Dagiti Nagannak nga Agrag-o!
1 No maysaka nga agtutubo nga agnanaed iti Nakristianuan a pagtaengan, adda naisangsangayan a wagas a maaramidmo a mangparagsak kadagiti nagannakmo. No surotem ti nalinteg a kurso, “da amam ken inam agrag-odanto.” (Prov. 23:22-25) Awanen ti ad-adda a makaparagsak iti nagannakyo ngem ti pannakakitada kadakayo a matagikuayo ti kinapudno ken idedikaryo ti biagyo ken Jehova.
2 Agyamankayo no dagiti nagannakyo ket addada iti kinapudno. Manipud pannakaipasngayyo, tinaraonan, kinawesan, ken imbalayan kasta met a tinarakendakayo no agsakitkayo. Inkagumaanda met nga insuro kadakayo ti maipapan ken Jehova ken dagiti nalinteg a dalanna; daytoy a panangsanay ti mangisiguro iti agnanayon a biagyo. (Efe. 6:1-4) Kasanoyo a maipakita ti panangipategyo?
3 Tagikuaenyo ti Kinapudno: Maipakitayo ti panangipateg babaen ti panaginteresyo iti panagadal ti pamilia a saan a mapilpilit. Ipakita ti tarigagayyo a makigimong, nga agrubbuatkayo a bukbukodyo tapno ti pamilia ket makasangpet a nasapa. Makikatugawkayo kadagiti nagannakyo bayat dagiti gimong ken agimdengkayo babaen ti panangsurotyo kadagiti publikasion a maad-adal. Ikagumaanyo ti agkomento kadagiti gimong. Awatenyo a situtulok dagiti paset iti Teokratiko nga Eskuelaan ti Panagministro ken ikagumaanyo a nasayaat ti pannakaiparangda. Agboluntariokayo a mangasikaso kadagiti bambanag iti aglawlaw ti Kingdom Hall.
4 Mangaramidkayo Kadagiti Progresibo a Kalat: Ikagumaanyo ti naan-anay a pannakiraman iti tay-ak ti serbisio, nga ipakita ti tarigagayyo a maikari kas maysa nga agibumbunannag. Makidanggaykayo iti linawas a panagbasa ti Biblia wenno, nasaysayaat pay koma, basaenyo a bukbukod ti intero a Biblia. Determinadokayo koma a mangragpat kadagiti kasapulan iti dedikasion ken bautismo. Siaannad nga iplanoyo ti kurikulumyo iti pagadalan, a buyogen ti panggep a gumun-od iti pannakasanay a mangkabal kadakayo iti naan-anay a pannakiraman iti serbisio ni Jehova. Patanorenyo ti pakasarsaritaan a mangtignay iti dadduma a mangirekomenda kadakayo kadagiti espesial a pribilehio a kas iti kinapayunir wenno Serbisio iti Bethel. (Ara. 16:1, 2) Ti panangragpat kadagiti kalat ti tumulong kadakayo a ‘mangsigurado kadagiti napatpateg a bambanag, iti kasta . . . mapunnokayo koma iti nalinteg a bunga.’—Fil. 1:10, 11.
5 Ti kinaagtutubo ket tiempo a panagsursuro ken pananggun-od kadagiti laing a makilangen iti sabsabali. Tiempo dayta a matagiragsakyo ti biag nga awan ti adu a responsabilidad a kas ti adda iti kinaadulto. Kinuna ni Solomon: “Agrag-oka, agtutubo a lalaki, iti kinaagtutubom, ket paragsakennaka koma ta pusom kadagiti aldaw ti kinaagtutubom.” (Ecl. 11:9) No usarenyo ti kinaagtutuboyo nga agserbi ken Jehova, agapitkayo kadagiti bendision nga agpaut iti agnanayon.—1 Cron. 28:9.
6 No “surotem ti kinalinteg” imbes a “dagiti tarigagay a nakaisigudan iti kinaagtutubo,” mapalag-ananyo dagiti nagannakyo iti adu a danag ken sakit ti nakem. (2 Tim. 2:22) Maparag-oyo a mismo ti pusoyo. (Prov. 12:25) Kangrunaan iti amin, maparag-oyo ti Namarsua kadakayo, ni Jehova a Dios.—Prov. 27:11.