Gabríel heimsækir Maríu

Elísabet átti unga frænku sem hét María. María bjó í Nasaret í Galíleu. Hún var trúlofuð Jósef, en hann var smiður. Þegar Elísabet var búin að vera ólétt í sex mánuði kom engillinn Gabríel til Maríu. Hann sagði: ‚Sæl, María. Jehóva er sérstaklega ánægður með þig.‘ Hún skildi ekki hvað Gabríel átti við. Þá sagði hann við hana: ‚Þú verður ólétt og eignast son. Þú átt að láta hann heita Jesú. Hann verður konungur og ríki hans mun standa að eilífu.‘

María sagði: ‚En ég er hrein mey. Hvernig get ég eignast barn?‘ Gabríel svaraði: ‚Ekkert er ómögulegt fyrir Jehóva. Heilagur andi kemur yfir þig og þú eignast son. Elísabet frænka þín er líka orðin ólétt.‘ Þá sagði María: ‚Ég er þjónn Jehóva. Það sem þú sagðir um mig má gerast.‘

María fór að heimsækja Elísabetu, sem bjó í borg í fjallendi. Þegar María heilsaði henni fann Elísabet að barnið sparkaði í maganum á henni. Elísabet fylltist heilögum anda og sagði: ‚María, Jehóva hefur blessað þig. Það er mikill heiður fyrir mig að hafa mömmu Messíasar í heimsókn.‘ María sagði: ‚Ég lofa Jehóva af öllu hjarta.‘ María var hjá Elísabetu í þrjá mánuði og síðan fór hún heim til Nasaret.

Þegar Jósef komst að því að María var ólétt ætlaði hann að hætta við að giftast henni. En engill kom til hans í draumi og sagði: ‚Ekki vera hræddur við að giftast henni. Hún hefur ekki gert neitt rangt.‘ Jósef giftist þá Maríu.