Beinum nemendum til skipulagsins að baki nafni okkar

¹ „Það er boðskapur sem fluttur er á fleiri en 200 tungumálum. Það er boðskapur sem heyrist í meira en 210 löndum. Það er boðskapur sem boðberinn kemur persónulega til skila hvar sem fólk er að finna. Allt þetta er liður í mestu prédikunarherferð sem heimurinn hefur nokkurn tíma kynnst, boðskapur sem sameinar milljónir um víða veröld. Vottar Jehóva hafa sameinað krafta sína með gott skipulag að baki sér til að framkvæma þetta starf í meira en hundrað ár!“

² Þannig hefur þulurinn mál sitt á myndbandinu Jehovah’s Witnesses—The Organization Behind the Name (Vottar Jehóva — skipulagið að baki nafninu). Myndbandið svarar síðan spurningunum: Hverjir eru vottar Jehóva í raun og veru? Hvernig er starfsemi þeirra skipulögð? Stjórnað? Fjármögnuð? Myndbandið innprentar þá staðreynd í huga áhorfendanna að „vottar Jehóva um allan heim hafa sem skipulögð heild fengið þjálfun í að hjálpa nágrönnum sínum að byggja upp hjá sér trú á Biblíuna,“ og það hvetur þá til að sjá með eigin augum skipulagið að baki nafni okkar. Kona, sem var að nema, tárfelldi bæði af gleði og þakklæti eftir að hafa séð þetta myndband og sagði: „Hvernig getur nokkur komist hjá því að sjá að þetta er skipulag hins sanna Guðs, Jehóva“. — Samanber 1. Korintubréf 14:24, 25.

³ Önnur kona hafði numið Biblíuna af og til í langan tíma en hún gat ekki viðurkennt að þrenningarkenningin væri fölsk. Þá var henni og eiginmanni hennar sýnt myndbandið. Þau voru mjög hrifin af framsetningu efnisins og horfðu tvisvar á myndbandið þá um kvöldið. Í næstu námsstund tjáði eiginkonan löngun sína til að verða vottur. Hún sagði að hún hefði einblínt á trú sína á þrenninguna og látið undir höfuð leggjast að horfa á skipulag okkar og fólkið sem þar er. Út frá myndbandinu gerði hún sér ljóst að hún hefði fundið hið sanna skipulag Guðs. Hún vildi strax fara að prédika hús úr húsi. Eftir að útskýrt hafði verið fyrir henni hvaða nauðsynleg skref þarf að stíga til að verða óskírður boðberi sagði hún: „Við skulum drífa í því.“ Hún sagði sig úr kirkju sinni, hóf að fara út í boðunarstarfið og varð leikin í að hrekja þrenningarkenninguna.

⁴ Það hefur komið skýrt í ljós að biblíunemendur taka betri andlegum framförum og vaxa hraðar fram til þroska þegar þeir viðurkenna skipulag Jehóva og eiga samfélag við það. Það hefur mikla þýðingu að hinir 3000, sem voru skírðir á hvítasunnunni, „ræktu trúlega uppfræðslu postulanna og samfélagið“ þar á eftir. (Post. 2:42) Það er alger nauðsyn að við hjálpum nemendum að gera það sama nú á tímum. Hvernig getum við það?

⁵ Öxlum ábyrgðina: Sérhver sá sem gerir aðra að lærisveinum verður að gera sér ljóst að það er hans ábyrgð að beina biblíunemandanum til skipulags Guðs. (1. Tím. 4:16) Líta skyldi á hverja námsstund sem skref í átt til þess hamingjudags þegar hinn nýi mun sýna á táknrænan hátt með vatnsskírninni að hann hefur vígt sig Jehóva. Önnur þeirra spurninga, sem hann verður spurður meðan á skírnarathöfninni stendur er þessi: „Gerir þú þér ljóst að vígsla þín og skírn auðkennir þig sem einn af vottum Jehóva í samfélagi við skipulag Guðs sem hann stýrir með anda sínum?“ Þar af leiðandi er mikilvægt að hann geri sér grein fyrir því að hann getur ekki þjónað Guði án þess að eiga virkt samfélag við hinn sannkristna söfnuð. — Matt. 24:45-47; Jóhn. 6:68; 2. Kor. 5:20.

