Siraragsak a Panagsubli a Tumulong Kadagiti Interesado a Tattao
1 Tunggal maysa a makiraman iti panagbalaybalay a trabaho ti agtarigagay a tumulong iti tattao nga interesado. Babaen ti pannangted iti kasta a tulong, masagraptayo ti nauneg a rag-o ken pannakapnek. (Maidilig iti Salmo 126:5, 6.) Kasapulanna daytoy a nakasaganatayo.
2 Ti panagsagana isut’ mangrugi babaen ti panangidulin iti detaliado a pakaammo idiay house-to-house record. Inotar ti suheto a napagsaritaan iti umuna a dupag ken ti tignay iti bumalay. Nalabit a kayatyo nga inotar no kasano ti kayatyo a panangirubbuat iti saritaan inton agsarungkarkayo.
3 Kas ehemplo, no nadakamatyo ti kararag nga Amami idi damo ken naipaimayo iti “Agbiag nga Agnanayon” a libro, mabalinyo a sawen ti banag a kaasping daytoy:
◼ “Iti napalabas a sarungkarko, napagsaritaantayo no kasano a ti pagayatan iti Dios ket maaramidto ditoy daga ket ti talna isunton iti pumudno iti amin a benneg ti panagbiag. Iti daydiay libro a naibatik, pangaasiyo ta siputanyo iti nakuna idiay pinanid 156 aginggat’ 158 maipapan ti dadduma pay a bendision iti Pagarian ti Dios nga iyegna iti sangatauan.”
4 No ti tao ket agannayas iti di panamati iti Dios, kunaenyo ti kaasping daytoy:
◼ “Idi naminsan nga immayak, napagsaritaantayo ti punto ni Pablo iti Hebreo 3:4, a nangted ti lohikal a rason a nagkuna a masapul nga adda maysa nga intelihente a Namarsua iti amin a bambanag.” Basaen manen ti kasuratan ken iturong iti panid 35, parapo 3 ti Agbiag nga Agnanayon a libro. Maiyimtuod ti saludsod iti baba ken basaen ti parapo, a palubosan ti bumalay a mangsungbat iti saludsod. Awisenyo a mangiruar iti librona ken usigenyo a sangsangkamaysa dagiti sumaruno a parapo.
5 Daytoy met laeng nga iyaasideg ti mabalin a mausar iti maysa nga artikulo a nalabit a napagsaritaan idiay Ti Pagwanawanan ken Agriingkayo! Iturong iti artikulo a nalawagan idi napalabas a sarungkar ken madakamat ti sabali a punto a makapainteres iti isu met laeng nga artikulo wenno ti sabali a ruar nga adda kadakayo. No mabalin, basaenyo a sangsangkamaysa ti maysa a kasuratan ken kiddawen iti bumalay ti komentona.
6 Ikabil iti panunot ti kalatyo a mangirugi iti panagadal ti Biblia. Gagangay a kasapulan ti adu a sarungkar tapno mapatanor iti interes agingga ti dayta a kalat. Ipakitayo ti bukod a pannakaseknanyo babaen ti panagsubliyo iti kabiitan a tiempo no mabalin.
7 Ti naimbag a damag nga iwarwaragawagtayo ti mamarnuay iti dakkel a ragsak. (Luc. 2:10) No ipangag dagiti interesado a tattao ti reggettayo, sigurado a mangparag-o daytoy kadatayo. (Fil. 4:1) Maapittayo ti kasta a ragsak babaen ti panagsubli a tumulong iti interesado a tattao a masarakantayo idiay tay-ak.