Agbalin a Kontento Babaen ti Panangyaplikar Kadagiti Prinsipio ti Biblia

AWAN duadua a nakakitakayon iti nakakukot ken ngumayemngem a pusa​—ladawan ti nalawag a pannakakontento. Ania la ketdin a nagsayaat ti agkukot a kas iti dayta a pusa ket riknaen ti umasping a pannakakontento! Ngem para iti adu, nagrigat ti agbalin a kontento, ken temporario laeng dayta. Apay?

Masansan ngamin a makaaramidtayo iti kamali gapu iti kinaimperpektotayo, ken masapul nga anusantayo dagiti pagkurangan ti dadduma. Maysa pay, agbibiagtayo iti panawen nga inawagan ti Biblia a ‘dagiti maudi nga aldaw,’ a mabigbig kas “napeggad a tiempo a narigat a pakilangenan.” (2 Timoteo 3:1-5) Mabalin a nakapasartayo iti pannakakontento idi ubbingtayo, ngem nakaro a marigrigatan ita ti kaaduan kadatayo gapu ta agbibiagtayo iti “napeggad a tiempo.” Posible kadi ti agbalin a kontento bayat daytoy a tiempo a pagbibiagantayo?

Imutektekanyo ta ibaga ti Kasuratan a narigat, saan ket nga imposible, a pakilangenan dagitoy napeggad a tiempo. Mapagballigiantayo dagita babaen ti panangyaplikar kadagiti prinsipio ti Biblia. Mabalin a saantayo a kanayon a marisut dagiti parikut, ngem mabalintayo ti agbalin a kontento. Usigentayo ti tallo kadagiti kasta a prinsipio.

Taginayonen ti Realistiko a Panangmatmat

Tapno agbalintayo a kontento, masapul a taginayonentayo ti realistiko a panangmatmat kadagiti limitasiontayo ken limitasion dagiti dadduma. Iti suratna kadagiti taga-Roma, imbatad ni apostol Pablo: “Amin nagbasol ken agkurang iti dayag ti Dios.” (Roma 3:23) Ditay kabaelan a tarusan ti adu nga aspeto ti dayag ni Jehova. Ti maysa a pagarigan ket ti simple a kinapudno a nailanad iti Genesis 1:31: “Nakita ti Dios ti isuamin nga inaramidna ket, adtoy! nasayaat unay dayta.” Kaanoman a kayat ni Jehova a lagipen ti nagapuananna, kanayon a maibagana a “nasayaat unay dayta.” Awan ti tao a kanayon a makaibaga iti dayta. Ti panangbigbig kadagiti limitasiontayo ti umuna nga addang tapno agbalintayo a kontento. Ngem adda pay ti kasapulan. Nasken a matarusan ken bigbigentayo ti panangmatmat ni Jehova iti dayta a banag.

Ti Griego a sao a naipatarus a “basol” ket naggapu iti termino a kaipapananna agmintis iti marka. Kas panangyilustrar: Panunotem ti maysa a tao a mangnamnama a mangabak iti premio babaen ti panangpanana iti puntiria. Adda tallo a panana. Imbiatna ti umuna ngem maysa a metro ti kaadayo dayta iti puntiria. Sinaysayaatna nga imbiat ti maikadua a pana ngem maysa a pie ti kaadayona iti puntiria. Buyogen ti naan-anay a konsentrasion, imbiatna ti maudi ngem maysa a pulgada ti kaadayona iti puntiria. Dandanina napuntaan, ngem maysa latta dayta a panagmintis.

Kaslatayo iti dayta napaay a pumapana. No dadduma, kasla nagdakkel ti nagmintisantayo. No dadduma, gistay mapuntaantayo ti marka ngem kaskasdi a nagmintis latta. Maupaytayo gapu ta kasta unay ti panangikagumaantayo, ngem saan nga umdas ti naaramidantayo. Ita, subliantayo ti maipapan iti pumapana.

In-inut nga umadayo, a nalpay agsipud ta talaga a tarigagayanna unay ti premio. Pagam-ammuan, isu ket inayaban ti mangimatmaton iti pasalip sana inyawat kenkuana ti premio, a kunana: “Kayatko nga ited kenka daytoy agsipud ta magustuak ti kinapingetmo.” Maragsakan ti pumapana!

