Pakaidayawan ni Jehova ti Panagibtur iti Sidong Dagiti Pakasuotan

“No, inton agar-aramidkayo iti naimbag ket agsagabakayo, ibturanyo dayta, makaay-ayo a banag daytoy iti Dios.”​—1 PEDRO 2:20.

1. Gapu ta kayat dagiti pudno a Kristiano a maitungpal ti dedikasionda, ania a saludsod ti nasken a mausig?

DAGITI Kristiano ket dedikado ken ni Jehova ken kayatda nga aramiden ti pagayatanna. Tapno maitungpalda ti dedikasionda, aramidenda ti amin a kabaelanda a mangtulad iti Ulidanda, ni Jesu-Kristo, ken saksianda ti kinapudno. (Mateo 16:24; Juan 18:37; 1 Pedro 2:21) Ngem ni Jesus ken ti dadduma pay a matalek a tattao imbuisda ti biagda ket natayda kas martir gapu iti pammatida. Kayat kadi a sawen daytoy a namnamaen ti amin a Kristiano a matayda gapu iti pammatida?

2. Ania ti panangmatmat dagiti Kristiano kadagiti suot ken panagsagaba?

² Kas Kristiano, maidagadag nga agtalinaedtayo a matalek agingga ken patay, nupay dina kanayon a kaipapanan a mataytayo gapu iti pammati. (2 Timoteo 4:7; Apocalipsis 2:10) Kayat a sawen daytoy a nupay sidadaantayo nga agsagaba​—ken matay no kasapulan​—maigapu iti pammatitayo, saan a dayta ti tartarigagayantayo. Saantayo a pagragsakan ti panagsagaba ken ut-ot wenno pannakaibabain. Ngem gapu ta ditay malapdan dagiti suot ken pannakaidadanes, masapul nga utobentayo a naimbag no kasanotayo nga agtignay no mapasarantayo dagita.

Matalek iti Sidong ti Pannubok

3. Mangisalaysay kadagiti nailanad iti Biblia a kapadasan dagiti naipasango iti pannakaidadanes. (Kitaenyo ti kahon a “No Kasanoda a Sinango ti Pannakaidadanes,” iti sumaganad a panid.)

³ Iti Biblia, mabasatayo ti adu a salaysay a mangipakita no ania ti inaramid dagiti nagkauna nga adipen ti Dios idi naipasangoda kadagiti kasasaad a namagpeggad iti biagda. Dagiti nadumaduma a panagtignayda ket makaisuro kadagiti Kristiano ita no bilang ta maipasangoda kadagiti umasping a kasasaad. Usigenyo dagiti salaysay iti kahon a “No Kasanoda a Sinango ti Pannakaidadanes,” ket kitaenyo no ania ti maadalyo kadagita.

4. Ania ti inaramid ni Jesus ken ti dadduma a matalek nga adipen idi nasuotda?

⁴ Nupay saan nga agpapada ti panagtignay ni Jesus ken ti dadduma a matalek nga adipen ti Dios idi naidadanesda iti sidong ti nadumaduma a kasasaad, nalawag a dida insarsarak ti biagda nga awan gapgapuna. Idi naipasangoda iti napeggad a kasasaad, natured ngem naannadda. (Mateo 10:16, 23) Kayatda ngamin a maitultuloy ti panangasabada ken masalimetmetan ti kinasungdoda ken ni Jehova. Dagiti inaramidda iti nagduduma a kasasaad ket agserbi a pagwadan kadagiti Kristiano a maipaspasango ita kadagiti suot ken pannakaidadanes.

5. Ania a pannakaidadanes ti napasamak idiay Malawi idi dekada 1960, ket ania ti inaramid dagiti Saksi?

⁵ Iti moderno a panawen, naipasango ti ili ni Jehova kadagiti nakaro a rigat ken pannakadangran gapu kadagiti gubat, pannakaiparit, wenno direkta a pannakaidadanes. Kas pagarigan, idi dekada 1960, nakaro ti pannakaidadanes dagiti Saksi ni Jehova idiay Malawi. Nadadael dagiti Kingdom Hall, pagtaengan, abasto a taraon, ken negosioda​—nganngani amin nga ik-ikutanda. Napasaranda ti pannakakabkabil ken dadduma pay a pannakaparigat. Ania ti inaramid dagiti kakabsat? Rinibu ti nagtalaw manipud kadagiti purokda. Adu ti nagkamang iti kabakiran, bayat a dadduma ti temporario a nagnaed idiay Mozambique. Nupay adu a matalek a kakabsat ti natay, dadduma ti pimmanaw kadagiti napeggad a lugar, maysa a nainsiriban a tignay iti sidong dagiti kasta a kasasaad. Gapuna, tinulad dagiti kakabsat ti inaramid da Jesus ken Pablo.

