Naan-anay a Magunggonaan iti 1993 a “Nadiosan a Sursuro” a Kombension ti Distrito
1 “Isuronak, O Jehova.” (Sal. 86:11) Daytoy koma ti nasged a dawat iti tunggal dedikado nga adipen ti Dios. Determinadotayo koma a saan a mamingga nga agadal ken ditay sumardeng a mangalagad kadagiti naadaltayo. No dadduma kasapulantayo ti maihusto, a kas iti salmista, kasapulan nga idawat iti Dios a pagkaysaenna ti pusotayo tapno saan a nabingay. Ti programa iti “Nadiosan a Sursuro” a Kombension ti Distrito isut’ mangted iti praktikal a sursuro ken panangihusto a kasapulantayo tapno makaserbitayo a simamatalek ken Jehova iti sidong dagiti ublag daytoy sistema dagiti bambanag.
2 Uppat nga Aldaw a Kombension: Maidatag iti programa kadagiti 36 a lugar ditoy Pilipinas. Tallo kadagitoy a kombension ti maaramid ditoy Metro Manila inton Nobiembre 4-7, 1993, bayat a dagiti 33 ti maaramid iti Disiembre ken nasapa nga Enero. Mangrugi ti programa iti Huebes iti 1:20 t.m. ken agngudo iti malem ti Domingo iti agarup nga 4:15 t.m. Nota: Ti programa kadagiti 36 a lugar ket agpapada, agraman iti Manila. Ti laeng giddiatna isut’ kaadda dagiti ganggannaet a delegado ditoy Manila.
3 Ania ti nairanta nga agpaay kadatayo? Maysa a nawadwad a solido a naespirituan a taraon a maidasar iti nagduduma a wagas: dagiti palawag, demostrasion, interbio, ken dua a drama. Saanyo a saawen iti aniaman kadagitoy a nasken nga instruksion! Mainayon, kumitatayo iti masakbayan a mangpabaro ti panagsasarak kadagiti dati nga am-ammo ken kadagiti adu nga agdadamo. Dagiti misionero a nagserbi kadagiti ganggannaet a pagilian ti mabalin a tumabuno iti kombensionyo. Gundawayanyo ti oportunidad a maam-ammo dagitoy a matalek a kakabsat a lallaki ken babbai. No maysakayo a naganak, iramanyo dagiti annakyo iti saritaan. Ti naragsak ken nasakripisio nga espiritu dagitoy a misionero ti mangted iti pundasion dagiti agtutuboyo a mangusig ti karera iti amin a tiempo a serbisio.
4 Itugotyo Aya ti Intero nga Apagkapullo iti Kamalig? Iti Malakias 3:10, naikari ni Jehova kadagiti Israelita a no situtulokda a mangpadas kenkuana ken iyegda ti intero nga apagkapullo iti kamalig, ibukboknanto ti bendision agingga nga awan ti pagkurangan.
5 Kadagiti dadduma, ti panangpadas ken Jehova kaipapananna iti iyaasidegda kadagiti amoda a nasapa tapno kiddawenda ti agbakasion tapno makatabunoda iti kombension. No dadduma dagiti kakabsat ket agkitakitda a mangaramid iti daytoy, a pagarupda a dagiti amo ket saanda nga ipalubos a tumabunoda ti kombension. Kaskasdi, no maipapan iti awan singgalutna ti espiritual a bambanag, saanda unay a marigatan a mangibaga iti amoda no ania ti kayatda nga aramiden.
6 Masapul a saludsodan ti bagbagitayo: No ti maysa nga ingungoten a gayyem ket agkasar iti sabali a lugar, saantayo kadi nga asitgan ti amotayo tapno kiddawen kenkuana iti panagbakasion tapno tumabuno ti kasarna? Ket no medio agkedked, saan kadi a sidadayaw nga ilawlawag no kasano ti kapategna tapno makapantayo latta? Sigurado a mas napatpateg iti maisuro babaen ken Jehova ngem ti tumabuno iti maysa a boda! No pudno a kumbensidotayo a ti programa iti kombension ket nasken iti espiritual a panagdakkeltayo, nalaklaka a makombinser ti amotayo a mangted iti pammalubos tapno makatabunotayo ti kombension.—Sant. 1:7, 8.
