Adda Pudpudno a Maseknan

RINIBU a tattao ti mangipakpakita a talaga a maseknanda. Mannakipagriknada ken saanda nga agimbubukodan. Saanda nga iyaleng-aleng dagiti parikut ti sabsabali. Imbes ketdi, aramidenda ti amin a kabaelanda​—nga irisgoda pay ti biagda no maminsan​—tapno mabaw-asan ti panagsagaba. Nagdakkel a trabaho daytoy, a pinakaro dagiti nabileg a puersa a dida magawidan.

Dagiti banag a kas iti kinaagum, intriga iti politika, gubgubat, ken natural a didigra ti mabalin a mangpaay uray “iti kasasayaatan ken kapapasnekan a panangikagumaan a mamagpatingga iti bisin,” kuna ti maysa nga aid worker. Ti panamagpatingga iti bisin ket maysa laeng kadagiti adu a parikut a sangsanguen dagiti maseknan a tattao. Pakidangadanganda met dagiti bambanag a kas iti sakit, kinapanglaw, kinaawan hustisia, ken ti nakaro a panagsagaba gapu iti gubat. Ngem agballigida kadi?

Kinuna ti chief executive ti maysa nga aid agency a dagidiay mangisaysayangkat iti kasta a ‘nagsayaat ken napasnek a panangikagumaan’ tapno mabaw-asan ti bisin ken rigat ket mayarig iti naasi a Samaritano a nadeskribir iti ilustrasion ni Jesu-Kristo. (Lucas 10:29-37) Ngem kinunana nga aniaman ti aramidenda, agtultuloy nga umad-adu dagiti biktima. Isu nga inyimtuodna: “Ania ti rumbeng nga aramiden ti naimbag a Samaritano no inaldaw a lumabas iti isu met la a dalan iti sumagmamano a tawen ket iti kada lawas makasarak iti igid ti dalan iti sabali a biktima dagiti tulisan?”

Nalaka la nga agbanag dayta iti nadeskribir kas ‘ti makapapatay a sakit ti nauma a tumultulong’ ket agsardengen gapu iti pannakapaay. Maapresiar ta saan a mauma dagiti pudpudno a maseknan. (Galacia 6:9,10) Kas pagarigan, maysa a lalaki a nagsurat iti Jewish Telegraph idiay Britania kinomendaranna dagiti Saksi ni Jehova, gapu ta idi panawen ti Nazi idiay Alemania “tinulonganda ti rinibu a Judio a makalasat kadagiti pammarigat idiay Auschwitz.” Kinuna ti nagsurat a “no nakirang ti taraon, iranudda ti tinapayda kadagiti [Judio a] kakabsatmi!” Inaramid dagiti Saksi ti amin a kabaelanda babaen ti aniaman nga adda kadakuada.

Ngem ti kinapudnona, saan a naan-anay nga agpatingga ti panagsagaba ti sangatauan uray kasano ti panagririnnanud iti tinapay. Saan a panangtagibassit daytoy iti naaramidan dagiti naasi a tattao. Makagunggona ti aniaman nga aramid a mangbaw-as iti panagsagaba. Inep-ep dagidi a Saksi ti rigat dagiti kakaduada a balud uray kaskasano, ket nadadael ti Nazismo idi kamaudiananna. Nupay kasta, adda pay laeng ti sistema ti lubong a pakaigapuan ti kasta a kinaulpit, ket agraira pay la dagiti awanan pannakaseknan a tattao. Kinapudnona, “adda kaputotan a dagiti ngipenda kasda la kamkampilan, ket dagiti sangida kasda la im-immuko, tapno lamutenda dagiti napanglaw ditoy daga, ken dagiti nakurapay kadagiti tattao.” (Proverbio 30:14) Mabalin a masdaawkayo no apay a kastoy ti kasasaad.

Apay nga Adda Kinapanglaw ken Panangirurumen?

Kinuna ni Jesu-Kristo iti naminsan: “Kankanayon nga adda kadakayo dagiti napanglaw, ket kaanoman a kayatyo mabalinyo nga aramiden a kankanayon kadakuada ti naimbag.” (Marcos 14:7) Kayat kadi a sawen ni Jesus a dinto pulos agpatingga ti kinapanglaw ken panangirurumen? Kas iti sumagmamano a tattao, patienna kadi a ti kasta a panagsagaba ket paset ti plano ti Dios a mangted kadagiti naasi a tattao iti gundaway a mangipakita no kasano kadakkel ti pannakaseknanda? Saan! Di pinati dayta ni Jesus. Ibagbagana laeng a bayat nga agtultuloy daytoy a sistema dagiti bambanag, addanto latta ti kinapanglaw. Ngem ammo met ni Jesus daytoy: Saan nga orihinal a panggep ti nailangitan nga Amana dagiti kasta a kasasaad ditoy daga.

