Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w90 9/15 pp. 16-20
  • Bendituenyo ti Nasantuan a Nagan ni Jehova!

Awan video-na ti napilim.

Pasensiakan, adda problema iti pannakai-load ti video.

  • Bendituenyo ti Nasantuan a Nagan ni Jehova!
  • Ti Pagwanawanan Mangibumbunannag iti Pagarian ni Jehova—1990
  • Subtitulo
  • Umasping a Material
  • Saritaen ti Panagari ni Jehova
  • Saan nga Agmintis ti Panangsaranay ni Jehova
  • Ni Jehova Salaknibanna Dagidiay Agayat Kenkuana
  • Itultuloyyo a Bendituen ti Nasantuan a Nagan ni Jehova
  • Naruay ti Nasungdo nga Ayat ni Jehova
    Ti Pagwanawanan Mangibumbunannag iti Pagarian ni Jehova—2004
  • Ni Jehova Maikari iti Agnanayon a Dayaw
    Ti Pagwanawanan Mangibumbunannag iti Pagarian ni Jehova—1990
  • Di Matukod ti Kinanaindaklan ni Jehova
    Ti Pagwanawanan Mangibumbunannag iti Pagarian ni Jehova—2004
  • Apay a Pagserbian ni Jehova?
    Ti Pagwanawanan Mangibumbunannag iti Pagarian ni Jehova—1993
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—1990
w90 9/15 pp. 16-20

Bendituenyo ti Nasantuan a Nagan ni Jehova!

“Ti ngiwatko agsaonto iti panangidaydayaw ken Jehova; ket amin a lasag bendituenna koma ti nasantuan a naganna iti panawen a di nakedngan, uray iti awan inggana.”​—SALMO 145:21.

1, 2. (a) Iti ania a pamay-an a kinarit ni Satanas ti panagturay ti Dios? (b) Ania a salsaludsod ti timmaud maipapan ti Salmo 145:11-21?

AWAN duadua ni Jehova ti Soberano ti Uniberso. Ngem kinarit ni Satanas ti kinalinteg ken kinaumiso ti kinaturay ti Dios. (Genesis 2:16, 17; 3:1-5) Ti Diablo nagduaduaanna met ti kinatarnaw amin nga ad-adipen ti Dios idiay langit ken ditoy daga. (Job 1:6-11; 2:1-5; Lucas 22:31) Gapu itoy nangted tiempo ni Jehova tapno makita amin a nasaririt a parsua ti dakes a bunga ti iyaalsada iti panagturayna ken tapno maipakita no sadinot’ pagtaktakderanda kadagitoy nga isyu.

2 Ti Salmo 145 matulongannatayo a mangalat’ natibker a takder a maipaay iti panagturay ti Dios. Kasano? Aniat’ kuna ni David maipapan iti kinaari ni Jehova? Ken kasanot’ panangtrato ti Dios kadagiti manangitandudona? Dagiti makatulong a sungbat agparangda iti Salmo 145:11-21.

Saritaen ti Panagari ni Jehova

3. No ti kinaari ni Jehova nasudi kadatayo, aniat’ aramidentayo?

3 Ti panagturay ni Jehova isut’ dakkel a pakaseknan ken David, a nagkuna: “Sasawendanto ti dayag ti pagariam, ken sarsaritaendanto ti pannakabalinmo, tapno ipakaammoda kadagiti annak dagiti tattao dagiti nabileg nga ar-aramidna ken ti dayag ti nadaeg a pagarianna.” (Salmo 145:11, 12) Dagiti tattao pagsasaritaanda dagiti bambanag a makapainteres kadakuada. Gapuna saritaen ti maysa a tao maipapan ti pamiliana, ti pagtaenganna, dagiti apitna. “Ti naimbag a tao iti nasayaat a gameng ti pusona iruarna ti naimbag,” kuna ni Jesus. (Lucas 6:45) No ti panagturay ti Dios nasudi iti pusotayo, ikararagtay ti iyaay ti Pagarianna, ken sawentayo kadagiti dadduma maipapan ti kinahustisia, talna, ken kinalinteg nga agsaknapto iti panagturayna. Idaydayawtayo ni Jehova kas ti “Ari ti pampannawen,” ken saritaentayo ti pannakaiyebkas ti kinasoberanona babaen iti Mesianiko a Pagarian iti im-ima ti Anakna a dungdungnguen, a ni Jesu-Kristo. (Apocalipsis 15:3; Isaias 9:6, 7) Anian a pribilehio ti panagsao maipapan iti nailangitan a dayag ti pagarian ni Jehova, a dandanin maipamatmat iti kinaimnas ti naindagaan a paraiso a napunno kadagiti perpekto a naragsak a parparsua!​—Lucas 23:43.

