Panagserbi a Sisusungdo a Kadua ti Organisasion ni Jehova

“Iti nasungdo, agtignayka a sisusungdo.”​—2 SAMUEL 22:26, NW.

1, 2. Aniada a sumagmamano nga ehemplo iti kinasungdo ti nalabit makitatayo amin iti kongregasion?

ADALEMEN ti rabii ngem agisagsagana pay laeng ti maysa a panglakayen iti palawag para iti Nakristianuan a gimong. Kayatna ti sumardeng ken aginana; ngem intuloyna ti ar-aramidenna, a nangsapul kadagiti Nainkasuratan nga ehemplo ken ilustrasion a makagutugot ken makaparegta iti arban. Iti rabii ti gimong, makainana koman idiay balayda ti dua a napaksuyan a nagannak iti dayta met laeng a kongregasion; ngem siaanus nga inrubbuatanda dagiti annakda sada napan nakigimong. Kalpasan ti gimong, pinagsasaritaan ti maysa a grupo dagiti Kristiano ti palawag ti panglakayen. Makaibagbaga ti maysa a kabsat a babai nga iti naminsan nasaktan iti insawang ti isu met laeng a kabsat; ngem sigagagar a dinakamatna ti maysa kadagiti punto nga impalawag ti panglakayen. Makitayo kadi ti galad a naiparangarang kadagitoy a kasasaad?

² Dayta a galad ket kinasungdo. Sisusungdo a pinagreggetan ti panglakayen ti agserbi iti arban ti Dios; sisusungdo a tinabunuan dagiti nagannak dagiti gimong ti kongregasion; sisusungdo a sinuportaran ti kabsat a babai dagiti panglakayen. (Hebreo 10:24, 25; 13:17; 1 Pedro 5:2) Wen, iti amin a benneg ti biag, makitatayo a determinado ti ili ti Dios nga agserbi a sisusungdo a kadua ti organisasion ni Jehova.

3. Apay a nagpateg nga agtalinaedtayo a nasungdo iti organisasion ni Jehova ditoy daga?

³ No tannawagan ni Jehova daytoy dakes a lubong, manmano ti makitana a nasungdo. (Mikias 7:2) Sigurado a maragsakan a makakita iti kinasungdo ti ilina! Wen, ti kinasungdoyo makaay-ayo kenkuana. Nupay kasta, karurod dayta ni Satanas, ti orihinal a rebelde, ken paneknekanna nga isu ket ulbod. (Proverbio 27:11; Juan 8:44) Namnamaenyo nga ikagumaan ni Satanas a dadaelen ti kinasungdoyo ken Jehova ken iti organisasionna ditoy daga. Intay usigen ti sumagmamano a pamay-an ni Satanas a mangaramid iti daytoy. Iti kasta ad-adda a makitatayo no kasanotay a makapagtalinaed a nasungdo agingga iti panungpalan.​—2 Corinto 2:11.

Ti Panangipamaysa Kadagiti Pagkapuyan Madadaelna ti Kinasungdo

4. (a) Apay a nalaka ti mangbabalaw kadagidiay addaan autoridad? (b) Kasano a napaneknekan a di nasungdo ni Core iti organisasion ni Jehova?

⁴ No adda responsabilidad nga ak-akmen ti maysa a kabsat, mabalin a nalaklaka a makita dagiti pagkuranganna. Anian a naglaka a dillawen ti ‘garami iti mata ti kabsattayo idinto ta ditay madlaw ti pasanggir iti matatayo’! (Mateo 7:1-5) Ngem ti panangipamaysa kadagiti pagkurangan pagbalinennatayo a di nasungdo. Kas panangiladawan, usigenyo ti naggiddiatan da Core ken David. Dakkel ti responsabilidad a naipabaklay ken Core, ket nalabit nasungdo iti adu a tawen, ngem nagbalin nga ambisioso. Sinakit ti nakemna ti autoridad da Moises ken Aaron a kakasinsinna. Nupay ni Moises ti kaemmaan a tao, nabatad a rinugian ni Core a dillawen. Nalabit nakitana dagiti pagkurangan ni Moises. Nupay kasta, dagidiay a pagkurangan dina maikalintegan ti panagbalin ni Core a di nasungdo iti organisasion ni Jehova. Napapatay iti tengnga ti kongregasion.​—Numeros 12:3; 16:11, 31-33.