Pinarsua ni Jehova a Dios ti daga tapno agbalin a paraiso, saan a lugar a pagsaadan ti kinapanglaw, kinaawan hustisia, ken pannakairurumen. Impakitana ti kasta unay a pannakaseknanna iti sangatauan babaen ti panangipaayna kadagiti agkakaimbag a probision a mangnayon iti ragsak ti biag. Panunotenyo laengen ti nagan ti minuyongan a nagyanan idi damo ti immuna a nagannak kadatayo, da Adan ken Eva! Naawagan iti Eden, kayatna a sawen “Ragsak.” (Genesis 2:8,9) Inted ni Jehova saan laeng a dagiti kangrunaan a kasapulan ti tattao a pagbiagda iti maysa a makauma, narigat a kasasaad. Iti ngudo ti panamarsuana, sinukimat ni Jehova ti nagapuananna ket kinunana a “nasayaatda unay.”​—Genesis 1:31.

Apay ngarud a nagsaknap iti intero a daga ita ti kinapanglaw, pannakairurumen, ken dadduma pay a pakaigapuan ti panagsagaba? Adda daytoy agdama a dakes a sistema dagiti bambanag gapu ta pinili ti immuna a dadakkeltayo ti umalsa iti Dios. (Genesis 3:1-5) Daytoy ti nangpataud iti saludsod no adda kalintegan ti Dios a mangkalikagum iti panagtulnog dagiti parsuana. Impalubos ngarud ni Jehova ti isisina kenkuana dagiti kaputotan ni Adan iti nakedngan a tiempo. Maseknan latta ti Dios iti nagbanagan ti sangatauan. Nangipaay iti probision a mangikkat iti amin a pannakadangran nga ibunga ti isusukir kenkuana. Ket din agbayag, pagpatinggaen ni Jehova ti kinapanglaw ken kinaulpit​—kinapudnona, amin a panagsagaba.​—Efeso 1:8-10.

Ti Parikut a Di Masolbar ti Tao

Iti sinigsiglo sipud pannakaparsua ti tao, kimmaro ti iyaadayo ti sangatauan kadagiti pagalagadan ni Jehova. (Deuteronomio 32:4, 5) Gapu iti agtultuloy a panangilaksidda kadagiti linteg ken prinsipio ti Dios, nagdadangadang dagiti tattao, ket ti “tao addaan pannakabalin iti sabali a maipaay iti pagdaksanna.” (Eclesiastes 8:9) Amin a panagregget a mangipasdek iti kagimongan nga addaan napaypayso a kinahustisia, nga awanan kadagiti mangparparigat iti agsagsagaba a tattao, ket pinaay ti kinamanagimbubukodan dagidiay a ti kaykayatda laeng ti ar-aramidenda imbes nga agpasakupda iti kinasoberano ti Dios.

Adda pay maysa a parikut​—a nalabit matmatan ti adu kas minamaag a sarsarita. Daydiay nangisungsong iti panagrebelde iti Dios ket mangdurdurog pay laeng kadagiti tattao nga agbalin a dakes ken agimbubukod. Isu ni Satanas a Diablo, ket inawagan ni Jesu-Kristo a “ti agturay iti daytoy a lubong.” (Juan 12:31; 14:30; 2 Corinto 4:4; 1 Juan 5:19) Iti paltiing a naited ken apostol Juan, naipakita a ni Satanas ti kangrunaan a pagtaudan ti rigat​—ti kangrunaan a “mangiyaw-awan iti intero a mapagnaedan a daga.”​—Apocalipsis 12:9-12.

Uray kasano ti pannakaseknan ti dadduma a tao kadagiti padada a tattao, dida pulos kabaelan a pukawen ni Satanas a Diablo wenno baliwan daytoy sistema nga umad-adu ti biktimana. Ania ngarud ti kasapulan tapno masolbar dagiti parikut ti sangatauan? Saan a marisut iti basta pannakaadda ti maysa nga addaan pannakaseknan. Kasapulan ti maysa nga addaan determinasion ken pannakabalin a mangpukaw ken Satanas ken iti intero a nakillo a sistemana.

