Ispalen ni Jehova Daydiay Naparigatan

“Adu ti didigra daydiay nalinteg, ngem manipud kadakuada amin isu ispalen ni Jehova.”​—SALMO 34:19.

1, 2. Ania a parikut ti nakaipasanguan ti maysa a matalek a Kristiano, ken apay a mabalin a makapasartayo met iti umasping a rikrikna?

NASUROK a 20 a tawenen a Saksi ni Jehova ti maysa nga agkabannuag a babai nga agnagan Keiko.a Adda panawen a nagserbi kas maysa a regular pioneer, wenno amin-tiempo a manangiwaragawag iti Pagarian. Impatpategna dayta a pribilehio. Ngem iti di pay nabayag, isu ket nakarikna iti kinaawan namnama ken panagmaymaysa. “Awan ti inaramidko no di agsangit,” kunana. Tapno mailiwliwagna ti leddaangna, nangbusbos ni Keiko iti ad-adu a tiempo iti personal a panagadal. “Ngem kaskasdi a diak naliwliwa ti bagik,” kunana. “Dimtengak iti punto a kayatkon ti matay.”

² Nakidangadangkayo met kadin iti kasta a rikna ti pannakaupay? Kas maysa kadagiti Saksi ni Jehova, adu ti rason nga agrag-okayo gapu ta ti nadiosan a debosion ket “addaan kari a biag itan ken daydiay nga umay.” (1 Timoteo 4:8) Iti agdama, agnanaedkayo iti naespirituan a paraiso! Ngem kayatna kadi a sawen a masalaknibankayo manipud iti amin a pakarigatan? Saan! Kuna ti Biblia: “Adu ti didigra daydiay nalinteg.” (Salmo 34:19) Saan a pakasdaawan dayta yantangay “ti intero a lubong adda iti pannakabalin daydiay nadangkes.” (1 Juan 5:19) Iti sumagmamano a pamay-an, mapasarantayo amin dagiti epekto dayta a kinapudno.―Efeso 6:12.

Dagiti Epekto ti Pakarigatan

3. Mangtedkay kadagiti kapadasan dagiti adipen ti Dios a nadakamat iti Biblia a nakapasar iti nakaro a panagdukot.

³ Ti napaut a panagdukot mabalinna a libegen ti panangmatmattayo. (Proverbio 15:15) Usigenyo ti nalinteg a tao a ni Job. Bayat ti nakaro a rigat, kinunana: “Ti tao, a nayanak manipud babai, ababa ti biagna ken namelmelan iti pannakariribuk.” (Job 14:1) Napukaw ti rag-o ni Job. Adda pay kanito nga impagarupna nga isu ket binaybay-an ni Jehova. (Job 29:1-5) Saan laeng a ni Job ti adipen ti Dios a nakapasar iti napalalo a panagtuok. Ibaga kadatayo ti Biblia a ‘sipapait ti kararua’ ni Anna gapu iti kinalupesna. (1 Samuel 1:9-11) Gapu ta matutuok ti rikna ni Rebecca iti maysa a pasamak iti pamiliada, kinunana: “Karurodko daytoy biagko.” (Genesis 27:46) Idi pampanunoten ni David dagiti nagkamalianna, kinunana: “Iti intero nga agmalem nagpagnapagnaak a sililiday.” (Salmo 38:6) Maibatay kadagita a sumagmamano a kapadasan, nalawag a nakapasar iti nakaro a dukot dagiti managbuteng iti Dios a lallaki ken babbai a nagbiag sakbay ti panawen Kristiano.

4. Apay a ditay pagsiddaawan nga adda dagiti Kristiano ita a ‘malmaldaangan ti kararuada’?

⁴ Komusta met dagiti Kristiano? Marikna ni apostol Pablo a masapul nga ibagana kadagiti taga-Tesalonica nga ‘agsaoda iti makaliwliwa kadagiti malmaldaangan a kararua.’ (1 Tesalonica 5:14) Maysa a reperensia ti agkuna a ti Griego a sao a naipatarus kas “malmaldaangan a kararua” ti mabalin a tumukoy kadagidiay “temporario a linapunos dagiti pakadukotan ti biag.” Ipamatmat ti sasao ni Pablo nga adda dagidiay napulotan iti espiritu idiay kongregasion ti Tesalonica a naupay ti riknada. Adda met dagiti Kristiano ita a malmaldaangan. Ngem apay a malmaldaanganda? Usigentayo ti tallo a gagangay a makagapu.

