Ti Panangmatmat iti Biblia

No Apay Napateg dagiti Padpadto ti Biblia Kenka

“NO ADDAANTAYO laeng kadagiti positibo a pammaneknek a ti Biblia ket Sao ti Dios,” kuna dagiti adu a tattao, “mabalin a patientayo dayta.” Masansan, nupay kasta, dagita a tattao saanda a makaibaga no ania a “positibo a pammaneknek” ti kasapulan a mangkumbinsir kadakuada. Mabalin aya a dayta ket maysa a milagro?

Nangaramid ni Jesus kadagiti adu a milagro bayat ti kaaddana ditoy daga, kaskasdi dagiti managduadua nagkedkedda a mangawat kadakuada a kas pammaneknek nga isu ti Pannakangiwat ti Dios. Ta, dadduma ti nagkuna a babaen “ken ni Beelzebub nga agturay kadagiti demonio” a ni Jesus nagaramid kadagiti milagro! Binigbig ni Jesus a dadduma a “milagro” nga inaramid dagiti dadduma ti aktual nga ar-aramid ni Satanas. (Lucas 11:14-19; Mateo 7:22, 23) Ngarud, adda banag a kasapulan kas positibo a pammaneknek a ti Biblia ket Sao ti Dios​—maysa a banag a mangipakita a dagiti mismo a sasao ti Biblia, dagiti mensahe a linaonna, ket naggapu iti Dios a mismo.

Kadagiti pinanid ti Biblia a mismo, masarakantayo dagita a pammaneknek​—ti padto. Pudno unay, ni Jehova kas Dios iti kinapudno ken ti Gubuayan iti amin a kinasirib, Daydiay a mangipalawag ti panungpalan manipud iti pangrugian, masapul a kabaelanna nga ipadto no anianto ti mapasamak iti masanguanan, agraman ti masanguanantayo. (Salmo 31:5; Proverbio 2:6; Isaias 46:9, 10) Daytoy inaramidna iti naisurat a Saona, ket masansan iti detaliado unay. Usigentayo ti maysa laeng kadagiti padpadto a naisentro ken ni Jesu-Kristo.

Dagiti Padto a Mangpaneknek a ni Jesus ti Mesias

Ginasgasut a padpadto ti Biblia ti nakasarak iti kaitungpalanda ken Jesu-Kristo.a Dadduma ti mangirason a ni Jesus ken dagiti adalanna immaniobrada dagiti bambanag nga agturong iti daytoy a pagtungpalan. Ngem pudno kadi a kasta? Usigenyo ti dadduma kadagiti kinapudno.

Awan kada Jesus ken uray kadagiti nagannakna ti mabalin a nangtignay iti maysa a caesar a Romano a mangipaulog iti maysa a bilin a mangkalikagum kada Jose ken ni Maria a mapan iti ili a nakaiyanakanda a Bethlehem a maipaay iti sensus ken ti panagrehistro a maipaay iti panagbuis a maiparna iti tiempo iti pannakaipasngay ni Jesus. Gapuna dagiti Romano, nga iti aniaman a pamay-an saanda nga interesado iti pannakaibanag iti padto ti Biblia, ket adda pasetda iti pannakaipasngay ni Jesus idiay Bethlehem a kaitungpalan iti padto idiay Mikias 5:2.

Bayat nga ad-adda nga imbutaktak ni Jesus ti kinamanaginsisingpet dagiti relihiuso a Judio, ad-adda met a tarigagayanda ti mangpapatay kenkuana. Ngem ti ipapatayna ket saan a dimteng a direkta manipud iti im-ima dagiti kailianna. No koma no pinapatay dagiti Judio ni Jesus, mabalin nga isu komat’ binatoda agingga ken patay, yantangay daytoy ti pamay-an iti panangibanagda iti dusa nga ipapatay a naibalabala iti Linteg Mosaiko. (Juan 8:59; 10:31) Nupay kasta, sigun kadagiti padto, ti Mesias masapul a maibitin iti kayo a pagtutuokan tapno pukawenna “ti lunod iti Linteg.” (Idiligyo ti Deuteronomio 21:22, 23 iti Galacia 3:13.) Isut’ masapul a “maipangato” tapno “guyugoyenna ti amin a kita ti tattao.” (Idiligyo ti Numeros 21:4, 9 iti Juan 3:14 ken 12:32, 33.) Babaen iti pannakailansa, kas inusar dagiti Romano, awan duadua iti kaitungpalan dagitoy a padpadto. Gapuna dagiti Romano, a saan nga interesado iti itutulong tapno matungpal dagiti padpadto ti Biblia, naaddaanda manen iti paset a nangpaneknek a pudno ti padto iti Sao ni Jehova.

