Umadanika iti Dios
Ammona ti “Puso ti Annak ti Sangatauan”
ADDA kadi siasinoman a saan nakapasar iti rigat gapu iti napalalo a parikut ken karit iti biag? No dadduma, kasla awan ti makatarus kadagiti pakarigatan wenno pakaburiborantayo. Ngem ni Jehova a Dios naan-anay a matarusanna dagiti riknatayo. Maliwliwatayo kadagiti sasao ni Solomon a mabasa iti 2 Cronicas 6:29, 30.
Idadauluan ni Solomon ti kararag bayat ti inagurasion ti templo idiay Jerusalem idi 1026 B.C.E. Iti kararagna a nalabit agpaut iti sangapulo a minuto, indaydayawna ni Jehova kas ti nasungdo a Dios, ti Manangitungpal iti kari, ken ti Managdengngeg iti kararag.—1 Ar-ari 8:23-53; 2 Cronicas 6:14-42.
Kiniddaw ni Solomon a denggen koma ti Dios ti panagpakpakaasi dagiti adipenna. (Bersikulo 29) Nupay dinakamat ni Solomon ti adu a pakarigatan (bersikulo 28), kinunana nga ammo ti tunggal agdaydayaw ti “bukodna a saplit” ken mariknana ti “bukodna a rigat.” Mabalin nga agduduma ti parikut ken pakaringgoran ti tunggal maysa.
Aniaman ti kasasaad, manamnama dagiti managbuteng iti Dios a saanda nga agmaymaysa a mangibaklay kadagiti pakarigatanda. Iti kararag ni Solomon, pampanunotenna ti indibidual nga adipen ti Dios a mabalin a matignay a ‘mangyukrad kadagiti dakulapna,’ nga umadani ken Jehova buyogen ti naimpusuan a kararag.a Nalabit malagip ni Solomon ti imbaga ti mariribukan unay idi nga amana a ni David: “Ipalladawmo ti dadagsenmo ken Jehova.”—Salmo 55:4, 22.
Kasano a sungbatan ni Jehova dagiti napasnek a panagpakaasi iti tulong? Impakaasi ni Solomon ken Jehova: “Denggem koma manipud langlangit, ti disso a pagnanaedam, ket mamakawankanto ket itdem iti tunggal maysa ti maitunos iti amin a daldalanna.” (Bersikulo 30) Ammo ni Solomon a ti “Managdengngeg iti kararag” ket maseknan kadagiti adipenna, saan laeng a kas grupo no di ket kas indibidual pay. (Salmo 65:2) Ipaay ni Jehova ti tulong a kasapulan, agraman ti pannakapakawan ti nakabasol a naimpusuan nga agsubsubli iti Dios.—2 Cronicas 6:36-39.
Apay nga agtalek ni Solomon a sungbatan ni Jehova ti panagpakpakaasi ti agbabbabawi nga adipenna? Itultuloy a kunaen ni Solomon iti kararagna: “Agsipud ta ammom [Jehova] ti pusona (ta sika laeng ti makaammo unay iti puso ti annak ti sangatauan).” Pagaammo ni Jehova ti saplit wenno rigat a sagsagabaen ti tunggal matalek nga adipenna, ket maseknan iti pakarigatanda.—Salmo 37:4.
Maliwliwatayo iti kararag ni Solomon. Mabalin a saan a naan-anay a matarusan dagiti padatayo a tao no ania ti riknatayo—ti ‘bukodtayo a saplit’ ken ‘bukodtayo a rigat.’ (Proverbio 14:10) Ngem ammo ni Jehova ti linaon ti pusotayo, ken talaga a maseknan kadatayo. No iyebkastayo kenkuana ti linaon ti puso ken panunottayo babaen iti kararag, nalaklakatayto a madaeran dagiti parikuttayo. Kunaen ti Biblia: “Iyallatiwyo kenkuana ti isuamin a pakaringgoranyo, agsipud ta isu maseknan kadakayo.”—1 Pedro 5:7.
[Footnote]
a Idi tiempo ti Biblia, ti ‘panangyukrad kadagiti dakulap,’ wenno panangitag-ay iti ima a nakaukrad iti ngato dagiti dakulap, ket postura ti panagkararag.—2 Cronicas 6:13.