Yu Memba?

Yu did riid Di Wachtowa dem fi da ier ya gud? Wel si ef yu kyan ansa dem kwestiyan ya:

A wa push wi fi big op Jeuova?

Wi big op Jeuova kaa wi av nof rispek fi im an wi lov im wid aal a wi aat. Wi big op Jeuova tu kaa wi waahn piipl fi nuo bout im.​—w25.01, p. 3.

Ef sumadi ort wi, ou wi kyan riili paadn dem?

Wi no fi gwaan laik se wi no fiil bad wen sumadi ort wi, bot wi no fi av op di sumadi iina wi aat so dat wi no en op a chriit ada piipl bad kaaz a wa a gwaan wid wi.​—w25.02, p. 15-16.

Wa mek it gud fi di yong breda dem du laik Jiizas falara we niem Maak?

Maak did redi fi du di wok we Jeuova gi im fi du. Iivn duo Maak mos did fiil a wie wid ou tingz go dong, dat neehn mek im tap elp di breda an sista dem. Maak did get fi spen nof taim wid Paal an som ada breda an sista we chrang iina di sitn dem we dem biliiv iina.​—w25.04, p. 27.

Wa Jiizas did miin wen im prie an se: “Mi mek dem nuo yu niem”? (Jan 17:26)

Im falara dem did wel an nuo Gad niem. Bot Jiizas tel dem bout di sitn dem we Jeuova du aredi, wa im a du nou, an di sitn dem we a-go apm kaa im waahn dem fi apm. An im tel dem bout Jeuova wiez dem tu.​—w25.05, p. 20-21.

Ef wi nuo wa wi kyan du fram wa wi kyaahn du, ou dat kyan elp wi?

It wi elp wi fi si se wi no nuo evriting. Laik wi no nuo wen di worl a-go don ar ou Jeuova a-go elp wi da taim de. Wi no nuo wa a-go apm tumaro, an wi kyaahn andastan umoch Jeuova nuo wi niida.​—w25.06, p. 15-18.

Wa wi kyan du fi get di elp we wi fi get fram sitn we wi riid iina wan magaziin ar wa wi ier iina wan Baibl sorman?

Wi kyan aks wiself dem kwestiyan ya: ‘Wa iina dis we mi kyan yuuz fi elp sumadi biliiv we di Baibl a se? Mi kyan yuuz no gud tuori an dem ting de fi tiich da sitn ya we di Baibl se? Uu wuda waahn fi lorn bout dis?’​—w25.07, p. 19.

Wen wi luk pan ou Gad diil wid Dievid, wa dat tiich wi bout ou Gad paadn piipl?

Aalduo Dievid did du som bad sitn, kaa im did riili sari fi wa im did du, Jeuova paadn im. (1 Ki. 9:4, 5) Wen Gad paadn wi sin dem, im naa go uol it gens wi ar ponish wi fi it agen.​—w25.08, p. 17.

Ef yu Baibl stodi a chogl fi andastan sitn, wa yu kyan du?

Ef dem a chogl fi andastan sitn, aal afta yu du yu bes fi tiich dem bout it fram di Baibl, no bada di de a chrai nak it iina dem ed. Jos muuv aan an den kom bak tu it wan neda taim.​—w25.09, p. 24.

Di Baibl mek wi nuo se ‘sin kyan get di beta a wi.’ (Iib. 3:13) Ou dat?

Sin kyan mek wi waahn fi du di sitn dem we bad. It kyan mek wi wanda wanda bout tingz, laik it kyan mek wi aalwiez a wanda ef Jeuova lov wi.​—w25.10, p. 16.

Wa wi kyan du wen wi a prie so dat wi kyan get kluosa an kluosa tu Jeuova?

(1) Wi kyan tek di taim fi tingk bout di kain-a Gad Jeuova bi. (2) Wi kyan tingk bout wa yu a-go se tu Jeuova bifuo yu se it, laik ef yu an nobadi iina notn we yu niid fi paadn dem fa. (3) Wi no fi rosh chuu wi prieya dem. A dem taim de wi wi tel Jeuova ou wi riili fiil.​—w25.10, p. 19-20.

A ou wi kyan elp di wan dem we op iina iej?

Wi kyan kaal an go luk fi di breda an sista dem we op iina iej. An wen dem av dem dakta vizit, wi kyan go wid dem. Ar wi kyan wok wid dem iina sorvis.​—w25.11, p. 6-7.

Wa a som a di sitn dem we di wan dem we a marid afi mek op dem main bout wen it kom aan tu wa dem a-go du a dem wedn?

Du tingz bies pan di laa a di konchri we yu liv iina. Du tingz iina wan wie so dat piipl kyan av nof rispek fi Jeuova. Yu si evriting we yu du pan da die de, aal di wedn paati we kip afta, mek shuor se yu du tingz di wie ou Jeuova waahn yu fi dwi’it, no di wie ou di piipl dem iina di worl wuda dwi’it. No shuo aaf an go uova buod wid notn, laik wid wa yu a wier an ting. An no du di sopm dem we di piipl iina yu ieriya du a wan wedn we go gens we di Baibl se. Wen unu a plan unu wedn, unu fi taak iina wan wie we shuo se unu rispek unu wan aneda.​—w25.12, p. 21-24.