‘O Jehova, Subokennak’

“NI Jehova isu ti manangsukimat kadagiti puso.” (Proverbio 17:3) Makaliwliwa unay dayta kadatayo amin. Apay? Agsipud ta saan a kas kadagiti tattao, a mangukom babaen laeng iti makinruar a langa, ti nailangitan nga Amatayo “kitaenna no ania ti puso.”​—1 Samuel 16:7.

Kinapudnona, uray datayo a mismo, ditay kabaelan a tingitingen a naan-anay ti kaunggan a motibo ken pagannayasantayo. Apay? Ngamin, ‘ti pusotayo ket nagulgulib ngem iti aniaman a banag ket desperado. Siasino ti makaammo iti dayta?’ Awan sabali no di ti Dios agsipud ta kinunana: “Siak, ni Jehova, suksukisokek ti puso, suksukimatek dagiti bekkel.” (Jeremias 17:9, 10) Wen, maawatan ni Jehova “ti puso”​—agraman ti kaunggan a motibotayo​—kasta met “dagiti bekkel,” nga isu ti pampanunot ken emosiontayo.

Apay a Mapasarantayo Dagiti Pannubok?

Di ngarud pakasdaawan no apay a naibaga idi ni Ari David: “Sukimatennak, O Jehova, ket subokennak; pasudiem dagiti bekkelko ken ti pusok.” (Salmo 26:2) Perpekto kadi ni David tapno pulos a di agkamali iti panagsasao ken panagtigtignayna, isu nga awan pagdanaganna uray no suboken ni Jehova? Siempre saan! Kas kadatay amin, imperpekto met ni David ken saanna a naan-anay a nasurot dagiti pagalagadan ti Dios. Gapu kadagiti pagkapuyanna, nakaaramid ni David iti sumagmamano a nadagsen a basol. Kaskasdi, ‘nagna buyogen ti kinatarnaw ti puso.’ (1 Ar-ari 9:4) Kasano? Babaen ti panangawatna iti pannubngar ken panangilintegna iti danana. Impakitana ngarud a pudpudno nga inayatna ni Jehova. Naan-anay ti debosionna iti Dios.

Datayo ngay met ita? Ammo ni Jehova nga imperpektotayo ken mabalin nga agbasoltayo iti sao ken aramid. Nupay kasta, dina inkeddeng a nasaksakbay ti pagtungpalantayo babaen ti panangusarna iti pannakabalinna a mangammo iti masanguanantayo. Pinarsuanatayo nga addaan iti wayawaya a mangngeddeng, ken raraemenna dayta a wayawaya​—maysa a sagut a sipaparabur nga impaayna kadatayo.

Kaskasdi a no an-anagen, adda dagiti gundaway a suboken ni Jehova ti makin-uneg a kinataotayo, agraman dagiti motibotayo. Nalabit ipalubosna a maaddaantayo kadagiti oportunidad a mangipakita no ania ti kasasaad ti pusotayo. Mabalin a bay-anna met a maipasangotayo iti nadumaduma a kasasaad wenno parikut tapno maipalgak ti kaunggan a pagannayasantayo. Dayta ti mangted kadatayo iti gundaway tapno maipakitatayo ken Jehova ti debosion ken kinasungdotayo kenkuana. Dagita a pannubok nga ipalpalubosna mabalin a subokenda ti kabileg ti pammatitayo, no ‘naan-anay met laeng ken nasalun-attayo iti amin a bambanag, a saan nga agkurang iti aniaman.’​—Santiago 1:2-4.

Nagkauna a Pagarigan ti Pannakasubok ti Pammati

Uray dagiti nagkauna nga adipen ni Jehova nasubok met ti pammati ken motiboda. Usigentayo ni patriarka nga Abraham. “Ti pudno a Dios sinubokna ni Abraham.” (Genesis 22:1) Idi naibaga dayta, nasuboken ti pammati ni Abraham iti Dios. Tawtawen sakbayna, kiniddaw ni Jehova kenni Abraham nga isu ken ti pamiliana ket pumanaw iti nabaknang a siudad ti Ur sa mapan iti maysa a lugar a dina pay ammo. (Genesis 11:31; Aramid 7:2-4) Nalabit nga addaan ni Abraham iti bukodna a balay idiay Ur. Ngem idiay Canaan, a nagnaedanna iti pinulpullo a tawen, saan a pulos a gimmatang iti permanente a balayna. (Hebreo 11:9) Gapu ta agakar-akarda, ni Abraham ken ti pamiliana ket naipasango iti sumagmamano a peggad a kas iti bisin, grupo dagiti armado a bandido, ken pagano nga agtuturay iti dayta a lugar. Iti laksid dagita a kasasaad, napaneknekan nga awan pagkurangan ti pammati ni Abraham.

