Dagiti Ministro iti Naimbag a Damag

NANGTED kadatayo ni Jehova iti perpekto nga ulidan​—ti Anakna a ni Jesu-Kristo. (1 Ped. 2:21) No agbalin a pasurot ni Jesus ti maysa a tao, tulonganna dayta a mangikasaba iti naimbag a damag kas ministro ti Dios. Tapno ipakitana a makapabang-ar daytoy iti naespirituan, kinuna ni Jesus: “Umaykayo kaniak, dakayo amin a nabannog ken madagdagsenan, ket pagin-awaenkayto. Alaenyo ti sangolko ken agsursurokayo kaniak, ta naalumamay ken napakumbabaak, ket magin-awaankayto.” (Mat. 11:28, 29) Natungpal ti karina kadagidiay nangipangag iti dayta nga awis!

² Kas Kangrunaan a Ministro ti Dios, inawis ni Jesus ti sumagmamano nga indibidual nga agbalin a pasurotna. (Mat. 9:9; Juan 1:43) Sinanayna ida iti ministerio ken imbaonna ida tapno aramidenda ti trabaho nga ar-aramidenna. (Mat. 10:1–11:1; 20:28; Luc. 4:43) Idi agangay, imbaonna ti 70 pay a makiraman iti panangipakaammo iti naimbag a damag maipapan iti Pagarian ti Dios. (Luc. 10:1, 8-11) Idi imbaon ni Jesus dagiti adalanna, kinunana kadakuada: “Ti dumdumngeg kadakayo, dumdumngeg kaniak. Ti di mangipangpangag kadakayo, dinak met ipangpangag. Ket ti saan a mangikaskaso kaniak, saanna met nga ikaskaso Daydiay nangibaon kaniak.” (Luc. 10:16) Impaganetget ditoy ni Jesus ti nadagsen a responsabilidad dagiti adalan. Irepresentarda ni Jesus ken ti Kangatuan a Dios! Kasta met ti responsabilidad ti amin a mangipangag iti awis ni Jesus: “Umayka ket agbalinka a pasurotko.” (Luc. 18:22; 2 Cor. 2:17) Amin a mangipangag ket addaan iti annongen a naggapu iti Dios a mangikasaba iti naimbag a damag ti Pagarian ken mangaramid kadagiti adalan.​—Mat. 24:14; 28:19, 20.

³ Gapu ta impangagtayo ti awis ni Jesus a sumurot kenkuana, naammuantayo ti maipapan ken Jehova a Dios ken ni Jesu-Kristo. (Juan 17:3) Naisuro kadatayo dagiti dalan ni Jehova. Babaen iti tulongna, nabalbaliwan ti panagpampanunot ken personalidadtayo, ken agbibiagtayo a maitunos kadagiti nalinteg a pagalagadan ni Jehova. (Roma 12:1, 2; Efe. 4:22-24; Col. 3:9, 10) Ti naimpusuan nga apresasiontayo ti nangtignay kadatayo a mangidedikar iti biagtayo ken Jehova ken mangisimbolo iti dayta babaen ti bautismo iti danum. Ti bautismo ket pammaneknek a maysatayon a ministro.

⁴ Laglagipentayo a masapul a nadalus ti puso ken panagbiagtayo nga agserbi iti Dios. (Sal. 24:3, 4; Isa. 52:11; 2 Cor. 6:14–7:1) Naaddaantayo iti nadalus a konsiensia gapu iti pammatitayo ken ni Jesu-Kristo. (Heb. 10:19-23, 35, 36; Apoc. 7:9, 10, 14) Imparegta ni apostol Pablo kadagiti Kristiano nga aramidenda ti amin a banag a pakaidayawan ti Dios tapno saanda a makaitibkol. Impaganetget ni apostol Pedro a napateg ti nasayaat a kababalin tapno awaten dagiti di manamati ti kinapudno. (1 Cor. 10:31, 33; 1 Ped. 3:1) Kasanom a matulongan ti maysa a tao tapno agbalin a kualipikado a ministro iti naimbag a damag a kas kadatayo?

KABBARO NGA AGIBUMBUNANNAG

⁵ Iti damo pay laeng a panangyadalmo iti Biblia iti interesado a tao, iparegtam kenkuana nga ibagana iti sabsabali dagiti maad-adalna iti di pormal a pamay-an​—iti kakabagian, gagayyem, katrabahuanna, ken dadduma pay. Napateg a maisuro daytoy kenkuana tapno agbalin a ministro ti naimbag a damag ken pasurot ni Jesu-Kristo. (Mat. 9:9; Luc. 6:40) Bayat a rumangrang-ay iti naespirituan ti kabbaro ken lumalaing a mangasaba iti di pormal, sigurado a kayatnan ti makiraman iti ministerio.

