Jesús fer aftur til himna

Jesús hitti fylgjendur sína í Galíleu. Hann gaf þeim mjög mikilvægt verkefni: ‚Farið og gerið fólk frá öllum löndum að lærisveinum. Kennið því það sem ég kenndi ykkur og skírið það.‘ Síðan lofaði hann þeim: ‚Ég verð alltaf með ykkur.‘

Í 40 daga eftir að Jesús reis upp frá dauðum birtist hann mörg hundruð lærisveinum í Galíleu og Jerúsalem. Hann kenndi þeim margt mikilvægt og gerði mörg kraftaverk. Jesús hitti postulana í síðasta sinn á Olíufjallinu.

Hann hafði sagt þeim: ‚Ekki fara frá Jerúsalem. Bíðið eftir því sem Jehóva hefur lofað ykkur.‘ Postularnir höfðu ekki skilið hvað hann var að tala um. Þess vegna spurðu þeir hann á Olíufjallinu: ‚Verðurðu núna konungur í Ísrael?‘ Jesús svaraði: ‚Það er ekki enn þá kominn tími Jehóva til að láta mig verða konungur. Bráðum fáið þið kraft frá heilögum anda og verðið vottar mínir. Farið og boðið í Jerúsalem, Júdeu, Samaríu og út um alla jörðina.‘

Síðan var Jesú lyft upp í himininn og hann fór á bak við ský. Lærisveinarnir héldu áfram að horfa á eftir honum, en hann var farinn.

Lærisveinarnir fóru niður af Olíufjallinu og til Jerúsalem. Næstu dagana hittust þeir í herbergi á efri hæð til að biðja til Jehóva. Þeir voru að bíða eftir að Jesús myndi gefa þeim meiri leiðbeiningar.