6. Iti laksid ti nakaro a pannakaidadanes, ania ti saan a liniwayan dagiti Saksi idiay Malawi?

⁶ Nupay masapul nga umakar wenno aglemmeng dagiti kakabsat a taga Malawi, inkagumaanda a sinurot dagiti teokratiko nga instruksion ket sililimed nga intultuloyda nga intungpal dagiti Nakristianuan nga aktibidad agingga iti kabaelanda. Ti resultana? Naragpatda ti 18,519 a kangatuan a bilang dagiti agibumbunannag iti Pagarian sakbay unay ti pannakaiparit idi 1967. Nupay nagtultuloy ti pannakaiparit ken adu ti nagkamang idiay Mozambique, adda baro a 23,398 a kangatuan a bilang dagiti agibumbunannag idi 1972. Nagpromedioda iti nasurok a 16 nga oras iti ministerio kada bulan. Awan duadua a nangyeg iti pakaidayawan ni Jehova dagiti tignayda, ket binendisionan ni Jehova dagidi a matalek a kakabsat bayat daydi a panawen ti nakaro a pakarigatan.a

7, 8. Apay a saan nga immakar ti dadduma, nupay adda ibubusor?

⁷ Iti sabali a bangir, kadagiti pagilian a parikut ti ibubusor, mabalin a pilien ti dadduma a kakabsat ti saan a pumanaw, nupay kabaelanda koma ti umakar. Mabalin nga adda dagiti parikut a marisut no umakar, ngem mabalin a mangpataud met dayta iti dadduma a karit. Kas pagarigan, maitultuloyda ngata ti makitimpuyog kadagiti Kristiano a kakabsat ket saanda a maikapis iti naespirituan? Masalimetmetanda ngata ti naespirituan a rutinada bayat nga agbirbirokda iti pagnaedan ken panggedanda, nalabit iti nasalsaliwanwan a pagilian wenno iti lugar a dakdakkel ti oportunidad a sumayaat ti panagbiag?​—1 Timoteo 6:9.

⁸ Saan a kayat nga umakar ti dadduma gapu ta maseknanda iti naespirituan a pagimbagan dagiti kakabsatda. Pinilida ti agtalinaed ken sanguen ti kasasaad tapno maitultuloyda ti mangasaba iti lugarda ken mapabilegda dagiti padada nga agdaydayaw. (Filipos 1:14) Babaen ti kasta a pangngeddeng, nakatulong pay ketdi ti dadduma kadagiti legal a panagballigi iti pagilianda.b

9. Ania dagiti banag a nasken nga usigen sakbay nga agdesision no agtalinaed wenno umakar gapu iti pannakaidadanes?

⁹ Agtalinaed man wenno umakar​—personal a desision dayta ti indibidual. Ngem agdesision laeng koma kalpasan ti sikakararag a panagpaiwanwan ken ni Jehova. Aniaman ti desisiontayo, masapul a laglagipentayo ti kinuna ni apostol Pablo: “Tunggal maysa kadatayo makikuentanto iti Dios maipaay iti bagina.” (Roma 14:12) Kas nadakamaten, ti kalikaguman ni Jehova isu ti panagtalinaed a matalek ti tunggal adipenna iti sidong ti aniaman ken amin a kasasaad. Dadduma ita nga adipenna ti maipaspasango kadagiti suot ken pannakaidadanes; mabalin nga iti sabalinto met a gundaway ti dadduma. Maipasangotayo amin iti pannubok ket awan koma ti mangipapan a maliklikantayo dayta. (Juan 15:19, 20) Kas dedikado nga adipen ni Jehova, saantayo a mabalin a liklikan ti sapasap nga isyu mainaig iti pannakasantipikar ti nagan ni Jehova ken ti pannakaalangon ti kinasoberanona.​—Ezequiel 38:23; Mateo 6:9, 10.