5. Apay a mabalin a nagduyos ni David nga agibales ken Saul?

⁵ Iti sabali a bangir, nagserbi ni David ken Ari Saul. Naimbag idi nga ari ni Saul, ngem nagbalin a dakes. Kinasapulan ni David ti pammati, panagibtur, ken uray kinasikap tapno di maranggasan ni agimon a Saul. Kaskasdi, idi naaddaan ni David iti gundaway nga agibales, kinunana nga ‘iparit ni Jehova’ a gulibanna ti pinulotan ni Jehova.​—1 Samuel 26:11.

6. Uray no makitatayo dagiti pagkapuyan ken pagkurkurangan dagiti panglakayen, ania ti pulos a ditay koma aramiden?

⁶ No dagiti dadduma a mangidadaulo kadatayo ket kasla saan a husto ti desisionda, nagubsang ti panagsaoda, wenno kasla mangidumdumada, agtanabutobtay kadi maibusor kadakuada, nalabit isungsong dagiti dadduma iti kongregasion a mangbabalaw? Ditay kadin tumabuno kadagiti Nakristianuan a gimong kas panagprotesta? Ay ket, saan! Kas ken David, pulos a ditay ipalubos a pagbalinennatayo dagiti pagkurangan ti sabali a di nasungdo ken Jehova ken iti organisasionna!​—Salmo 119:165.

7. Ania dagiti sumagmamano a dakes nga aramid a mapaspasamak idi mainaig iti templo sadi Jerusalem, ket kasano ti panagrikna ni Jesus iti daytoy?

⁷ Ni Jesu-Kristo ti kasayaatan a pagtuladan iti kinasungdo ti tao, a nadeskribir iti padto kas ti “nasungdo” ken Jehova. (Salmo 16:10, NW) Ti di umiso a pannakausar ti templo sadi Jerusalem pinagbalinna la ketdi a karit ti kinasungdo. Ammo ni Jesus a ti trabaho ti nangato a padi ken dagiti daton inladawanda ti ministerio ken ti ipapatayna kas daton, ket ammona a nasken a maammuan daytoy dagiti tattao. Isu a nalapunos iti nalinteg a pungtot idi makitana a ti templo nagbalinen a “rukib dagiti mannanakaw.” Tangay addaan iti autoridad nga inted ti Dios, namindua a dinalusanna dayta.a​—Mateo 21:12, 13; Juan 2:15-17.

8. (a) Kasano nga impakita ni Jesus ti kinasungdona iti urnos iti templo? (b) Kasanotay a maipakita nga apresiarentayo ti panagdayaw ken Jehova a kadua ti nadalus nga organisasionna?

⁸ Kaskasdi, sisusungdo a sinuportaran ni Jesus ti urnos iti templo. Sipud pay iti kinaubingna, dinar-ayanna dagiti piesta iti templo ken masansan a nangisuro sadiay. Nagbayad pay iti buis nga agpaay iti templo​—nupay saan a talaga nga obligado nga agbayad. (Mateo 17:24-27) Pinadayawan ni Jesus ti napanglaw a balo gapu iti panangipisokna iti “amin a pagbiagna” iti pagitintinnagan iti gameng ti templo. Di nagbayag kalpasanna, naan-anay a binaybay-anen ni Jehova daydi a templo. Ngem agingga idi, nasungdo ni Jesus iti dayta. (Marcos 12:41-44; Mateo 23:38) Nasaysayaat nga amang ti organisasion ti Dios ditoy daga ita ngem iti sistema a Judio ken ti templona. Pudno, saan a perpekto daytoy; dayta ti gapuna nga adda maaramid a panagbalbaliw no dadduma. Ngem saan a napno iti kinakillo, ken saan met a sukatan ni Jehova a Dios. Pulos a ditay koma marurod wenno agdayengdeng ken agtanabutob no adda makitatayo a pagkurkurangan daytoy. Imbes ketdi, tuladentayo ti kinasungdo ni Jesu-Kristo.​—1 Pedro 2:21.

