PANAGADAS
Ti panangtudtod iti aniaman a paset ti anien nga imbati dagiti agan-ani, inggagara man wenno saan. Espesipiko nga imbilin ti linteg ti Dios iti Israel a saanda nga alaen amin a maapit iti igid ti talonda, saanda met nga aprasan manen dagiti sanga ti kayo nga olibo no naburasanda dagitan, ken saanda a sublian a burasen dagiti natedda a bunga dagiti kaubasanda. Saan metten a rumbeng a sublian uray ti sangabettek a bukbukel a naibati iti talon. Ti panagadas ket kalintegan nga inted ti Dios kadagiti napanglaw iti daga, kadagiti naparigatan a tattao, ganggannaet nga agnanaed, awan amana nga ubing, ken balo a babai.—Le 19:9, 10; De 24:19-21.
Masarakan iti salaysay ti Ruth ti naisangsangayan a pagarigan no kasano a nayaplikar daytoy naayat a probision ti linteg ti Dios. Nupay addaan ni Ruth iti kalintegan nga agadas, impakadana dayta iti agay-aywan kadagiti managani, ket mabalin a daytoy idi ti kadawyan nga ar-aramiden dagiti agad-adas. Imbilin ni Boaz kadagiti managanina a tratuenda ni Ruth a siaasi, a manguyosda iti sumagmamano manipud kadagiti nareppet a dawa ket ibatida dagita tapno alaenna. Nupay daytoy ti namagbalin a nalaklaka ti panagadas ni Ruth, agkasapulan latta dayta iti panagreggetna. Sigagaget nga intultuloyna ti agadas iti likudan dagiti managani ni Boaz manipud bigat agingga iti rabii, sa laeng agsardeng no apagbiit nga aginana iti balay ken no mangan.—Ru 2:5-7, 14-17.
Nabatad a nupay daytoy a nasayaat nga urnos nga agpaay kadagiti napanglaw iti daga ket mangiparparegta iti kinamanagparabur, di kinamanagimbubukodan, ken panagtalek iti pamendision ni Jehova, saanna met a pulos pampanuynoyan ti kinasadut. Dayta ti manglawag iti kaipapanan ti kinuna ni David a: “Saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.” (Sal 37:25) No gundawayan dagiti napanglaw daytoy a probision nga impaay kadakuada ti Linteg, saanda nga agbisin gapu iti napinget a panagtrabahoda, ken saanda met a makilimos iti tinapay agraman dagiti annakda.
Piguratibo ken Mangiladawan a Pannakausarna. Idi a dagiti Efraimita pinabasolda ni Gideon gapu ta saanna nga inayaban ida idi mangrugi ti pannakirupak iti Midian, kuna ni Gideon: “Saan aya a dagiti maadas ti Efraim nasaysayaatda ngem iti maburas nga ubas ti Abi-ezer [ti balay a nakaikamengan ni Gideon]?” Inlawlawagna ti kaipapanan ti pangngarigna idi imbagana a ti paset ti Efraim (nupay saanda a karaman iti immuna a pannakirupak) a nangkautibo kadagiti prinsipe ti Midian a da Oreb ken Zeeb ket dakdakkel nga amang ngem iti isuamin a naaramidan a mismo ni Gideon. (Uk 8:1-3; 6:11) Iti Kasuratan, tukoyenna met kas ‘panagadas’ ti pannakapapatay dagidiay nakalasat iti gubat, kalpasan ti kangrunaan a paset ti dangadang. (Uk 20:44, 45) Dagidiay natda kalpasan ti panangukom ni Jehova ket nayarigda iti ‘naadas no agngudon ti panagburas iti ubas,’ kasta met a ti natda iti tawid ti Dios iti tengnga ti nadangkes nga il-ili ket tinukoy ni Mikias kas “naadas iti panagburas iti ubas.”—Isa 24:13; Mik 7:1-8, 18; idiligyo ti Jer 6:9; 49:9, 10.