No Kasano a Naaddaan ni Anna iti Talna

ADDA matalek a babai a nagkararag iti napigsa tapno idaydayawna ni Jehova. Nariknana nga isut’ intan-ok ti Dios manipud iti tapuk, ken pinagbalinna a naragsak ti dati a nakas-ang a kasasaadna.

Ti nagan dayta a babai ket Anna. Ania ti makagapu iti naisangsangayan a panagbalbaliw ti riknana? Apay a nakaragragsaken? Kasano a magunggonaantayo iti kapadasanna? Tapno maammuantayo dagiti sungbat kadagitoy a saludsod, usigentayo ti pakasaritaan ni Anna.

Nariribuk a Pamilia

Ni Anna ket maysa kadagiti dua nga assawa ti maysa a Levita a ni Elcana, nga agnanaed iti teritoria ti Efraim. (1 Samuel 1:1, 2a; 1 Cronicas 6:33, 34) Nupay ti poligamia ket saan a paset ti orihinal nga urnos ti Dios agpaay iti sangatauan, impalubos dayta ti Linteg Mosaiko ken adda dagiti linteg maipapan iti dayta nga urnos. Ti pamilia ni Elcana ket agdaydayaw ken Jehova, ngem ti panagasawa iti nasursurok ngem maysa ket masansan a nariribuk kas iti napasamak iti biag ti pamilia ni Elcana.

Lupes idi ni Anna idinto ta adu ti annak ni Penina, ti sabali pay nga asawa ni Elcana. Ni Penina ket karibal ni Anna.​—1 Samuel 1:2b.

Kadagiti Israelita a babbai, ti kinalupes ket maibilang idi a pakaibabainan ken maysa pay ketdi a pagilasinan a di maikari ti maysa iti imatang ti Dios. Ngem awan ti mangipasimudaag a ti kinalupes ni Anna ket ebidensia nga awan ti anamong ti Dios kenkuana. Ngem imbes a liwliwaenna ni Anna, inusar ni Penina ti mismo a kabaelanna nga agpasngay tapno pagbalinenna a nakakaasi ti karibalna.

Panagdaliasat nga Agturong iti Santuario ni Jehova

Agpapan pay kadagitoy a riribuk, tinawen nga agdaliasat ti pamilia ni Elcana nga agturong iti santuario ni Jehova idiay Silo tapno agidatonda kadagiti sakripisio.a Pagpagnaenda la idi daytoy a panagdaliasat iti agarup 60 a kilometro nga agpapan agawid. Narigat dagidi a gundaway nangnangruna ken ni Anna. Ngamin, ti sumagmamano a paset ti pakikaykaysa a sakripisio ket maipaay ken Penina ken iti annakna, idinto ta maymaysa a paset ti maawat ni Anna. Inusar ni Penina dagidi a gundaway tapno rurodenna ni Anna. Nariribukan ni Anna agsipud ta kasla ket tay ‘sinerraan ni Jehova ti aanakanna.’ Tinawen a kasta ti ar-aramiden ni Penina, isu nga agsangit ken saan a mangan ni Anna. Nagbalin a naliday dagiti panagdaliasat a rumbeng koma a naragsak para kenkuana. Nupay kasta, simmurot latta ni Anna kadagitoy a panagdaliasat nga agturong iti santuario ni Jehova.​—1 Samuel 1:3-7.

Maamirisyo kadi no kasano a nangipaay ni Anna iti naimbag nga ulidan agpaay kadatayo? Ania ti aramidenyo no malmaldaangkayo? Isinsinayo kadi ti bagiyo ken saankayon a makitimpuyog kadagiti kapammatianyo? Saan a kasta ti inaramid ni Anna. Inyugalina ti makitimpuyog kadagiti agdaydayaw ken Jehova. Nupay nariribuk dagiti kasasaad, kasta met koma ti aramidentayo.​—Salmo 26:12; 122:1; Proverbio 18:1; Hebreo 10:24, 25.

Inkagumaan ni Elcana a liwliwaen ni Anna ken pinaregtana a mangyebkas kadagiti pakasikoranna. Kastoy ti inyimtuodna: “Anna, apay nga agsangitka, ken apay a saanka a mangan, ken apay a maladingitan ta pusom? Saanak aya a naim-imbag kenka ngem iti sangapulo nga annak a lallaki?” (1 Samuel 1:8) Nalabit saan nga ammo ni Elcana ti kinaulpit ni Penina, ket mabalin a kaykayat laengen ni Anna ti agibtur imbes nga agreklamo. Aniaman ti kasasaad, ti naespirituan ti panagpampanunotna a ni Anna sinapulna ti talna babaen ti panagkararagna ken Jehova.