Dagiti Bukodtayo a Pagkapuyan

9, 10. (a) Kasano a gunggundawayan ti sistema ti bambanag ni Satanas ti kinaimperpektotayo tapno maallukoytay nga agbalin a di nasungdo? (b) Ania ti rebbeng nga aramiden ti maysa a nagbasol iti nadagsen?

⁹ Ikagkagumaan met ni Satanas a dadaelen ti kinasungdotayo babaen ti pananggundawayna iti kinaimperpektotayo. Gunggundawayan ti sistema ti bambanagna dagiti pagkapuyantayo, a sulisogennatayo a mangaramid iti dakes iti imatang ni Jehova. Nakalkaldaang, kada tawen rinibu ti tumultulok iti imoralidad. Pakpakaruen dagiti dadduma ti kastoy a di kinasungdo babaen ti doble a panagbiag, nga itultuloyda ti agaramid iti dakes bayat nga agpampammarangda kas matalek latta a Kristiano. Kas panangsubalit kadagiti artikulo maipapan iti daytoy a banag iti serye nga “Agimtuod Dagiti Agtutubo . . . ” iti magasin nga Agriingkayo!, insurat ti maysa nga agtutubo a babai: “Dagiti artikulo ket pakasaritaan ti biagko.” Sililimed a nakigayyem idi kadagiti agtutubo nga awanan panagayat ken Jehova. Ti resulta? Insuratna: “Naiwawaak, ket natnagak iti imoralidad ket nasken a matubngarak. Nadadael ti relasionko ken Jehova, ket awanen ti panagtalek kaniak dagiti dadakkelko ken dagiti panglakayen.”b

¹⁰ Nagpatulong kadagiti panglakayen daytoy nga agtutubo ket sisusungdo nga agserserbi manen ken Jehova. Nupay kasta, nakalkaldaang ta nakarkaro ti nagbanagan dagiti adu, ket dagiti dadduma saandan a nagsubli iti kongregasion. Anian a nasaysayaat nga amang ti agbalin a nasungdo ken sarangten ti sulisog iti daytoy dakes a lubong! Ipangagyo dagiti ballaag kadagiti magasin a Pagwanawanan ken Agriingkayo! maipapan kadagiti banag a kas iti pannakitimpuyog kadagiti taga lubong ken dakes a paglinglingayan. Sapay koma ta pulos a diyo dadaelen ti kinasungdoyo. Ngem no mapasamak dayta kadakayo, dikay aginsisingpet. (Salmo 26:4) Agpatulongkay ketdi. Dayta ti gapuna nga adda a madadaan dagiti Kristiano a nagannak ken panglakayen.​—Santiago 5:14.

11. Apay a di umiso nga ibilangtayo ti bagbagitayo a dakes la nga agnanayon, ket ania nga ehemplo iti Biblia ti makatulong kadatayo a mangilinteg iti panangmatmattayo?

¹¹ Dagiti pagkapuyantayo mabalin nga isebbadatayo iti sabali a pamay-an. Dagiti dadduma a di nangipakita iti kinasungdo naumadan a mangikagumaan a mangay-ayo ken Jehova. Laglagipenyo, nadagsen dagiti basol a naaramid ni David. Kaskasdi, nupay nabayag idin a natay ni David, linagip ni Jehova kas matalek nga adipen. (Hebreo 11:32; 12:1) Apay? Agsipud ta di nauma a nangikagumaan a mangay-ayo ken Jehova. Kuna ti Proverbio 24:16: “Ti nalinteg a tao uray matuang a mamimpito, ket bumangon manen.” Kinapudnona, no makaaramidtayo iti babassit a basol​—wen masansan​—gapu iti pagkapuyan a parparmekentayo, mabalin a nalintegtay pay laeng iti imatang ni Jehova no kanayon a “bumangon[tayo]”​—kayatna a sawen, sipapasnek nga agbabawi ken agserbi manen a sisusungdo.​—Idiligyo ti 2 Corinto 2:7.

Agannadkayo Kadagiti Makaallilaw a Kita ti Di Kinasungdo!