Mamagdukot ti Kinaimperpektotayo

5, 6. Ania a liwliwa ti ipaay ti Roma 7:22-25?

⁵ Saan a kas kadagiti nadangkes a ‘didan ammo ti agbain,’ marigrigatan dagiti pudno a Kristiano gapu iti managbasol a kasasaadda. (Efeso 4:19, Ti Naimbag a Damag Biblia) Mabalin a mariknada ti narikna ni Pablo, a nangisurat: “Pudno a pagragsakak ti linteg ti Dios maitunos iti kinatao nga adda iti unegko, ngem makitak iti kamkamengko ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol nga adda iti kamkamengko.” Kalpasanna, kinuna ni Pablo: “Nakaay-ay-ayak a tao!”​—Roma 7:22-24.

⁶ Nariknayo met kadi ti narikna ni Pablo? Saan a dakes nga agbalinkayo a sipapanunot iti imperpekto a kasasaadyo yantangay mabalin a dayta ti mangipalagip kadakayo iti kinakaro ti basol ken mangpabileg iti determinasionyo a mangliklik iti kinadakes. Ngem saan a rumbeng nga agtultuloy ti panagleddaangyo maigapu kadagiti pagkuranganyo. Kalpasan ti kaad-adaw a sinao ni Pablo a nangyebkasanna iti leddaangna, innayonna: “Pagyamanan iti Dios baeten ken Jesu-Kristo nga Apotayo!” (Roma 7:25) Wen, agtalek ni Pablo a ti dara nga imbukbok ni Jesus ket makabael a mangsubbot kenkuana manipud iti natawid a basol.―Roma 5:18.

7. Ania ti makatulong iti maysa a tao tapno saan a mariribukan kadagiti pagannayasanna nga agbasol?

⁷ No mariknayo a lapunosennakayo ti managbasol a kasasaadyo, makaliwliwa koma kadakayo ti sasao ni apostol Juan, a nangisurat: “No ti asinoman makaaramid iti basol, addaantayo iti katulongan iti Ama, ni Jesu-Kristo, daydiay nalinteg. Ken isu ket pangikappia a sakripisio maipaay kadagiti basoltayo, ngem saan a maipaay kadatayo laeng no di ket maipaay met iti intero a lubong.” (1 Juan 2:1, 2) No mariribukankayo gapu iti managbasol a kasasaadyo, kanayon a laglagipenyo a natay ni Jesus maipaay kadagiti managbasol, saan a kadagiti perpekto a tattao. Wen, “amin nagbasol ken agkurang iti dayag ti Dios.”​—Roma 3:23.

8, 9. Apay a nasken nga iwaksitayo dagiti kapanunotan a mangkondenar iti bagitayo?

⁸ Ipapantayon nga adda naaramidmo idi a nadagsen a basol. Awan duadua nga inkararagmon dayta ken ni Jehova, nalabit a masansan pay ketdi. Nakaawatka iti naespirituan a tulong manipud kadagiti Kristiano a papanglakayen. (Santiago 5:14, 15) Sipapasnek a nagbabawika ket iti kasta nagtalinaedka a paset ti kongregasion. Wenno nalabit nga adda panawen a pinanawam ti organisasion ni Jehova, ngem nagbabawika idi agangay isu a naaddaanka manen iti nadalus a takder. Aniaman kadagita ti naglabasam, mabalin a malaglagipmo latta ken riribukennaka dayta a naaramidmo a basol. No mapasamak dayta, laglagipem a ‘dakkel’ ti pammakawan ni Jehova kadagidiay pudno nga agbabawi. (Isaias 55:7) Kanayonanna, dina kayat a panunotem nga agnanayonkan a nakondenar. Ni Satanas ti mangayat a kasta ti panunotem. (2 Corinto 2:7, 10, 11) Madadaelto ti Diablo gapu ta isu ket maikari a talaga iti dayta, ngem kayatna a mariknam a maikarika iti umasping a pannusa. (Apocalipsis 20:10) Gapuna, dimo ipalubos nga agballigi ni Satanas iti dayta a gakatna a mangdadael iti pammatim. (Efeso 6:11) Imbes ketdi, ‘agtakderka a bumusor kenkuana,’ kas met laeng iti aramidem no maipasangoka iti dadduma a situasion.​—1 Pedro 5:9.

