Apresiaren ti Naisangsangayan nga Akem ni Jesus iti Panggep ti Dios

“Siak ti dalan ken ti kinapudno ken ti biag. Awan ti umay iti Ama malaksid no baeten kaniak.”​—JUAN 14:6.

1, 2. Apay a rumbeng nga usigentayo ti naisangsangayan nga akem ni Jesus iti panggep ti Dios?

ITI intero a pakasaritaan ti tao, adu ti nangikagumaan nga agbalin a naiduma kadagiti sabsabali, ngem manmano ti nagballigi. Basbassit manen no maipapan iti bilang dagidiay talaga a makuna a dakkel ti nakaidumaanda. Ngem naisangsangayan iti adu a pamay-an ni Jesu-Kristo, ti Anak ti Dios.

² Apay a rumbeng nga adalentayo ti naisangsangayan nga akem ni Jesus? Gapu ta nairaman ti mismo a relasiontayo iti nailangitan nga Amatayo a ni Jehova! Kinuna ni Jesus: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Juan 14:6; 17:3) Usigentayo ti dadduma a pamay-an a naisangsangayan ni Jesus. Makatulong dayta tapno maparayray ti apresiasiontayo iti akem ni Jesus iti panggep ti Dios.

“Ti Bugbugtong nga Anak”

3, 4. (a) Apay a maikunatayo a naisangsangayan ti akem ni Jesus kas ti bugbugtong nga Anak? (b) Kasano a naisangsangayan ti akem ni Jesus iti panamarsua?

³ Ni Jesus ket saan laeng a basta “anak ti Dios,” kas panangtukoy kenkuana ni Satanas idi sinulisogna. (Mat. 4:3, 6) Imbes ketdi, maitutop a maawagan ni Jesus kas “ti bugbugtong nga Anak ti Dios.” (Juan 3:16, 18) Ti Griego a sao a naipatarus a “bugbugtong” kaipapananna “naidumduma, kakaisuna,” wenno “naisangsangayan.” Addaan ni Jehova iti ginasut a milion nga espiritu nga annak. Iti ania ngarud nga anag a naidumduma ni Jesus?

⁴ Naidumduma ni Jesus gapu ta isuna laeng ti direkta a pinarsua ni Amana. Isu ti inauna nga Anak. Kinapudnona, isu “ti inauna iti isuamin a parsua.” (Col. 1:15) Isu “ti pangrugian ti panamarsua ti Dios.” (Apoc. 3:14) Naisangsangayan met ti akem ti bugbugtong nga Anak mainaig iti panamarsua. Saan nga isu ti Namarsua wenno Namunganay iti panamarsua. Imbes ketdi, isu ti inusar ni Jehova kas ahente, wenno instrumento, tapno maparsua ti amin a bambanag. (Basaen ti Juan 1:3.) Insurat ni apostol Pablo: “Kinaagpaysuanna kadatayo adda maymaysa a Dios nga Ama, a kenkuana agtaud ti amin a bambanag, ket maipaaytayo kenkuana; ket adda maymaysa nga Apo, ni Jesu-Kristo, a babaen kenkuana adda ti amin a bambanag, ken datayo babaen kenkuana.”​—1 Cor. 8:6.

5. Kasano nga intampok ti Kasuratan dagiti nakaidumaan ni Jesus?

⁵ Nupay kasta, adu pay ti nakaidumaan ni Jesus. Dakamaten ti Kasuratan ti adu a titulo wenno annongenna a mangitampok iti naisangsangayan nga akemna iti panggep ti Dios. Usigentayo ti lima pay kadagitoy nga akem ni Jesus a nadakamat iti Kristiano a Griego a Kasuratan.a

“Ti Sao”

