Kanayon nga Idayawyo ni Jehova
1 Adda sumagmamano nga aktibidad a nasken unay kadatayo a kanayon a masapul a sanguentayo. Dagitoy ti pannangan, panaganges, ken pannaturog. Insaad ni apostol Pablo ti panangikasaba ti naimbag a damag iti umasping a kategoria idi indagadagna: “Kankanayon koma nga idatontayo iti Dios ti sakripisio ti panagdaydayaw.” (Heb. 13:15) No kasta, ti panagdayaw ken Jehova ket banag a masapul nga ikagumaantayo nga aramiden iti inaldaw.
2 Kinuna ni Jesus: “Masapul nga ideklarak ti naimbag a damag ti pagarian ti Dios.” (Luc. 4:43) Bayat ti tallo ket kagudua a tawen a ministeriona, amin nga inaramidna iti kada aldaw ket adda direkta a pannakaisinggalutna iti pakaidayawan ti Dios. Narikna met ni Pablo ti kasta. Siputanyo ti 1 Corinto 9:16: “Asiak pay no diak indeklara ti naimbag a damag!” Naparegta dagiti dadduma a matalek a Kristiano a sidadaanda koma a kanayon a mangidepensa iti namnamada kadagiti sabsabali. (1 Ped. 3:15) Itatta ikagkagumaan a tuladen dagiti nareregta a payunir ken agibumbunannag ti kongregasion dagita a nasayaat a pagulidanan.
3 No usigentay ti regta ni Jesus, matignaytayo a mangsurot a sisisinged kadagiti addangna. (1 Ped. 2:21) Kasanotay nga inaldaw a magundawayan dagiti oportunidad a mangidayaw ken Jehova no addaantayo iti amin a tiempo a panggedan? Kasano ngay dagiti obligasiontayo iti pamilia a mangkiddaw iti nawadwad a tiempotayo? Kaaduan kadagiti agtutubo ket okupado iti nasken a panageskuela. Mabalin nga ikuna dagiti dadduma a saan a posible nga idayaw ni Jehova iti kada aldaw. Mabalin a palabsen ti dadduma ti intero a makabulan a dida inranud ti naimbag a damag iti aniaman a wagas.
4 Maysa ni Jeremias a saan a nakapagulimek. Idi apagbiit laeng a di nakapagsao iti nagan ni Jehova, nakarikna iti di madaeran nga apuy a sumsumged iti unegna. (Jer. 20:9) Nupay adda problemana idi, kanayon a maisarak ni Jeremias ti pamay-an a mangisao iti mensahe ni Jehova iti sabsabali. Mabalintay kadi a tuladen ti ehemplona ken mangsarak iti oportunidad a mangidayaw iti Namarsuatayo iti inaldaw?
5 Saan nga agingga laeng koma iti pormal, nayurnos a tiempo ti panangasaba a kadua ti sabsabali nga agibumbunannag iti teritoria ti kongregasion ti panagsaotayo maipapan ken Jehova. Masapultay laeng ti maysa a lapayag a dumngeg. Inaldaw nga adda makasaritatayo—umayda iti pagtaengantayo, kaduatay ida idiay panggedan, wenno makaluganantayo ida. Kasapulan laeng ti nainggayyeman a kablaaw ken makagutugot-panunot a saludsod wenno sasao a pangirugi iti saritaan. Adu ti nakapaneknek iti daytoy a kas kabungaan a porma ti panangasaba. No ad-adu ti gundawaytay a makisao iti sabsabali maipapan iti naimbag a damag, adayo ngarud a mapasamak kadatayo ti panaglabas ti maysa a bulan a ditay maikasaba ti Pagarian.
6 Ti pribilehio a mangidayaw ken Jehova saanto nga agpatingga kas impamatmat ti salmista iti Salmo 150:6. No tignayennatay ti pusotayo a kanayon a mangaramid iti dayta, inaldaw ngarud a gundawayantay dagiti oportunidad nga agsao maipapan ken Jehova ken ti Saona.