⁹ Iti Apocalipsis 12:10, ni Satanas ket naawagan kas “ti manangakusar kadagiti kakabsattayo”―dagiti napulotan a Kristiano. ‘Ak-akusaranna ida iti aldaw ken rabii’ iti imatang ti Dios. No utobem dayta a bersikulo, maawatam a maragragsakan ni Satanas, ti ulbod a manangakusar, no akusaram ken kondenarem ti bagim, idinto ta saan met a kasta ti panangmatmat ni Jehova kenka. (1 Juan 3:19-22) Apay koma a parigatem ta bagim gapu kadagiti nagkamaliam nga uray la kasla kayatmon ti sumuko? Dimo ipalubos a dadaelen ni Satanas ti relasionmo iti Dios. Dimo pulos ipalubos a kullaapan ni Satanas ti panunotmo iti kinapudno a ni Jehova ket “naasi ken managparabur, nabannayat nga agunget ken naruay iti naayat a kinamanangngaasi.”​—Exodo 34:6.

Makaupay Dagiti Limitasiontayo

10. Kadagiti ania a wagas a mabalin a makaupay kadatayo dagiti limitasiontayo?

¹⁰ Maup-upay ti dadduma a Kristiano gapu ta apektaran dagiti limitasionda ti panagserbida iti Dios. Kasta kadi ti marikriknam? Nalabit a dimo maaramidanen ti sigud a magapgapuanam iti ministerio gapu iti nakaro a sakit, panaglakay wenno panagbaket, wenno gapu iti dadduma pay a kasasaad. Pudno, maiparparegta kadagiti Kristiano a gatangenda ti tiempo nga agserbi iti Dios. (Efeso 5:15, 16) Ngem kasano no dagiti limitasiontayo pudno a kednganda dagiti magapuanantayo iti ministerio, banag a makaupay kadatayo?

11. Kasano a makagunggona kadatayo ti balakad ni Pablo a nailanad iti Galacia 6:4?

¹¹ Idagadag ti Biblia a ditay agpampamayan no di ket agbalintayo a “tumutulad kadagidiay a babaen ti pammati ken kinaanus tawidenda dagiti kari.” (Hebreo 6:12) Maaramidtayo laeng dayta no sukimatentayo dagiti nasayaat nga ulidanda ken ikagumaantayo a tuladen ti pammatida. Ngem awan ti nasayaat nga itdenna no idiligtayo ti bagitayo kadagiti dadduma satay panunoten nga awan ti umiso a magapgapuanantayo. Gapuna, iyaplikartayo koma ti balakad ni Pablo: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.”​—Galacia 6:4.

12. Apay a makapagrag-otayo iti serbisio a maipapaaytayo ken ni Jehova?

¹² Adda naimbag a rason nga agrag-o dagiti Kristiano, uray no malimitaran ti magapuananda gapu iti nakaro a sakit. Ipanamnama kadatayo ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Hebreo 6:10) Nalabit nga adda dagiti dimo malapdan a kasasaad a mamagbalin a narigat kenka ti panangaramid kadagiti dati a magapgapuanam. Ngem iti tulong ni Jehova, mabaelam ti makipaset a naan-anay kadagiti dadduma a benneg ti Nakristianuan a ministerio, kas iti panangasaba babaen ti telepono ken panagsurat. Masiguradom a bendisionannaka ni Jehova a Dios gapu iti amin-kararua a panagserbim ken iti ayat nga ipakpakitam kenkuana ken kadagiti padam a tattao.―Mateo 22:36-40.

Mamagdukot “Dagiti Napeggad a Tiempo”

13, 14. (a) Kadagiti ania a pamay-an a mangyeg iti pakarigatantayo “dagiti napeggad a tiempo”? (b) Kasano nga agminar ita ti kinaawan iti nainkasigudan a panagayat?