Maragsakan! Kasta ti marikna ti asinoman nga ikkan ti Dios iti “sagut” a perpekto a biag nga agnanayon. (Roma 6:23) Kalpasan dayta, perpekton ti amin nga aramidenda​—didanton pulos agmintis iti marka. Naan-anayton a mariknada ti pannakakontento. Kabayatanna, no laglagipentayo dayta a namnama, nasaysayaat ti panagriknatayo maipapan iti bagitayo ken kadagiti padatayo.

Bigbigen nga Agkasapulan iti Panawen ti Amin a Banag

Agkasapulan iti panawen ti amin a banag. Ngem nautobyo kadi a nagrigat ti agtalinaed a kontento no ti maysa a banag a padpadaanam ket kasla napapaut ngem iti ninamnamam wenno no ti di nasayaat a kasasaad ket kasla nabaybayag ngem iti impagarupmo? Kaskasdi, adda dagiti nakapagtalinaed a kontento kadagiti kasta a kasasaad. Usigenyo ti pagarigan ni Jesus.

Sakbay nga immay ditoy daga, ni Jesus ket naisangsangayan a pagwadan ti kinatulnog bayat ti kaaddana idiay langit. Ngem ditoy daga a “nasursurona ti panagtulnog.” Kasano? Babaen dagiti “bambanag a sinagabana.” Sakbay dayta, napaliiwna dagiti panagsagaba ngem dina pulos napasaran dayta. Idi adda ditoy daga, nangruna sipud idi nabautisaran idiay Jordan agingga idi kanito ti ipapatayna idiay Golgotha, adu a kasasaad ti nakasuotanna. Saantayo nga ammo ti amin a detalye no kasano a ‘nagbalin a naan-anay’ ni Jesus no iti dayta a banag, ngem ammotayo a nagkasapulan dayta ti panawen.​—Hebreo 5:8, 9.

Nagballigi ni Jesus agsipud ta minennamennana ti “rag-o a naikabil iti sanguananna,” ti gunggona gapu iti kinamatalekna. (Hebreo 12:2) Ngem adda met tiempo a “nangidaton kadagiti araraw ken kasta met kadagiti dawat . . . buyogen dagiti napigsa nga ikkis ken lulua.” (Hebreo 5:7) Mabalin a kasta met ti panagkararagtayo no dadduma. Kasano ti panangmatmat ni Jehova iti dayta? Ipakita ti isu met laeng a bersikulo a ni Jehova inimdenganna ni Jesus “buyogen ti pannakaanamong.” Kasta met laeng ti aramiden ti Dios kadatayo. Apay?

Agsipud ta ammo ni Jehova dagiti limitasiontayo, ken tulongannatayo. Limitado ti kabaelan nga ibturan ti tunggal maysa. Kuna dagiti umili ti Benin, Africa: “Ti adu unay a danum lemmesenna uray dagiti tukak.” Iti kanito a dumtengtayo iti limitasiontayo, ad-adda nga ammo ni Jehova ti kasasaadtayo ngem kadatayo a mismo. Siaayat a mangipaay iti “asi ken . . . di kaikarian a kinamanangngaasi kas tulong iti umiso a tiempo.” (Hebreo 4:16) Impaayna dayta ken Jesus, ken impaayna dayta iti di mabilang a sabsabali. Imutektekanyo no kasano a naipaay ken ni Monika dayta a tulong ti Dios.

Nasaranta, naragsak, ken saan a managab-aburido a tao ni Monika. Idi 1968, idi agtawen iti nasurok bassit a 20, naklaat idi naammuanna nga isu ket addaan iti multiple sclerosis, maysa a sakit a kaaduanna nga agresulta iti pannakaparalisa ti dadduma a paset ti bagi. Dayta ti nangapektar unay iti biagna ket masapul a mangaramid kadagiti dakkel a panagbalbaliw iti amin-tiempo a ministeriona. Naammuan ni Monika nga agpaut ti sakitna. Sangapulo ket innem a tawen kalpasanna, kinunana: “Saan pay latta nga immimbag ti sakitko ken nalabit nga agtultuloy dayta agingga a ti baro a sistema ti bambanag ti Dios pabaruenna ti amin a bambanag.” Binigbigna a saan a nalaka dayta: “Nupay kuna dagiti gagayyemko a naragsak latta ti kababalinko, . . . ammo dagiti kasingedan a gagayyemko nga adda dagiti panawen a napalalo ti panagsangitko.”

