Pagtuladan a Presentasion

Panangirugi iti Panangyadal iti Biblia iti Umuna a Sabado iti Nobiembre

“Interesado ti kaaduan kadatayo iti nasayaat a gobierno. Iti panagkunayo, ania a kita ti gobierno ti makabael a mangrisut kadagiti problema dagiti tattao? [Palubosanyo a sumungbat.] Panunotenyo no ania ti kuna daytoy.” Itedyo iti bumalay ti Nobiembre 1 a Pagwanawanan sa usigenyo ti material iti babaen ti umuna a subtitulo iti panid 16 ken ti uray maysa laeng a teksto. Ipaimayo dagiti magasin sa ibagayo nga agsublikayto tapno pagsaritaanyo ti sungbat ti sumaruno a saludsod.

Ti Pagwanawanan Nobiembre 1

“Kayatmi a maammuan ti opinionyo. No maikkankayo iti gundaway nga agsaludsod iti Dios, ania ti isaludsodyo? [Palubosanyo a sumungbat.] Sigun ken Jesus, nasayaat a birokentayo dagiti sungbat dagiti napasnek a saludsodtayo. [Basaenyo ti Mateo 7:7.] Ipakita daytoy a magasin no ania ti sungbat ti Biblia kadagitoy a tallo a napapateg a saludsod.” Ipakitayo iti bumalay dagiti saludsod iti baba ti panid 3.

Agriingkayo! Nobiembre

“Simmarungkarkami ta adda napateg nga impormasion a kayatmi nga iranud kadagiti pamilia. Gagangay itan dagiti pamilia nga addaan iti agsolsolo a nagannak. Iti panagkunayo, ad-adu kadi ti problemada ngem kadagiti kompleto a pamilia? [Palubosanyo a sumungbat.] Adu a nagannak ti nakasarak iti praktikal a balakad iti Biblia. [Basaenyo ti 2 Timoteo 3:16.] Ipakita daytoy a magasin ti sumagmamano a singasing a makatulong kadagiti agsolsolo a nagannak tapno agballigida a mangibaklay iti nadagsen nga annongenda.”