7 Iti Israel ti apagkapullo ket buklen dagiti material a suportar iti lugar a pagdayawan ken Jehova. Iti aldawtayo ti apagkapullo ket itakderanna iti tiempo, pigsa, ken pinansial a diretso a mausar iti serbisio ken Jehova ken pangsuportar iti trabaho ti Pagarian. Ti apagkapullo ramanenna iti tiempo a mausar ti gimong, asamblea, ken kombension, agraman panangsalimetmet ken panangdalus iti lugar a pagtaripnongan. Ti “Nadiosan a Sursuro” a Kombension ti Distrito ket mangted kadatayo iti adu nga oportunidad a mangyeg ti intero nga apagkapullo iti espiritual a kamalig ni Jehova. Aniada ti dadduma kadagitoy?
8 Maiyegtayo iti apagkapullo babaen ti napasnek a panagimdeng iti programa ti kombension, babaen ti pannakiraman iti narayray a panagkanta ti kada kanta iti Pagarian, ken panagimdeng a siaannad iti kararag, tapno maingudotayo babaen ti napusuam a panagamen.
9 Ti progresotayo iti kinapudno isut’ agpannuray ti umdas a napasnek a panagimdengtayo. Iti maysa a dakkel nga auditorium wenno stadium, nalaka laeng ti masinga babaen dagiti adda iti aglawlawtayo, ket dayta ti rason no apay salimetmetan iti turong ti panunottayo. Siguruenyo ti umay iti kombension a naan-anay a nakasagana, babaen ti Bibliayo, pagkantaan, pagsurat ken pagsuratan, ken iti ruar Ti Pagwanawanan a maadal iti dayta a lawas. Makatulong kadatayo no inotar dagiti puntos ken kasuratan a nausar iti kada agpalawag. Ababaenyo laeng iti notayo; ti panangala iti adu unay a nota ket dadaelenna ti panangipamaysa iti panunot. Masanay met dagiti agtutubo a naimdengda a dumngeg. Maitugot dagiti ubbing iti apagkapullo agraman nagannakda babaen ti panangtimudda a naimbag iti programa.
10 Iyurnos dagiti dadduma a nagannak ti naulimek a tiempo iti balay ti kada aldaw bayat a dagiti annakda ket manamnama a basaen wenno kitaenda dagiti ladawan iti maysa a publikasion ti Sosiedad. Daytoy a naimbag a panangsanay ti mamaglaka kadagiti annak nga agtugaw a naulimek bayat dagiti gimong ken kombension. Dagiti nagannak a namadakkel kadagiti mapaguadan nga annak ti agkuna a saanda a palubosan dagiti annakda a mangitugot iti ay-ayam wenno pagkoloran a libro bayat ti gimong. Uray dagiti ubbing pay unay maadalda a ti rason a tumabuno iti gimong isut’ panagdayaw ken Jehova. Dagiti nagannak a mangisuro iti annakda no ania ti kayat a sawen kadakuada iti panangyeg ti intero nga apagkapullo iti kamalig ti pudno unay a mapadayawan!
11 Maitugottayo met ti apagkapullo babaen iti panangiboluntario ti tiempo ken pigsatayo a tumulong iti organisasion ti kombension. Kaaduan kadagiti lugar a maiyiskediol ti maysa wenno dua nga aldaw a panagdalus sakbay a mairugi iti kombension. No asidegkayo, apay a saan nga iyurnos ti intero a pamiliayo iti makiraman? Dadduma kadagiti kakabsat ti mangikuyog kadagiti naprogreso nga estudianteda ti Biblia kadakuada tapno uray sakbay iti bautismo dagitoy nga agdadamo ket maadaldan a suportaran daytoy panagdayaw ken Jehova. Nawadwad dagiti aramiden a mangisiguro iti nalammuyot nga andar ti kombension. Apay a dikay agboluntario a sangapamiliaan?
12 Ti pinansial a suportar iti kombension isut’ sabali pay a wagas ti panangyeg iti apagkapullo. Iti pannakaituyang no kasano a ti material a sagut ket maaramid a pangsuportar iti nadalus a panagdayaw, imbilin ni Jehova iti nasion ti Israel: “Awan koma ti agparang iti saklang ni Jehova nga ima-ima. Ti sagut iti ima ti tunggal maysa isut’ masapul a maitutop iti bendision ni Jehova a Diosyo nga impaayna kadakayo.” (Deut. 16:16, 17) Kabaelan man dagiti tattao iti mangted ti adu wenno bassit, daytoy datonda, a naisagana a nasakbay, ket makaay-ayo ken Jehova. Umasping iti daytoy, adu a kakabsat ti mangted iti nainkararagan a panunot ti kontribusion nga itedda, babaen iti kuarta wenno tseke. Pinalubosanyo kadin dagiti babassit nga annakyo a mangipisok ti kontribusion iti kahon?