12. Maipanggep kadagiti Fariseo, kasano a ti nainget, legalistiko a panangmatmat pinagbalinna ida a di nasungdo?

¹² Adda met dagiti makaallilaw a kita ti di kinasungdo. Mabalin nga agparang pay ketdi kas kinasungdo! Kas pagarigan, dagiti Fariseo idi kaaldawan ni Jesus nalabit impagarupda a nabatad a nasungdoda.c Ngem saanda a naamiris ti paggidiatan ti panagbalin a nasungdo ken ti nainget a manangannurot kadagiti aramid-tao a linteg, ta estriktoda unay ken nakuspag a manangukom. (Idiligyo ti Eclesiastes 7:16.) Iti kinaagpaysona, saanda a nasungdo​—kadagiti tattao a rebbengna koma a pagserbianda, iti kababagas ti Linteg nga ibagbagada nga isursuroda, ken ni Jehova a mismo. Iti kasupadina, nasungdo ni Jesus iti kababagas ti Linteg, a naibatay iti ayat. Gapuna, pinabileg ken pinaregtana dagiti tattao, kas impakpakauna dagiti Mesianiko a padto.​—Isaias 42:3; 50:4; 61:1, 2.

13. (a) Kasano nga agbalin a di nasungdo dagiti Kristiano a nagannak? (b) Apay a rebbeng a liklikan dagiti nagannak ti nalabes a kinaulpit, kinamanangbabalaw, wenno panagbalin a negatibo iti panangdisiplina kadagiti annakda?

¹³ Dagiti Kristiano nga addaan autoridad adu ti masursuroda ken Jesus iti daytoy a banag. Kas pagarigan, ammo dagiti nasungdo a nagannak a masapul a disiplinaenda dagiti annakda. (Proverbio 13:24) Ngem siguraduenda a saanda a ruroden dagiti annakda babaen ti naulpit ken nauyong a panangdisiplina wenno babaen ti naynay a panangbabalaw. Dagiti annak a makarikna a saanda a pulos maay-ayo dagiti dadakkelda wenno makarikna a ti relihion dagiti dadakkelda kasla pagbalinenna laeng ida a manangdillaw ken manangbabalaw mabalin a maupayda ket, kas bungana, tallikudanda ti pudno a pammati.​—Colosas 3:21.

14. Kasano a mapaneknekan dagiti Kristiano a papastor a nasungdoda iti arban a pagserserbianda?

¹⁴ Kasta met, asikasuen dagiti Kristiano a panglakayen ken agdaldaliasat a manangaywan dagiti parikut ken peggad a pakaipasanguan ti arban. Kas nasungdo a papastor, mangbalakadda no kasapulan, a siguraduenda nga ammuenda pay nga umuna ti pudno a kasasaad ket siaannad nga ibatayda ti sawenda iti Biblia ken kadagiti publikasion ti Sosiedad. (Salmo 119:105; Proverbio 18:13) Ammoda met nga isuda ti pagpannurayan ti arban iti naespirituan a pammabileg ken pannakataraon. Gapuna, ikagumaanda a tuladen ni Jesu-Kristo, ti Naimbag a Pastor. Sisusungdo nga agserserbida a linawas kadagiti karnero iti Nakristianuan a gimong​—a saanda ida nga upayen no di ket pabilgen ken pakirdenda ti pammatida.​—Mateo 20:28; Efeso 4:11, 12; Hebreo 13:20, 21.

15. Kasano nga impakita dagiti dadduma idi umuna a siglo a di umiso ti kinasungdoda?

¹⁵ Ti maysa pay a makaallilaw a kita ti di kinasungdo ket di umiso a kinasungdo. Ti kaipapanan ti pudno a kinasungdo iti Biblia dina ipalubos nga iyun-unatayo ti kinasungdo iti sabali ngem ken ni Jehova a Dios. Adu a Judio idi umuna a siglo ti siiinget a nangsalimetmet iti Linteg Mosaiko ken iti Judio a sistema ti bambanag. Ngem inkedked idin ni Jehova ti pammendisionna iti dayta a nasukir a nasion ket imbaw-ingna iti nasion ti naespirituan nga Israel. Manmano laeng idi ti nasungdo ken Jehova ken immayon iti daytoy napateg a panagbalbaliw. Uray kadagiti pudno a Kristiano, impilit ti dadduma a Judio ti agsubli kadagiti “nakapuy ken nanumo a pagdamdamuan a bambanag” ti Linteg Mosaiko, a natungpal idin ken Kristo.​—Galacia 4:9; 5:6-12; Filipos 3:2, 3.