4. Kaano a maaddaantay iti okasion a mangisasao ti “pannakabalin” ni Jehova, ken kasanotay a masustentuan iti kasta nga aramid?

4 Ti panangapresiar tignayennatay met nga agsao maipapan ti “pannakabalin” ni Jehova. Nupay “isu ti mangnibinibi iti pannakabalin,” saanna pulos ab-abusuen dayta. (Job 37:23) Inusarna ti pannakabalinna a nangparsua iti daga ken sangatauan ken watwatenna dayta a mangdadael kadagiti managdakdakes. Addaantay gundaway nga agsao maipapan ti pannakabalin ti Dios no iwaragawagtayo ti naimbag a damag. Ken ditay kadi agyaman a daytoy nga ultimo a Gubuayan ti bileg pinapigsanatayo a mangaramid itoy a trabaho? (Isaias 40:29-31) Wen, kas dagiti Saksi ni Jehova, mapappapigsatayo iti sagrado a serbisio babaen iti pigsa ken espiritu ti Dios. Babaen laeng iti daytoy a pamay-an a ti mensahe ti Pagarian maiwarwaragawag iti intero a daga buyogen ti nakaskasdaaw a panagballigi.​—Salmo 28:7, 8; Zacarias 4:6.

5. Gapu ta umariwekwek dagiti di makaammo kadagiti “nabileg nga ar-aramid” ni Jehova, aniat’ rebbengtay nga aramiden?

5 Adda pannakasapul kadatayo nga ipakaammo kadagiti annak ti tattao dagiti “nabileg nga ar-aramid” ni Jehova, kas panangibaga dagiti Israelita kadagiti annakda ti maipapan iti panangispal ti Dios kadakuada manipud panangkayaw dagiti Egipcio. (Exodo 13:14-16) Dagiti tattao agibangondat’ monumento kadagiti tattao nga ibilangda dagiti ar-aramidda a nasasayaat, ngem kasano kaadu ti makaammo kadagiti mannakabalin nga ar-aramid ti Dios? Kas panagkuna ti maysa nga eskolar: “Ikitikitda ti ar-aramid dagiti banuarda kadagiti bronse, ngem dagiti nadayag nga ar-aramid ni Jehova naisuratda iti darat, ket ti allon ti panawen punasenna ida manipud agdama a memoria.” Dagidiay nga ar-aramid saanda a pudno a napunas, nupay saan a pagaammo kadagiti umariwekwek. Gapuna iti intay panagbalaybalay, no mangidadaulo kadagiti panangyadal ti Biblia kadagiti pagtaengan, ken kadagiti dadduma pay nga okasion, agsaotay koma a sireregta maipapan kadagiti mannakabalin nga ar-aramid ti Dios.

6. (a) Iti ania nga okasion adu a tawtawen ti napalabasen a nagsayaat pannakaiyebkas ti naregta nga espiritu a panangitungtungpaltay ti ministeriotayo? (b) Iti kababagasna, aniat’ naikuna idi 1922 maipapan iti panangipablaak ti Pagarian?