Nupay kasta, kinunana: “Nasursurok ti aganus ken ti maragsakan no sumayaat bassit ti salun-atko. Bimmileg ti personal a relasionko ken Jehova gapu ta nabigbigko a mismo ti kinaawan gaway ti tao iti panangsarangetna iti sakit. Ni laeng Jehova ti makabael a mangpaimbag a naan-anay.” Babaen ti tulong ni Jehova, nataginayon ni Monika ti pannakakontento ken 40 a tawennan iti amin-tiempo a serbisio.

Ammotayo a saan a nalaka dagiti kasasaad a kas iti situasion ni Monika. Ngem sigurado nga ad-adda nga agbalinka a kontento no mabigbigmo nga adda dagiti banag nga agkasapulan iti napapaut a tiempo ngem iti impagarupmo. Kas ken ni Monika, masiguradom met ti ‘tulong ni Jehova iti umiso a tiempo.’

Mangipasdek Kadagiti Rasonable a Kalat Imbes nga Agidilig

Naidumaka kas indibidual. Awan ti eksakto a kapadpadam. Kastoy ti simple a panangibaga ti maysa a pagsasao ti African Gun maipapan iti dayta a kinapudno: “Saan nga agpapada ti kaatiddog dagiti ramay.” Kinamaag ti panangidilig iti maysa a ramay kadagiti dadduma. Saanmo la ketdi a kayat nga idilignaka ni Jehova iti sabali a tao, ken dina pulos nga aramiden ti kasta. Kaskasdi, nasaknap kadagiti tattao ti pagannayasan a mangidilig ket dayta ti mabalin a mangikkat iti pannakakontento dagiti tattao. Imutektekanyo no kasano a sibibileg nga inyilustrar dayta ni Jesus, kas mabasatayo iti Mateo 20:1-16.

Dinakamat ni Jesus ti maysa nga “apo” nga agkasapulan kadagiti trabahador iti kaubasanna. Nakitulag iti sumagmamano a lallaki nga awanan iti trabaho ket pinagtrabahona ida iti “nasapa iti bigat,” nalabit iti alas sais iti agsapa. Immanamongda iti gagangay a tangdan iti maysa nga aldaw, maysa a denario iti kada 12-oras a panagtrabaho iti inaldaw. Awan duadua a naragsakan dagidi a lallaki ta naaddaanda iti trabaho ken makaawatda iti gagangay a sueldo. Kalpasanna, nakasarak ti apo kadagiti sabali pay a grupo dagiti awanan trabaho a lallaki ket pinagtrabahona ida iti 9:00 ti bigat, iti agmatuon, 3:00 ti malem, ken uray iti 5:00 ti malem. Awan kadagitoy a grupo ti agtrabaho iti agmalmalem. Mainaig iti sueldo, inkari kadakuada ti apo no “aniaman ti nainkalintegan,” ket immanamong dagiti trabahador.

Iti ngudo ti aldaw, ti apo binilinna ti mangimatmaton a lalaki tapno suelduanna dagiti nagtrabaho. Impaayabna dagiti trabahador ket sinuelduanna nga immuna dagidiay naudi a nagtrabaho. Maysa laeng nga oras a nagtrabaho dagitoy, ngem pakasdaawan ta immawatda iti maysa nga aldaw a sueldo. Mabalin a mapanunottayo ti nabara a saritaan kalpasanna. Dagidiay nagtrabaho iti kompleto a 12 nga oras impagarupda a dakdakkel ti masueldoda. Ngem immawatda iti isu met laeng a gatad.

Ania ti reaksionda? “Idi maawatda dayta nangrugida nga agtanabutob maibusor iti bumalay ket kinunada, ‘Dagitoy naudi nangbusbosda iti maysa nga oras a trabaho; kaskasdi nga impadam ida kadakami a nangibaklay iti babantot iti aldaw ken ti makakset a pudot!’”

