Dagiti Saludsod Manipud Kadagiti Managbasa

◼ Gapu iti baro nga impormasion maipapan kadagiti saan pay a bautisado a mangrugrugin iti ministerio ti publiko, mabalin kadi nga awisen ti maysa nga estudiante ti Biblia a kumuyog ti mabiit tapno makitana no kasanot’ pannakaar-aramid ti trabaho?

Kaaduanna, dagiti saan pay a bautisado a kumuykuyog kadagiti Saksi ni Jehova iti tay-ak ti ministerio isuda dagiti tattao a kualipikadon kas agibumbunannag ti naimbag a damag.

Adu iti publiko ti mangraraem kadagiti Saksi ni Jehova gapu iti naisalsalumina ken nasayaat a trabahoda a ‘panagaramid ti adalan, a sursuruan ida’ iti binalaybalay ken babaen iti panangiyadal ti Biblia kadagiti pagtaengan. (Mateo 28:19, 20) Anianto, ngarud, ti makuna ti publiko maipapan ti pannakikuyog ti maysa a tao iti Saksi iti daytoy a ministerio? Nainkalintegan laeng nga ipatoda a ti kaduana ket maysa met a ministro wenno asidegen nga agbalinen a kasta.

Ikabilyon, mabalin nga adda sumagmamano a pakailaksidan daytoy a mapanunotyo.

Kadagiti mammano a maiyanatup nga okasion dagiti panglakayen pinalubosanda ti maysa a reporter ti damdamag, propesor ti kolehio, wenno umas-asping kadagita a mangkuyog ti maysa a Saksi iti panagbalaybalay a ministerio tapno makitada no kasanot’ pannakaaramid dayta. Siempre, ti langa ken tigtignay ti tao kadagita nga okasion ket saan koma a maisuppiat kadagiti pagannurotantayo. Ket ti Saksi mabalinna nga ibaga kadagiti bumalay a ti kaduana ket maysa a reporter wenno propesor nga interesado a mangpaliiw no kasanot’ panangar-aramidtayo iti nasken unay a trabahotayo ti Biblia.

Kasta met, itugtugot dagiti Kristiano a nagannak dagiti annakda iti ministerio uray no dagitoy ket nakaub-ubingda pay wenno saanda pay a nakasagana nga agbalin a bautisado nga agibumbunannag. Dagitoy a nagannak ngarud saanda koma baybay-an dagiti annakda nga awan mangas-asikaso. Ti panangitugotda kadakuada iti tay-ak ti serbisio palubosanna dagiti nagannak a makisao kadagiti annakda maipapan ti Sao ti Dios ken ar-aramidna bayat a “magmagnada iti dalan.” (Deuteronomio 6:4-7) Ngem daytoy ket maysa a paset ti panagbiag ti maysa a Kristiano a pamilia, saan a maysa a banag a ti maysa a Saksi mangikuykuyog ti sabali a tao kenkuana kas maysa laeng a managpaliiw. Siempre, ti kasta a panangsanay dagiti nagannak isaganana met dagiti ubbing iti tiempo inton idaydayawdanto metten ni Jehova kas agibumbunannag.​—Mateo 21:15, 16; idiligyo iti Organisado a Mangitungpal ti Ministeriotayo, panid 99, 100.

Ngem, ania, ti maipapan ti maysa a tao a pangidadauluan ti Saksi ti panagadal ti Biblia, maysa a tao nga addan iti dalan nga agbalin a maysa nga adalan? Isut’ addaan naimbag a rason nga ibaga kadagiti kakabagian, katrabahuan, kakaarruba, ken dadduma pay maipapan “kadagiti nakaskasdaaw nga aramid ti Dios” a naadalna manipud iti Kasuratan. (Aramid 2:11) Manamnama, dumtengto ti kanito inton makitana ti pannakasapul a makiraman kadua dagiti Saksi ni Jehova iti organisado nga urnos nga “ipakaammoda ti sao ti Dios.”​—Aramid 13:5.

Iti nabiit pay Ti Pagwanawanan imbalabalana dagiti maiyanatup nga addang sakbay a ti kasta nga estudiante ket makitimpuyog kadagiti lokal a Saksi iti ministerio, nga agbalinen a saan pay a bautisado nga agibumbunannag. Nainkalintegan laeng a rebbeng nga isut’ addaanen ti pamunganayan a pannakaammo ti Biblia, a matartarusanna ken makituntunosen kadagiti moral a pagalagadan ti Dios, ket personal a tarigagayannan ti makiraman iti ministerio iti publiko a kadua dagiti Saksi ni Jehova. Gapuna dua a panglakayen ti kongregasion ti mabalin a maaddaan ti makatulong ken makaparegta a pannakipatang kadagita a punto kenkuana ken ti Saksi a mangiyad-adal kenkuana iti Biblia.a Daytoy ti rebbeng nga aramiden sakbay a ti estudiante ti Biblia ket maawis a kumuyog iti agibumbunannag iti tay-ak ti ministerio tapno umawat ti progresibo a pannakasanay.

Kaawatan, no ti estudiante makakualipikaren a rummuar iti ministerio ti tay-ak ket santo damdamo nga aramidenna dayta, mabalinna ti kumuyog ti sumagmamano a daras iti agibumbunannag tapno maammuanna no kasanot’ aktual a pannakaramid ti panangaskasaba. Ti ministro a kaduana ti mabalin a mangted kenkuana ti in-inut a panagsanay, kas iti panangdawat kenkuana a tumulong bassit ti panagbasa kadagiti kasuratan, sa inton tiemponan isunton ti mangidaulo ti panangaskasaba iti maysa a bumalay. Iti kasta, mabalinnanto metten nga ited ti umuna a reportna iti serbisio iti tay-ak inton aktual a nakiramanen iti panangaskasaba iti tay-ak. Ti progresibo a pannakiramanna nga ad-adda iti trabaho ket maitunos iti sasao ni Jesus: “Ti adalan saan a natantan-ok ngem ti mannursuro kenkuana, ngem ti tunggal adalan nga awan pagkuranganna umaspingto iti mannursurona.”​—Lucas 6:40.

[Dagiti Footnote]