13 Arkosan ti Sursuro iti Manangisalakantayo, ti Dios: Babaen ti naimbag nga urbanidad ken nasayaat a konduktatayo, mabalintayo nga “arkosan ti sursuro iti Manangisalakantayo, ti Dios, iti amin a bambanag.” (Tito 2:10) Iti sabali a panao, mismo nga idiay kombension, maipakita a ti nadiosan a sursuro ket maiyaplikar iti biagtayo.
14 Kasano ngarud iti kababalintayo? Ti konsiderasion iti sabsabali ket manmano itan ditoy lubong. Ngem kadagiti tattao ni Jehova, isuda a maidaldalan iti Nainkasuratan a prinsipio, ti agpanunot, saan laeng nga iti pagimbaganda, ngem ti pagimbagan met iti padada a tao. (Fil. 2:4) Sipupuottayo koma kadagiti sabsabali iti aglawlawtayo. Saantayo koma nga agiduron wenno agiwadag no makilineatayo a maipaay iti taraon ken publikasion. Napabus-oytayo koma kadagiti nataengan ken basbassit nga ubbing a nakalinea a kadua dagiti nagannakda ta nalakada laeng a madalapus dagiti adulto no dida makita ida. Kadagiti restauran masapul a nasingpet ken nadayawtayo kadagiti empleadoda, saan a nasabrak wenno naturay no ti serbisioda ket saan a mairukod idiay namnamaentayo.
15 Ti nadiosan a kababalintayo ket addaan iti napudno a kaipapanan kadagiti adda ti aglawlawtayo. Iti maysa a siodad ti kombension iti napalabas a tawen, maysa a polis a nagserbin iti 21 a tawen ti nagkuna: “Pagraemak unay ti disiplina kadagiti tattaoyo. [Isuda’t] nagpaiduma; pidutenda dagiti basura nga uray awan ti mangibaga kadakuada ken naurnosda ken organisado unay ti kombensionyo.” Innayonna pay: “No kumita dagiti tattaoyo, umisemda pay. Maysa a naimbag a tanda dayta. Ur-urayenmi ti kasta. Tanda dayta ti kinagayyem ken awan iti ilemlemmengna. Ken nadlawmi met no kasano a dagiti annakyo ket kakuyogda dagiti nagannakda ken disiplinadoda. Patiendak, magustuankayo. Makaparagsak ti maidestino ditoy.”
16 Personal kadi nga arkosanyo ti sursuro iti Manangisalakantayo, ti Dios, babaen iti mapaguadan a kababalinyo? Adtoy ti sumagmamano a wagas a daytoy ket maaramid:
Panagkawes ken panagbubuok: Bayat ti tiempo a tumabunotayo iti kombension, ditay koma matmatan nga addatayo ti bakasion. Imbes, idatdatagtayo ti bagitayo ken Jehova tapno suruanna. Idinto ta kasta ti kaso, saan ngata nga agkawestayo a kas met laeng no tumabunotayo idiay Kingdom Hall? (1 Tim. 2:9, 10) Mainayon pay, masapul nga ipaaytayo ti naannad a panangpanunot no ania iti isuottayo kalpasan ti sesion. No agsublitayo iti pagdagusantayo, maitutop kadi kadatayo no agsukattayo iti naparbeng, nadisente nga arwaten ti kombension iti kawes a mangted kadatayo ti nakuso a langa dagiti taga lubong? Saan ngata a mangted daytoy ti kapaliiwan a dagiti kawestayo a para gimong ket kapada dagiti pagbugar imbes a mangisilnag koma iti wagas ti panagbiagtayo? Laglagipenyo, awittayo iti nagan ni Jehova, ket tunggal maysa kadatayo ti kumita iti dayta nga awan koma ti agpayso nga akusasion a maibusor iti dana ti kinapudno.