PANANGRAGPAT KADAGITI MAKALIKAGUMAN

⁶ Sakbay nga awisem ti kabbaro a kumuyog kenka iti panagbalaybalay iti umuna a gundaway siguraduem a naragpatnan dagiti kualipikasion. No makikadua kadatayo iti ministerio, ipakpakitana kadagiti tattao nga isu ket naitimpuyogen kadagiti Saksi ni Jehova. Rumbeng laeng nga agbibiagen a maitunos kadagiti nalinteg a pagalagadan ni Jehova tapno kualipikado nga agbalin a di bautisado nga agibumbunannag.

⁷ Bayat nga iyad-adalam ti maysa a tao ken ilawlawagmo kenkuana dagiti prinsipio ti Biblia, maammuam dagiti kasasaadna. Mapaliiwmo nga agbibiagen a maitunos iti maad-adalna. Ngem adda sumagmamano nga aspeto iti biag ti iyad-adalam a kayat a pakisaritaan dagiti panglakayen kadakayo a dua.

⁸ Iyurnos ti koordineytor ti bagi dagiti panglakayen nga adda dua a panglakayen (ti maysa ket miembro ti komite ti serbisio) a makisarita kenka ken iti iyad-adalam iti Biblia maipapan kadagitoy a banag. Kadagiti kongregasion a manmano dagiti panglakayen, mabalin nga aramiden daytoy ti maysa a panglakayen ken ti kualipikado a ministerial nga adipen. Masapul nga aramiden koma a dagus daytoy dagiti kakabsat a nadutokan. Kinapudnona, no naammuanda ti tarigagay ti mayad-adalan bayat ti gimong, mabalinda ti makisarita kenka ken iti iyad-adalam kalpasan ti gimong. Nainggayyeman koma ti pannakisaritayo. Sakbay a maaprobaran ti iyad-adalan kas di bautisado nga agibumbunannag, makita koma kenkuana dagitoy:

1. (1) Mamati nga inwanwan ti Dios ti pannakaisurat ti Biblia.​—2 Tim. 3:16.

2. (2) Ammona ken patienna dagiti kangrunaan a sursuro ti Kasuratan tapno no mapagsaludsodan, masungbatanna dagita maitunos iti kuna ti Biblia ken saan a maitunos kadagiti palso a sursuro ti relihion wenno kadagiti bukodna a kapanunotan.​—Mat. 7:21-23; 2 Tim. 2:15.

3. (3) Tungtungpalenna ti bilin ti Biblia a makitimpuyog iti ili ni Jehova kadagiti gimong ti kongregasion no ipalubos ti kasasaadna.​—Sal. 122:1; Heb. 10:24, 25.

4. (4) Ammona ti isursuro ti Biblia maipapan iti seksual nga immoralidad, agraman ti pannakikamalala, poligamia, ken homoseksualidad, ken agbibiag a maitunos kadagita a sursuro. No adda kabbalay ti maysa a tao a saanna a kasekso ken saanna met a kabagian, masapul a nagkasarda.​—Mat. 19:9; 1 Cor. 6:9, 10; 1 Tim. 3:2, 12; Heb. 13:4.

5. (5) Tungtungpalenna ti ibagbaga ti Biblia a saan nga agbartek ken saan nga agus-usar iti aniaman a kita ti makaadikto a droga wenno dagiti natural ken sintetiko a substansia a mangapektar iti isip.​—2 Cor. 7:1; Efe. 5:18; 1 Ped. 4:3, 4.

6. (6) Bigbigenna a masapul a liklikanna dagiti dakes a kakadua.​—1 Cor. 15:33.

7. (7) Nagikkaten a miembro ti palso a relihion a dati a nakaikamenganna. Saanen a makigimgimong ken mangsupsuporta wenno makiramraman kadagiti aktibidadda.​—2 Cor. 6:14-18; Apoc. 18:4.

8. (8) Saanen a makiramraman iti aniaman nga aktibidad ti politika iti lubong.​—Juan 6:15; 15:19; Sant. 1:27.