Nagsapata ni Anna

Dagiti pakikaykaysa a sakripisio ket makan iti santuario ni Jehova. Kalpasan a rimmuar ni Anna iti siled a panganan, napan nagkararag iti Dios. (1 Samuel 1:9, 10) “O Jehova ti buybuyot,” impakaasina, “no kumitakanto a di bumurong iti pannakaparigat ti adipenmo a babai ket pudno a lagipennak, ket saanmonto a lipaten ti adipenmo a babai ket pudno a mangipaayka iti adipenmo a babai iti anak a lalaki, ipaaykonto ken Jehova iti amin nga al-aldaw ti panagbiagna, ket awanto ti labaha nga umay iti rabaw ti ulona.”​—1 Samuel 1:11.

Espesipiko ti kararag ni Anna. Kiniddawna a maaddaan iti maysa nga anak a lalaki ket insapatana a maidedikar ken Jehova kas maysa a Nazareo inggat’ tungpal biag. (Numeros 6:1-5) Ti kasta a sapata ket rumbeng nga anamongan ni lakayna, ket dagiti inaramid ni Elcana idi agangay ti mangipakita nga inanamonganna ti kari ti patpatgenna nga asawa.​—Numeros 30:6-8.

Ti wagas ti panagkararag ni Anna ti namkuatan ti Nangato a Padi a ni Eli a mangipagarup nga isu ket nabartek. Agpigpigerger ti bibig ni Anna, ngem saan a mangngeg ti timekna, agsipud ta agkarkararag a siuulimek. Naisangsangayan ti kinapasnek ti kararagna. (1 Samuel 1:12-14) Agasenyo ti rikna ni Anna idi inasitgan ni Eli sa tinubngar ken imbagana a nabartek! Nupay kasta, siraraem a sinungbatanna ti nangato a padi. Idi naamiris ni Eli nga agkarkararag ni Anna “manipud kinaruay ti pannakaseknan[na] ken pannakasemsem[na],” kinunana: “Ited koma ti Dios ti Israel ti dawatmo a kiniddawmo kenkuana.” (1 Samuel 1:15-17) Kalpasanna, pimmanawen ni Anna sa napan nangan, ket “saanen a nagdanag ti rupana.”​—1 Samuel 1:18.

Ania ti masursurotayo kadagita a pasamak? No ikararagtayo ken Jehova dagiti pakaseknantayo, mabalintayo nga ipakaammo kenkuana no kasano ti panagriknatayo ken naimpusuan nga agkiddawtayo. No awanen ti maaramidantayo tapno marisut ti parikut, ipabiangtayo daytan kenkuana. Awanen ti nasaysayaat pay nga aramidentayo.​—Proverbio 3:5, 6.

Kalpasan ti napasnek a panagkararagda, posible unay a maaddaan dagiti adipen ni Jehova iti talna a kas iti naadda ken ni Anna. Maipapan iti kararag, kastoy ti insurat ni apostol Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) No ipalladawtayo ti dadagsentayo ken Jehova, masapul a bay-antayo nga isunan ti makaammo iti dayta. Kalpasanna, kas ken Anna, saanen a kasapulan a masikorantayo pay.​—Salmo 55:22.

Anak a Lalaki a Naipabulod ken Jehova

Inturong itan ti Dios ti atensionna ken Anna; nagsikog ken nagpasngay iti anak a lalaki. (1 Samuel 1:19, 20) Maysa daytoy kadagiti manmano a pasamak a nailanad iti Biblia a ti Dios ket timmulong iti pannakaipasngay ti maysa nga agbalin nga adipenna. Ni Samuel nga anak a lalaki da Elcana ken Anna ket naituding nga agbalin a propeta ni Jehova. Napateg ti akemna tapno ti Israel ket mangrugin a maaddaan iti ari.

Awan duadua a sinursuruan ni Anna ni Samuel maipapan ken Jehova sipud kinamaladagana. Ngem nalipatanna kadin ti insapatana? Saan a pulos! “Apaman a mapusot ti ubing, ipankonto, ket agparangto iti sango ni Jehova ket agnaed sadiay agingga iti tiempo a di nakedngan,” kinunana. Idi napusoten ni Samuel, nalabit idi agtawenen iti tallo wenno nasursurok, isu ket impan ni Anna idiay santuario ni Jehova tapno agnaed sadiay, kas iti inkarina.​—1 Samuel 1:21-24; 2 Cronicas 31:16.