6 Masapul a sireregtatay met a mangipakaammo iti dayag ti pagarian ni Jehova. Ti kasta a kinaregta iti serbisio ti Pagarian pudno a makita, idi 1922, idi a ni J. F. Rutherford, nga isu idi ti presidente ti Watch Tower Society, nagpalawag kadagiti kumbensionista idiay Cedar Point, Ohio, ket kunana: “Nanipud 1914 innalan ti Ari ti kinadayag ti pannakabalinna . . . Ti pagarian ti langit asidegen; ti Ari agturturayen; ti imperio ni Satanas marmarpuogen; minilmilion a sibibiag itan didanto matayen. Patienyo aya dayta? . . . Ngarud agsublikayo iti tay-ak, O dakay nga annak ti kangatuan a Dios! Isuotyo ti kabal! Agtaknengkayo, agtalinaed a siririing, agaktibo, agmaingelkayo. Agbalin a matalek ken pudno a sasaksi ti Apo. Umabantekayo iti pannakidangadang agingga nga amin a tedda ti Babilonia aglangalangen. Ipukkawyo a silalawa ti mensahe. Masapul a ti lubong maammuanna a ni Jehova isut’ Dios ket ni Jesu-Kristo isut’ Ari dagiti ar-ari ken Apo dagiti ap-apo. Isu daytoy ti aldaw ti amin nga al-aldaw. Kitaenyo, ti Ari agturturayen! Dakayo dagiti manangipablaakna. Gapuna ipablaakyo, ipablaakyo, ipablaakyo, ti Ari ken ti pagarianna.”

7. Kasanot’ rebbeng a panagriknatayo maipapan iti trabahotayo kas manangibumbunannag ti Pagarian?

7 Anian a rag-o ti ‘agpanunot iti nagan ti Dios,’ nga ibaga kadagiti dadduma maipapan ti kinaarina, ken ti panangipablaak ti Mesianiko a Pagarian ti Anakna a dungdungnguen! (Malakias 3:16) Kas dagiti manangiwaragawag ken manangitandudo ti Pagarian, tagipatgentay ti pribilehio a panangiwaragawag ti naimbag a damag ken panangiturong ti puspuso dagiti dadduma iti Dios, ken Kristo, ken iti Pagarian. Iti unegtayo, adda koma ti umap-apuy a tarigagay a mangibaga kadagiti dadduma maipapan iti nadayag a kinaranga ti kinaari ni Jehova.​—Idiligyo ti Jeremias 20:9.

8. (a) Iti aniat’ nakairepresentaran ti kinaari ni Jehova itatta? (b) Apay maikuna a ti Dios addaan panagturay a “mataginayon kadagiti amin a kaputotan”?

8 Rebbeng a matignaytayo a mangiyanunsio ti Pagarian ti Dios buyogen ti dakkel a kinaregta, ta sumaruno a kinuna ni David: “Ti pagariam agnanayon a pagarian, ket ti panagturaymo mataginayon kadagiti amin a kaputotan.” (Salmo 145:13) Bayat ti panagtultuloy ti panagmennamenna ti salmista iti pagarian ni Jehova, sinukatanna dagiti pronumbre manipud “na” a nagbalin a “mo,” nga iturturong ti karkararagna a direkta iti Dios. Siempre, ti panagturay ni Jehova kas nairepresentar iti Mesianiko a Pagarian saanna a sukatan ti agnanayon a pagarian wenno kinaari ti Dios. Kinapudnona, inton maitag-ayen ti natulnog a sangatauan iti kinaperpekto, iyawatton ni Kristo ti Pagarian ken Amana. (1 Corinto 15:24-28) Gapuna ti Dios talaga nga addaan panagturay “kadagiti amin a kaputotan.” Ni Jehova ti Ari idi naparsua ni Adan ken addaanto pay ti panagturay iti intero a nalinteg a tattao iti agnanayon.

9. Idiay Salmo 145, aniat’ makuna maipapan iti bersikulo a nangrugi iti letra a Hebro a nun?

9 Iti daytoy acrostic a salmo, inikkat ti Masoretic a teksto ti bersikulo a mangrugi iti letra a nun iti Hebreo. Ngem maitunos iti Griego a Septuagint, ti Syriac a Peshitta, ken ti Latin a Vulgate, maysa a manuskrito a Hebreo mabasa: “Ni Jehova matalek iti amin a sasaona, ken naayat a naasi [wenno, “nasungdo”] iti amin nga aramidna.” (New World Translation of the Holy Scriptures​—With References, footnote) Tungpalen ti Dios amin a karkarina ken nasungdo, naayat, ken naasi kadagiti isuamin a mangapresiar ti kinaimbagna.​—Josue 23:14.