Ngem naiduma ti panangmatmat ti apo. Impaganetgetna nga inawatda no ania ti inanamonganda, nga awan kurangna. Ngem kadagiti dadduma, inkeddengna nga ikkan ida iti sueldo ti agmalmalem a trabaho, nga awan duadua a dakdakkel ngem iti ninamnamada. Iti kinapudnona, awan ti immawat iti nababbaba ngem iti napagnumuan; adu, kinapudnona, ti immawat iti dakdakkel ngem iti ninamnamada. Gapuna, kas panangingudo, inyimtuod ti apo: “Saan aya a nainkalintegan kaniak nga aramidek no ania ti kayatko iti bambanag a kukuak?”

Ita, panunotenyo no ti tao nga agay-aywan immuna koma a sinuelduanna ti damo a grupo sa dagus a pimmanawda. Nakontento koma dagitoy. Timmaud laeng ti saanda a pannakakontento idi nakitada nga immawat iti isu met laeng a sueldo dagidiay basbassit ti naaramidanda. Dayta ti namagpungtot kadakuada, nga uray la nagtanabutobda maibusor iti apo, daydiay pagyamyamananda idi damo gapu iti panangayabna kadakuada nga agtrabaho.

Nalawag nga ipakita daytoy no ania ti mapasamak no agidiligtayo. No mennamennaem ti personal a relasionmo ken ni Jehova ken apresiarem ti panangbendisionna kenka, agbalinka a kontento. Saanmo nga idilig ti kasasaadmo kadagiti sabsabali. No agparang nga inkeddeng ni Jehova ti mangaramid iti kanayonan a banag para kadagiti sabsabali, makipagragsakka kadakuada.

Ngem adda banag a namnamaen ni Jehova nga aramidem. Ania dayta? Kuna ti Galacia 6:4: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng.” Iti ababa a pannao, mangipasdekka kadagiti rasonable a kalatmo. Iplanom no ania ti realistiko a kabaelam sa aramidem dayta. No rasonable ti kalat ket naaramidmo dayta, adda ‘pakaigapuan ti panagrag-om.’ Iti kasta, maaddaanka iti pannakakontento.

Addanto ti Gunggona

Dagiti tallo a prinsipio nga inusigtayo ipakitana a ti panangyaplikar kadagiti prinsipio iti Biblia matulongandatayo nga agbalin a kontento uray kadagitoy maudi nga al-aldaw ken iti laksid ti kinaimperpekto. Bayat ti inaldaw a panagbasam iti Biblia, apay a dimo kitaen dagiti kasta a prinsipio, direkta man a nadakamat dagita wenno naibugas kadagiti salaysay ken ilustrasion?

No mariknam a mapukpukaw ti pannakakontentom, ikagumaam nga ammuen ti talaga a makagapu. Kalpasanna, kitaem dagiti prinsipio a mabalinmo nga iyaplikar tapno maatur ti kasasaadmo. Kas pagarigan, mabalin a sukimatem ti panid 110-11 ti libro nga “Amin a Kasuratan Impaltiing ti Dios ket Naimbag.”a Nausig dita ti libro a Proverbio, ken makasarakka iti adu a pagpilian kadagiti prinsipio ken balakad a nailista iti sidong ti 12 a subtitulo. Nakasaysayaat met a gubuayan ti impormasion ti The Watch Tower Publications Indexb ken ti Watchtower Library on CD-ROM.c Babaen ti masansan a panangusar kadagita, agbalinka a nasigo iti panangsapul kadagiti mausarmo a prinsipio.

Umad-adanin ti tiempo a ni Jehova ipaayanna dagiti maikari a tattao iti biag nga agnanayon buyogen ti kinaperpekto iti paraiso a daga. Naan-anayto a makontentoda iti biagda.

[Footnotes]

[Blurb iti panid 12]

“Amin nagbasol ken agkurang iti dayag ti Dios.”​—Roma 3:23

[Blurb iti panid 13]

Nasursuro ni Jesus ti kinatulnog manipud kadagiti banag a sinagabana.​—Hebreo 5:8, 9

[Blurb iti panid 15]

“Maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.”​—Galacia 6:4