“Dikay Subadan ti Dakes iti Dakes iti Asinoman”

10. Ania a nagsayaat a pagwadan ti impasdek ni Jesus ken dagiti apostolna no maipasangotayo iti suot ken ibubusor?

¹⁰ Ti sabali pay a napateg a prinsipio a masursurotayo iti inaramid ni Jesus ken dagiti apostolna iti sidong ti pannakasuot isu ti di pulos panagibales kadagiti mangidaddadanes kadatayo. Awan ti mabasatayo iti Biblia a mangiparipirip a ni Jesus wenno dagiti pasurotna nangbuangayda iti maysa a grupo ti oposision, wenno nakirinnanggasda kadagiti mangidaddadanes kadakuada. Iti kasumbangirna, binalakadan ni apostol Pablo dagiti Kristiano: “Dikay subadan ti dakes iti dakes iti asinoman.” “Dikay ibalesan ti bagbagiyo, dungdungnguen, no di ket ipaayanyo ti lugar ti pungtot; ta adda a naisurat: ‘Kukuak ti pammales; supapakakto, kuna ni Jehova.’” Maysa pay, “dika ipalubos a parmekennaka ti dakes, no di ket itultuloymo a parmeken ti dakes babaen ti naimbag.”​—Roma 12:17-21; Salmo 37:1-4; Proverbio 20:22.

11. Ania ti kinuna ti maysa a historiador maipapan iti kababalin dagiti nagkauna a Kristiano iti gobierno?

¹¹ Dagiti nagkauna a Kristiano impapusoda dayta a balakad. Iti librona a The Early Church and the World, ni historiador a Cecil J. Cadoux dineskribirna ti kababalin dagiti Kristiano maipapan iti gobierno idi 30-70 K.P. Insuratna: “Awan ti nalawag a pammaneknektayo a dagiti Kristiano iti daydi a tiempo nangaramatda iti puersa tapno sarangtenda dagidiay mangidaddadanes kadakuada. Ti kakaruanen nga inaramidda isu ti panangkondenarda kadagiti agtuturay wenno ti pananglibasda kadagitoy. Ngem ti kadawyan a tignay dagidi a Kristiano no maidadanesda isu ti natanang ngem natibker a panagkedkedda kadagiti bilin ti gobierno nga ibilangda a maisalungasing iti panagtulnogda ken Kristo.”

12. Apay a nasaysayaat nga ibturan ti panagsagaba imbes nga agibales?

¹² Nainsiriban kadi ti kasta a natanang a tignay? Dagidiay kasta ti kababalinda saanda ngata nga agbalin a nalaka a maabuso babaen dagidiay porsegido a mangtalipupos kadakuada? Saan ngata a nainsiriban nga idepensa ti maysa ti bagina? No iti panangmatmat ti tao, mabalin a husto dayta. Ngem kas adipen ni Jehova, agtalektayo a kasayaatan pay laeng a tungpalen ti instruksion ni Jehova iti amin a kasasaad. Silalagiptayo iti sasao ni Pedro: “No, inton agar-aramidkayo iti naimbag ket agsagabakayo, ibturanyo dayta, makaay-ayo a banag daytoy iti Dios.” (1 Pedro 2:20) Agtalektayo a naan-anay nga ammo ni Jehova ti kasasaad ket dina ipalubos nga agtultuloy a kasta dagiti bambanag. Kasanotayo a masigurado dayta? Kinuna ni Jehova kadagiti nakautibo nga ilina idiay Babilonia: “Ti mangsagid kadakayo sagidenna ti bukel ti matak.” (Zacarias 2:8) Siasino koma ti mayat a masagid ti matana iti mabayag? Ipaay ni Jehova ti bang-ar iti umiso a tiempo. Saan pulos a mapagduaduaan dayta.​—2 Tesalonica 1:5-8.

13. Apay nga impalubos ni Jesus nga isu ket arestuen dagiti kabusorna?

¹³ Mainaig iti dayta, makasursurotayo ken ni Jesus. Impalubosna nga isu ket arestuen dagiti kabusorna idiay minuyongan ti Getsemani. Ngem saan a gapu ta dina maidepensa ti bagina. Kinapudnona, kinunana kadagiti adalanna: ‘Pagarupenyo kadi a saanko a mabalin ti agkiddaw ken Amak tapno mangipaay kaniak ita a kanito iti nasurok a sangapulo ket dua a lehion dagiti anghel? Ta no kasta, kasanonto ti pannakatungpal ti Kasuratan a dayta ket masapul a maaramid iti kastoy a pamay-an?’ (Mateo 26:53, 54) Ti panangibanag iti pagayatan ni Jehova ti kapatgan ken ni Jesus, uray agsagaba maigapu iti dayta. Naan-anay a nagtalek iti naimpadtuan a salmo ni David: “Saanmonto a baybay-an ti kararuak idiay Sheol. Saanmonto nga ipalubos a daydiay nasungdom makitana ti abut.” (Salmo 16:10) Sumagmamano a tawen kalpasanna, kinuna ni apostol Pablo maipapan ken Jesus: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.”​—Hebreo 12:2.