Saan nga Agmintis ti Panangsaranay ni Jehova

10. Kasano a ti Dios ‘saranayennatayo’?

10 Ti Ari nga Awan Inggana dinanto liwayan ti kasasaad dagiti ad-adipenna. Gapu itoy, maikuna ni David: “Ni Jehova saranayenna amin a matuang, ken batakenna amin dagiti maparukob.” (Salmo 145:14) Nanipud pay ken Abel, sinaranayen ni Jehova dagiti managdaydayawna. No mabaybay-antayo, mamin-adu a matuangtayo kadagiti pakadagdagsenantayo. Awan umdas a pigsatayo a mangibtur iti amin nga ay-ay ti panagbiag ken ti pannakaidadanes a dumteng kadatayo kas ili ti Dios, ngem saranayennatayo ni Jehova. Ti porma ti verbo a Hebreo ditoy ipamatmatna a ti Dios ket agtultuloy a ‘saranayennatayo.’ Maikuna met ditoy a ni Juan a Mammautisar ken ti mismo nga Anak ti Dios timmulongda iti moral a nangibangon kadagiti natuang a managbasol. Idi dagitoy a tattao nagbabawida ken nagbalinda nga ad-adipen ni Jehova, tinagiragsakda ti nakaskasdaaw a bendision ti nadiosan a pannaranay.​—Mateo 21:28-32; Marcos 2:15-17.

11. Iti ania a pamay-an a ni Jehova ‘batakenna amin dagiti maparukob’?

11 Makaliwliwa a maammuan a ni ‘Jehova batakenna amin dagiti maparukob’ kadagiti nadumaduma a pakasuotan. Paragsakenna dagidiay naawanan namnama kadatayo, liwliwaenna dagiti malmaldaangan, ken tulongannatayo nga agsao a situtured no maidadanestayo. (Aramid 4:29-31) Dinanto pulos ipalubos a dagiti pakadagsenantayo ti mangdadael kadatayo no la ket ta awatentay ti tulongna. (Salmo 55:22) Ngarud, kas iti daydiay “anak a babai ni Abraham” a “napakubbo” ngem pinaimbag ni Jesus iti pisikal, rebbengtay nga ‘idaydayaw ti Dios’ inton siaayat a bangonennatayo iti naespirituan. (Lucas 13:10-17) Dagiti napulotan a napakubbo iti pannakakayawda iti Babilonia nagyamanda iti Dios idi imbangonna ida idi 1919, ket isu ti mangibangbangonen kadagiti manangapresiar a “sabsabali a karnero” nanipud pay 1935.​—Juan 10:16.

12. Kasano a “dagiti matmata dagiti isuamin agur-urayda” iti Dios?

12 Nikaanoman saan a paayen ni Jehova ti ilina, kas sumaruno nga ilawlawag ni David babaen panagkunana: “Dagiti matmata dagiti isuamin agur-urayda kenka, ket sika itdem kadakuada ti taraonda iti maitutop a tiempona. Ukradem ta imam ket pennekem ti tarigagay ti isuamin a nabiag.” (Salmo 145:15, 16) Arig dayta a ti matmata amin dagiti sibibiag a parparsua nakaturongda a siinanama iti Soberano ti Uniberso. Dagiti anghel kumitkitada iti Dios a maipaay iti agtultuloy a biagda. Ken kas ti ubing a kumitkita iti naganak kenkuana kadagiti bambanag a kasapulanna, kumitatayo iti nailangitan nga Amatayo. Kinapudnona, agpadpada a dagiti tattao ken an-animal umaw-awatda iti pannakasustener manipud kenkuana. Awan sabalin a makapennek kadagiti kasapulanda. Itden ti Dios kadakuada “ti taraonda iti maitutop a tiempona,” kayatna a sawen, inton daytat’ kasapulan.

