“Daydiay Mangipaay iti Nalinteg a Sungbat”

IDIAY Sermon iti Bantay, dinakamat ni Jesus “ti Linteg ken dagiti Mammadto.” Ti maikatlo a seksion ti Hebreo a Kasuratan isu ti Sursurat, a ramanenna dagiti poetiko a libro, kas Dagiti Salmo ken Proverbio. ( Mateo 7:12; Lucas 24:44) Uray met dagitoy, naglaonda iti kinasirib ti Dios.

Kas pangarigan, dagiti proverbio pinakdaaranna dagiti ukom iti kadaanan nga Israel: “Ti agkuna iti nadangkes: ‘Sika nalintegka,’ ilunodto dagiti inilin-ili, ket dagiti nasnasion guraendanto. Ngem kadagiti mangtubngar kenkuana addanto rag-o, ket ti naimbag a bendision umayto kadakuada. Agkanna dagiti bibig daydiay mangipaay iti nalinteg a sungbat.”​—Proverbio 24:24-26.

No tumulok ti ukom iti panangpilit ti pasuksok wenno panangidumduma ket ideklarana ti nadangkes kas nalinteg, makita dagiti dadduma nga isut’ di rumbeng iti saadna. Ay ket, uray ti kamkameng dagiti Gentil a “nasnasion” a makangngeg iti kasta a dakes a panangukom marimondanto! Iti kasumbangirna, no ti ukom situtured a tubngarenna ti tao a managdakdakes ken mangipaay ti nalinteg a sungbat iti adda a kaso, magun-odannanto ti panagraem ken ayat ti umili. Kaaduanna a tattao ti matignayto nga agtarigagay a dumteng “ti naimbag a bendision” kenkuana. Kas kanayonan a kunaen ti proverbio: “Agkanna dagiti bibig daydiay mangipaay iti nalinteg a sungbat.”

Ti kasta nga agek ipamatmatna ti panagraem ti tunggal maysa​—iti nagbaetan ti manangbalakad ken dagidiay umim-imdeng iti nalinteg a pannubngarna. Nalabit uray daydiay mismo a matubtubngar ti umawatto a sipapaborable ket iyebkasnat’ panagayatnanto iti ukom. Kuna ti Proverbio 28:23: “Ti mangtubngar iti tao ad-adunto a parabur ti masarakanna iti kalpasanna ngem ti mangpasablog babaen ti dilana.” Dagidiay ngarud agserserbi itatta kas panglakayen ti kongregasion liklikanda koma a ballikogen ti panangukomda gaput’ pannakigayyem wenno relasion ti pamilia. Babaen iti nalinteg a panangipaay ti kasapulan a balakad, magun-odanto dagiti panglakayen ti panagraem ti kongregasion.