Kalpasan a nangipaay da Anna ken ni lakayna iti daton ken Jehova, impanda ni Samuel ken ni Eli. Mabalin a kibkibinen idi ni Anna ti baritona bayat a kinunana ken Eli: “Dispensarennak, apok! Babaen ti biag ta kararuam, apok, siak daydi babai a sitatakder a kaduam iti daytoy a lugar tapno agkararag ken Jehova. Mainaig idi itoy nga ubing nga inkararagko nga ited kaniak ni Jehova ti dawatko a kiniddawko kenkuana. Ket siak, kas pannakabatangko, impabulodko ken Jehova. Iti amin nga al-aldaw a kaaddana, isu maysa a nakiddaw maipaay ken Jehova.” Iti kasta a wagas a nangrugin ti inggat’ tungpal biag a naisangsangayan a panagserbi ni Samuel iti Dios.​—1 Samuel 1:25-28; 2:11.

Iti panaglabas ti tiempo, ni Anna malaglagipna la ketdi ni Samuel. Kuna ti Biblia: “Iyaramidan ni inana iti awan manggasna a lambon a bassit, ket impanna kenkuana iti tinawentawen idi simmang-at a kadua ti asawana tapno isakripisio ti tinawen a sakripisio.” (1 Samuel 2:19) Sigurado a kanayon nga ikarkararagan ni Anna ni Samuel. Kadagiti tinawen a panangsarungkarna, awan duadua a pinaregtana nga agtalinaed a matalek iti panagserbina iti Dios.

Naminsan, binendisionan ni Eli dagiti nagannak ni Samuel ta kastoy ti imbagana ken Elcana: “Ni Jehova mangituding koma kenka iti putot manipud itoy nga asawa a babai a mangsandi iti naipabulod a banag, a naipabulod ken Jehova.” Maitunos kadagita a sasao, naparaburan da Anna ken Elcana iti tallo pay nga annak a lallaki ken dua nga annak a babbai.​—1 Samuel 2:20, 21.

Anian a nagsayaat nga ulidan ti impasdek da Elcana ken Anna para kadagiti Kristiano a nagannak! Adu nga inna ken amma ti situtulok a nangipabulod kadagiti annakda ken Jehova, no ar-arigen, babaen ti panangparegtada kadakuada nga agserbi iti amin-tiempo a ministerio nga adayo iti dennada. Makomendaran dagita a naayat a nagannak kadagiti ar-aramidenda a panagsakripisio. Ket sigurado a gunggonaan ida ni Jehova.

Ti Naragsak a Kararag ni Anna

Anian ti ragsak ni Anna a sigud a lupes! Manmano laeng ti nailanad iti Biblia a kararag dagiti babbai. Ngem iti kasasaad ni Anna, dua kadagiti kararagna ti nailanad. Ti immuna ket aglaon kadagiti sentimientona idi mariribukan ken marigrigatan, ken ti maikadua ket idi siraragsak a nagyaman ken Jehova. “Ti pusok agrag-o ken Jehova,” inrugi ni Anna. Nagrag-o ta “uray ti lupes nagpasngay,” isu nga intan-okna ni Jehova kas “Manangitan-ok, Manangpatakder iti daydiay nanumo manipud tapok.” Wen, “manipud abut ti dapo ingatona daydiay napanglaw.”​—1 Samuel 2:1-10.

Ti naipaltiing a salaysay maipapan ken Anna ti mangipakita a normal laeng a masairtayo gapu kadagiti kinaimperpekto wenno nakas-ang a kababalin ti sabsabali. Nupay kasta, masapul a ditay ipalubos a dagita a pakasuotan ti mangpukaw iti rag-otayo nga agserserbi ken Jehova. Isu ti Naindaklan a Managdengngeg iti kararag a mangipangag kadagiti ikkis dagiti matalek a tattaona, nga isalakanna ida manipud iti rigat ken ikkanna ida iti aglaplapusanan a talna ken dadduma pay a bendision.​—Salmo 22:23-26; 34:6-8; 65:2.

[Footnote]

[Ladawan iti panid 17]

Ni Anna impabulodna ni Samuel ken Jehova