¹³ Nupay padpadaanantayo ti biag iti nalinteg a baro a lubong ti Dios, iti agdama agbibiagtayo pay laeng iti “napeggad a tiempo a narigat a pakilangenan.” (2 Timoteo 3:1) Gapuna, makaliwliwa kadatayo ti pannakaammo nga asidegen ti pannakaispaltayo kas ipatuldo dagiti makariribuk a paspasamak ita. Ngem kaskasdi nga apektadotay latta kadagiti kasasaad iti aglawlawtayo. Kas pagarigan, nalabit nga awan ti trabahom. Mabalin a manmano ti silulukat nga oportunidad ket iti panaglabas dagiti bulbulan, mabalin a pampanunotem no ammo met laeng ni Jehova ti kasasaadmo wenno mangmangngegna dagiti kararagmo. Wenno nalabit nagbalinka a biktima ti diskriminasion wenno dadduma a kita ti kinaawan hustisia. Uray no palabasam laeng dagiti paulo ti damdamag kadagiti diario, mariknam ti kas iti narikna ni nalinteg a Lot, a “nariribukan unay” (“silaladingit unay,” Ti Biblia) kadagiti nalulok a kondukta dagiti tattao iti aglawlawna.―2 Pedro 2:7.

¹⁴ Adda maysa a partikular nga aspeto ti maudi nga al-aldaw a rumbeng a laglagipentayo. Impadto ti Biblia nga adunto ti ‘awanan iti nainkasigudan a panagayat.’ (2 Timoteo 3:3) Adu a pamilia ti lumamlamiis ti ayatda iti maysa ken maysa. Kinapudnona, “ipamatmat dagiti ebidensia a dakdakkel ti posibilidad a ti mismo a kapamiliam ti mangpatay, mangdangran, wenno mangabuso kenka,” kuna ti libro a Family Violence. “Ti lugar a rumbeng a pakariknaan ti tao iti dungngo ken kinatalged isu metten ti kapeggadan a lugar para iti dadduma nga adulto ken ubbing.” Dagidiay dimmakkel iti maysa a di naurnos a pamilia nalabit a makapasardanto iti rikna ti panagdanag ken panagleddaang. Kasano no kasta ti kasasaadmo?

15. Kasano a natantan-ok ti panagayat ni Jehova ngem iti panagayat ti asinoman a tao?

¹⁵ Inkanta ni salmista a David: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.” (Salmo 27:10) Anian a makaliwliwa a maammuan nga adayo a dakdakkel ti panagayat ni Jehova ngem iti panagayat ti asinoman a nagannak! Nupay mabalin a nasakit ti panangilaksid, di umiso a panangtrato, wenno panangbaybay-a ti maysa a nagannak, awan pakaimudinganna dayta iti kadakkel ti panagayat ni Jehova kenka. (Roma 8:38, 39) Laglagipem a ti Dios iyadanina kenkuana dagidiay ay-ayatenna. (Juan 3:16; 6:44) Aniaman ti panangtrato kenka dagiti tattao, ay-ayatennaka ti nailangitan nga Amam!

Dagiti Praktikal nga Addang a Mangep-ep iti Leddaang

16, 17. No makarikna iti leddaang, ania ti mabalin nga aramiden ti maysa tapno mataginayonna ti naespirituan a kiredna?

¹⁶ Mabalinmo nga aramiden dagiti praktikal nga addang a mangdaer iti panagleddaang. Kas pagarigan, naan-anay a makipasetka iti Nakristianuan nga aktibidad. Mennamennaem ti Sao ti Dios, nangnangruna no lapunosennaka ti pannakaupay. Inkanta ti salmista: “Idi kinunak: ‘Ti sakak siguradonto nga agkaglis,’ ti bukodmo a naayat a kinamanangngaasi, O Jehova, sinarsaranaynak. Idi a ti mangrirriribuk a pampanunotko immaduda iti unegko, dagiti bukodmo a pangliwliwa rinugianda a sappuyoten ti kararuak.” (Salmo 94:18, 19) Ti regular a panagbasa iti Biblia tulongannaka a mangpunno iti isipmo kadagiti makaliwliwa a sasao ken makapabileg a kapanunotan.

¹⁷ Napateg met ti kararag. Uray no saanmo a naan-anay a mayebkas iti sasao ti kaunggan a kaririknam, ammo ni Jehova no ania ti kayatmo nga ibaga. (Roma 8:26, 27) Kastoy ti impanamnama ti salmista: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.”​—Salmo 55:22.