“Maaramid ti Pagayatam . . . iti Rabaw ti Daga”

Inkari ti Dios a dadaelenna daytoy dakes a sistema ti bambanag. Determinado ken adda pannakabalinna a mangaramid iti dayta. (Salmo 147:5, 6; Isaias 40:25-31) Iti naimpadtuan a libro ti Biblia a Daniel, adda a naipadto: “Ti Dios ti langit mamangonto iti maysa a pagarian a kaanoman dinto madadael ket ti panagturayna dinto met maited iti sabali nga ili; ngem burakennanto ken ibusennanto amin dagitoy a pagpagarian, ket isu agtalinaedto iti agnanayon”​—wen, iti agnanayon. (Daniel 2:44) Adda iti panunot ni Jesu-Kristo daytoy manayon ken naparabur a nailangitan a gobierno idi insurona nga umararaw dagiti adalanna iti Dios: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.”​—Mateo 6:9, 10.

Sungbatanto ni Jehova ti kakasta a kararag gapu ta pudpudno a maseknan iti sangatauan. Sigun iti naimpadtuan a sasao iti Salmo 72, tudingan ti Dios ti Anakna, ni Jesu-Kristo, a mangipaay iti agnanayon a gin-awa kadagiti napanglaw, agsagsagaba, ken mairurrurumen a mangsupsuporta iti kinaturay ni Jesus. Inkanta ngarud ti napaltiingan a salmista: “Isu [ti Mesianiko nga Ari a dinutokan ti Dios] mangukomto kadagiti napanglaw iti umili, isalakannanto dagiti annak ti nanumo; ket pispisangennanto ti mangidadanes. . . . Ispalennanto ti makasapul intono umkis, ken ti napanglaw nga awan mangarayat kenkuana. Mangngaasinto kadagiti napanglaw ken makasapul, ket dagiti kararua dagiti makasapul isalakannanto. Subbotennanto dagiti kararuada iti panangirurumen ken iti panangrabsut: ket napategto ti darada iti saklangna.”​—Salmo 72:4, 12-14.

Iti sirmata maipapan iti kaaldawantayo, nakita ni apostol Juan ti “maysa a baro a langit ken maysa a baro a daga,” maysa a naan-anay a baro a sistema ti bambanag nga impasdek ti Dios. Anian a bendision iti agsagsagaba a sangatauan! Kas panangipadtona iti aramidento ni Jehova, insurat ni Juan: “Nangngegko ti maysa a natbag a timek manipud iti trono a kunana: ‘Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.’ Ket Daydiay situtugaw iti trono kinunana: ‘Adtoy! Pagbalbalinek a baro ti isuamin a bambanag.’ Kasta met, kunana: ‘Isuratmo, agsipud ta dagitoy a sasao matalek ken napudnoda.’”​—Apocalipsis 21:1-5.

Wen, mabalintay a patien dagitoy a sasao, ta mapagtalkan ken napudnoda. Iti saan a mabayag, agtignayto ni Jehova tapno pukawenna ditoy daga ti kinapanglaw, bisin, kinaulpit, panagsakit, ken amin a kinakillo. Kas naynay nga ipatuldo daytoy a magasin manipud Kasuratan, nakaad-adu ti ebidensia a mangipakita nga agbibiagtayon iti tiempo a matungpalto dagitoy a kari. Asidegen ti baro a lubong nga inkari ti Dios! (2 Pedro 3:13) Din agbayag, ni Jehova ‘alimonennanto nga agnanayon ni patay’ ket “punasennanto dagiti lulua kadagiti isuamin a ruprupa.”​—Isaias 25:8.

Agingga a mapasamak dayta, maragsakantayo ta uray ita adda dagiti tattao a napaypayso a maseknan. Ad-adda a pagragsakantayo ta pudpudno a maseknan ni Jehova a Dios. Ikkatennanto iti di mabayag amin a kinaulpit ken panagsagaba.

Naan-anay a mapagtalkanyo dagiti kari ni Jehova. Nagtalek idi ti adipenna a ni Josue. Awan panagduadua a kinunana iti nagkauna nga ili ti Dios: “Ammuenyo iti amin a pusoyo ken amin a kararuayo, nga awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo; isuda amin natungpalda kadakayo. Awan ti nagkurang kadakuada nga uray maysa.” (Josue 23:14) Bayat ngarud nga adda pay laeng ti agdama a sistema, dikay paupay kadagiti pakasuotan a nalabit nasken a sanguenyo. Iyallatiwyo ken Jehova amin a pakaringgoranyo, ta pudpudno a maseknan.​—1 Pedro 5:7.

[Dagiti Ladawan iti panid 7]

Iti baro a lubong nga inkari ti Dios, awanto ti kinapanglaw, kinaulpit, panagsakit, ken kinakillo ditoy daga