6 sa basaen ti Apocalipsis 21:3, 4.] Paregtaenkayo a mangbasa iti dayta. Inton maminsan a dumagasak, kayatkonto nga ammuen no ania ti makunayo iti dayta.”
6 Bayat nga itukontayo ti Apocalipsis—Ti Grande a Tampokna Asidegen! iti Pebrero, awan duadua nga adu ti makagun-od iti ragsak babaen ti panangusigda ti kaipapanan dagiti nakaskasdaaw a padto iti Apocalipsis.—Prov. 3:13.