6. Apay a maitutop a maawagan ni Jesus kas “ti Sao”?

⁶ Basaen ti Juan 1:14. Apay a naawagan ni Jesus kas “ti Sao,” wenno Verbo? Tuktukoyen daytoy a titulo ti akem nga itungtungpalna sipud idi naaramid dagiti amin a dadduma pay nga intelihente a parsua. Inusar ni Jehova ti Anakna a mangyallatiw iti impormasion ken instruksion kadagiti espiritu nga annakna, agraman kadagiti tattao ditoy daga. Pinasingkedan ni Jesus ti akemna kas ti Sao wenno Pannakangiwat ti Dios, idi kinunana kadagiti Judio a dumdumngeg kenkuana: “Ti isursurok saanko a kukua, no di ket kukua daydiay nangibaon kaniak. No ti asinoman agtarigagay a mangaramid iti pagayatanna, maammuannanto maipapan iti sursuro no dayta ket aggapu iti Dios wenno no agsasaoak manipud iti bukodko a parnuay.” (Juan 7:16, 17) Uray idi nagsubli iti nailangitan a dayagna, agtultuloy nga agaplikar ken Jesus ti titulo a “Ti Sao ti Dios.”​—Apoc. 19:11, 13, 16.

7. Kasano a matuladtayo ti kinapakumbaba ni Jesus kas “ti Sao”?

⁷ Panunotenyo no ania ti ipamatmat daytoy a titulo. Nupay ni Jesus ti kasisiriban kadagiti amin a parsua ni Jehova, saan a nagpannuray iti bukodna a sirib. Sawenna laeng no ania ti ibaga kenkuana ni Amana. Kanayon a ni Jehova ti pangituronganna iti pammadayaw imbes nga iti bagina. (Juan 12:50) Anian a nagsayaat a tuladentayo! Naitalek met kadatayo ti nagpateg a pribilehio a “mangideklara iti naimbag a damag ti naimbag a bambanag.” (Roma 10:15) No pudno nga apresiarentayo ti kinapakumbaba ni Jesus, liklikantayo nga isuro ti bukodtayo a kapanunotan. Bayat nga ikaskasabatayo ti mangispal-biag a mensahe ti Kasuratan, ditay kayat ti “lumbes iti bambanag a naisurat.”​—1 Cor. 4:6.

“Ti Amen”

8, 9. (a) Ania ti kayat a sawen ti sao nga “amen,” ken apay a naawagan ni Jesus kas “ti Amen”? (b) Kasano nga intungpal ni Jesus ti akemna kas “ti Amen”?

⁸ Basaen ti Apocalipsis 3:14. Apay a naawagan ni Jesus kas “ti Amen”? Ti sao a naipatarus nga “amen” ket transliterasion ti Hebreo a termino a kaipapananna “sapay koma,” wenno “awan duadua.” Ti nagtaudanna a Hebreo a sao ket kaipapananna “mapagtalkan” wenno “mapagpiaran.” Daytoy met la a sao ti nausar a mangtukoy iti kinamapagtalkan ni Jehova. (Deut. 7:9; Isa. 49:7) Iti ania ngarud a pamay-an a naisangsangayan ni Jesus idi natukoy kas “ti Amen”? Imutektekanyo ti kuna ti 2 Corinto 1:19, 20: “Ti Anak ti Dios, ni Kristo Jesus, a naikaskasaba kadakayo . . . , saan a nagbalin a Wen ket kaskasdi a Saan, no di ket ti Wen nagbalin a Wen iti kasona. Ta uray pay no kasano ti kaadu dagiti kari ti Dios, nagbalinda a Wen babaen kenkuana. Gapuna baeten met kenkuana a ti ‘Amen’ maikuna iti Dios a maipaay a dayag.”

⁹ Ni Jesus “ti Amen” kadagiti amin a kari ti Dios. Ti awan pakapilawan a panagbiagna ditoy daga, agraman ti ipapatayna kas daton, pinasingkedanna ken pinagbalinna a posible ti pannakatungpal ti amin a kari ni Jehova a Dios. Babaen ti panagtalinaedna a matalek, pinaneknekan ni Jesus nga ulbod ti pammabasol ni Satanas a dagiti adipen ti Dios tallikudanda kano ni Jehova no maipasangoda iti rigat, suot, ken panagsagaba. (Job 1:6-12; 2:2-7) Kadagiti amin a parsua ti Dios, ti inauna nga Anak ti nakaipaay iti naan-anay a pammaneknek nga ulbod dayta a pammabasol. Kanayonanna, ni Jesus ti kangrunaan a nangitandudo iti kinasoberano ni Jehova kas ti addaan kalintegan a mangituray iti intero nga uniberso.