9. (9) Patienna ken agbibiag a maitunos iti kuna ti Biblia iti Isaias 2:4 maipapan kadagiti aramid dagiti nasion.

10. (10) Talaga a kayatna ti agbalin a maysa kadagiti Saksi ni Jehova.​—Sal. 110:3.

⁹ No saan a sigurado dagiti panglakayen no ania ti opinion ti estudiante maipapan kadagitoy a banag, masapul a saludsodenda kenkuana. Mabalin nga usarenda dagiti nadakamat a teksto a pangibatayanda iti saritaan. Masapul a maawatanna a dagidiay makiraman iti trabaho a panangasaba dagiti Saksi ni Jehova ket agbibiag a maitunos kadagitoy a Nainkasuratan a kualipikasion. Dagiti sungbatna ket makatulong kadagiti panglakayen a mangikeddeng no ammona ti manamnama kenkuana ken no talaga a kualipikadon a makiraman iti ministerio.

¹⁰ No kualipikado, ipakaammo koma a dagus dagiti panglakayen iti mayad-adalan. Kaaduanna a maipakaammo dayta sakbay nga agngudo ti pannakisaritada. No kualipikado, sibabara nga abrasaen dagiti panglakayen kas maysa nga agibumbunannag. (Roma 15:7) Maparegta koma a makiraman iti ministerio iti kabiitan a panawen ken itedna ti reportna iti ministerio iti ngudo ti bulan. Ilawlawag dagiti panglakayen a no kualipikadon ti estudiante iti Biblia nga agbalin a di bautisado nga agibumbunannag ken mangteden iti report iti ministerio iti umuna a gundaway, mayaramidanen iti Congregation’s Publisher Record ken mairaman iti salansan ti kongregasion. Alaen dagiti panglakayen daytoy a personal nga impormasion kenkuana tapno mabalinna ti makiraman kadagiti aktibidad nga inyurnos ti kongregasion ken umawat iti pammaregta ken panangiwanwan dagiti panglakayen. Kanayonanna, mabalin nga ibaga dagiti panglakayen kadagiti kabbaro nga agibumbunannag nga aniaman a personal nga impormasion ket maannadan maitunos iti Sangalubongan a Pagannurotan Dagiti Saksi ni Jehova iti Pannakaprotektar Dagiti Impormasion, iti jw.org/ilo.

¹¹ Maparegta ti kabbaro nga agibumbunannag no am-ammuentayo a naimbag ken no interesadotayo iti maar-aramidanna. Mabalin a daytoy ti mangtignay kenkuana nga ad-adda nga agregget nga agserbi ken ni Jehova ken binulan a mangited iti reportna iti ministerio.​—Fil. 2:4; Heb. 13:2.

¹² No naikeddengen dagiti panglakayen a kualipikadon ti estudiante iti Biblia a makiraman iti ministerio, mabalinen nga ikkan iti bukodna a kopia iti Organisado a Mangaramid iti Pagayatan ni Jehova. Kalpasan a maitedna ti damo a reportna iti ministerio, adda ababa a pakaammo iti kongregasion nga isu ket maysan a di bautisado nga agibumbunannag.

PANANGTULONG KADAGITI AGTUTUBO

¹³ Mabalin met a makualipikar dagiti ubbing kas agibumbunannag iti naimbag a damag. Interesado ni Jesus kadagiti ubbing ken binendisionanna ida. (Mat. 19:13-15; 21:15, 16) Nupay dagiti nagannak ti kangrunaan a mangisuro kadagiti annakda, mabalin met a tumulong ti dadduma iti kongregasion tapno matignay ti puso dagiti ubbing a makiraman iti trabaho a panangikasaba iti Pagarian. No maysaka a nagannak, dakkel ti maitulong ti nasayaat nga ulidanmo iti ministerio tapno matignay dagiti annakmo nga agbalin a naregta nga agserbi iti Dios. No nasayaat ti kababalin ti maysa nga ubing ken ibagbaganan ti pammatina iti sabsabali, ania pay ti maitulong kenkuana?