⁶ Haltu áfram að fræða nemandann um söfnuðinn þinn og hið alþjóðlega skipulag að baki vottum Jehóva. Gerðu þetta í hverju biblíunámi og byrjaðu strax í fyrstu námsstundinni. Alveg frá upphafi skaltu bjóða biblíunemandanum á samkomurnar, og haldu áfram að bjóða honum. — Opinb. 22:17.

⁷ Notaðu tækin sem eru á boðstólnum: Bestu ritin, sem við höfum til notkunar í heimabiblíunámum, eru bæklingurinn Hvers krefst Guð af okkur? og bókin Þekking sem leiðir til eilífs lífs. Hvor tveggja benda skýrt á nauðsyn þess að eiga samfélag við söfnuðinn. Í lok 5. námskaflans í Kröfubæklingnum segir: „Þú [þarft] að halda áfram að læra um Jehóva og hlýða kröfum hans. Samkomurnar í ríkissal votta Jehóva munu hjálpa þér til þess.“ Þekkingarbókin hvetur nemandann hvað eftir annað til að sækja samkomurnar. Í 5. kafla, grein 22, er þetta boð: „Vottar Jehóva . . . hvetja þig hlýlega til að taka með þeim þátt í að tilbiðja Guð ‚í anda og sannleika.‘ (Jóhannes 4:24)“ Í 16. grein í 12. kafla segir: „[Trú þín mun] styrkjast enn meira þegar þú heldur áfram þessu námi og gerir þér að venju að sækja samkomur votta Jehóva.“ Kafli 16, grein 20 segir: „Vendu þig þess vegna á að sækja samkomur votta Jehóva.“ Hann bætir við: „Það eflir trúarskilning þinn og hjálpar þér síðan að beita þekkingunni á Guði í lífinu og þá mun hamingja þín aukast. Auk þess mun það að tilheyra hinu kristna bræðrafélagi, sem nær um allan heim, hjálpa þér að halda þér nálægt Jehóva.“ Sautjándi kaflinn fjallar rækilega um það hvernig finna má ósvikið öryggi meðal fólks Guðs. Þegar við förum yfir námsefnið með öðrum er það skylda okkar að leggja áherslu á þessa þætti efnisins.

⁸ Bæklingurinn Vottar Jehóva — sameinaðir í að gera vilja Guðs um allan heim er gott verkfæri sem hefur verið framleitt til að kynna einstaklingum eina sýnilega skipulagið sem Jehóva notar nú á tímum til að koma vilja sínum í framkvæmd. Nákvæmu upplýsingarnar í honum um boðunarstarf okkar, samkomur og skipulag hvetur lesandann til að tilbiðja Guð í félagi við okkur. Þegar biblíunám er komið af stað er mælt með að við gefum nemandanum eintak af þessum bæklingi til að lesa sjálfur. Það er engin þörf á að fara yfir hann með honum, eins og gert var áður fyrr.

⁹ Sum myndbandanna, sem Félagið hefur framleitt, eru frábær verkfæri til að beina nemendum til skipulagsins að baki nafni okkar. Gott væri ef þeir gætu horft á (1) The New World Society in Action (Samfélag nýja heimsins að störfum), upprifjun á kvikmyndinni frá 1954 sem kom vel til skila hinum hnökralausa, skilvirka og kærleiksríka anda sem skipulag Jehóva vinnur með; (2) United by Divine Teaching (Kennsla Guðs sameinar) sem skoðar hina friðsælu einingu sem komið hefur í ljós á alþjóðlegum mótum okkar í Austur-Evrópu, Suður-Ameríku, Afríku og Asíu; (3) To the Ends of the Earth (Til endimarka jarðar) sem kom út í tengslum við 50 ára afmæli Biblíuskólans Gíleað og sýnir þau áhrif sem trúboðarnir hafa haft á prédikunarstarfið um víða veröld; (4) Jehovah’s Witnesses Stand Firm Against Nazi Assault (Vottar Jehóva standa einarðir gegn árásum nasista), sem segir hrífandi sögu af hugrekki vottanna og hvernig þeir hrósuðu sigri andspænis grimmilegum ofsóknum Hitlers; og, að sjálfsögðu, (5) Vottar Jehóva — skipulagið að baki nafninu.