10. Kasano a matuladtayo ni Jesus iti naisangsangayan nga akemna kas “ti Amen”?

¹⁰ Kasano a matuladtayo ni Jesus iti naisangsangayan nga akemna kas “ti Amen”? Babaen ti panagtalinaedtayo a matalek kenni Jehova ken panangsuporta iti sapasap a kinasoberanona. No aramidentayo dayta, ipangpangagtayo ti balakad ti Proverbio 27:11: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.”

Ti “Manangibabaet iti Maysa a Baro a Tulag”

11, 12. Kasano a naisangsangayan ti akem ni Jesus kas Manangibabaet?

¹¹ Basaen ti 1 Timoteo 2:5, 6. Ni Jesus ti “maymaysa a manangibabaet iti Dios ken kadagiti tattao.” Isu ti “manangibabaet iti maysa a baro a tulag.” (Heb. 9:15; 12:24) Ngem naawagan met ni Moises kas manangibabaet​—ti manangibabaet iti Linteg ti tulag. (Gal. 3:19) Kasano ngarud a naisangsangayan ti akem ni Jesus kas Manangibabaet?

¹² Ti orihinal a sao a naipatarus kas “manangibabaet” ket maysa a legal a termino. Tuktukoyenna ni Jesus kas ti legal a Manangibabaet (wenno no an-anagen, maysa nga abogado) iti baro a tulag a namagbalin a posible ti pannakaipasngay ti baro a nasion, ‘ti Israel ti Dios.’ (Gal. 6:16) Daytoy a nasion ket buklen dagiti napulotan iti espiritu a Kristiano a kameng ti nailangitan a “naarian a kinapadi.” (1 Ped. 2:9; Ex. 19:6) Ti Linteg ti tulag nga imbabaet ni Moises ket saan a nakapataud iti kasta a nasion.

13. Ania ti ramanen ti akem ni Jesus kas Manangibabaet?

¹³ Ania ti ramanen ti akem ni Jesus kas Manangibabaet? Inyaplikar ni Jehova ti pateg ti dara ni Jesus kadagiti nagbalin a paset ti baro a tulag. Iti kasta, ideklara ida ni Jehova a nalinteg. (Roma 3:24; Heb. 9:15) Ibilang ida ti Dios a maikari iti baro a tulag ken addaan iti namnama nga agbalin nga ar-ari ken papadi idiay langit! Kas ti Manangibabaet, tultulongan ida ni Jesus nga agtalinaed a nadalus iti imatang ti Dios.​—Heb. 2:16.

14. Aniaman ti namnamada, apay a rumbeng nga apresiaren ti amin a Kristiano ti akem ni Jesus kas Manangibabaet?

¹⁴ Komusta met dagidiay saan a karaman iti baro a tulag, a mangnamnama nga agbiag nga agnanayon ditoy daga imbes nga idiay langit? Nupay saanda a karaman iti baro a tulag, magunggonaanda iti dayta. Mapakawan dagiti basolda ken maideklarada a nalinteg kas gagayyem ti Dios. (Sant. 2:23; 1 Juan 2:1, 2) Nailangitan man wenno naindagaan ti namnamatayo, adda naimbag a rasontayo a mangapresiar iti akem ni Jesus kas Manangibabaet iti baro a tulag.