¹⁴ Nasayaat no makisarita ti nagannak iti maysa kadagiti panglakayen a miembro ti Komite ti Serbisio ti Kongregasion tapno pakisaritaanda no kualipikadon ti ubing nga agbalin nga agibumbunannag. Ti koordineytor ti bagi dagiti panglakayen iyurnosna a dua a panglakayen (ti maysa ket miembro ti komite ti serbisio) ti makisarita iti ubing ken iti Saksi a nagannakna wenno ti mangay-aywan kenkuana. No ammon ti ubing ti kangrunaan a pannursuro ti Biblia ken ipakitana a talaga a kayatnan ti makiraman iti ministerio, pammaneknek dayta a nasayaat ti panagrang-ayna. Kalpasan a mausig dagitoy ken ti dadduma pay a banag nga agaplikar kadagiti nataengan, maammuan ti dua a panglakayen no kualipikadon ti ubing nga agbalin a di bautisado nga agibumbunannag. (Luc. 6:45; Roma 10:10) No makisarita iti maysa nga ubing, saanen a kasapulan a pakisaritaan ti dadduma a banag nga agaplikar laeng kadagiti nataengan.

¹⁵ Bayat ti pannakisarita dagiti panglakayen, komendaranda koma ti ubing iti panagrang-ayna ken paregtaenda a pagbalinenna a kalat ti agpabautisar. Makomendaran met ti panangikagumaan dagiti nagannak ta impasagepsepda ti kinapudno iti anakda. Tapno ad-adda pay a matulongan dagiti nagannak ti anakda a rumang-ay iti naespirituan, ibaga dagiti panglakayen nga usigenda ti “Mensahe Kadagiti Kristiano a Nagannak” a masarakan iti panid 179-181.

DEDIKASION KEN BAUTISMO

¹⁶ No naammuamon ti maipapan ken Jehova ken naipakitamon ti ayatmo kenkuana babaen ti panangragpatmo kadagiti kalikagumanna ken pannakipasetmo iti ministerio, masapul a patibkerem ti relasionmo kenkuana. Kasano? Babaen ti panangidedikarmo iti biagmo kenkuana ken ipakitam dayta babaen ti bautismo iti danum.​—Mat. 28:19, 20.

¹⁷ Ti panagdedikar kaipapananna ti pannakaisina para iti sagrado a panggep. No idedikarmo ti biagmo iti Dios, umadanika kenkuana babaen ti kararag, naimpusuan nga ikarim nga usarem ti biagmo nga agserbi kenkuana ken aramidem ti pagayatanna ken ipaaymo kenkuana ti naipamaysa a debosion iti agnanayon. (Deut. 5:9) Personal a banag daytoy ken sika laeng ti makaaramid iti dayta.

¹⁸ Ngem saanmo laeng nga ibaga ken Jehova a kayatmo ti agbalin nga adipenna. Masapul nga ipakitam met iti sabsabali a nagdedikarka iti Dios babaen ti panagpabautisarmo iti danum, kas iti inaramid ni Jesus. (1 Ped. 2:21; 3:21) No determinadoka nga agserbi ken Jehova ken kayatmo ti agpabautisar, ania ti aramidem? Masapul nga ibagam ti tarigagaymo iti koordineytor ti bagi dagiti panglakayen. Iyurnosna a makisarita kenka ti dadduma a panglakayen tapno ammuenda no naragpatmo dagiti kalikaguman ti Dios kadagidiay agpabautisar. Para iti kanayonan nga impormasion, repasuem ti “Mensahe Kadagiti Di Bautisado nga Agibumbunannag,” a masarakan iti panid 182-184 iti daytoy a libro, ken ti “Dagiti Saludsod Para Kadagiti Agtarigagay nga Agpabautisar,” iti panid 185-207.

PANANGIREPORT ITI PANAGRANG-AY ITI MINISTERIO

¹⁹ Kadagiti naglabas a tawen, makaparegta iti ili ni Jehova dagiti report iti panagrang-ay ti nadalus a panagdayaw iti intero a lubong. Sipud idi imbaga ni Jesu-Kristo kadagiti adalanna a maikasaba ti naimbag a damag iti intero a daga, interesado dagiti pudno a Kristiano no kasano a matungpal daytoy.​—Mat. 28:19, 20; Mar. 13:10; Ara. 1:8.