16. Kasano ti panagtignay dagiti nasungdo nga adipen ni Jehova no adda maaramid a panagbalbaliw?

¹⁶ Iti kasupadina, pinaneknekan ti ili ni Jehova iti moderno a panawen a nasungdoda uray kadagiti tiempo ti panagbalbaliw. Bayat nga agtultuloy a rumaniag ti lawag ti naipalgak a kinapudno, adda dagiti maaramid a panagbalbaliw. (Proverbio 4:18) Iti di pay nabayag, tinulongannatayo ti “matalek ken masirib nga adipen” a mangpasin-aw iti pannakaawattayo iti termino a “kaputotan” a naaramat iti Mateo 24:34 ken ti panawen a pannakaukom dagiti “karnero” ken “kalding” a nadakamat iti Mateo 25:31-46, agraman ti panangmatmattayo iti dadduma a serbisio publiko. (Mateo 24:45) Maragsakan la ketdi dagiti dadduma nga apostata no adu a Saksi ni Jehova ti nangsalimetmet a siiinget iti dati a pannakaawat kadagita a banag ken agkedked a rumang-ay. Saan a napasamak dayta. Apay? Nasungdo ti ili ni Jehova.

17. Kasano a dagiti ay-ayatentayo mabalin a suotenda no dadduma ti kinasungdotayo?

¹⁷ Nupay kasta, mabalin a personal a maapektarannatayo ti di umiso a kinasungdo. No adda banag nga ar-aramiden ti maysa a patpatgen a gayyem wenno miembro ti pamilia a maisalungasing kadagiti prinsipio ti Biblia, mabalin a mariknatayo a mabingay ti kinasungdotayo. Natural laeng a nasungdotayo kadagiti miembro ti pamilia. Ngem ditay koma ipangpangruna ti kinasungdotayo kadakuada ngem iti kinasungdotayo ken Jehova! (Idiligyo ti 1 Samuel 23:16-18.) Ditay tulongan dagiti nakabasol a mangilimed iti nadagsen a basol wenno kanunongan ida maibusor kadagiti panglakayen a mangikagkagumaan a ‘mangatur kadakuada iti espiritu ti kinaalumamay.’ (Galacia 6:1) Ti panangaramid iti kasta ket panagbalin a di nasungdo ken Jehova, iti organisasionna, ken iti ay-ayatentayo. Kinapudnona, no ilisitayo ti nakabasol iti disiplina a kasapulanna, bangbangenantayo ti ebkas ti ayat ni Jehova kenkuana. (Hebreo 12:5-7) Laglagipenyo met a “natalek dagiti panangdanar ti gayyem.” (Proverbio 27:6) Ti prangka, naayat a balakad a naibatay iti Sao ti Dios mabalin a dunorenna ti amor propio ti nagbasol nga ay-ayatentayo​—ngem makaispal-biag dayta!

Ti Kinasungdo Madaeranna ti Pannakaidadanes

18, 19. (a) Ania ti kayat ni Acab ken Nabot, ket apay a nagkedked ni Nabot? (b) Nainkalintegan kadi ti kinasungdo ni Nabot? Ilawlawagyo.

¹⁸ No dadduma direkta ti panangatakar ni Satanas iti kinasungdotayo. Usigenyo ti napasamak ken Nabot. Idi piliten ni Ari Acab a mangilako iti kaubasanna, kinunana: “Ni Jehova imparitna kaniak nga itedko kenka ti tawid dagiti ammak.” (1 Ar-ari 21:3) Saan a natangken ti ulo ni Nabot; isu ket nasungdo. Imbilin ti Linteg Mosaiko a ti maysa nga Israelita dina mabalin nga ilako iti agnanayon ti sanikua a daga a pagtatawidan. (Levitico 25:23-28) Sigurado nga ammo ni Nabot nga isu ket mabalin a papapatay daytoy a nadangkok nga ari, ta pinalubosan idin ni Acab ni Jezabel nga asawana a mangipapatay kadagiti adu a mammadto ni Jehova! Ngem nagtalinaed a natibker ni Nabot.​—1 Ar-ari 18:4.

