Ti Baro a Pannakayanak—Ania ti Ibanagna?
APAY nga inusar ni Jesus ti ebkas a “mayanak manipud . . . espiritu” idi dinakamatna ti maipapan iti bautismo iti nasantuan nga espiritu? (Juan 3:5) No mausar dayta iti piguratibo a pamay-an, ti sao a “mayanak” kaipapananna “pangrugian,” kas iti ebkas a “pannakayanak ti maysa a nasion.” Gapuna, ti ebkas a “baro a pannakayanak” ipamatmatna ti “baro a pangrugian.” No kasta, ti piguratibo a sasao a “mayanak” ken “baro a pannakayanak” ipaganetgetda a mangrugi ti baro a relasion iti nagbaetan ti Dios ken dagidiay mabautisaran iti nasantuan nga espiritu. Kasano a maipasdek dayta a baro a relasion?
Kas panangilawlawag no kasano nga isagana ti Dios dagiti tattao a makipagturay idiay langit, inusar ni apostol Pablo ti maysa nga ilustrasion mainaig iti biag ti pamilia. Insuratna kadagiti Kristiano idi kaaldawanna a matagiragsakdanto ti “pannakaampon kas annak” ket iti kasta, ibilang ida ti Dios ‘kas annakna.’ (Galacia 4:5; Hebreo 12:7) Makatulong ti urnos ti panagampon tapno maawatantayo no ania a panagbalbaliw ti mapasamak iti maysa nga indibidual no mabautisaran iti nasantuan nga espiritu. Kasano? Usigentayo manen ti ilustrasion maipapan iti agtutubo nga agtarigagay nga agpasalista iti eskuelaan para kadagiti katutubo nga estudiante.
Panagbalbaliw Babaen ti Panagampon
Iti ilustrasion, ti agtutubo ket saan a naawat iti dayta nga eskuelaan gapu ta saan a katutubo. Ita, panunotenyo nga adda napasamak a dakkel a panagbalbaliw. Isu ket legal nga inampon ti maysa nga ama ti katutubo a pamilia. Ania ti epektona dayta iti agtutubo? Bueno, gapu iti pannakaamponna, matagiragsaknan dagiti kalintegan a tagtagiragsaken dagiti katutubo nga estudiante—agraman ti kalintegan a makapagpasalista iti dayta nga eskuelaan. Ti pannakaamponna ti naan-anay a nangbalbaliw iti masanguananna.
Daytoy ti mangyilustrar no ania ti dakdakkel a kaitungpalanna kadagidiay mangtagiragsak iti baro a pannakayanak. Usigenyo ti sumagmamano a nagpadaanda. Ti agtutubo iti ilustrasion ket maawat iti eskuelaan no maragpatna dagiti kualipikasion—ti panagbalin a kameng ti katutubo a komunidad. Kaskasdi, saan a makakualipikar iti kabukbukodanna. Umasping iti dayta, dadduma a tattao ti makipagturay iti Pagarian ti Dios, wenno nailangitan a gobierno, no maragpatda ti kualipikasion—ti ‘pannakayanakda manen.’ Kaskasdi, saanda a maragpat dayta a kualipikasion iti bukodda gapu ta ti baro a pannakayanak ket agpannuray iti Dios.
Ania ti namagbalbaliw iti kasasaad ti agtutubo? Ti legal a proseso ti panagampon. Siempre, dayta a proseso dina binalbaliwan ti kinatao ti agtutubo. Nupay kasta, kalpasan a naragpat dagiti legal a kalikagum ti panagampon, nagbalbaliw ti kasasaad ti agtutubo. Iti kasta, arigna a nayanak manen. Nagbalinen a legal nga anak, a nangted kenkuana iti kalintegan a maawat iti eskuelaan ken agbalin a paset ti pamilia ti ama a nangampon kenkuana.
Umasping iti dayta, balbaliwan ni Jehova ti kasasaad ti grupo dagiti imperpekto a tattao babaen ti panangyussuatna iti legal a proseso tapno maamponna ida a kas annakna. Ni apostol Pablo, a paset dayta a grupo, insuratna kadagiti pada a manamati: “Inawatyo ti espiritu ti pannakaampon kas annak, a babaen iti dayta nga espiritu ipukkawtayo: ‘Abba, Ama!’ Ti mismo nga espiritu mangsaksi a buyogen ti espiritutayo a datayo ket annak ti Dios.” (Roma 8:15, 16) Wen, babaen ti proseso ti panagampon, dagita a Kristiano nagbalinda a paset ti pamilia ti Dios, wenno “annak ti Dios.”—1 Juan 3:1; 2 Corinto 6:18.
Siempre, dayta a panangampon ti Dios dina balbaliwan ti kinatao dagiti naampon yantangay agtalinaedda nga imperpekto. (1 Juan 1:8) Nupay kasta, kas inlawlawag ni Pablo, agbalbaliw ti kasasaadda kalpasan a maragpat dagiti legal a kalikagum ti panagampon. Malaksid iti dayta, ti espiritu ti Dios ipariknana kadagiti naampon nga annak ti natalged a kombiksion a makipagtaengda ken Kristo idiay langit. (1 Juan 3:2) Dayta a natalged a kombiksion a gapuanan ti nasantuan nga espiritu ti naan-anay a mangbalbaliw iti panangmatmatda iti biag. (2 Corinto 1:21, 22) Wen, arigna a mayanakda manen.
Maipapan kadagiti annak nga inampon ti Dios, kuna ti Biblia: “Isudanto ti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.” (Apocalipsis 20:6) Makipagturayda ken Kristo kas ar-ari iti Pagarian ti Dios, wenno nailangitan a gobierno. Kinuna ni apostol Pedro kadagiti pada a manamati nga umawatda iti “di agrupsa ken di natulawan ken di agkupas a tawid” a ‘naisagana iti langlangit’ agpaay kadakuada. (1 Pedro 1:3, 4) Anian a nagpateg a tawid!
Nupay kasta, mangpataud iti saludsod daytoy a panagturay. No dagiti mayanak manen ket makipagturay kas ar-ari idiay langit, siasinonto dagiti iturayanda? Mausig dayta a saludsod iti sumaganad nga artikulo.
[Ladawan iti panid 10]
Ania ti kinuna ni Pablo maipapan iti panagampon?