13. Iti ania a pamay-an a ni Jehova ‘ukkradenna ti imana ken penkenna ti tarigagay ti isuamin a nabiag’?

13 Ti Dios ‘ukradenna dagiti imana ken penkenna ti tarigagay ti tunggal sibibiag a banag.’ (Salmo 104:10-28) Pudno, dadduma nga an-animal matmatayda gaput’ kinakirang ti taraon. Adu a tattao agbisinda kas biktima ti kinaagum, panangirurumen, ken di umiso a panangusar kadagiti rekursos. Mainayon pay, impadto ni Jesus a ti “kinakirang ti taraon” ket maysanto a paset “ti pagilasinan” ti kaaddana kadagitoy maudi nga al-aldaw. (Mateo 24:3, 7) Ngem awan kadagitoy ti mapaspasamak gapu ta naimut ni Jehova wenno dina kabaelan ti mangted. Panunotenyo laengen dagiti rinibribo a milion a parparsua a masus-sustentuan! Mainayon pay, daytoy a salmo mangted paniguraduan nga iti sidong ti turay ti Pagarian, inton ‘ti tao saannanton nga iturayan ti padana a tao iti pagdaksanna,’ pennekenton ti Dios dagiti namaterialan ken naespirituan a kasapulantayo. (Eclesiastes 8:9; Isaias 25:6) Uray itatta, di kasapulan nga agbisintayo iti naespirituan a taraon, ta ipapaay ti Dios nga aglaplapusanan dayta iti panawenna babaen “ti matalek ken naannad nga adipen.” (Mateo 24:45-47; 1 Pedro 2:2) Iti naespirituan a panagsao, dagiti Saksi ni Jehova ti kasasayaatan pannakatartaraonna a tattao ditoy daga. Ipakpakitayo aya ti napasnek a panangipateg kadagita a kinamanagparabur?

Ni Jehova Salaknibanna Dagidiay Agayat Kenkuana

14. Apay a maikuna ni David a “ni Jehova sililinteg kadagiti amin a dalanna ken sipaparabur kadagiti amin nga aramidna”?

14 Ti kinamaagtayo mabalin a ‘karakaranna ti dalantayo’ ket mangyeg rigat kadatayo, ngem pulos a ditay koma pabpabasolen ti Dios kadagitoy a kinarigat. (Proverbio 19:3) Impakita ni David no apay idi a kinunana: “Ni Jehova sililinteg kadagiti amin a dalanna ken sipaparabur kadagiti amin nga aramidna.” (Salmo 145:17) Ti Dios kanayon nga agtigtignay iti siuumiso, nainkalintegan, ken naasi a pamay-an. Nangnangruna a nabatad ti kinaasina iti panangipaayna ti pannakaisalakan babaen iti daton a subbot ni Jesus. (Aramid 2:21; 4:8-12) Ni Jehova met ti “sipaparabur kadagiti amin nga aramidna,” a kanayon a matalek, naayat, ken awan panangidumdumana. Kas “dagiti tumutulad iti Dios,” ngarud, agbalintay koma a nalinteg, nainkalintegan, naasi, awan panangidumdumana, ken nasungdo.​—Efeso 5:1, 2; Deuteronomio 32:4; Salmo 7:10; 25:8; Isaias 49:7; Aramid 10:34, 35.

15. Kasanotay nga ‘immawag iti Dios iti kinapudno,’ ken aniat’ imbunga ti panangaramidtay iti kasta?

15 Yantangay ti Dios ket nalinteg ken nasungdo, maallukoytay kenkuana. Mainayon pay, ipasiguro ni David kadatayo: “Ni Jehova siaarpad kadagiti amin nga umawag kenkuana, kadagiti amin nga umawag kenkuana iti kinapudno.” (Salmo 145:18) Iti pannakabautisartayo kas dagiti dedikado a manamati, immawagtayo iti nagan ni Jehova. (Aramid 8:12; 18:8; Roma 10:10-15) Yantangay immadanitay ngaruden iti Dios, isut’ umadani kadatayo. (Santiago 4:8) “Umawag[tayo] kenkuana iti kinapudno” agsipud ta ar-aramidentay dayta iti pudno a dalan, babaen ken Jesu-Kristo. Ket ni Jehova agtalinaed nga asideg no agdayawtay kenkuana “iti espiritu ken kinapudno,” mangipamatmat ti “pammati nga awan panaginsisingpetna,” ken ‘agtalinaed a kasla kitkitaen Daydiay saan a makita.’ (Juan 4:23, 24; 1 Timoteo 1:5; Hebreo 11:27) Iti kasta saantay nga agkarkararag a barengbareng wenno sumango a bukbukodtayo iti lubong ni Satanas, no di ket agtultuloytayo a mangtagiragsak ti nadiosan a tulong ken panangiwanwan. (Salmo 65:2; 1 Juan 5:19) Anian a kinatalged dayta!