¹⁹ No dadduma adda kasukat ti kinasungdo. Iti tulong dagiti “nakas-ang a lallaki,” impamusmusan ni Jezabel ti pannakaidarum ni Nabot iti basol a dina inaramid. Nagbanaganna, napapatay ni Nabot ken dagiti annakna. (1 Ar-ari 21:7-16; 2 Ar-ari 9:26) Kayatna kadi a sawen a di nainsiriban ti kinasungdo ni Nabot? Saan! Maysa ni Nabot kadagiti adu a nasungdo a lallaki ken babbai a ‘sibibiag’ iti lagip ni Jehova ita, a sitatalged a matmaturog iti tanem agingga iti tiempo ti panagungar.​—Lucas 20:38; Aramid 24:15.

20. Kasano a ti namnama matulongannatayo nga agtalinaed a nasungdo?

²⁰ Makapabileg kadagiti nasungdo ken Jehova ita ti isu met laeng a kari. Ammotayo a mabalin a dakkel ti mapukawtayo iti daytoy a lubong gapu iti kinasungdotayo. Napukaw ni Jesu-Kristo ti biagna gapu iti kinasungdona, ket imbagana kadagiti pasurotna a mapasarandanto met ti kasta. (Juan 15:20) No kasano a ti namnamana iti masanguanan ti nangpakired kenkuana, kasta met a pakirdennatayo ti namnamatayo. (Hebreo 12:2) Iti kasta makapagtalinaedtayo a nasungdo iti sango ti amin a kita ti pannakaidadanes.

21. Ania ti ipanamnama ni Jehova kadagiti nasungdo kenkuana?

²¹ Pudno, manmano kadatayo ita ti aglak-am iti kakasta a direkta a panangatakar iti kinasungdotayo. Ngem mabalin nga adunto pay ti pannakaidadanes a pakaipasanguan ti ili ti Dios sakbay nga umay ti panungpalan. Kasanotay a masiguro a mataginayon ti kinasungdotayo? Babaen ti panagtalinaedtayo a nasungdo ita. Inikkannatayo ni Jehova iti naindaklan nga annongen​—panangikasaba ken panangisuro iti maipapan iti Pagarianna. Sisusungdo nga itungpaltayo daytoy napateg a trabaho. (1 Corinto 15:58) No ditay ipalubos a dadaelen dagiti pagkurkurangan ti tao ti kinasungdotayo iti organisasion ni Jehova ken no agannadtayo kadagiti makaallilaw a kita ti di kinasungdo kas iti di umiso a kinasungdo, ad-adda a nakasaganatayto no bilang nakarkaronto pay ti pannakasuot ti kinasungdotayo. Iti aniaman a kasasaad, kanayon koma nga agtalektayo nga agtalinaed a nasungdo ni Jehova kadagiti nasungdo nga adipenna. (2 Samuel 22:26) Wen, aywananna dagiti nasungdo kenkuana!​—Salmo 97:10.

[Dagiti Footnote]

Kasanoyo a Sungbatan?

◻ Ania ti aramidentayo tapno saannatay a pagbalinen a di nasungdo ti kinaimperpekto dagiti sabsabali?

◻ Kadagiti ania a pamay-an a ti kinaimperpektotayo pagbalinennatayo a di nasungdo?

◻ Kasanotay a masaranget ti pagannayasan a maaddaan iti di umiso a kinasungdo?

◻ Ania ti tumulong kadatayo nga agtalinaed a nasungdo uray iti tiempo ti pannakaidadanes?

[Kahon iti panid 9]

Sisusungdo a Panagserbi Iti Bethel

“Isuamin a bambanag maaramid koma a sitatakneng ken addaan urnos” Kasta iti insurat ni apostol Pablo. (1 Corinto 14:40) Ammo ni Pablo a tapno agandar ti kongregasion, kasapulan ti “urnos,” organisasion. Kasta met ita, adda dagiti praktikal a banag a desisionan dagiti panglakayen, kas iti panangituding kadagiti miembro ti kongregasion iti nadumaduma a lugar a pagadalan iti libro, panangyurnos kadagiti taripnong para iti serbisio iti tay-ak, ken panangsierto no mawanwanas met laeng ti teritoria. Ti kakasta nga urnos mabalin a suotenda no dadduma ti kinasungdo. Saan dagitoy a bilin nga impaltiing ti Dios, ken saanda a mapagustuan ti tunggal indibidual.