Ti Rag-o ti Panangsantipikar iti Nagan ni Jehova

14. Ania a rag-o ti nangpabileg ken ni Jesus kadagiti amin a pannakasuotna?

¹⁴ Ania a rag-o ti nangpabileg ken ni Jesus idi naipasidong iti kakaruan a pannubok? Kadagiti amin nga adipen ni Jehova, ni Jesus a dungdungnguenna nga Anak ti sigurado a kangrunaan a puntiria ni Satanas. No kasta, ti panangsalimetmet ni Jesus iti kinasungdona iti sidong ti pannubok isu ti kangrunaan a sungbat iti panangumsi ni Satanas ken ni Jehova. (Proverbio 27:11) Mailadawanyo kadi ti rag-o ken pannakapnek a narikna ni Jesus apaman a napagungar? Anian a ragsakna ta ammona a natungpalna ti annongenna kas perpekto a tao a nangalangon iti kinasoberano ni Jehova ken nangsantipikar iti naganna! Maysa pay, ti panagtugaw “iti makannawan ti trono ti Dios” ket awan duadua a maysa a nakaskasdaaw a dayaw ken kangrunaan a gubuayan ti rag-o ni Jesus.​—Salmo 110:1, 2; 1 Timoteo 6:15, 16.

15, 16. Ania a nakaro a pannakaidadanes ti inibturan dagiti Saksi idiay Sachsenhausen, ken ania ti nangpakired kadakuada a mangaramid iti kasta?

¹⁵ Para kadagiti Kristiano, maysa met a rag-o ti pannakiraman iti panangsantipikar iti nagan ni Jehova babaen ti panangibtur kadagiti suot ken pannakaidadanes, kas panangtulad iti ulidan ni Jesus. Maysa a mayanatup a pagarigan ti kapadasan dagiti Saksi a nagsagaba kadagiti nakaam-ames a kampo konsentrasion idiay Sachsenhausen ken nakalasat iti makabannog a martsa nga agturong ken patay idi arinunos ti Gubat Sangalubongan II. Bayat ti martsa, rinibu a balud ti natay gapu iti paniempo, sakit, bisin, wenno siuulpit a napapatay iti dalan babaen dagiti Nazi a guardia. Dagiti Saksi, nga agdagup iti 230, nakalasatda babaen ti panagtalinaedda a sisisinged iti maysa ken maysa ken nagtitinnulongda uray nagpeggad ti biagda.

¹⁶ Ania ti nangpakired kadagidi a Saksi tapno maibturanda ti kasta a nakaro a pannakaidadanes? Apaman a timmalged ti kasasaadda, inyebkasda ti rag-o ken panagyamanda ken ni Jehova babaen ti maysa a dokumento a napauluan “Ti resolusion dagiti 230 a saksi ni Jehova a naggapu iti innem a nasion, a nagkakadua iti kabakiran nga asideg ti Schwerin idiay Mecklenburg.” Kastoy ti sagudayenna: “Nalasatanmi ti maysa a napaut, narigat a panawen ti pannakasubok. Dagidiay naitalimeng, nga arigna narabsut manipud iti dumardarang nga urno, awan a pulos iti pagilasinan a naglak-amda iti kasta. (Kitaenyo ti Daniel 3:27.) Imbes ketdi, napnoda iti kired ken bileg ni Jehova ken sigagagar nga agur-urayda kadagiti baro a bilin ti Ari a mangidur-as kadagiti Teokratiko nga interes.”c

17. Aniada a kita ti pannubok ti maipaspasango ita kadagiti adipen ti Dios?

¹⁷ Kas kadagidi a 230 a matalek, mabalin met a masubok ti pammatitayo, nupay ditay pay napadas ti “simmaranget agingga iti dara.” (Hebreo 12:4) Ngem nadumaduma ti kita ti pannubok. Mabalin a pananguyaw dayta dagiti kaeskuelaan, wenno panangdurog dagiti kakadua nga agaramid iti imoralidad ken dadduma pay a dakes nga aramid. Mabalin a mangyeg met iti nakaro a rigat ken suot ti determinasion nga umadayo iti dara, makiasawa laeng iti maysa nga agserserbi iti Apo, wenno mangisuro kadagiti annak nga agbalin a manamati iti laksid ti nasinasina a sangakabbalayan.​—Aramid 15:29; 1 Corinto 7:39; Efeso 6:4; 1 Pedro 3:1, 2.