Mapalagipan dagiti kandidato ti bautismo a saan a rumbeng iti dayta a sagrado nga okasion ti agsuot iti T-shirt nga addaan ti nailubongan nga slogan, logo, wenno pablaak ti komersio. Siguruen dagiti panglakayen a dagiti saludsod iti bautismo ket mairepaso a naimbag ti nasakbay ken tunggal kandidato ket maibaga iti maitutop a tiempo no isu ket naanamongan a maipaay ti bautismo wenno saan. (No iwanas dagiti saludsod, mabalin a maitutop a tiempo a maisingasing maipapan ti maitutop, naemma a kawes a maipaay iti bautismo.) Saan a kasapulan kadagiti kandidato iti bautismo a naanamongan babaen dagiti panglakayen ti agparehistro idiay kombension.
Panangsalimetmet a Nadalus iti Aglawlawtayo: Kas nadakamaten nga immuna, adu a komento maipapan iti kinadalus dagiti tattao ni Jehova kadagiti kombension. Salimetmetantayo koma dayta a nangato a pagrukodan, a ditay agibelleng iti papel, balkot ti kendi, wenno basio, iti aglawlawtayo. Sakbay nga pumanawkayo iti rumabii, kitaenyo ti aglawlaw iti tugawyo ket pidutenyo ti aniaman a nakawara a basura a maikabil iti basuraan wenno iyawid tapno maibellengton sadiay. Laglagipenyo a ti convention hall isut’ mismo a Kingdom Hall bayat ti uppat nga aldaw ket masapul a matrato a kas iti mismo a Kingdom Halltayo.
Sekular a Panggedan: Tumabunotayo iti kombension tapno gumun-od ti espiritual a taraon. Saan ngarud a tiempo a mangaramid iti sekular a panggedan wenno aniaman a pagkakuartaan, a gundawayan iti dakkel nga umariwekwek a timmabuno. Maminsan manen a maipalagipmi kadagiti amin nga awan ti personal a tagilako a maipalubos iti uneg ti pagkombensionan, ket dagiti laeng kukua iti Sosiedad ti maipalubos iti bookroom wenno kadagiti dadduma a departamento ti kombension.
Kagawaan a Pagirekord: Bayat a maipalubos iti video camera, ammomi a nakonsiderarkayo kadagiti dadduma. Saan a naayat a banag no malingedan dagiti kapada a kombensionista bayat nga ipelikula ti programa. No mairekordyo dayta a sitatanang manipud ti mismo a tugawyo, saankayo a malapdan a mangaramid iti dayta. Pangaasiyo a laglagipen, nupay kasta, nga awan ti kamera wenno kagawaan a pagirekord iti maikonekta idiay elektrikal wenno sistema ti timek iti kombension, wenno maikabil ti aniaman a remienta iti pagnaan wenno lugar ti trapiko.
Pagtugawan: Pangaasiyo ta adda iti panunotyo a DAGITI TUGAW TI MABALIN LAENG A MAIRESERBA KADAGITI ASIDEG A MIEMBRO TI PAMILIA KEN SIASINOMAN A MAKIBIAHE BABAEN ITI LUGANYO. Pangaasiyo ta nakonsiderarkayo kadagiti nataengan. Iti napalabas, adda lallakay ken babbaket a kakabsat ti agsapsapul iti pagtugawanda kadagiti saan a kombeniente a lugar agsipud ta kinupado dagiti agtutubo iti beddeng a naireserba kadakuada.
Personal a Kagawaan: Maisingasing a kalalainganna laeng dagiti kagawaan nga itugotyo iti kombension. No ti kagawaanyo ket saan a mailugar iti tugawyo, nasaysayaat no ibatiyo laengen iti balay wenno idiay likud iti luganyo. Dagiti dadakkel a remienta ti saan a mapalubosan a mailugar iti pagnaan a maigapu iti rason ti kinatalged, ket no maisaad met iti abay ti tugawyo, mapaidaman met iti tugaw dagiti dadduma.
17 Iti naayat a konsiderasion iti dadduma, sapaenyo nga iplano ti isasangpetyo iti kada aldaw, nangruna ti Huebes a nalabit kasapulan iti napapaut a tiempo nga agiparada ken agsapul ti pagtugawan.
18 Anian a pribilehiotayo a paisuro ken Jehova! Ti panangusar iti tiempo, pigsa, ken material a sanikuatayo tapno suportaran daytoy “Nadiosan a Sursuro” a Kombension ti Distrito iti daytoy a tawen ti agresulta iti manayon a naespirituan a gunggona kadatayo ken ti pamiliatayo a mismo.