²⁰ Maragragsakan idi dagiti immuna a pasurot ni Jesus a dumdumngeg kadagiti report maipapan iti naballigi a panangasaba. (Mar. 6:30) Ibaga kadatayo ti libro nga Aramid nga agarup 120 nga adalan ti adda idi naiparukpok ti nasantuan nga espiritu idi Pentecostes 33 C.E. Di nagbayag, ti bilang dagiti adalan ket immadu iti agarup 3,000 sa kalpasanna agarup 5,000. Naipadamag nga “intultuloy . . . ni Jehova nga itipon kadakuada iti inaldaw dagidiay maisalsalakan” ken “adu met a papadi ti nagbalin a manamati.” (Ara. 1:15; 2:5-11, 41, 47; 4:4; 6:7) Naparegta la ketdi dagiti adalan kadagitoy a report iti panagrang-ay! Dagitoy a makaparagsak a report ti nangtignay kadakuada nga agtultuloy iti trabaho nga inted ti Dios, uray nakaro ti panangidadanes kadakuada dagiti Judio a panguluen ti relihion!

²¹ Idi agarup 60-61 C.E., kinuna ni Pablo iti suratna kadagiti taga-Colosas “nga agbungbunga ken agsaksaknap ti naimbag a damag iti intero a lubong” ken “naikaskasaba iti amin a parsua iti baba ti langit.” (Col. 1:5, 6, 23) Nagtulnog iti Sao dagiti nagkauna a Kristiano, ket pinabileg ida ti nasantuan nga espiritu a mangitungpal iti dakkel a trabaho a panangasaba sakbay nga agpatingga ti Judio a sistema ti bambanag idi 70 C.E. Talaga a naparegta dagiti matalek a Kristiano idi mangngegda dagiti report maipapan iti naaramidanda!

²² Kasta met, ikagkagumaan ita ti organisasion ni Jehova a maaddaan iti rekord iti naaramidanen kas kaitungpalan ti Mateo 24:14, a kunana: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.” Kas dedikado nga ad-adipen ti Dios, naganat ti trabahotayo. Masapul nga aramidentayo ti amin a kabaelantayo a mangitungpal a naan-anay iti ministeriotayo sakbay a dumteng ti panungpalan. Siguraduen ni Jehova a mairingpas daytoy a trabaho, ket no makiramantayo, maparagsaktayo ni Jehova.​—Ezek. 3:18-21.

TI REPORTMO ITI MINISTERIO

²³ Ania ti ireporttayo? Ipakita ti Field Service Report slip nga impaay ti organisasion no ania dagiti ireporttayo. Ngem makatulong dagiti sumaganad nga instruksion.

²⁴ Ikabilmo iti “Placements (Printed and Electronic)” ti bilang ti publikasion​—nayimprenta man wenno electronic​—a nairanudmo kadagiti saan a bautisado a Saksi. Iti “Video Showings,” ikabilmo no namin-anoka a nakaipabuya iti maysa kadagiti video-tayo.

²⁵ No ireportmo ti “Return Visits,” bilangem no namin-anoka a simmarungkar tapno maparayraymo ti interes ti saan a bautisado a Saksi. Mabalin ti agsarungkar babaen ti personal nga ibibisita, panagsurat, tawag, teks wenno e-mail, ken agitulod iti literatura. Tunggal mangyadalka iti Biblia, maibilang dayta kas panagsarungkar. No mangidaulo iti panagdaydayaw ti pamilia ti maysa a nagannak, mabalin nga ireportna dayta kas maysa a panagsarungkar iti tunggal lawas no presente ti anakna a saan a bautisado.

²⁶ Nupay maikondukta ti panangyadal iti Biblia iti kada lawas, maysa laeng ti maireport a panangyadal iti kada bulan. Ikabil dagiti agibumbunannag ti bilang ti nagduduma a panangyadal iti Biblia a naikondukta iti dayta a bulan. Maireport met kas panangyadal iti Biblia no mayadalan dagiti saan a bautisado a Saksi. Maibilang met kas panangyadal iti Biblia no mayadalan dagiti di aktibo a kakabsat babaen ti panangiwanwan ti miembro ti komite ti serbisio wenno ti kabbaro a nabautisaran a dina pay nalpas ti libro nga Agbiagka a Naragsak iti Agnanayon!

²⁷ Napateg a maited ti umiso a report ti “Oras.” Kaaduanna, daytoy ti oras a nakipasetka iti panagbalaybalay, panagsarungkar, panangyadal iti Biblia, wenno panangasaba iti pormal wenno di pormal kadagiti saan a Saksi. No dua nga agibumbunannag ti agbalaybalay, mabalin a duada a mangireport iti oras ngem maysa laeng kadakuada ti mangireport iti panagsarungkar wenno panangyadal iti Biblia. Dagiti nagannak nga agpada a mangisursuro kadagiti annakda bayat ti Panagdaydayaw ti Pamilia ket mabalinda nga ireport ti maysa nga oras kada lawas. Mabalin nga ireport dagiti kakabsat a lallaki ti oras a nangipaayda iti palawag publiko. Mabalin met nga ireport ti interpreter ti oras a nausar iti palawag publiko. Adda dagiti napateg a trabaho a saan a maireport ti oras a mabusbos kadagita, kas iti panagsagana para iti ministerio, itatabuno iti taripnong sakbay ti panangasaba, ken panangasikaso iti dadduma pay a trabaho.