“Nangato a Padi”

15. Kas ti Nangato a Padi, kasano a naiduma ni Jesus kadagiti amin a lallaki a nagserbi idi kas nangato a padi?

¹⁵ Adu a lallaki ti nagserbi idi kas nangato a padi, ngem naisangsangayan ti akem ni Jesus kas Nangato a Padi. Kasano? Inlawlawag ni Pablo: “Saanna a kasapulan nga inaldaw, a kas kadagidiay nangato a papadi, a mangidaton kadagiti sakripisio, umuna maipaay iti bukodna a basbasol ket kalpasanna agpaay kadagidiay umili: (ta daytoy inaramidna iti namimpinsanen idi indatonna ti bagina;) ta ti Linteg dutokanna a nangato a papadi dagiti tattao nga addaan pagkapuyan, ngem ti sao ti sinapataan a kari a dimteng kalpasan ti Linteg dutokanna ti Anak, a maan-anay iti agnanayon.”​—Heb. 7:27, 28.b

16. Apay a naisangsangayan ti daton ni Jesus?

¹⁶ Perpekto a tao ni Jesus, ti eksakto a katupag ni Adan sakbay a nagbasol. (1 Cor. 15:45) Iti kasta, ni laeng Jesus ti tao a makaipaay iti perpekto a daton​—ti kita ti sakripisio a maminsan laeng a maidaton. Iti sidong ti Mosaiko a Linteg, inaldaw idi ti panagdaton. Ngem dagita a panagdaton ken napadian a serbisio ket panirpatan laeng iti aramidento ni Jesus. (Heb. 8:5; 10:1) Isu a no maipapan iti nagapuanan ken kapautna, naisangsangayan ti akem ni Jesus kas Nangato a Padi.

17. Apay a rumbeng nga apresiarentayo ti akem ni Jesus kas Nangato a Padi, ken kasano a maaramidtayo dayta?

¹⁷ Kasapulantayo ni Jesus kas Nangato a Padi tapno magun-odtayo ti nalinteg a takder iti imatang ti Dios. Nagsayaat la ketdin ta addaantayo iti kasta a Nangato a Padi! “Addaantayo kas nangato a padi, saan a ti maysa a saanna a mabalin ti makipagrikna kadagiti kinakapuytayo,” insurat ni Pablo, “no di ket ti maysa a nasuboken iti amin a bambanag kas kadatayo, ngem awanan basol.” (Heb. 4:15) No talaga nga apresiarentayo daytoy, masapul a ‘saantayo koman nga agbiag nga agpaay iti bagbagitayo, no di ket agpaay kenkuana a natay maipaay kadatayo.’​—2 Cor. 5:14, 15; Luc. 9:23.

Ti Naipadto a ‘Bin-i’

18. Ania ti naipadto kalpasan a nagbasol ni Adan, ken ania ti kanayonan a naipalgak maipapan iti daytoy a padto?

¹⁸ Idiay Eden, idi agparang a napukaw ti tao ti amin a naimbag nga ik-ikutanna​—nadalus a takder iti imatang ti Dios, agnanayon a biag, kinaragsak, ken Paraiso​—ni Jehova a Dios impakpakaunana ti maysa a Manangispal. Natukoy daytoy kas ti ‘bin-i.’ (Gen. 3:15) Iti panaglabas ti panawen, daytoy a di nainaganan a Bin-i ti nakaisentruan ti adu a padto ti Biblia. Isu ket agtaud iti kapuonan da Abraham, Isaac, Jacob, ken Ari David.​—Gen. 21:12; 22:16-18; 28:14; 2 Sam. 7:12-16.

19, 20. (a) Asino ti naikari a Bin-i? (b) Apay a makuna nga adda dadduma pay a paset ti naipadto a bin-i malaksid ken Jesus?

¹⁹ Asino daytoy a naikari a Bin-i? Masarakan ti sungbat iti Galacia 3:16. (Basaen.) Ngem iti maud-udi a paset dayta a kapitulo, kinuna ni apostol Pablo kadagiti napulotan a Kristiano: “Mainayon pay, no kukuanakayo ni Kristo, pudno a bin-inakayo ni Abraham, dagiti agtawid mainaig iti maysa a kari.” (Gal. 3:29) No ni Kristo ti naikari a Bin-i, apay a naikuna nga adda dadduma pay a karaman iti dayta a bin-i?