Kasta met, bayat a nakabitin iti kayo a pagtutuokan, awan ti mabalin nga aramiden ni Jesus a mangikeddeng no ania ti maar-aramid iti pagan-anayna. Saanna a mabalin nga imaniobra dagiti soldado a Romano nga agpipinnusta maipapan kadakuada. Ngem inaramidda dayta, nga apag-isu iti naipadto a padto ti Biblia nga aramidenda! (Salmo 22:18; Juan 19:24) Manen, dagiti Romano, saan a ni Jesus wenno dagiti adalanna, ti nairaman iti panagbalin ti padto a pudno.

Impadto ni Jesus dagiti paspasamak a mapasamakto iti Jerusalem bayat ti kaputotanna a mabalin a kaipapananna ti dagus a panungpalan iti siudad. (Lucas 21:5-24) Nasurok a 500 a tawen sakbay ti panawen ni Jesus, impadto ni Daniel daytoy. (Daniel 9:26, 27) Idi tawen 70 K.P., nadadael ti Jerusalem. Dagiti sasao ni Jesus ken ni Daniel natungpalda. Maminsan manen, napaneknekan a mapagtalkan ti padto ti Biblia.

Magunggonaankayto Aya iti Padto?

Addada adu a padpadto ti Biblia a matungpalto pay. Kas pangarigan, ni Jehova impaipadtona iti Anakna, ni Jesu-Kristo, a daytoy agdama a dakes a sistema dagiti bambanag agpatingganto, a sarunuen iti maysa a baro a lubong iti kinalinteg iti sidong ti nailangitan a Pagarianna. (Mateo 24:3-14; Apocalipsis 21:1-5; kitaenyo met ti 2 Pedro 3:7-13.) Amin daytoy ket naisurat iti Biblia, ti padto iti Sao ni Jehova a kankanayon a napaneknekan a pudno. Ditay kadi aya ngarud, ikkan ti serioso a panangusig?

Ania ti rason iti saan a panagtalek dagiti annak kadagiti kari dagiti nagannak nga iti napalabas nakaipaay laeng kadagiti naimbag a bambanag a maipaay kadakuada ket kankanayon a nangtungpal kadagiti saoda? Kasta met, ania ti rasontayo a saan nga agtalek iti kari ni Jehova a mangiyeg iti Pagarian iti Anakna? Ania dagiti rason a pamatiantayo a ni Jehova, a nakaaramiden iti adu a naimbag a bambanag a maipaay kadagiti parparsuana iti napalabas, ket giddato a mapukawna ti interesna iti pagimbaganda?

Awan dagiti makakumbinsir a rason maipapan iti dayta. Ngarud, addaantayo kadagiti amin a naimbag a rason nga agtalek ken ni Jehova ken iti Saona ken ti panangipabiangtayo iti namnamatayo kenkuana. Ti mapagtalkan a saona iti padto ti mangipaay kadatayo iti panggep nga agbiag. Dayta ti mangiturong iti ar-aramidtayo iti napateg a kalat. Pudno a dayta ti kapapatgan kadatayo itatta.

[Dagiti Footnote]

[Kahon iti panid 26]

Dagiti padto ti Biblia a mangipadpadto iti pannakadadael dagiti siudad, kas iti Sodoma ken Comorra (Genesis 18:20, 21; 19:12, 13), ti Ninive (Sofonias 2:13), ti Babilonia (Jeremias 51:1, 2), ken ti Petra idiay Edom (Jeremias 49:7-22), ti nalaka a mangiyilustrar a ti sao ti padto ket napaneknekan nga umiso.

[Kahon iti panid 27]

KAYATYO KADI A MAPADASAN TI MASANGUANAN A KAITUNGPALAN DAGITOY A PADTO?

“Pasardengenna dagiti gubgubat.”​—Salmo 46:9.

“Ket ti agtaeng dinanto kunaen: ‘Masakitak’”​—Isaias 33:24.

“Ket awanton ni patay, ket awanto metten ti sasaibbek wenno sangsangit wenno rigrigat.”​—Apocalipsis 21:4.

“Umay ti oras a dagiti amin nga adda kadagiti tanem a pakalaglagipan mangngegdanto ti timekna ket rummuardanto.”​—Juan 5:28, 29.

“Ti sililinteg tawidennanto ti daga, ket agtaengto kenkuana nga agnanayon.”​—Salmo 37:29.