²⁸ Masapul nga ikararag ken suroten ti tunggal agibumbunannag ti idiktar ti konsiensiana a nasanay iti Biblia no bilangenna ti oras a nabusbosna iti ministerio. Mangasaba ti dadduma nga agibumbunannag iti lugar nga adu ti tao, idinto ta adda dagiti mangasaba iti teritoria a manmano ti tao ken agbiaheda iti adayo. Nagduduma dagiti teritoria ken nagduduma met ti panangmatmat dagiti agibumbunannag iti ministerioda. Ti Bagi a Manarawidwid saanna nga ipilit ti konsiensiana iti amin a Saksi no kasano a bilangen ti oras a nabusbos iti ministerio, ken awan met ti nadutokan a mangikeddeng no mano ti ireporttayo.​—Mat. 6:1; 7:1; 1 Tim. 1:5.

²⁹ Ti panangireport iti tiempo a nausar iti ministerio ket masapul a kompleto nga oras, malaksid no limitadon ti maaramidan ti maysa nga agibumbunannag gapu ta lakay wenno baketen, naidalit, adda iti balay a pagtaraknan, wenno baldado. Ti kasta nga agibumbunannag ket mabalinna nga ireport ti 15, 30, wenno 45 a minuto a nagapuananna iti ministerio. Uray no 15 a minuto laeng ti mabusbosna a mangasaba iti makabulan, masapul nga ireportna dayta. Maibilang kas regular nga agibumbunannag iti Pagarian. Agaplikar met daytoy nga urnos iti agibumbunannag a limitado ti maaramidanna, nalabit saan a makagunay iti uneg ti makabulan wenno napapaut pay gapu iti nakaro a sakit wenno aksidente. Daytoy a probision ket para laeng kadagiti nakapuy unayen ken limitado ti maar-aramidanda. Ikeddeng ti komite ti serbisio no kualipikado ti maysa nga agibumbunannag iti daytoy nga urnos.

TI CONGREGATION’S PUBLISHER RECORD

³⁰ Ti binulan a reportmo iti ministerio ket mairekord iti Congregation’s Publisher Record. Dagitoy a rekord ket kukua ti kongregasion. No planom ti umakar iti sabali a kongregasion, masapul nga ipakaammom kadagiti panglakayenyo. Siguraduen ti sekretario a maipatulod ti rekordmo iti baro a kongregasionmo. Iti kasta, ad-adda a maparegtadaka dagiti panglakayen iti baro a kongregasionmo ken matulongandaka iti naespirituan. No awanka iti kongregasionmo iti nakurang a tallo a bulan, itultuloymo koma nga ipatulod ti reportmo iti kongregasionmo.

NO APAY NGA IREPORTTAYO TI NAARAMIDANTAYO ITI MINISTERIO

³¹ No dadduma, malipatam kadi nga ited ti reportmo iti ministerio? Kasapulantayo ti mapalagipan sagpaminsan. Ngem no umiso ti panangmatmattayo iti panagreport ken matarusantayo ti kinapateg dayta, ditay malipatan nga ited ti reporttayo iti ministerio.

³² Isaludsod ti dadduma: “Tangay ammo ni Jehova ti maar-aramidak a panagserbi kenkuana, apay pay laeng nga itedko ti reportko iti kongregasion?” Pudno, ammo ni Jehova ti maar-aramidantayo, ken ammona no naimpusuan ti panagserbitayo wenno ad-adu pay ti maaramidantayo. Ngem laglagipem nga inrekord ni Jehova no mano nga aldaw a nagyan ni Noe iti daong ken no mano a tawen a nagdaliasat dagiti Israelita iti let-ang. Inrekord ti Dios no mano dagiti matalek ken nasukir. Inrekordna met ti in-inut a pannakasakup ti daga a Canaan ken ti naaramidan dagiti matalek nga ukom ti Israel. Wen, inrekordna ti adu a detalye maipapan iti ar-aramid dagiti adipenna. Impaltiingna dagitoy nairekord a pasamak tapno ipakitana kadatayo a napateg nga adda dagiti umiso a rekord.