Kalpasanna, ni Jehova impasidongna ni Abraham iti narigrigat a pannubok. “Pangngaasim, alaem ti anakmo, ti kakaisuna nga anakmo nga ay-ayatem unay, ni Isaac, ket . . . idatonmo kas daton a mapuoran.” (Genesis 22:2) Para ken Abraham, ni Isaac ket naisangsangayan nga anak. Isu ti bugbugtong nga anak ni Abraham kenni Sara nga asawana. Ni Isaac ti naikari nga anak, ti kakaisuna a pangnamnamaan ni Abraham a pagtaudan ti ‘bin-i’ a mangtawid iti daga ti Canaan ken agbalin a pakabendisionan ti adu, sigun iti kari ti Dios. Kinapudnona, ni Isaac ti anak a pinadpadaanan ni Abraham ken naipasngay gapu iti milagro nga inaramid ti Dios!​—Genesis 15:2-4, 7.

Mailadawanmo kadi no kasano karigat para kenni Abraham a tarusan no apay a kasta ti naibilin kenkuana? Kasapulan kadi ni Jehova ti tao a maidaton? Apay pay laeng nga impalubos ni Jehova a tagiragsaken ni Abraham ti maaddaan iti anak kabayatan ti kinalakayna, no kiddawenna met la gayam a maidaton dayta kenkuana?a

Nupay saan a naan-anay a nalawag kenkuana ti sungbat dagita a saludsod, insigida a nagtulnog ni Abraham. Tallo nga aldaw a nagdaliasatda sakbay a nadanonda ti bantay a pinili ti Dios. Apaman a nakadanonda sadiay, nangbangon iti altar sa nangikabil iti sungrod iti rabaw dayta. Nadanonen ti karirigatan a paset ti pannubok. Iniggaman ni Abraham ti imuko, ngem idi patayenna koman ti anakna, inggawid ni Jehova babaen ti maysa nga anghel sana kinuna: “Ita ammokon a managbutengka iti Dios ta saanmo nga impaidam kaniak ti anakmo, ti kakaisuna kenka.” (Genesis 22:3, 11, 12) Nagunggonaan la ketdi ni Abraham idi nangngegna dayta! Umiso ti damo a panangtingiting ni Jehova iti pammatina. (Genesis 15:5, 6) Kalpasan unay dayta, nangidaton ni Abraham iti kalakian a karnero a kasukat ni Isaac. Kasta met, pinatalgedan ni Jehova ti tulag nga inkarina mainaig iti bin-i ni Abraham. Matarusantayo ngarud no apay a ni Abraham ket nagbalin a gayyem ni Jehova.​—Genesis 22:13-18; Santiago 2:21-23.

Masubsubok Met ti Pammatitayo

Ammotayo amin nga awan kadagiti adipen ti Dios ita ti makaliklik kadagiti pannubok. Ngem iti kasasaadtayo, mabalin a narigrigat ti pannubok a mapasarantayo gapu kadagiti banag nga ipalpalubos ni Jehova ngem kadagiti banag nga ipapaaramidna.

Insurat ni apostol Pablo: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:12) Ti kasta a pannakaidadanes ket mabalin nga agtaud kadagiti kaeskuelaan, gagayyem, kabagian, kaarruba, wenno kadagiti agtuturay a nakadamag iti di umiso nga impormasion maipapan kadagiti Saksi. Mabalin a ramanen dayta ti nasakit a sasao, panangdangran, ken pannakibiang iti pagsapulan ti maysa a Kristiano. Mapasaran met dagiti pudno a Kristiano ti parparikut a gagangay iti sangatauan kas iti sakit, pannakaupay, ken kinaawan hustisia. Amin dagita a pakasuotan ti mangsubok iti pammati ti maysa a tao.

Impaganetget ni apostol Pedro dagiti pagsayaatan ti pannakasubok ti pammati ti maysa a tao: “Napagleddaangkayo babaen iti nadumaduma a pakasuotan, tapno ti nasubok a kualidad ti pammatiyo, a dakdakkel unay ti pategna ngem ti balitok a madadael agpapan pay pannakasubokna babaen iti apuy, masarakan koma a pakaigapuan ti pannakaidayaw ken dayag ken dayaw inton pannakaipanayag ni Jesu-Kristo.” (1 Pedro 1:6, 7) Wen, dagiti epekto ti pannubok ket mayarig iti pannakagugor ti balitok iti apuy. Bayat ti pananggugor, maikkat dagiti rugit ket mabati ti puro a balitok. Umasping iti dayta, magugoran met ti pammatitayo no mapasarantayo dagiti pannubok.