16. Apay ken kasano a ni Jehova ‘tungpalennanto ti tarigagay dagidiay agbuteng kenkuana’?

16 Addaantay met ti pudpudno a kinatalged, gapu kadagiti dadduma pay a bambanag nga ar-aramiden ni Jehova para kadatayo. Kuna ni David: “Tungpalennanto ti tarigagay dagiti agbuteng kenkuana, denggennanto met ti ikkisda iti tulong, ket isalakannanto ida.” (Salmo 145:19) Ni Jehova ‘tungtungpalenna ti tarigagaytayo’ agsipud ta addaantay ti napasnek a panagraem iti Dios ken maiparbeng a panagbuteng a mamagpungtot kenkuana. (Proverbio 1:7) Ti natulnog a pusotayo tignayennatayo a mangaramid ti dedikasion ken Jehova, ken ti kababalintayo ket, “Maaramid koma ti pagayatam.” Yantangay pagayatanna nga iwaragawagtayo ti mensahe ti Pagarian, tungtungpalenna ti tarigagaytayo a mangaramid iti dayta a trabaho. (Mateo 6:10; Marcos 13:10) Ti Dios ‘tungtungpalenna ti tarigagaytayo’ agsipud ta saantay nga agkarkararag a siaagum no di ket agdawdawattayo kadagiti bambanag a maitunos iti pagayatanna. Itdenna daydiay maitunos iti pagayatanna ken agpaay iti pagimbagantayo.​—1 Juan 3:21, 22; 5:14, 15; idiligyo ti Mateo 26:36-44.

17. Apay a makasigurotayo a ti “ikkis[tayo] iti tulong” ket denggento ti Dios?

17 Kas dagiti nasungdo a Saksi ni Jehova, makasiguradotay met a dagiti “ikkis[tayo] iti tulong” maipangagdanto. Ti Dios inispalna ni David manipud didigra ken insalakanna ni Jesus, nga isut’ pinagungarna pay manipud ken patay. No maraut manipud kabkabusor, nangnangruna bayat ti iraraut ni Gog, makasiguradotayo a ni Jehova ispalennatayto. (Ezequiel 38:1–39:16) Kinapudnona, bayat ti aniaman a pakariribukan, kas ken David mabalintay ti agkararag a sitatalek: “Mangaasika kaniak, O Jehova, ta addaak iti tarumpingay. . . . Ta nangngegko ti panangibabain dagiti adu, ames nga agsusumbangir. Idi a nagbibinnalakadda a bumusor kaniak, insikatda nga ikkaten toy biagko. Ngem​—nagkammatalekak kenka, O Jehova. Kinunak: ‘Sika ti Diosko.’”​—Salmo 31:9-14.

18. Kasanotay a magunggonaan iti pannakaammo a ni Jehova ‘salaknibanna amin dagidiay agayat kenkuana’ ngem ‘dadaelennanto dagiti nadangkes’?

