Ginagara a Panangisaknap ti Ipapatay
SAKBAY ti panangpapatay ti AIDS kadagiti biktimana, mangipaay kadakuada ti nakaam-amak a rebbengen: maysa a pannakabalin a mangbiag wenno mangpapatay kadagiti dadduma. Adu nga agsagsagaba iti AIDS naannadda, nga ipaidamda kadagiti bagbagida ti aniaman nga aramid a mabalin a mangimpektar iti sabali. Ngem adda sumagmamano a napeggad a naidumat’ panagtignayda.
Maysa a sikiatrista idiay Washington, D.C., insuratna ti maysa a nakabutbuteng a pangarigan—maysa kadagiti pasientena: “Ti mariribukan iti kasta unay a biseksual a biktima iti AIDS ket, pagamkak, igaggagarana a padpadasen nga impektaran dagiti dadduma a tattao iti sakitna. Ammona a papatayenna ida.” Imbagana kenkuana: “Idi damo idi naammuak nga addaanka iti AIDS inkeddengko a saanak a makidenna iti siasinoman, ket kalpasanna basta nakapungtotak ket kinunak: Parmekentayo ti lubong.” Aniat’ kayatna a sawen?
Inlawlawag ti sikiatrista: “Imbagana kaniak a no dadduma no makapungtot iti maysa a tao, adda timek iti unegna a mangibagbaga kenkuana, ‘Akarantayo daytoy a lalaki’ ket padasenna ti makidenna kadakuada. Imbagana met nga isut’ makikabkabbalay iti biseksual a lalaki a nalulok kadagiti babbai.” Ti sikiatrista padpadasenna nga allukoyen dagiti opisiales a mangikulong itoy a napeggad a lalaki ngem awan ti mamaayna. “Idi naudi a nakitak,” insuratna, “saan a nagbalbaliw ti kababalinna, ket diak agduadua a naiduman itatta.”
Naisangsangayan a kaso? Nakalkaldaang, saan. Maysa a lalaki ti pinanaganan ti Centers for Disease Control iti Patient Zero gapu iti kangrunaan a pasetna iti nasapa a pannakaisaknap iti AIDS idiay Estados Unidos. Uray pay kalpasan ti pannakaammona a pagpegpeggadenna ti biag dagiti dadduma, intultuloyna ti homoseksual a pannakidennana kadagiti 250 a pareha iti makatawen. Nagreklamo dagiti babbai maipapan kadagiti kaparehada a nangilimed iti pannakidennada iti dua a sekso. Dagiti managusar iti droga itultuloyda nga ipabulod dagiti nausaren ken narugitanen a dagumda ket nagbalindan a kadadakkelan a grupo iti baro a biktima iti AIDS kadagiti sumagmamano a pagilian.
Nupay no makariribuk daytoy, saan a nakaskasdaaw kadagiti estudiante ti Biblia. Nabayagen nga impadto ti Biblia a dagiti tattao daytoy nariribuk a kaputotan ket “managayatdanto kadagiti bagbagida . . . awan ayatda a nakayanakan.” (2 Timoteo 3:1-5) Dimtengen dayta a tiempo. Dagidiay a di mangikankano kadagiti linlinteg ti Dios maipapan iti moralidad kankanayon nga agbasolda iti Autor dagidiay a linlinteg, ti Namarsuatayo. Dayta ti kadadaksan a risgo nga alaen ti maysa iti biagna. Ngem itatta ti isu met laeng a panaglabsing masansan a mangiyeg iti kanayonan pay a risgo: ti panangitalek iti biag ti maysa kadagiti tattao nga awan ti aniaman nga ipatpategda no di ti bukodda a pagragsakan.