Kas pagarigan, mabalin nga agrigattayo gapu iti maysa nga aksidente wenno natural a didigra. Kaskasdi, saan a sumuko dagidiay addaan iti napudno a pammati. Maliwliwada iti daytoy a pammatalged ni Jehova: “Saankanto a pulos panawan ket saankanto a pulos baybay-an.” (Hebreo 13:5) Itultuloyda nga iyun-una dagiti naespirituan a banag, agsipud ta agtalekda a bendisionan ni Jehova a Dios dagiti panagreggetda a manggun-od kadagiti kasapulanda. Ti pammatida ti tumulong tapno maibturanda dagiti narigat a kasasaad ken maliklikanda ti aglablabes a panagdanag nga ad-adda a mangpakaro iti kasasaadda.

Yantangay ti pannubok mabalin nga ipalgakna ti pagkapuyan ti pammatitayo, makagunggona met dayta agsipud ta tulongannatayo a mangaramid iti kasapulan a panagbalbaliw. Rumbeng ngarud nga iyimtuod ti maysa a tao: ‘Kasano a mapabilegko ti pammatik? Kasapulak kadi ti ad-adu a panawen iti napasnek a panagadal ken panangutob iti Sao ti Dios? Regular kadi a tumabtabuno ken makipaspasetak kadagiti nayurnos a gimong? Agpampannurayak kadi iti bagik idinto ta rumbeng koma nga ikararagko dagiti pakaseknak ken Jehova a Dios?’ Ngem ti kasta a panangsukimat iti bagi ket pangrugian laeng.

Tapno bumileg ti pammati ti maysa a tao, nalabit kasapulan a parayrayenna ti panangapresiarna iti naespirituan a taraon, nga ipakitana ti ‘panagtarigagayna iti awan lalaokna a gatas a kukua ti sao.’ (1 Pedro 2:2; Hebreo 5:12-14) Ikagumaantayo koma a tuladen ti lalaki a dineskribir ti salmista: “Ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii.”​—Salmo 1:2.

Saan nga umdas ti basta panagbasa laeng iti Biblia. Rumbeng a panunotentayo ti ibagbaga ti Sao ti Dios kadatayo ken iyaplikartayo ti ibalbalakadna. (Santiago 1:22-25) Kas resultana, umuneg ti panagayattayo ken Jehova a Dios, ad-adda a sumingedtay kenkuana, agbalin a mas espesipiko dagiti kararagtayo, ken agbalin a nabilbileg ti pammatitayo kenkuana.

Ti Kinapateg ti Nasubok a Pammati

Matignaytayo a mangpabileg iti pammatitayo no maamiristayo a nakapatpateg dayta iti pananggun-odtayo iti anamong ti Dios. Palagipannatayo ti Biblia: “No awan ti pammati isu di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Gapuna, ti kaririknatayo ket kas koma iti narikna ti lalaki a nagpakpakaasi ken Jesus: “Tulongannak no sadino a kasapulak ti pammati!”​—Marcos 9:24.

Ti pannakasubok ti pammatitayo ket makatulong met iti sabsabali. Kas pagarigan, no natay ti ay-ayaten ti maysa a Kristiano, ti nabileg a pammatina iti panagungar nga inkari ti Dios ti tumulong kenkuana nga agibtur. Maldaang ngem ‘saan nga agladingit a kas met iti dadduma nga awanan namnama.’ (1 Tesalonica 4:13, 14) No madlaw ti dadduma ti bileg ti pammati ti maysa a Kristiano, nalabit mabigbigda nga adda nakapatpateg nga ik-ikutanna. Mabalin a dayta ti mangparegta kadakuada a mangpatanor iti umasping a kita ti pammati ken mangtignay kadakuada nga agadal iti Sao ti Dios ken agbalin nga adalan ni Jesu-Kristo.

Ammo ni Jehova a nakapatpateg ti nasuboken a pammati. Kanayonanna, dagiti pannubok iti pammatitayo ti mangipalgak no nabileg met laeng ti pammatitayo. Matulongannatayo a mangammo kadagiti pagkapuyan ti pammatitayo, tapno nalaklakatayo a maatur dagiti bambanag. Kamaudiananna, no mapagballigiantayo dagiti pannubok, matulongantayo ti sabsabali nga agbalin nga adalan ni Jesus. Gapuna, ikagumaantayo koma a taginayonen ti nabileg a pammati​—ti kita ti pammati a kalpasan a naipasidong iti nadumaduma a pannubok, agbalin ‘koma a pakaigapuan ti dayag ken dayaw inton maipanayag ni Jesu-Kristo.’​—1 Pedro 1:7.

[Footnote]

[Ladawan iti panid 13]

Ni Abraham ket nagbalin a gayyem ni Jehova gapu iti ar-aramid a nangiparangarang iti pammatina

[Dagiti Ladawan iti panid 15]

Dagiti pannubok mapaneknekanda no talaga a natibker ti pammatitayo

[Picture Credit Line iti panid 12]

Manipud iti Illustrated Edition of the Holy Scriptures, da Cassell, Petter, & Galpin