LEKSION 60
Itultuloymo ti Rumang-ay
Bayat ti panagadalmo iti Biblia, nagadu ti nasursurom maipapan ken Jehova. Gapu kadagita a nasursurom, inayatmo isuna iti kasta unay. Isu a mabalin nga indedikarmo ti biagmo kenkuana ken nagpabautisarka. No saan pay, baka pampanunotem nga aramiden dayta iti masanguanan. Ngem saanna a kayat a sawen a no nagpabautisarkan, agpatinggan ti panagrang-aymo. Posible nga agbalinka a nadekdekket pay ken Jehova iti agnanayon. Kasano?
1. Apay a masapul nga itultuloymo a palagdaen ti pannakigayyemmo ken Jehova?
Masapul nga agporsegitayo a mangpalagda iti pannakigayyemtayo ken Jehova. Apay? “Tapno ditay pulos mayayus” wenno mayadayo kenkuana. (Hebreo 2:1) Ania ti makatulong tapno maitultuloytayo ti matalek a panagserbitayo ken Jehova? Nagagettayo koma iti trabaho a panangasaba ken mangbiroktayo iti dadduma pay a pamay-an a mas makapagserbitayo iti Dios. (Basaen ti Filipos 3:16.) Ti panagserbitayo ken Jehova ti kasayaatan nga aramidentayo iti biagtayo!—Salmo 84:10.
2. Ania pay ti itultuloymo nga aramiden?
Uray no malmalpasen daytoy a panagadalmo iti Biblia, agtultuloy ti biagmo kas maysa a Kristiano. Ibaga ti Biblia a masapul nga ‘isuottayo ti baro a personalidad.’ (Efeso 4:23, 24) No itultuloymo nga adalen ti Sao ti Dios ken umatenderka kadagiti gimong, adda dagiti baro a masursurom maipapan ken Jehova ken kadagiti kualidadna. Ikagumaam a kanayon a tuladen ti personalidadna. Itultuloymo ti agaramid kadagiti kasapulan a panagbalbaliw tapno maparagsakmo ni Jehova.
3. Kasanonaka a tulongan ni Jehova a rumang-ay?
Ibaga ti Biblia: ‘Turposento a mismo [ti Dios] ti panagsanaymo. Patibkerennakanto, papigsaennakanto, ikabilnakanto iti natibker a pundasion.’ (1 Pedro 5:10) Maipasangotayo amin kadagiti sulisog. Ngem tulongannatayo ni Jehova tapno malabanantayo dagita. (Salmo 139:23, 24) Ikarkarina nga ikkannaka agpadpada iti tarigagay ken pannakabalin tapno makapagserbika a simamatalek kenkuana.—Basaen ti Filipos 2:13.
AMMUEM TI AD-ADU PAY
Kitaem no kasano a maitultuloymo ti rumang-ay ken no kasano a bendisionannaka ni Jehova.
4. Itultuloymo ti makikomunikar iti kasayaatan a Gayyemmo
Nakatulong ti panagkararag ken panagadalmo iti Biblia tapno agbalinka a gayyem ni Jehova. Kasano a makatulong dagita tapno agbalinka a nadekdekket kenkuana?
Basaen ti Salmo 62:8, sa pagsaritaan daytoy a saludsod:
Kasano a mapasayaatmo dagiti kararagmo tapno lumagda ti pannakigayyemmo ken Jehova?
Basaen ti Salmo 1:2 ken footnote, sa pagsaritaan daytoy a saludsod:
Kasano a mapasayaatmo ti panagbasam iti Biblia tapno lumagda ti pannakigayyemmo ken Jehova?
Ania ti aramidem tapno ad-adu ti masursurom iti personal a panagadalmo iti Biblia? Tapno adda ideyam, i-play ti VIDEO. Kalpasanna, pagsaritaan dagiti sumaruno a saludsod.
Ania kadagiti suhestion iti video ti mabalinmo nga aramiden?
Ania dagiti topiko a kayatmo nga adalen?
5. Maaddaanka kadagiti naespirituan a kalat
Makatulong no adda kalatmo iti panagserbi ken Jehova tapno maitultuloymo ti rumang-ay. I-play ti VIDEO, sa pagsaritaan ti sumaruno a saludsod.
Iti daytoy a video, kasano a nakatulong ken Cameron dagiti implanona a naespirituan a kalat?
Saan a posible para iti amin ti umakar iti sabali a pagilian tapno mangasaba. Ngem mabalintayo latta ti maaddaan kadagiti kalat a kayatayo a gaw-aten. Basaen ti Proverbio 21:5, sa panunotem dagiti kalat a mabalinmo a gaw-aten para iti . . .
kongregasion.
ministerio.
Kasano a makatulong ti prinsipio iti dayta a bersikulo tapno magaw-atmo dagiti kalatmo?
Dagiti kalat a mabalinmo a gaw-aten
Pasayaatem dagiti kararagmo.
Basaem ti intero a Biblia.
Am-ammuem ti amin a kakongregasionmo.
Mangirugika iti panangyadal iti Biblia.
Agaplay kas auxiliary pioneer wenno regular pioneer.
No maysaka a kabsat a lalaki, ikagumaam ti makualipikar kas ministerial nga adipen.
6. Agbiagka a naragsak iti agnanayon!
Basaen ti Salmo 22:26, sa pagsaritaan daytoy a saludsod:
Ania ti mabalinmo nga aramiden tapno agbiagka a naragsak ita ken iti agnanayon?
SUMARIO
Itultuloymo a palagdaen ti pannakigayyemmo ken Jehova ken mangiplanoka kadagiti naespirituan a kalat. Iti kasta, agbiagka a naragsak iti agnanayon!
Rebiu
Apay a masiguradom a tulongannaka ni Jehova tapno makapagserbika a simamatalek kenkuana?
Kasano a mapalagdam ti pannakigayyemmo ken Jehova?
Kasano a makatulong dagiti naespirituan a kalat tapno rumang-ayka?
AGDISKOBREKA PAY
Ania ti napatpateg ken Jehova, ti mammaminsan a panangipakita iti debosion wenno ti agtultuloy a kinamatalek kenkuana?
Uray dagiti matalek nga adipen ni Jehova, mabalin a mapukawda ti rag-oda. Kitaem no kasano a mapasubli dayta.
Kasanoka a makaiplano kadagiti naespirituan a kalat ken ania ti aramidem tapno magaw-atmo dagita?
“Ipadayagyo ti Namarsua Babaen Dagiti Naespirituan a Kalat” (Ti Pagwanawanan, Hulio 15, 2004)
Apay a napateg nga agbalinka a nataengan iti naespirituan a Kristiano, ken kasanoka nga agbalin a kasta?
“Agmataengankayo ta ‘ti Dakkel nga Aldaw ni Jehova Asidegen’” (Ti Pagwanawanan, Mayo 15, 2009)