PANAGTEPPEL

Panangmedmed, panangpawil, wenno panangaywan ti maysa iti bagina, tigtignayna, panagsasaona, wenno panagpampanunotna. (Ge 43:31; Est 5:10; Sal 119:101; Pr 10:19; Jer 14:10; Ara 24:25) Dagiti Hebreo ken Griego a termino a nainaig iti panagteppel literal nga ipasimudaagda ti panangituray wenno panangaywan iti bagi ti maysa. Ti panagteppel ket ‘bunga ti espiritu ti Dios’ (Ga 5:22, 23); ket nupay agik-ikut ni Jehova kadagiti di nakedngan a pannakabalin, kanayon nga agtepteppel. Imbes nga agtignay a dagus maibusor kadagiti managdakdakes, impalubosna nga aglabas pay ti tiempo tapno adda gundawayda nga agbaw-ing manipud dakes a daldalanda ket iti kasta magun-odda ti anamongna.​—Jer 18:7-10; 2Pe 3:9.

Nupay kasta, no napaneknekanen a ti asina ket saan a ginundawayan dagidiay naipaayan iti tiempo nga agbabawi, siuumiso a saannan a lapdan ti bagina a mangipakat iti panangukom. Ti maysa a pagarigan ket isu ti napasamak kadagidiay namaglangalang iti Jerusalem. Gapu ta saanda a binigbig a ni Jehova ti nangipalubos kadakuada a mangituray iti Israel tapno madisiplina dagiti Israelita gapu iti saanda a panagmatalek, dagitoy a namaglangalang awanan asi a trinatoda ti Israel ket aglablabes ti impakatda a disiplina ngem iti kalkalikaguman ti panangukom ti Dios. (Idiligyo ti Isa 47:6, 7; Zac 1:15.) Nasaksakbay nga ammon ni Jehova daytoy ken impatuldona babaen ken mammadto Isaias a dumteng ti tiempo a saannan a medmedan a dusaen dagidiay a namaglangalang: “Nagulimekak iti nabayag a tiempo. Nagtalinaedak a siuulimek. Nangwatwatwatak iti panagteppel. Kas iti babai nga agpaspasngay paggigiddanek ti agasug, aganangsab, ken agsung-ab. Mangtalipuposakto iti bambantay ken turturod, ket ganguekto amin a mulmulada.”​—Isa 42:14, 15.

Addaan met ni Kristo Jesus iti panagteppel. Kastoy ti insurat ni apostol Pedro idi pinalagipanna dagiti adipen iti balay a masapul nga agpasakupda kadagiti makinkukua kadakuada: “Iti kinapudnona, naayabankayo iti daytoy a dana, agsipud ta uray ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna. . . . Idi narabrabngis, saanna a sinubadan iti panangrabngis. Idi agsagsagaba, saan a nagipangpangta, no di ket intultuloyna nga intalek ti bagina iti daydiay mangukom a sililinteg.”​—1Pe 2:21-23.

Kadagiti “maudi nga aldaw,” ti kaawan ti panagteppel ket maysa kadagiti kababalin a pakailasinan kadagidiay saan a mangal-alagad iti pudno a Kinakristiano. (2Ti 3:1-7) Nupay kasta, yantangay dagiti Kristiano masapul a tuladenda ti Dios ken ti Anakna (1Co 11:1; Efe 5:1), rebbeng a pagreggetanda a sukayen ti panagteppel iti amin a bambanag. (1Co 9:25) Kinuna ni apostol Pedro: “Inayonyo iti pammatiyo ti kinasingpet, iti kinasingpetyo ti pannakaammo, iti pannakaammoyo ti panagteppel, iti panagteppelyo ti panagibtur, iti panagibturyo ti nadiosan a debosion, iti nadiosan a debosionyo ti nainkabsatan a panagayat, iti nainkabsatan a panagayatyo ti ayat. Ta no adda kadakayo dagitoy a banag ken aglippiasda, lapdandanto ti panagbalinyo a di aktibo wenno di nabunga maipapan iti umiso a pannakaammo ken ni Apotayo a Jesu-Kristo.”​—2Pe 1:5-8.

Dagiti agserserbi kas manangaywan kadagiti kongregasion Kristiano ti kangrunaan koma a mangipakita iti panagteppel. (Tit 1:8) Tapno epektibo ti panangtaming dagiti manangaywan kadagiti parikut ti kongregasion, masapul a taginayonenda ti panagteppel iti sao ken aramid. Ni apostol Pablo binalakadanna ni Timoteo: “Kanayonanna, laksidem dagiti minamaag ken ignorante a panagus-usisa, yantangay ammom a mangpataudda iti panagaapa. Ngem ti adipen ti Apo saan a kasapulan a makiapa, no di ket kasapulan nga agbalin a naalumamay kadagiti isuamin, kualipikado a mangisuro, nga agtultuloy a medmedanna ti bagina iti sidong ti dakes, nga isurona a buyogen ti kinaalumamay dagidiay saan a sidadaan nga umannugot.”​—2Ti 2:23-25.

No iti maysa a pasamak saan a makapagteppel ti maysa, mabalin a mamulitan ti atiddog a rekord ti matalek a panagserbina ken maipasango iti nagduduma kita ti parparikut. Ti maysa a pagarigan iti daytoy isu ti napasamak ken Ari David. Nupay nasungdo iti pudno a panagdaydayaw ken addaan panagayat kadagiti nalinteg a prinsipio ti linteg ti Dios (idiligyo ti Sal 101), nakikamalala ni David ken Bat-seba, ket nagbanag iti panangipaipuestona iti asawa ni Bat-seba a ni Urias iti lugar ti pagbabakalan a sadiay sigurado a mapapatay. Tawtawen kalpasanna, nagbanag daytoy iti pannakadidigra ni David iti nakaro a parparikut a dimteng iti pamiliana. (2Sm 12:8-12) Ipamatmat met ti napasamak kenkuana a nainsiriban ti panangliklik kadagiti situasion a mangiturong iti pannakapukaw ti panagteppel. Nupay mabalin koma ni David ti pumanaw iti pangatepan ti palasiona, nabatad nga intultuloyna a binuybuya ni Bat-seba bayat nga agdigdigus ket iti kasta timmanor ti panaggartemna kenkuana.​—2Sm 11:2-4.

Umasping iti dayta, saan a nasayaat nga agtalinaed nga awanan asawa ti maysa a tao a di makapagtepteppel no mabalinna met ti sumrek iti nadayaw a panagasawa iti kasta maliklikanna ti makiabig. Kastoy ti insurat ni apostol Pablo maipapan iti daytoy: “No awananda iti panagteppel, mangasawada koma, ta nasaysayaat ti mangasawa ngem ti sumged iti derrep.”​—1Co 7:9, 32-38.