Manipud Managbasatayo

AIDS

Agsursuratak kas pangsungbat kadagiti artikuloyo maipapan iti AIDS ken nangnangruna ti maysa a surat a nagkomento a “dagiti Saksi ni Jehova ti kasla kakaisuna a saan nga agpeggad iti pannakaala iti AIDS gapu ta saanda nga ‘agitudok’ kadagiti droga, agaramid iti homoseksualidad wenno makidenna iti dua a sekso, matalekda iti asawada, ket saanda nga umawat iti panangiyalison iti dara.” Ti AIDS ket maysa a sakit a mamagpeggad kadagiti amin, uray pay dagiti Saksi ni Jehova. Nakaro ti sakit ti nakemko iti panangikunayo nga isuda laeng ti saan a maapektaran iti AIDS. Pangngaasiyo ta sardenganyo ti panamagbalin a kasla dayta ket maysa a nadiosan a pannusa, agsipud ta kunayo a ti kanser ket kasta met, ket saan met a kasta.

R. C., Estados Unidos

Ti managbasami mabalin nga adda iti panunotna ti maysa a paset manipud iti “Panangmatmat iti Lubong” (Mayo 8, 1988). Dagiti sasao ket inaramid ti maysa a medikal nga eksperto maipapan kadagiti makaakar a saksakit ket dayta ti naipablaak iti magasin iti Brazil nga “ISTOE.” Dagiti kakasta met laeng a komento ti inaramid dagiti dadduma a medikal a gubuayan a mangbigbig iti nababbaba a peggad a mapasamak babaen iti panangsurot kadagiti prinsipio a nadakamat. Siempre, umiso ni R. C. iti panangibagana nga uray dagiti Saksi ni Jehova ket agpeggadda, ngem gagangay gapu iti kababalinda sakbay iti panagbalinda a Saksi, wenno gapu ta dagitoy makitiptiponda kadagiti assawa a saan a mangsursurot iti bilin ti Biblia. Dikam makakita iti pakipadaan dayta iti kanser, a gagangay a dayta ket saan nga agtaud iti pananglabsing kadagiti prinsipio iti Biblia.​—ED.

Pagaywanan

Kayatko ti mangipaay iti komplimento maipapan iti panangsaklawyo iti “Ti Suppiat iti Day Care” iti Disiembre 8, 1987, a bilang iti Agriingkayo! Umiso ti impormasion ket naiparang iti natimbeng a pamay-an. . . . Adda maysa a napateg a paset iti kualidad iti pagaywanan a saan a dinakamat ti artikuloyo​—ti kinapateg iti addaan panagraem a relasion iti nagbaetan dagiti nagannak ken dagiti agay-aywan. No ad-adda ti pannakairaman dagiti nagannak, mabalin a nasaysayaat ti kualidad iti panangaywan. Dagiti agay-aywan masapul a maammuanda nga isudat’ mabaybayadan nga adipen. Napateg ti mangipasdek iti nasinged ken nalaka a pannakisarita iti agay-aywan . . . Pagserserbianyo a naimbag dagiti managbasayo babaen iti panangiturong kadagiti panunotda iti daytoy nagpateg a tema.

K. M., National Education Director

Children’s World, Estados Unidos

Pinataud a Perlas

Pudno a tagtagiragsakek ti agbasa kadagiti magasinyo, ket masarakak ida nga aduan ti impormasion ken nagsayaatan ti pannakaiparangna. Capu itoy a rason, kasla nakigtotak a makakita iti artikulo maipapan kadagiti pinataud a perlas iti Agriingkayo! iti Enero 22, 1988. Mapataud ti maysa a perlas babaen iti panangikabil iti ganggannaet a banag iti bagi ti tirem. Daytoy ganggannaet a banag saanna laeng a singaen ti tirem no di ket dayta ti maisinan kamaudiananna iti sibibiag a parsua, isu a maikkanen kalpasanna iti bukodna a naan-anay a sistema nerbio. Para kaniak daytoy ket kinaranggas kadagiti animaL

F. C., Pederal a Republika iti Alemania

Ti artikulo iyam-ammona laeng dagiti managbasatayo iti maysa nga industria ket saanna a tuktukoyen ti moralidad dayta. Mabigbigmi nga addada dagiti personal a kinasensitibo maipapan iti panangtrato iti aniaman a sibibiag, ket dikam babalawen dagita a personal a rikrikna. Nupay kasta, padpadasenmi a suroten dagiti pakakitaan iti panangmatmat ti Namarsuatayo a naiyebkas iti Biblia, isu a nagsayaatan ti panagsaona maipapan iti perlas ken kasta met mangipalubos iti panangusar iti “tunggal aggaraw nga animal . . . kas taraon” dagiti tao. (Genesis 9:3; Mateo 13:46) Iti maudi a panangusig, ti pananggun-od iti perlas ket awan nakaidumaanna manipud iti aniaman a pagpartian a sadiay dagiti narikrikut pay a kita dagiti animal ti mapapatay a maipaay iti taraon iti inaldaw.​—ED.