Malagipyo Kadi?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Ania ti uppat a nangusaran ti Kristiano a Griego a Kasuratan iti sao a “kongregasion”?

Ti umuna a nakausaranna isu ti ragup a grupo dagiti napulotan iti espiritu a pasurot ni Kristo (nairaman ni Kristo iti dadduma a teksto). No dadduma, “ti kongregasion ti Dios” tukoyenna dagiti amin a Kristiano nga agbibiag iti maysa a partikular a tiempo. Ti maikatlo a nakausaranna isu dagiti amin a Kristiano iti maysa a lugar. Ti maikapat ket tumukoy kadagidiay mangbukel iti maysa a lokal a kongregasion.​—4/15, panid 21-3.

• Kaano nga agpatingga ti pannakaayab dagiti Kristiano iti nailangitan a namnama?

Awan ti eksakto a sungbat ti Biblia. Nangrugi dayta a pannakaayab idi 33 K.P. ket nagtultuloy agingga iti moderno a panawen. Kalpasan ti 1935, ti trabaho a panagaramid iti adalan ket ad-adda a naipamaysa iti pannakaurnong ti dakkel a bunggoy. Dadduma a nabautisaran kalpasan ti 1935 ket addaanda iti nailangitan a namnama kas pinaneknekan kadakuada ti nasantuan nga espiritu. Gapuna, ditay masinunuo ti eksakto a petsa a panagpatingga dayta a pannakaayab. Kinapudnona, no idilig iti sabsabali a karnero, saan nga ad-adu nga espiritu ti Dios ti sagsagrapen dagiti napulotan a Kristiano. Saanda met a mangnamnama iti naisangsangayan nga atension. Aniaman ti namnamada, masapul nga agmatalek dagiti Kristiano ket itultuloyda nga aramiden ti pagayatan ti Dios.​—5/1, panid 30-1.

• Idi nagkari ni Jefte, ti kadi adda iti panunotna isu ti panangipaayna iti balasangna kas daton a mapuoran?

Saan. Ti kayat a sawen ni Jefte ket ipaaynanto daydiay masabatna tapno eksklusibo nga agserbi iti Dios, kas urnos ti Linteg Mosaiko. (1 Samuel 2:22) Tapno matungpal dayta a kari, nagtultuloy ti balasang ni Jefte a nagserbi idiay tabernakulo. Dakkel idi a sakripisio dayta agsipud ta kaipapananna a saan a pulos makiasawa.​—5/15, panid 9-10.

• Ania ti naitulong ti codex iti nagkauna a Kristianidad?

Nabatad a ti lukot ti masansan nga inusar dagiti Kristiano agingga iti agarup arinunos ti umuna a siglo K.P. Idi maikadua a siglo, timmaud ti panagsusupiat iti nagbaetan dagiti mangus-usar iti codex ken dagidiay agbasbasa iti lukot. Mamati dagiti eksperto a ti panangusar dagiti Kristiano iti codex ket dakkel ti naitulongna iti nasaknap itan a pannakausar dayta.​—6/1, panid 14-15.

• Ania ti Gezer Calendar?

Maysa dayta a bassit a tisa a tapi a nadiskobreda idi 1908 iti maysa a lugar idiay siudad ti Gezer. Adu ti agkuna a nagpraktisan laeng dayta ti maysa nga ages-eskuela nga ubing a lalaki iti leksionna. Ibinsabinsa dayta a tapi ti simple a bersion ti tawen ti agrikultura, wenno panagrikus ti tawen, a mangrugi iti panagapit bayat ti bulan a katupag ti nagbaetan ti Setiembre ken Oktubre. Dakamatenna met ti nadumaduma a maapit ken dagiti trabaho iti talon.​—6/15, panid 8.

• Ania ti kaipapanan ti panagbasol a maibusor iti nasantuan nga espiritu?

Mabalin nga agbasoltayo a maibusor iti nasantuan nga espiritu ni Jehova​—maysa a basol a di mapakawan. (Mateo 12:31) Ti Dios ti mangikeddeng no nakaaramidtayo iti basol a di mapakawan, ket kabaelanna nga ikkaten ti espirituna kadatayo. (Salmo 51:11) No maldaangantay unay iti naaramidtayo a basol, kaipapanan dayta a pudpudno nga agbabbabawitayo. No kasta, saantay a nakabasol a maibusor iti espiritu.​—7/15, panid 16-17.

• Yantangay ni David ket datin nga am-ammo ni Ari Saul, apay a dinamagna pay laeng no makin-anak kenkuana? (1 Samuel 16:22; 17:58)

Saan laeng nga interesado ni Saul a mangammo iti nagan ti ama ni David. Gapu ta nakitana ti kinatured ken kinabileg ti pammati ni David idi pinarmekna ni Goliat, kayat a maammuan ni Saul ti kinatao ti nangpadakkel ken David. Nalabit panggep ni Saul nga itipon iti buyotna ni Jesse wenno ti dadduma a miembro ti pamiliana.​—8/1, panid 31.