18 Sisasagana a kanayon ni Jehova a Dios a tumulong kadatayo. Kas kinuna ni David: “Ni Jehova salaknibanna amin dagiti agayat kenkuana, ngem amin dagiti nadangkes dadaelennanto ida.” (Salmo 145:20) Wen, no inayattayo ti Dios, bendisionan ken saluadannatayo. (Numeros 6:24-26) Isu ‘supapakanna a naan-anay ti agaramid a sitatangsit’ ngem igagana dagiti naemma nga ad-adipenna, a dina ipalubos ti aniaman a mapasamak kadakuada a mangdangran a naan-anay kadakuada. Yantangay ni Jehova adda kadatayo, umingeltay koma. (Salmo 31:20-24; Aramid 11:19-21) ‘Awan ti igam a naaramid a maibusor kadatayo ti rumang-ayto.’ (Isaias 54:17; Salmo 9:17; 11:4-7) Daytat’ kapadasan dagidiay pinaneknekandat’ ayatda iti Dios kas dagiti matalek a dedikado nga ad-adipenna. Kas maysa a grupo, sitatalgedto a lumasat dagiti Saksi ni Jehova iti “dakkel a rigat” a maiyegto kadagiti nadangkes. (Apocalipsis 7:14) Ket anianton a bendision ti pannakaibanag ti dakkel nga isyu ti sapasap a kinaari ni Jehova kadagiti “amin nga agayat kenkuana”!

Itultuloyyo a Bendituen ti Nasantuan a Nagan ni Jehova

19. Apay a dagiti ngiwattayo iyebkasdat’ ‘panangidaydayaw ken Jehova’?

19 Pinagpatingga ni David daytoy makatignay a salmo kadagiti sasao a: “Ti ngiwatko agsaonto iti panangidaydayaw ken Jehova; ket amin a lasag bendituenna koma ti nasantuan a naganna iti panawen a di nakedngan, uray iti agnanayon.” (Salmo 145:21) Kas dagiti Saksi ni Jehova, apresiarentayo ti kinadakkel, ti kinaimbag, ti manangngaasi a kinaari, di agmintis a panangtulong, ken di mabannog a panangaywan ti Dios. Gapuna, kas ken David, ti ngiwattayo agsao kadagiti panangidaydayaw iti Dios. Matignaytayo a mangted ti naipamaysa a debosion kenkuana, agyaman kadagiti adu a bembendisionna, ken mangidaydayaw ti “nagloriaan a naganna.”​—1 Cronicas 29:10-13; Exodo 20:4-6.

20. Simamatmat iti masanguanan, aniat’ rebbeng a determinasiontayo itan?

20 Idinto ta inaldaw a bembendisionannatayo ni Jehova, regular koma met ti panangbenditotayo kenkuana, wenno panagsao ti naimbag maipapan kenkuana. Ikaskasabatay koma ti naimbag a damag a sireregta iti pakaidayawan ti Dios, nga ibagbaga kadagiti dadduma nga iti mabiiten ‘amin a lasag bendituendanto ti nasantuan a naganna.’ Anian a nagsayaat ti panagbiagto inton amin dagiti agtaeng iti daga​—wen, amin a nasaririt a nabiag iti sapasap​—agkantadanto ti daydayaw iti nailangitan nga Amatayo! (Salmo 148:1-13) Bendito ni Jehova gaput’ panangipanayagna ti naganna ken panangtednat’ pribilehio kadatayo kas dagiti Saksina. (Salmo 83:13; Isaias 43:10-12) Sapay koma ta ti panagtigtignay ken aw-awidtayo maiyataday kadagidiay mangsalsalimetmet ti kinasagrado dayta a nagan ken mangikarkararag iti pannakasantipikarna. (Lucas 11:2) Agserbitay koma a sisusungdo iti Dios, tapno idiay baro a sistemana, ti timektayo mangngeganto iti koro dagidiay mangbembendito ti nasantuan a nagan ni Jehova iti agnanayon.

Ania dagiti Komentoyo?

◻ Aniat’ aramidentayto no nasudi ti kinaari ni Jehova kadatayo?

◻ Iti ania a nairepresentar ti kinaari ti Dios itatta?

◻ Kasano a ni Jehova ‘batakenna amin dagiti maparukob’?

◻ Kadagiti ania a pamay-an a ti Dios ‘ukradenna ti imana ken penkenna ti tarigagay ti isuamin a nabiag’?

◻ Kasanotay a bendituen ti nasantuan a nagan ni Jehova?

[Ladawan iti panid 17]

Idi 1922 dagiti sasao nga ‘ipablaakyo ti Ari ken ti Pagarianna’ pinaregtana dagiti manangitandudo ti kinaari ni Jehova iti dakdakkel a panagtignay

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share