18. Ania dagiti praktikal nga addang a mabalin nga aramiden ti maysa a malmaldaangan?

¹⁸ Dadduma ti agpaspasar iti panagleddaang a maaw-awagan iti clinical depression.b No mapaspasaram dayta, ikagumaam a panunoten ti baro a lubong ti Dios ken ti tiempo inton “awanto ti agtataeng nga agkuna: ‘Masakitak.’” (Isaias 33:24) Ngem no saan a gagangay a panagleddaang ti mapaspasaram, nalabit a nainsiriban ti agkonsulta iti doktor. (Mateo 9:12) Napateg met nga aywanam ti pisikal a salun-atmo. Makatulong ti panagehersisio ken pannangan kadagiti nasustansia a taraon. Siguraduem nga addaanka iti umdas a panaginana. Dika agpuyat nga agbuya iti telebision, ken liklikam dagiti paglinglingayan a makabannog unay iti bagi ken rikna. Kangrunaan iti amin, itultuloymo nga aramiden dagiti trabaho a makaay-ayo iti Dios! Nupay saan pay nga ita ti tiempo a ‘punasen ni Jehova ti amin a lua,’ matulongannaka nga agibtur.―Apocalipsis 21:4; 1 Corinto 10:13.

Panagbiag “iti Sidong ti Mannakabalin nga Ima ti Dios”

19. Ania ti ikarkari ni Jehova kadagidiay maparparigatan?

¹⁹ Ipanamnama kadatayo ti Biblia a nupay adu ti didigra nga umapay iti nalinteg, “manipud kadakuada amin isu ispalen ni Jehova.” (Salmo 34:19) Kasano nga aramiden dayta ti Dios? Idi maulit-ulit nga inkararag ni apostol Pablo a maikkat koma kenkuana ti ‘siit iti lasagna,’ kinuna kenkuana ni Jehova: “Ti pannakabalinko maan-anay iti pagkapuyan.” (2 Corinto 12:7-9) Ania ti inkari ni Jehova ken ni Pablo, ken ania ti ikarkarina kenka? Saan nga insigida a pannakapaimbag, no di ket ti bileg nga agibtur.

20. Iti laksid dagiti pakasuotantayo, ania ti ipanamnama kadatayo ti 1 Pedro 5:6, 7?

²⁰ Insurat ni apostol Pedro: “Agpakumbabakayo . . . iti sidong ti mannakabalin nga ima ti Dios, tapno itan-oknakayo iti naikeddeng a tiempo; bayat nga iyallatiwyo kenkuana ti isuamin a pakaringgoranyo, agsipud ta isu maseknan kadakayo.” (1 Pedro 5:6, 7) Gapu ta maseknan kenka ni Jehova, dinakanto pulos baybay-an. Saranayennaka iti laksid dagiti pakaipaspasanguam a pakasuotan. Laglagipem a dagiti matalek a Kristiano addada “iti sidong ti mannakabalin nga ima ti Dios.” Bayat nga agserserbitayo ken ni Jehova, ikkannatayo iti bileg nga agibtur. No matalektayo kenkuana, awan ti mabalin a mangyeg iti permanente a pannakadangran iti espiritualidadtayo. Sapay ngarud koma ta salimetmetantayo ti kinatarnawtayo ken ni Jehova tapno masagraptayo ti biag nga agnanayon iti inkarina a baro a lubong ken makitatayto ti aldaw inton permanente nga ispalenna dagiti naparigatan!

[Footnotes]

Malagipmo Kadi?

• Apay a makapasar iti rigat uray dagiti adipen ni Jehova?

• Ania ti sumagmamano a banag a mamagleddaang kadagiti adipen ti Dios?

• Kasano a tulongannatayo ni Jehova a mangparmek kadagiti pakaringgorantayo?

• Iti ania a wagas nga addatayo “iti sidong ti mannakabalin nga ima ti Dios”?

[Dagiti Ladawan iti panid 25]

Iti laksid dagiti pakasuotan, adda rason nga agrag-o dagiti adipen ni Jehova

[Ladawan iti panid 28]

Ti panangasaba babaen ti telepono ti maysa a pamay-an a maipaaymo ti kasayaatan ken ni Jehova