Karit kadi kadakayo no dadduma ti panagbalin a nasungdo kadagiti dadduma a praktikal nga urnos iti kongregasion Kristiano? No kasta, mabalin a makatulong kadakayo ti urnos iti Bethel. Ti nagan a Bethel, maysa a Hebreo a termino a kaipapananna “Balay ti Dios,” ti awag kadagiti amin a 104 a sanga ti Watch Tower Society, a pakairamanan ti hedkuarter idiay E.U.* Kayat dagiti boluntario nga agnanaed ken agtartrabaho iti Bethel a maanninaw kadagitoy a lugar ti panagraem ken panagbuteng ken Jehova. Kasapulan ditoy ti kinasungdo ti tunggal maysa.

Masansan a madakamat dagiti sumarsarungkar iti Bethel ti kinaurnos ken kinadalus a makitada sadiay. Organisado ken naragsak dagiti trabahador; ti panagsasao ken kababalinda ken uray ti panaglanglangada iyanninawna ti nataengan, sinanay-Biblia a Nakristianuan a konsiensia. Sisusungdo a sursuroten ti amin a kameng ti pamilia ti Bethel dagiti pagalagadan ti Sao ti Dios.

Mainayon pay, impaayan ida ti Bagi a Manarawidwid iti manual a napauluan Dwelling Together in Unity, a siaayat a mangilawlawag kadagiti praktikal nga urnos a kasapulan para iti kasta a dakkel a pamilia tapno sangsangkamaysa a makapagtrabahoda a siaannayas. (Salmo 133:1) Kas pagarigan, salaysayenna ti maipapan iti kuarto, pannangan, kinadalus, panagkawkawes ken panaglanglanga, ken dagiti umasping a bambanag. Sisusungdo a supsuportaran ken sursuroten dagiti kameng ti pamilia ti Bethel ti kakasta nga urnos, uray pay no sabali ti personal a kayatda. Ibilangda daytoy a manual, saan a kas naiinget a paglintegan ken regulasion, no di ket kas makatulong a pagsurotan a nairanta a mangitandudo iti panagkaykaysa ken panagtutunos. Sisusungdo a sursuroten dagiti manangaywan dagitoy naibatay-Biblia a pagalagadan, ken usarenda dagitoy iti positibo a wagas a mangpabileg ken mangparegta iti pamilia ti Bethel nga agtultuloy iti sagrado a panagserbida iti Bethel.

*Dagitoy a paktoria, opisina, ken pagtaengan saanda a buklen ti naindaklan a naespirituan a templo, wenno balay, ti Dios. Ti naespirituan a templo ti Dios ket isu ti urnosna iti nadalus a panagdayaw. (Mikias 4:1) Gapu ta kasta, saan a malimitaran daytoy iti aniaman a pisikal a pasdek ditoy daga.

[Kahon iti panid 9]

Ti Loyalista ken ti Legalista

Idi 1916, kinuna ti Encyclopædia of Religion and Ethics a “mabalin a masarakan iti amin a tiempo ken iti amin a lugar daytoy a paggidiatan dagiti loyalista ken legalista.” Inlawlawagna: “Adda legalista a mangaramid iti naibilin kenkuana, saan a manglabsing kadagiti paglintegan; simamatalek a tungpalenna ti sao a naisurat. Adda loyalista a mangar-aramid iti kastoy ngem . . . ad-adda a mapangnamnamaan, a mangipamaysa iti panunotna iti annongenna, nga itunosna ti kababalinna iti espiritu ti panggep nga itungpalna.” Idi kamaudiananna, kinuna ti isu met laeng nga encyclopedia: “Saan laeng a panagbalin a natulnog iti linteg ti kayat a sawen ti panagbalin a nasungdo. . . . Naiduma ti nasungdo a tao iti natulnog a tao ta agserserbi a buyogen ti amin a puso ken panunotna . . . Di tumulok nga agbasol a sipapakinakem, agliway, wenno agbalin a nakuneng.”