²⁰ Minilion ti mangibaga a kaputotan ida ni Abraham ken agtigtignay pay ketdi ti dadduma a kas propeta. Adda dagiti relihion a mangipannakkel a kaputotan ni Abraham dagiti propetada. Ngem dagitoy kadi ti naikari a Bin-i? Saan. Napaltiingan ni apostol Pablo a mangilawlawag a saan nga amin a kaputotan ni Abraham ket addaan iti karbengan a mangibaga nga isuda ti naikari a Bin-i. Dagiti kaputotan ti dadduma nga annak ni Abraham ket saan a nausar a mangbendision iti sangatauan. Ni laeng Isaac nga anakna ti pagtaudan ti bin-i a mangyeg iti bendision. (Heb. 11:18) Kinapudnona, maysa laeng a tao ti kangrunaan a paset ti naipadto a bin-i.c Isu ni Jesu-Kristo, ket nairekord iti Biblia ti kapuonanna mangrugi ken Abraham. Amin a simmaganad a nagbalin a segundario a paset ti bin-i ni Abraham ket ‘kukua ni Kristo.’ Wen, pudno a naisangsangayan ti akem ni Jesus iti pannakatungpal daytoy a padto.

21. Ania ti nakatukay kenka maipapan iti pamay-an ti panangtungpal ni Jesus iti naisangsangayan nga akemna iti panggep ni Jehova?

²¹ Ania ti naadaltayo iti daytoy ababa a panangusig iti naisangsangayan nga akem ni Jesus iti panggep ni Jehova? Sipud pannakaparsuana ken agpatpatuloy, pudno a naisangsangayan wenno naidumduma ti bugbugtong nga Anak ti Dios. Kaskasdi, kanayon a sipapakumbaba a nagserbi ni Jesus maitunos iti pagayatan ni Amana, a dina pulos tinarigagayan ti maidaydayaw. (Juan 5:41; 8:50) Anian a nagsayaat nga ulidan kadatayo ita! Kas ken Jesus, sapay koma ta determinadotayo a ‘mangaramid iti amin a bambanag a maipaay iti dayag ti Dios.’​—1 Cor. 10:31.

[Footnotes]

Malagipyo Kadi?

• Maibatay kadagiti titulo wenno annongen ni Jesus, ania ti naadalyo maipapan iti naisangsangayan nga akemna? (Kitaenyo ti kahon.)

• Kasanoyo a matulad ti ulidan ti naisangsangayan nga Anak ni Jehova?

[Kahon/Ladawan iti panid 15]

Dadduma a Titulo a Mangyanninaw iti Naisangsangayan nga Akem ni Jesus iti Panggep ti Dios

◼ Ti Bugbugtong nga Anak. (Juan 1:3) Ni Jesus ti kakaisuna a direkta a pinarsua ni Amana.

◼ Ti Sao. (Juan 1:14) Inusar ni Jehova ti Anakna kas Pannakangiwat tapno mangyallatiw iti impormasion ken instruksion kadagiti dadduma pay a parsua.

◼ Ti Amen. (Apoc. 3:14) Ti awan pakapilawan a panagbiag ni Jesus ditoy daga, agraman ti ipapatayna kas daton, pinatalgedan ken pinagbalinna a posible ti pannakatungpal dagiti kari ni Jehova a Dios.

◼ Ti Manangibabaet iti Baro a Tulag. (1 Tim. 2:5, 6) Kas ti legal a Manangibabaet, pinagbalin ni Jesus a posible ti pannakaipasngay ti maysa a baro a nasion, ‘ti Israel ti Dios,’ a buklen dagiti Kristiano a kameng ti nailangitan a “naarian a kinapadi.”​—Gal. 6:16; 1 Ped. 2:9.

◼ Ti Nangato a Padi. (Heb. 7:27, 28) Ni Jesus laeng ti tao a nakaipaay iti namimpinsan a perpekto a daton. Mabalinnatayo a dalusan manipud iti basol ken wayawayaan manipud iti resultana nga ipapatay.

◼ Ti Naikari a Bin-i. (Gen. 3:15) Maysa laeng a tao, ni Jesu-Kristo, ti kangrunaan a paset ti naipadto a bin-i. Amin a simmaganad a nagbalin a segundario a paset ti bin-i ni Abraham ket ‘kukua ni Kristo.’​—Gal. 3:29.