Panangiparang a Makaallukoy iti Sungbat
1 Ti panangiparang a makaallukoy iti sungbat isu dagidiay makaipakita no kasano a ti suheto ket pakaseknan iti bumalay, maysa a banag a kasapulan wenno mausarna. Tulongan ti bumalay a makabigbig, “Ramanennak daytoy.” No maisagana ti panangiparang, saludsodan iti bagitayo: ‘Ania a suheto ti pakaseknan dagiti tattao iti teritoriak? Ania dagiti kasapulanda? Kasanok nga ipresenta ti mensahe nga adda iti panunot ni Jehova ti kasapulanda?’ Nailista ditoy baba ti sumagmamano a bambanag a mapainteres iti tattao kadagitoy nga aldaw. Mabalinyo kadi nga usaren ti maysa kadagitoy iti panangiparangyo? Siputanyo met no kasano a dagiti puntos iti kaudian a Pagwanawanan ket maisinggalutda.
2 Maseknan Maipapan iti Kinakurang ti Ragsak: “Makisasaokami kadagiti tattao a maseknan iti problema ti biag iti komunidadtayo. Adu dagiti saan a napudno a naragsak iti papelda ti biag. Pagarupenyo kadi nga addanto pudno a naragsak a panagbiag? [Palubosan a sumungbat.] Maysa kadagiti tulbek ti kinaragsak isut’ masarakan iti Biblia ditoy Apocalipsis 1:3. [Basaen.] Ti pannakaawat no ania iti kunaen ti Apocalipsis maipapan iti masanguanan isut’ mangyeg kadakayo ti ragsak. Siputanyo ti maysa kadagitoy a padto.” Mabasa ti Apocalipsis 21:3, 4 ken maiturong idiay panid 14, parapo 23 iti Abril 1, 1992 a Pagwanawanan.
3 Maseknan Maipapan iti Masakbayan: “Ikagkagumaanmi nga iranud kadagiti kaaruba ti positibo a panangmatmat iti masakbayan. Kasta aya ti panangmatmatyo iti biag? [Palubosan a sumungbat.] Maitunos iti Biblia, adda rasontayo nga agpositibo no aramidentayo ti nakuna iti Apocalipsis 1:3.”
4 Maseknan Maipapan iti Naimbag a Salun-at: “Adu iti sangakaarubaantayo ti nasaldet maipapan iti panangtaginayon ti naimbag a salun-at. Nupay kasano ti kaannadtayo, nupay kasta, agsagsagabatayo latta iti sakit. Kayatyo kadi ti agbiag iti maysa a lubong a tunggal maysa ket agrag-o iti perpekto a salun-at ken kinaganaygay? Ipakita ti Biblia nga iti mabiiten ket ipaay ti Dios dayta.” Basaen ti Isaias 35:5, 6 sa maiturong iti parapo 7 ken 8 idiay pinanid 10 ken 11 ti Abril 1 a Pagwanawanan maipapan iti parabor ti biag bayat iti Sangaribo a Tawen a Turay ni Kristo.
5 Maseknan Maipapan iti Polusion ken Arubayan: “Iti pannakisaritami kadagiti kaarubatayo, nasarakanmi nga adu ti maseknan maipapan iti angin, danum, ken taraon a narugitan. Kunaenyo aya a dagiti gobierno ket kabaelanda a pasardengen daytoy? [Palubosan a sumungbat.] Makaparegta a makita iti Biblia a pinanggep ti Dios a dagiti naemma ket aramidenda a paraiso daytoy daga, kas kunaen ti Isaias 65:17-25.” Kalpasanna maiturongda idiay parapo 11 iti panid 11 ti Abril a Pagwanawanan.
6 Bayat a ganetgetanyo a danonen iti puso dagiti dumngeg kadakayo, dagidiay agbisin ti kinapudno ken kinalinteg isudat’ mangipangag.—Mat. 5:3, 6.