Jeremía

52 Sedekía+ var 21 árs þegar hann varð konungur og hann ríkti í 11 ár í Jerúsalem. Móðir hans hét Hamútal+ og var dóttir Jeremía frá Líbna. 2 Hann gerði það sem var illt í augum Jehóva, alveg eins og Jójakím.+ 3 Það sem gerðist í Jerúsalem og Júda vakti reiði Jehóva og að lokum rak hann íbúana burt úr augsýn sinni.+ Sedekía gerði uppreisn gegn Babýlonarkonungi.+ 4 Á níunda stjórnarári Sedekía, á tíunda degi tíunda mánaðarins, kom Nebúkadnesar* konungur Babýlonar til Jerúsalem ásamt öllum her sínum. Þeir settust um borgina og reistu árásarvirki allt í kringum hana.+ 5 Umsátrið stóð fram á 11. stjórnarár Sedekía konungs.

6 Á níunda degi fjórða mánaðarins,+ þegar hungursneyðin var orðin mikil í borginni og landsmenn höfðu ekkert að borða,+ 7 var loks brotið skarð í borgarmúrinn. Um nóttina, meðan Kaldear umkringdu borgina, flúðu allir hermennirnir út úr borginni, um hliðið milli múranna tveggja við garð konungs, og héldu í átt að Araba.+ 8 En her Kaldea elti Sedekía konung og náði honum+ á eyðisléttum Jeríkó. Allir hermenn hans yfirgáfu hann og tvístruðust. 9 Kaldear gripu þá konung og fóru með hann til Babýlonarkonungs í Ribla í Hamathéraði þar sem hann kvað upp dóm yfir honum. 10 Konungur Babýlonar drap syni Sedekía fyrir augunum á honum. Hann drap einnig alla höfðingja Júda þar í Ribla. 11 Konungur Babýlonar blindaði síðan Sedekía,+ setti hann í koparhlekki og flutti hann til Babýlonar þar sem honum var haldið föngnum til dauðadags.

12 Á tíunda degi fimmta mánaðarins, það er á 19. stjórnarári Nebúkadnesars* Babýlonarkonungs, kom Nebúsaradan inn í Jerúsalem, en hann var varðforingi og þjónn Babýlonarkonungs.+ 13 Hann brenndi hús Jehóva,+ konungshöllina* og öll hús í Jerúsalem. Hann brenndi líka öll stórhýsin. 14 Allur her Kaldea sem var undir forystu varðforingjans reif niður múrana umhverfis Jerúsalem.+

15 Nebúsaradan varðforingi flutti í útlegð hluta af lágstéttarfólkinu og þá sem eftir voru í borginni. Hann flutti einnig með sér liðhlaupana sem höfðu slegist í lið með konungi Babýlonar og þá sem eftir voru af handverksmönnunum.+ 16 En Nebúsaradan varðforingi skildi eftir nokkra af fátækustu íbúum landsins til að rækta víngarða og vinna kvaðavinnu.+

17 Kaldearnir brutu koparsúlurnar+ í húsi Jehóva og einnig vagnana+ og koparhafið+ sem voru í húsi Jehóva og fluttu allan koparinn til Babýlonar.+ 18 Þeir tóku líka föturnar, skóflurnar, skarklippurnar, skálarnar,+ bikarana+ og öll koparáhöldin sem voru notuð við þjónustuna í musterinu. 19 Varðforinginn tók kerin,+ eldpönnurnar, skálarnar, föturnar, ljósastikurnar,+ bikarana og skálarnar sem voru úr ekta gulli og silfri.+ 20 Koparinn í súlunum tveim, hafinu, koparnautunum 12+ sem hafið hvíldi á og vögnunum sem Salómon konungur hafði gert fyrir hús Jehóva var svo mikill að ekki var hægt að vigta hann.

21 Súlurnar voru 18 álnir* á hæð og 12 álna mælisnúru þurfti til að ná utan um hvora þeirra.+ Þær voru fjórar fingurbreiddir* á þykkt og holar að innan. 22 Súlnahöfuðin voru úr kopar. Þau voru fimm álnir á hæð+ og netin og granateplin allt í kringum þau voru úr kopar. Súlurnar tvær voru alveg eins, og það voru granateplin líka. 23 Granateplin sem sneru út á við voru 96 talsins. Alls voru 100 granatepli á netinu hringinn í kring.+

24 Varðforinginn flutti einnig með sér Seraja+ yfirprest, Sefanía+ prest, sem var næstur honum, og dyraverðina þrjá.+ 25 Úr borginni tók hann hirðmanninn sem var yfir hermönnunum, sjö af nánustu ráðgjöfum konungs sem fundust í borginni, ritara hershöfðingjans, sem kvaddi landsmenn í herinn, og 60 almúgamenn sem voru enn í borginni. 26 Nebúsaradan varðforingi tók þá og flutti þá til Babýlonarkonungs í Ribla. 27 Konungur Babýlonar lét taka þá af lífi í Ribla+ í Hamathéraði. Þannig voru íbúar Júda fluttir í útlegð úr landi sínu.+

28 Þetta er fjöldi þeirra sem Nebúkadnesar* flutti í útlegð: á sjöunda stjórnarárinu 3.023 Gyðinga.+

29 Á 18. stjórnarári Nebúkadnesars*+ voru 832 fluttir frá Jerúsalem.

30 Á 23. stjórnarári Nebúkadnesars* flutti Nebúsaradan varðforingi 745 Gyðinga í útlegð.+

Alls voru 4.600 manns fluttir í útlegð.

31 Árið sem Evíl Meródak varð konungur í Babýlon lét hann Jójakín+ Júdakonung lausan* og sleppti honum úr fangelsi. Það var á 37. útlegðarári Jójakíns Júdakonungs, á 25. degi 12. mánaðarins.+ 32 Hann talaði vingjarnlega við hann og veitti honum meiri heiður en hinum konungunum* sem voru hjá honum í Babýlon. 33 Jójakín fór úr fangabúningnum og borðaði hjá konungi það sem eftir var ævinnar. 34 Hann fékk daglegan matarskammt frá Babýlonarkonungi það sem eftir var ævinnar, allt þar til hann dó.