³³ Ipakita dagiti salaysay a nairekord iti Biblia nga umiso dagiti report ken rekord nga inaramid ti ili ni Jehova. Kaaduanna, ti naan-anay a kaipapanan ti salaysay iti Biblia ket saan a maammuan no saan a nairekord dagiti espesipiko a bilang. Usigentayo dagitoy a pagarigan: Genesis 46:27; Exodo 12:37; Uk-ukom 7:7; 2 Ar-ari 19:35; 2 Cronicas 14:9-13; Juan 6:10; 21:11; Aramid 2:41; 19:19.

³⁴ Nupay saan a mairaman kadagiti reporttayo ti amin nga ar-aramidentayo a panagserbi ken Jehova, adda nasayaat a panggep dagitoy iti organisasion ni Jehova. Idi umuna a siglo, kalpasan ti panangasaba dagiti apostol, inreportda ken Jesus “ti amin nga inaramidda ken insuroda.” (Mar. 6:30) No dadduma, mabalin a makita kadagiti report nga adda dagiti paset ti ministeriotayo a masapul a parang-ayen. Mabalin nga ipakita dagiti report a rimmang-ay ti dadduma nga aspeto ti ministeriotayo, ngem saan nga immadu wenno saan a rimmang-ay dagiti agibumbunannag iti dadduma nga aktibidad. Mabalin a kasapulan ti pammaregta wenno adda dagiti problema a masapul a masolbar. Asikasuen dagitoy dagiti responsable a manangaywan ken ikagumaanda nga ilinteg ti aniaman a mabalin a manglaplapped iti panagrang-ay dagiti indibidual wenno ti intero a kongregasion.

³⁵ Makatulong met dagiti report iti organisasion tapno maammuan no sadino ti addaan iti dakdakkel a pakasapulan kadagiti manangaskasaba. Sadino dagiti lugar a nabungbunga? Sadino ti saan unay a rumangrang-ay? Ania dagiti publikasion a kasapulan tapno matulongan dagiti tattao a mangammo iti kinapudno? Makatulong dagiti report iti organisasion tapno maammuan no ania dagiti kasapulan a literatura iti nadumaduma a paset ti lubong sa maisagana dagitoy tapno maipaay dagita a kasapulan.

³⁶ Kaaduan kadatayo ket maparegta kadagiti report. Saan kadi a makaparagsak no madamagtayo ti ar-aramiden dagiti kakabsattayo a panangikasaba iti naimbag a damag iti intero a lubong? Makitatayo ti nagrang-ayan ti organisasion ni Jehova no maammuantayo dagiti report maipapan iti umad-adu a bilang dagiti agibumbunannag. Makaparagsak ken makaparegta dagiti kapadasan, ken matignaytayo a makiraman a naan-anay iti panangasaba. (Ara. 15:3) Ipakpakitatayo a makitintinnulong ken maseknantayo kadagiti kakabsattayo iti intero a lubong no itedtayo dagiti reporttayo iti ministerio. Iti kasta, ipakpakitatayo ti panagpasakuptayo iti urnos ti organisasion ni Jehova.​—Luc. 16:10; Heb. 13:17.

MAADDAAN KADAGITI KALAT

³⁷ Saan a rumbeng nga idiligtayo kadagiti dadduma ti maar-aramidantayo iti ministerio. (Gal. 5:26; 6:4) Ngamin, nagduduma ti kasasaadtayo. Ngem magunggonaantayo no adda realistiko a kalattayo ta makitatayo no adda nagrang-ayantayo iti ministerio. Maragsakantayo iti naaramidantayo no naragpattayo dagitoy a kalat.

³⁸ Nalawag a pappapartaken ni Jehova ti pannakaurnong dagiti salaknibanna iti “dakkel a rigat.” Agbibiagtayon iti panawen a matungtungpal ti padto ni Isaias: “Ti bassit agbalinto a sangaribu ken ti nagbassit agbalinto a nabileg a nasion. Siak, ni Jehova, papardasekto dayta iti bukodna a tiempo.” (Apoc. 7:9, 14; Isa. 60:22) Talaga a nagsayaat a pribilehio ti agbalin a ministro ti naimbag a damag kadagitoy napeggad a maudi nga al-aldaw!​—Mat. 24:14.