18. Apay a masiguradotayo a maibturantayo uray ti karigatan a suot?

¹⁸ Ngem aniaman a pannubok ti sumangbay kadatayo, ammotayo nga agsagsagabatayo gapu ta ipangpangrunatayo ni Jehova ken ti Pagarianna, ket ibilangtayo a pudno a dayaw ken rag-o ti panangaramid iti dayta. Mapabilegtayo iti makaliwliwa a sasao ni Pedro: “No maum-umsikayo gapu iti nagan ni Kristo, naragsakkayo, agsipud ta ti espiritu ti dayag, ti mismo nga espiritu ti Dios, agtataeng kadakayo.” (1 Pedro 4:14) Babaen ti bileg ti espiritu ni Jehova, maibturantayo uray ti karigatan a suot, a mangyeg amin kenkuana iti dayag ken dayaw.​—2 Corinto 4:7; Efeso 3:16; Filipos 4:13.

[Footnotes]

Mailawlawagyo Kadi?

• Ania ti panangmatmat dagiti Kristiano iti panagsagaba ken pannakaidadanes?

• Ania ti masursurotayo iti inaramid ni Jesus ken ti dadduma a matalek a kakabsat idi naipasangoda iti suot?

• Apay a nainsiriban a di agibales no maidadanestayo?

• Ania a rag-o ti nangpabileg ken ni Jesus bayat ti pannakasuotna, ken ania ti masursurotayo iti dayta?

[Kahon/Dagiti Ladawan iti panid 15]

No Kasanoda a Sinango ti Pannakaidadanes

• Sakbay a dimteng idiay Betlehem dagiti soldado ni Herodes tapno papatayenda ti amin nga ubbing a lalaki nga agtawen iti dua nga agpababa, innala da Jose ken Maria ti maladaga a ni Jesus ket nagkamangda idiay Egipto kas imbilin ti anghel.​—Mateo 2:13-16.

• Iti adu a daras kabayatan ti ministerio ni Jesus, ginandat dagiti kabusorna a papatayen gapu iti nabileg a panangsaksina. Nalibasan ida ni Jesus iti tunggal gundaway.​—Mateo 21:45, 46; Lucas 4:28-30; Juan 8:57-59.

• Idi dimteng dagiti soldado ken opisial iti minuyongan ti Getsemani tapno arestuenda ni Jesus, dina inlibak ti kinasiasinona babaen ti namindua a panangikunana: “Siak dayta.” Binilinna pay ketdi dagiti pasurotna a dida lapdan ti panangaresto kenkuana dagiti managderraaw.​—Juan 18:3-12.

• Idiay Jerusalem, naaresto, nasapsaplit, ken nabilin da Pedro nga isardengda ti agsao maipapan ken Jesus. Ngem apaman a nawayawayaanda “pimmanawda . . . , ket iti tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.”​—Aramid 5:40-42.

• Ni Saulo, a nagbalin idi agangay kas apostol Pablo, naammuanna ti plano dagiti Judio idiay Damasco a mangpapatay kenkuana. Isu ket inkabil dagiti kakabsat iti maysa a kuribot sada imbaba iti maysa a gutbaw iti pader ti siudad kabayatan ti rabii, isu a nakalibas.​—Aramid 9:22-25.

• Sumagmamano a tawen kalpasanna, pinili ni Pablo ti agapelar ken ni Cesar, uray pay agpada a natakuatan da Gobernador Festo ken Ari Agripa nga “awan ar-aramidenna a maikari iti ipapatay wenno pannakaparaut.”​—Aramid 25:10-12, 24-27; 26:30-32.

[Dagiti Ladawan iti panid 16, 17]

Nupay napilitanda nga umakar gapu iti nakaro a pannakaidadanes, rinibu a matalek a Saksi idiay Malawi ti sirarag-o a nangitultuloy a nangikasaba iti Pagarian

[Dagiti Ladawan iti panid 17]

Ti rag-o ti panangsantipikar iti nagan ni Jehova pinabilegna dagitoy a matalek a kakabsat kabayatan daydi makapapatay a martsa ken kadagiti kampo konsentrasion dagiti Nazi

[Credit Line]

Martsa nga agturong ken patay: KZ-Gedenkstätte Dachau, iti pammalubos ti USHMM Photo Archives

[Dagiti Ladawan iti panid 18]

Adu a kita dagiti suot ken rigat