Dagiti Saludsod Manipud Kadagiti Managbasa

◼ Ti kadi material maipapan iti pananggun-od ti pananganamong ti Dios kaipapananna a dagiti Kristiano mabalin a makisaoda iti maysa a naibilang idi a kas “naanamongan a kadua” (approved associate) ngem kalpasanna, gapu iti dakes nga aramid, isut’ masapul a liklikan?

Wen. Ti Pagwanawanan a Nobiembre 15, 1988, impakitana no apay a nainkasuratan a baliwan ti panangmatmattayo iti saan a nabautisaran a tao a nakiraman iti ministerio iti publiko a kadua dagiti Saksi ni Jehova. Dati, ti kasta a tao makuna a “naanamongan a kadua.” No kalpasanna isut’ awan panagbabawina a nanglabsing kadagiti linlinteg ti Dios, ti kongregasion masapul a mapakaammuan, ket dagiti kamkameng ti kongregasion masapul ngarud a liklikanda ti pannakilangen ken ti pannakisarita kenkuana.

Kas ipakita ti nabiit pay a material, kalikaguman ti Biblia nga alaen ti kasta a panangdisiplina iti kaso dagiti nabautisaran a tattao nga awan ti panagbabawida. (1 Corinto 5:11-13; 2 Juan 9-11) Kaskasdi, ti sungsungbatan ti di nabautisaran a tao a mangitultuloy iti panagbasol ket naiduma iti nabautisaran. (Lucas 12:48) Isut’ saan a nabautisaran ket iti kasta saan a naanamongan iti imatang ti Dios, gapuna saan a maitutop ti panangilaksid iti kasona. Kangrunaanna, isu ket maysan a nailubongan a tao ket masapul a pakilangenan iti umiso a pamay-an.

Ania, ngarud ngay, ti maipapan iti maysa a dati a makuna a “naanamongan a kadua” ngem saanen a kualipikado a maipaay iti publiko a ministerio gapu iti dakes a dalanna? Yantangay isut’ saan a nailaksid, isut’ masapul a matrato a kas nailubongan a tao a kas idi.a Siempre, namalakad ti Nobiembre 15 a Pagwanawanan iti panid 19 a masapul ti panagannad dagiti nasungdo a Kristiano. Dagitoy mabigbigda a ti di nabautisaran a tao mabalin a nakiraman a naimbag iti kinadakes nupay addaan iti pannakaammo kadagiti pagalagadan ti Dios. Dagiti nataengan a Kristiano masapul nga agannadda maipapan iti pannakilangen iti kasta nga indibidual. No tumaud dagiti parikut maipapan iti pagpatinggaan ti pannakilangen kenkuana, kaaduan kadagitoy ti marisot babaen ti panangsurot kadagiti nadiosan a balakad. Mabalin a panunotentayo ti balakad a kas ti masarakan idiay 1 Corinto 15:33 ken Proverbio 13:20 ket imtuodentayo ti bagitayo met laeng: ‘Ania ti umiso a pannakilangenko iti tao a saan nga agbibiag a maitunos kadagiti nadiosan a pagalagadan?’ No makita dagiti panglakayen a ti kastoy a nailubongan a tao ket makaipaay iti pagpeggadan, mabalin a mangipaayda iti pribado a pakdaar a balakad kadagidiay adda iti kongregasion a mabalin nga agpegpeggad.

Kabayatanna, ti di nabautisaran a naibilang idi a “naanamongan a kadua” ket mabalin a mangipaay iti nainkalintegan a pammaneknek iti panagbabawina, ket mabalin a tarigagayanna manen ti maaddaan iti panagadal iti Biblia. (Aramid 26:20) Mabalin nga isut’ makisarita kadagiti panglakayen iti kongregasion a tabtabunuanna, a no mabalin, mangiyurnosto para kenkuana a maaddaan iti panagadal ti Biblia. Agaplikar met daytoy no iti masanguanan adda maysa nga agbalin a saan a kualipikado kas di nabautisaran nga agibumbunannag ket kalpasanna mangipakita iti panagbabawi. Gagangay, isut’ masapul a makisarita kadagiti dua a panglakayen a nangtaming iti basolna wenno iti dua a sabali a panglakayen a pinili ti bagi dagiti panglakayen a mangrepaso iti banag no kalikagumanna dayta.