¹⁰ Settu markmið um aukna samkomusókn: Nauðsynlegt er að útskýra fyrir nemandanum að við þörfnumst bæði þeirrar einkakennslu sem veitt er í heimabiblíunámi og þeirra skólastofuumræðna sem safnaðarsamkomurnar bjóða upp á. (Jóh. 6:45) Nemandinn þarf að taka framförum í skilningi sínum á skipulaginu engu síður en á Biblíunni. Til þess að svo megi verða er ekkert sem kemur í stað samkomusóknar. (Hebr. 10:23-25) Byrjaðu alveg strax á að bjóða honum á safnaðarsamkomurnar. Sumir sem nýlega hafa fengið áhuga byrja að sækja samkomur jafnvel áður en þeir hefja reglulegt heimabiblíunám. Að sjálfsögðu viljum við gefa gott fordæmi sjálf með því að mæta reglulega á samkomurnar. — Lúk. 6:40; Fil. 3:17.

¹¹ Gefðu nægilega miklar upplýsingar um samkomurnar og hvernig þær fara fram til þess að nemandanum líði vel þegar hann kemur í fyrsta sinn á samkomu. Þar sem sumum er verulega órótt þegar þeir fara í fyrsta skipti á nýja staði, gæti það gefið góða raun að verða samferða nemandanum til ríkissalarins þegar hann kemur á sína fyrstu samkomu. Hann mun slaka betur á ef þú ert með honum þegar hann hittir meðlimi safnaðarins. Vertu fyrir alla muni gesti þínum góður gestgjafi, láttu hann finna að hann sé velkominn og láttu honum líða vel. — Matt. 7:12; Fil. 2:1-4.

¹² Hvettu nemandann til að sækja sérstaka mótsdaginn, svæðismót eða umdæmismót við fyrsta tækifæri. Kannski gæti hann orðið samferða þér til mótstaðarins.

¹³ Glæddu hjá nemandanum miklar mætur á skipulaginu: Þjónustubókin segir á blaðsíðu 92: „Ef samræður þínar við áhugasamt fólk endurspegla hve miklar mætur þú hefur á skipulagi Jehóva, auðveldar það viðmælendum þínum að meta það sífellt betur og fær þá til að taka meiri framförum í því að afla sér þekkinga á Jehóva.“ Talaðu alltaf jákvætt, aldrei neikvætt, um söfnuðinn þinn. (Sálm. 84:11; 133:1, 3b) Í bænunum, sem þú ferð með í biblíunáminu, skaltu nefna söfnuðinn og þörf nemandans á reglulegu samfélagi við hann. — Ef. 1:15-17.

¹⁴ Við viljum svo sannarlega að hinir nýju þroski með sér innilegar mætur á hinum ánægjulega félagsskap og andlega öryggi sem er að finna hjá fólki Guðs. (1. Tím. 3:15; 1. Pét. 2:17; 5:9) Sem vottar Jehóva skulum við gera allt sem við getum til að beina nemendum í orði Guðs til skipulagsins að baki nafni okkar.

[Innskot á blaðsíðu 3]

Nemendur taka skjótari andlegum framförum þegar þeir sjá skipulagið með eigin augum.

[Innskot á blaðsíðu 4]

Láttu ekki dragast að bjóða nemendum að sækja samkomurnar.