Maitutop unay, Ti Pagwanawanan inlawlawagna a mabalin a naiduma ti kaso dagiti nagannak a mangay-aywan iti menor de edad iti pagtaengan​—dagidiay legal a menor de edad isu a rebbengenda nga ipaayan ti namaterialan a suporta. (Efeso 6:1-4) Ti Kasuratan imparebbengna kadagiti nagannak ti obligasion a mangisuro ken mangiwanwan kadagiti annakda. Gapuna dagiti nagannak (wenno manamati a nagannak) mabalin a pilienda ti mangiyadal a pribado iti Biblia iti nagbasol a menor de edad wenno ti mangiraman kenkuana iti programa ti pamilia a panagadal ken panagsasarita iti Biblia.

Nupay ti nabiit pay a material ti Pagwanawanan sapulenna ti panangbaliwtayo iti panunottayo ken pannakilangentayo, daytoy ket naaramid a maitunos iti Kasuratan a makagunggona “a pakadisiplinaan iti kinalinteg.”​—2 Timoteo 3:16, 17.

◼ Gapu iti kunaen ti Tito 1:6, masapul kadi a dagiti annak ti maysa a lalaki ket mabautisaran tapno kualipikado nga agbalin a panglakayen iti kongregasion?

Iti umuna a kapitulo iti Tito, ni apostol Pablo imbalabalana dagiti kualipikasion a maipaay kadagiti lallaki nga agserbi a kas papanglakayen iti kongregasion. Ti maysa ket ti maysa a kabsat a lalaki ket “awan pakababalawanna, . . . nga adda annakna a namati.”

Daytoy ket dina kaipapanan a dagiti annak ti panglakayen ket masapul a mabautisaranda amin, ta dadduma ti mabalin a maladaga pay. Gapuna nainkalintegan a ti Tito 1:6 ket kaipapananna a ti minor de edad nga annak ti lalaki mabautisaranda koma wenno masapul nga ammuenda ti kinapudno ti Biblia, nga awatenda ken iyaplikarda dayta ket rumangrang-aydan nga agturong iti bautismo, bayat nga addada pay laeng iti sidong ti panangaywan ti pamilia. (1 Corinto 7:14) Ti maysa a panglakayen ikagumaanna koma ti mangaramid kadagiti ad-adalan kadagiti annakna, a dagitoy ket “saanda a mapabasol iti kinadakes wenno kinasukir.”b

Ad-adda a maapresiartayo daytoy babaen ti panangpaliiwtayo no kasano ti panangusar ti Biblia iti ebkas a “namati.” Siempre, ti maysa a tao mabalin nga addaan pammati, wenno mamati kadagiti adu a bambanag. (Aramid 26:27, 28; 2 Tesalonica 2:3, 11; Santiago 2:19) Ngem masarakantayo a ti “namati” ket kankanayon a mainaig iti panangawat iti Kinakristiano ken iti panagbautisar. (Aramid 8:13; 18:8; idiligyo iti 19:1-5.) Ti bautismo ket nangnangruna nga iparangarangna a ti maysa a tao ket manamati.​—Aramid 2:41, 44; 4:4, 32.

Dadduma nga agtutubo nga annak ti maysa a panglakayen ket mabalin a saan pay a sisasagana iti pisikal, emosional, wenno naespirituan a maipaay iti bautismo. Kaskasdi, deskribiren ti Tito 1:6 ida a kas “manamati nga annak” no dagitoy ket rumangrang-aydan nga agturong iti bautismo, sigun iti edad ken kasasaadda.

[Dagiti Footnote]